Jidide Mlẹnmlẹn Do Jehovah Go Nọ Hẹnmẹ Tindo Adọgbigbo
Jidide Mlẹnmlẹn Do Jehovah Go Nọ Hẹnmẹ Tindo Adọgbigbo
“[Jehovah] na sè whenuena yẹn dawhá ylọ ẹ.”—PS. 4:3.
1, 2. (a) Ninọmẹ sinsinyẹn tẹwẹ Davidi pehẹ? (b) Psalm tẹlẹ wẹ mí na gbadopọnna?
TO WHENUE ahọlu Davidi ko dugán do Islaeli ji na ojlẹ de godo, e wá pannukọn ninọmẹ sinsinyẹn de. Visunnu etọn Absalọmi blasé do e go bo lá dọ emi ko lẹzun ahọlu, podọ Davidi to dandannu glọ nado họ̀n sọn Jelusalẹm. Humọ, ayinamẹtọ dejidego etọn de dùpa to e ji, podọ omẹ nugbonọ vude wẹ hodo e dile e to zọnlinzin afọ-vọ́ to Osó Olivie tọn ji bo to avivi. Enẹgodo, Ṣimei he wá sọn whédo de mẹ to owhé Ahọlu Sauli tọn gbè to dẹ̀hodo Davidi bo to zannu po kọ́gudu po dlan do e.—2 Sam. 15:30, 31; 16:5-14.
2 Be adángbòmẹ ehe na hẹn Davidi yì Ṣeol mẹ to awubla po winyan po mẹ wẹ ya? Lala, na e dejido Jehovah go wutu. Ehe họnwun to Psalm 3tọ he Davidi kàn mẹ to whenue e họ̀nna Absalọmi. Ewọ wẹ sọ kàn Psalm 4tọ. Psalm awe ehelẹ hẹn mí tindo nujikudo dọ Jiwheyẹwhe nọ sè odẹ̀ he mí nọ hò lẹ. (Ps. 3:4; 4:3) Humọ, yé sọ hẹn mí deji dọ Jehovah tin hẹ devizọnwatọ nugbonọ etọn lẹ to ozán po okle po, bo nọ nọgodona yé bosọ nọ hẹn yé tindo jijọho po numọtolanmẹ hihọ́ tọn po. (Ps. 3:5; 4:8) Enẹwutu, mì gbọ mí ni gbadopọnna Psalm ehelẹ bo pọ́n lehe yé sọgan hẹn mí tindo adọgbigbo bo dejido Jiwheyẹwhe go do.
To Whenue ‘Mẹsusu Tite do Mí Ji’
3. Dile Psalm 3:1, 2 dohia do, ninọmẹ tẹ mẹ wẹ Davidi jugbọn?
3 “Ayiha omẹ Islaeli tọn lẹ tọn tin to Absalọmi godo,” wẹ wẹnsagun de dọ. (2 Sam. 15:13) Na lehe Absalọmi wagbọn do diọlinlẹnna mẹsusu nado to hihodo e paṣa Davidi wutu, e kanse dọmọ: “[Jehovah], na kẹntọ ṣie lẹ sù dole? Susu wẹ yé he tite do ji e lẹ. Mẹsusu wẹ to didọ gbọn yẹn tọn dali, Whlẹngán de ma tin na ẹn to Jiwheyẹwhe mẹ.” (Ps. 3:1, 2) Islaelivi susu wẹ lẹndọ Jehovah ma na whlẹn Davidi sọn alọ Absalọmi po awhànpa etọn he to ogbé Davidi tọn yàn lẹ po tọn mẹ.
4, 5. (a) Jide tẹwẹ Davidi tindo? (b) Etẹwẹ hogbe lọ “ota ṣie zedagatọ” zẹẹmẹdo?
4 Ṣigba na Davidi deji mlẹnmlẹn do Jiwheyẹwhe go wutu, e gboadọ. E jihàn dọmọ: “Ṣigba hiẹ, [Jehovah] E, wẹ awọ̀yinu lẹdo mi; gigo ṣie, podọ ota ṣie zedagatọ.” (Ps. 3:3) Davidi deji dọ Jehovah na basi hihọ́na emi dile awọ̀yinu de nọ basi hihọ́na awhànfuntọ de do. Mọwẹ, ahọlu yọnhonọ he họ̀njẹgbé lọ ṣinyọnnudo ota bosọ dokọdò po winyan po. Ṣigba Gigogán lọ na diọ ninọmẹ Davidi tọn zun gigo tọn de. Jehovah na hẹn ẹn penugo nado fọnṣite, bo ze ota etọn daga whladopo dogọ. Davidi dawhá hlan Jiwheyẹwhe po jide po dọ e na sè emitọn. Be hiẹ nọ dohia dọ a tindo jide mọnkọtọn do Jehovah go ya?
5 Gbọn hogbe lọ “ota ṣie zedagatọ” yiyizan dali, Davidi yọnẹn dọ alọgọ emitọn na wá sọn Jehovah dè. Lẹdogbedevomẹ Today’s English Version tọn lilẹ́ wefọ ehe dole: “Ṣigba hiẹ, OKLUNỌ E, wẹ awọ̀yinu ṣie to whepoponu sọn owù mẹ; a hẹn mi gbawhàn bosọ gọ̀ adọgbigbo ṣie na mi.” Owe alọdlẹndonu tọn de dọ gando hogbe lọ “ota ṣie zedagatọ” go dọmọ: “Eyin Jiwheyẹwhe ze . . . ‘ota’ mẹde tọn daga, E nọ hẹn mẹlọ nado tindo todido po jidide po.” Na Davidi yin hinhẹn gánnugánnu nado tlọ́n ofìn Islaeli tọn ji wutu, e tindo whẹwhinwhẹ́n nado jẹflumẹ. Ṣigba ‘ota etọn zizedaga’ na vọ́ adọgbigbo na ẹn bosọ hẹn ẹn deji mlẹnmlẹn do Jiwheyẹwhe go dogọ.
‘Jehovah Na Siọ Mi!’
6. Naegbọn Davidi dọ dọ gblọndo odẹ̀ emitọn tọn na wá sọn osó wiwe Jehovah tọn ji?
6 Na Davidi deji bosọ gboadọ do Jehovah go wutu, e zindonukọn dọmọ: “Yẹn yí ogbè ṣie do dawhá ylọ [Jehovah], e sọ siọ mi sọn osó etọn wiwe ji wá.” (Ps. 3:4) Sọgbe hẹ gbedide Davidi tọn, aki alẹnu tọn lọ he nọtena tintin to finẹ Jiwheyẹwhe tọn yin hinhẹn yì Osó Ziọni ji. (Hia 2 Samuẹli 15:23-25.) Enẹwutu, e sọgbe dọ Davidi ni dọ dọ gblọndo odẹ̀ emitọn tọn ni wá sọn osó wiwe Jehovah tọn ji.
7. Naegbọn Davidi ma dibu?
7 Na Davidi deji dọ odẹ̀ he emi hò hlan Jiwheyẹwhe ma na yin to ovọ́ mẹ wutu, e ma dibu. Kakatimọ, e jihàn dọmọ: “Yẹn mlọnai bo damlọn; yẹn sọ fọ́n, na [Jehovah] hẹn go e wutu.” (Ps. 3:5) Etlẹ yin to zánmẹ to whenue owù mẹgbeyinyan tọn nọ sinyẹn te taun bọ alọ sọgan jẹ mẹgo to ajiji mẹ, Davidi ma nọ dibu nado damlọn. Na nuhe mẹ e ko jugbọn lẹ wutu, e yọnẹn dọ emi na fọ́n, na e gboadọ dọ Jiwheyẹwhe na gọalọna emi dandan. Mílọsu sọgan wà nudopolọ eyin mí tẹdo “aliho [Jehovah] tọn lẹ” go bo ma tọ́n sọn e ji.—Hia 2 Samuẹli 22:21, 22.
8. Nawẹ Psalm 27:1-4 dohia dọ Davidi dejido Jiwheyẹwhe go gbọn?
8 Adọgbigbo po jide mlẹnmlẹn he Davidi tindo do Jiwheyẹwhe go po họnwun to Psalm etọn devo mẹ, ehe bẹ ohó gbọdo ehelẹ hẹn dọmọ: ‘Jehovah wẹ hinhọ́n ṣie po whlẹngán ṣie po, mẹnu yẹn na dibuna? Jehovah wẹ gingántẹn ogbẹ̀ ṣie tọn: mẹnu yẹn na dibuna? Eyin awhànfuntọ lẹ tlẹ whèsla lẹdo mi, ayiha ṣie ma obu na di. Onú dopo wẹ yẹn bibiọ to Jehovah si, enẹ lọ wẹ yẹn na to dindin; na yẹn nido nọ nọ̀ ohọ̀ Jehovah tọn mẹ to gbẹzan ṣie lẹpo mẹ, nado nọ pọ́n whanpẹ Jehovah tọn, nado nọ kànnuse to tẹmpli etọn mẹ.’ (Ps. 27:1-4) Eyin hiẹ nọ tindo numọtolanmẹ dopolọ bọ ninọmẹ towe sọ na dotẹnmẹ, enẹ na whàn we nado nọ kọnawudopọ hẹ sinsẹ̀n-basitọ hatọ lẹ to gbesisọ mẹ to opli agun tọn lẹ ji.—Heb. 10:23-25.
9, 10. Mahopọnna nuhe Psalm 3:6, 7 dọ, naegbọn mí sọgan dọ dọ Davidi ma tindo gbigbọ ahọsuyiyi tọn?
9 Dile etlẹ yindọ Davidi jiya sébla domẹgo Absalọmi tọn po nuyiwa nugbonọ-mayin tọn mẹsusu devo lẹ tọn po, e jihàn dọmọ: “Yẹn ma na dibuna [degba-awe-foo] gbẹtọ he de kẹntọ to go e lẹ tọn. Tite, [Jehovah] E, whlẹn mi, Jiwheyẹwhe ṣie; na hiẹ wẹ linú kẹntọ ṣie lẹpo sọn aglanka, hiẹ sọ súnadu mẹylankan lẹ tọn.”—Ps. 3:6, 7.
10 Davidi ma tindo gbigbọ ahọsuyiyi tọn. Eyin mẹde ‘linú aglanka’ na kẹntọ etọn lẹ, be Jiwheyẹwhe wẹ na ko wàmọ. Ahọlu Davidi basi vọkan Osẹ́n lọ tọn na ede bosọ yọnẹn dọ Jehovah dọ to e mẹ dọ: “Ṣie wẹ ahọsuyi po ahọsu po.” (Deut. 17:14, 15, 18; 32:35) Jiwheyẹwhe tọn wẹ e sọ yin nado “súnadu mẹylankan lẹ tọn.” Nado súnadu na yé zẹẹmẹdo huhlọn didepo na yé ma nado gbleawunamẹ. Jehovah nọ yọ́n mẹylankan na ‘ayiha mẹ wẹ e nọ pọ́n’ wutu. (1 Sam. 16:7) Lehe mí dopẹ́ do sọ dọ Jiwheyẹwhe nọ hẹn mí tindo yise bo nọ na mí huhlọn nado diọnukunsọ Satani mẹylankan daho lọ, he na yin zizedlan odò mapote mẹ to madẹnmẹ taidi kinnikinni he to gbigbó bo ma tindo adú bo to tepọn vasudo de!—1 Pita 5:8, 9; Osọ. 20:1, 2, 7-10.
‘Jehovah Tọn Wẹ Whlẹngán’
11. Naegbọn mí dona nọ hodẹ̀ do yisenọ hatọ lẹ tamẹ?
11 Davidi yọnẹn dọ Jehovah kẹdẹ wẹ sọgan hẹn whlẹngán he emi tindo nuhudo etọn wá. Ṣigba Psalm-kantọ lọ ma to edetiti tọn kẹdẹ hòpọn gba. Etẹwẹ dogbọn omẹ vonọtaun Jehovah tọn lẹpo dali? Po gbesisọ po, Davidi dotana Psalm gbọdo etọn to aliho ehe mẹ dọmọ: “[Jehovah] tọn wẹ whlẹngán: dona towe sọ tin to omẹ towe lẹ go.” (Ps. 3:8) Mọwẹ, nuhahun he Davidi pehẹ sẹhundaga, etomọṣo, e hẹn pipli omẹ Jehovah tọn lẹ tọn do ayiha mẹ bosọ deji dọ Jiwheyẹwhe na dona yé. Be e ma jẹ dọ mílọsu ni nọ hẹn yisenọ hatọ mítọn lẹ do ayiha mẹ ya? Mì gbọ mí ni nọ flin yé to odẹ̀ mítọn lẹ mẹ bo nọ biọ Jehovah dọ ni na yé gbigbọ wiwe etọn na yé nido sọgan wleawuna adọgbigbo bo zindonukọn po jidide po to wẹndagbe lọ lilá mẹ.—Efe. 6:17-20.
12, 13. Etẹwẹ jọ do Absalọmi go, podọ nawẹ Davidi yinuwa gbọn?
12 Gbẹzan Absalọmi tọn wá vivọnu po winyan po—avase de wẹ ehe yin na mẹhe nọ yinuwa hẹ mẹdevo lẹ to aliho agọ̀ mẹ lẹpo, titengbe hẹ mẹyiamisisadode Jiwheyẹwhe tọn lẹ, taidi Davidi. (Hia Howhinwhẹn lẹ 3:31-35.) To whenue awhàn de wá aimẹ, awhànpa Absalọmi tọn lẹ ṣíawhàn. Absalọmi hẹ otlò de ji bo to yìyì bọ oda etọn he gọ́ taun plá do alà he dẹ́ wá odò atin daho de tọn go. Finẹ wẹ e ján do gbẹ̀te bo ma mọ alọgọtọ depope kakajẹ whenue Joabi yí owhán atọ̀n tlọ do ahun mẹ na ẹn bo hù i.—2 Sam. 18:6-17.
13 Be Davidi jaya to whenue e sè nuhe jọ do ovi etọn go wẹ ya? Lala. Kakatimọ, na e jẹflumẹ wutu, e jẹ yidọn-yide basi ji po avi po bo wule dọmọ: “E Absalọmi visunnu ṣie, visunnu ṣie, Absalọmi visunnu ṣie! Jlo Jiwheyẹwhe yẹn wẹ ko kú na hiẹ, E visunnu ṣie, visunnu ṣie, Absalọmi.” (2 Sam. 18:24-33) Nuhe Joabi dọ kẹdẹ wẹ de Davidi sọn awubla etọn he dibla tlọ ẹ lọ mẹ. Kọdetọn ylankan nankọ die ehe yin na Absalọmi, mẹhe ojlo zogbe ṣejannabi tọn sisẹ́ nado hoavùn sọta otọ́ etọn he yin mẹyiamisisadode Jehovah tọn bo hẹn nugbajẹmẹji wá ede ji!—2 Sam. 19:1-8; Howh. 12:21; 24:21, 22.
Davidi Do Jidide Do Jiwheyẹwhe Go Hia Whladopo Dogọ
14. Etẹwẹ mí sọgan dọ gando Psalm 4tọ he Davidi kàn go?
14 Taidi Psalm 3tọ, Psalm 4tọ yin odẹ̀ ahundopo tọn de he Davidi hò he dohia dọ e deji mlẹnmlẹn do Jehovah go. (Ps. 3:4; 4:3) Vlavo Davidi jihàn ehe nado gbọ fìn-in podọ nado dopẹna Jiwheyẹwhe to whenuena sébibla Absalọmi tọn ma wazọ́n. Kavi dọ Levinu hànjitọ lẹ wẹ e na ko tindo to ayiha mẹ to whenue e pà ohàn enẹ. Depope he whẹho lọ yin, ayihamẹlinlẹnpọn do Psalm ehe ji sọgan hẹn jidide mítọn do Jehovah go sinyẹn deji.
15. Naegbọn mí sọgan yí jidide do hodẹ̀ hlan Jehovah gbọn Visunnu etọn gblamẹ?
15 Davidi dohia whladopo dogọ dọ emi deji mlẹnmlẹn do Jiwheyẹwhe go bosọ tindo nujikudo dọ e nọ sè odẹ̀ emitọn lẹ. E jihàn dọmọ: “Siọ mi whenuena yẹn to yiylọ, Jiwheyẹwhe dodo ṣie tọn E: whenuena yẹn tin to awusinyẹn mẹ hiẹ ko klẹtẹnna mi; wàlẹblanuna mi, bosọ sè odẹ̀ ṣie.” (Ps. 4:1) Mílọsu sọgan tindo jidide mọnkọtọn eyin mí nọ yinuwa to aliho dodo tọn mẹ. Na mí yọnẹn dọ Jehovah, ‘Jiwheyẹwhe dodo tọn’ nọ dona omẹ ahunjijlọnọ etọn lẹ wutu, mí sọgan yí jidide do hodẹ̀ hlan ẹn gbọn Visunnu etọn gblamẹ bo do yise hia to avọ́sinsan ofligọ Jesu tọn mẹ. (Joh. 3:16, 36) Lehe ehe nọ hẹn mí tindo jijọho do sọ!
16. Etẹwẹ na ko hẹn Davidi gbọjọ?
16 E nọ wá jọ bọ mí nọ pehẹ ninọmẹ delẹ he nọ zọ́n bọ jidide mítọn do Jiwheyẹwhe go nọ depò. Vlavo nuhe na ko jọ do Davidi go na ojlẹ de niyẹn, na e jihàn dọmọ: “Mì ovi gbẹtọ tọn [lẹ] emi, na mì na diọ gigo ṣie zun winyan dẹnsọ? Na mì na jlo nuvọ́ dẹnsọ, bosọ to yẹwiwa dín pé?” (Ps. 4:2) E họnwun dọ hogbe lọ ‘ovi gbẹtọ tọn lẹ’ dlẹnalọdo gbẹtọvi lẹ to aliho whẹgbledomẹ tọn de mẹ. Kẹntọ Davidi tọn lẹ nọ ‘jlo nuvọ́.’ Lẹdogbedevomẹ New International Version tọn lilẹ́ apadewhe wefọ lọ tọn dole: “Nawẹ mì na yiwanna nuvọ́ lẹ dẹnsọ bosọ to yẹwhe lalo lẹ dín pé?” Eyin onú agọ̀ he mẹdevo lẹ wà do mí tlẹ hẹn mí gbọjọ, mì gbọ mí ni zindonukọn nado nọ hodẹ̀ vẹkuvẹku bo deji mlẹnmlẹn do Jiwheyẹwhe nugbo dopo kẹdẹ lọ go.
17. Basi zẹẹmẹ lehe mí sọgan yinuwa sọgbe hẹ Psalm 4:3 do tọn.
17 Jidide he Davidi tindo do Jiwheyẹwhe go họnwun to hogbe ehelẹ mẹ dọmọ: “Ṣigba mì ni yọnẹn dọ [Jehovah] ko de ayihawiwenọ dovo na ede. [Jehovah] na sè whenuena yẹn dawhá ylọ ẹ.” (Ps. 4:3) Adọgbigbo po jidide mlẹnmlẹn do Jehovah go po yin nujọnu nado gbọṣi nugbonọ-yinyin mẹ na ẹn. Di apajlẹ, whẹndo Klistiani lẹ tindo nuhudo jẹhẹnu ehelẹ tọn to whenuena hẹnnumẹ yetọn he ma lẹnvọjọ de yin didesẹ sọn agun mẹ. Jiwheyẹwhe nọ dona mẹhe gbọṣi nugbonọ-yinyin mẹ na ẹn bo tẹdo nujinọtedo etọn lẹ go lẹ. Taidi kọdetọn de, nugbonọ-yinyin po jidide mlẹnmlẹn do Jehovah go po nọ yidogọna ayajẹ to omẹ etọn lẹ ṣẹnṣẹn.—Ps. 84:11, 12.
18. Sọgbe hẹ Psalm 4:4, etẹwẹ mí dona wà eyin mẹdevo lẹ dọhona mí kavi yinuwa hẹ mí to aliho agọ̀ mẹ?
18 Etẹwẹ lo eyin mẹde dọ kavi wà nude he hẹn homẹgble mí? Eyin mí ma na hẹn ayajẹ mítọn bu, nujọnu wẹ e yin dọ mí ni yinuwa sọgbe hẹ hogbe Davidi tọn lẹ dọmọ: ‘Mì gblehomẹ, ṣigba mì waylando blo: mì dọho hẹ ayiha mìtọn to adọzan mìtọn ji, bosọ nabọẹ.’ (Ps. 4:4) Eyin mẹdevo lẹ dọhona mí kavi yinuwa hẹ mí to aliho agọ̀ mẹ, mì dike mí waylando gbọn ahọsuyiyi dali blo. (Lom. 12:17-19) Mí sọgan dọ numọtolanmẹ mítọn tọ́n to odẹ̀ mẹ gando whẹho lọ go to abò mẹ to adọzan mítọn ji. Enẹ sọgan diọ pọndohlan mítọn bo whàn mí nado jonamẹ po owanyi po. (1 Pita 4:8) Nuhe jẹna ayidego to whẹho ehe mẹ wẹ kanṣiṣa he ayinamẹ apọsteli Paulu tọn tindo hẹ Psalm 4:4 dọmọ: “Mì sọgan gblehomẹ, ṣogan mì waylando blo; mì dike owhè yihọ do mì to homẹgble mẹ blo, mọdopolọ, mì natẹn Lẹgba blo.”—Efe. 4:26, 27.
19. Sọgbe hẹ Psalm 4:5, eyin sinsẹ̀n-bibasi mítọn na yin alọkẹyi, etẹwẹ mí dona wà?
19 To whenuena Davidi to nùzindeji dọ dandannu wẹ e yin nado dejido Jiwheyẹwhe go, e jihàn dọmọ: ‘Mì sanvọ́ dodo tọn, bosọ dejido Jehovah go.’ (Ps. 4:5) Jiwheyẹwhe nọ kẹalọyi avọ́sinsan Islaelivi lẹ tọn kiki eyin yé basi i po mẹwhinwhàn dagbe po. (Isa. 1:11-17) Eyin Jiwheyẹwhe na kẹalọyi sinsẹ̀n-bibasi mítọn, mílọsu dona tindo mẹwhinwhàn dagbe bo deji mlẹnmlẹn do e go.—Hia Howhinwhẹn lẹ 3:5, 6; Heblu lẹ 13:15, 16.
20. Etẹwẹ ‘hinhọ́n nukun Jehovah tọn’ zẹẹmẹdo?
20 Davidi zindonukọn dọmọ: “Mẹsusu wẹ to didọ, dọmọ, Mẹnu wẹ na do dagbe hia mí? [Jehovah], hiẹ ni ze hinhọ́n nukun towe tọn daga do mí go.” (Ps. 4:6) ‘Hinhọ́n nukun Jehovah tọn’ zẹẹmẹdo nukundagbe etọn. (Ps. 89:15) Enẹwutu to whenue Davidi hodẹ̀ dọ: “Hiẹ ni ze hinhọ́n nukun towe tọn daga do mí go,” nuhe dọ e te wẹ yindọ e ni ‘do nukundagbe hia mí.’ Na mí dejido Jehovah go wutu, e nọ do nukundagbe etọn hia mí podọ mí nọ mọ ayajẹ susu dile mí yí adọgbigbo do to ojlo etọn wà.
21. Eyin mí nọ tindo mahẹ gigọ́ to azọ́n jibẹwawhé gbigbọmẹ tọn egbezangbe tọn lọ mẹ, jide etẹ tọn wẹ mí sọgan tindo?
21 Na Davidi to nukọnpọnhlan ayajẹ he Jiwheyẹwhe nọ namẹ he zẹ̀ ayajẹ jibẹwawhé whenu tọn go wutu, e jihàn dọmọ: “Hiẹ sọ yí homẹhunhun do ayiha mẹ na mi, hú ojlẹ he mẹ gbàdo yetọn po ovẹn yetọn po sudeji.” (Ps. 4:7) Mí sọgan deji dọ mí na mọ ayajẹ nujọnu tọn eyin mí nọ tindo mahẹ gigọ́ to azọ́n jibẹwawhé gbigbọmẹ tọn egbezangbe tọn lọ mẹ. (Luku 10:2) Po ‘akọta susu’ mẹyiamisisadode he to anadenanu lẹ tọn po, mí nọ jaya dile sọha ‘jibẹwawhétọ lẹ’ tọn to susudeji. (Isa. 9:3) Be hiẹ to mahẹ gigọ́ tindo to jibẹwawhé he nọ hẹn ayajẹ wá ehe mẹ ya?
Yí Adọgbigbo Do to Jidedo Jiwheyẹwhe Go Mlẹnmlẹn Zọnmii
22. Sọgbe hẹ Psalm 4:8, vivi etẹ tọn wẹ Islaelivi lẹ dù to whenue yé yìn Osẹ́n Jiwheyẹwhe tọn?
22 Davidi dotana Psalm ehe dole: “Yẹn na mlọnai bo damlọn jijọho mẹ, na hiẹ, [Jehovah], dopo kẹdẹ wẹ hẹn mi sinai ma hanú [kavi tindo hihọ́].” (Ps. 4:8) To whenue Islaelivi lẹ yìn Osẹ́n Jehovah tọn, yé tin to jijọho mẹ hẹ ẹ bosọ tindo numọtolanmẹ hihọ́ tọn. Di apajlẹ, to gandudu Sọlomọni tọn whenu, ‘Juda po Islaeli po mọ hihọ́.’ (1 Ahọ. 4:25) Mẹhe dejido Jiwheyẹwhe go lẹ tin to jijọho mẹ etlẹ yin to whenue akọta he lẹdo yé lẹ diọnukunsọ yé. Taidi Davidi, mí nọ mlọnai to jijọho mẹ na Jiwheyẹwhe nọ hẹn mí nado tindo numọtolanmẹ hihọ́ tọn wutu.
23. Etẹwẹ mí na duvivi etọn eyin mí deji mlẹnmlẹn do Jiwheyẹwhe go?
23 Mì gbọ mí ni yí adọgbigbo do zindonukọn to sinsẹ̀nzọn Jehovah tọn mẹ. Mì dike mílọsu ni nọ yí yise do hodẹ̀ bo gbọnmọ dali duvivi “jijọho Jiwheyẹwhe tọn he yiaga hugan linlẹn lẹpo” tọn. (Flp. 4:6, 7) Lehe enẹ nọ hẹn ayajẹ wá na mí do sọ! Podọ ayihaawe ma tin dọ mí sọgan yí adọgbigbo do to sọgodo pọnhlan eyin mí deji mlẹnmlẹn do Jehovah go.
Nawẹ Hiẹ Na Na Gblọndo Gbọn?
• Nuhahun tẹlẹ wẹ Davidi pehẹ na Absalọmi tọn wutu?
• Nawẹ Psalm 3tọ sọgan hẹn mí tindo adọgbigbo gbọn?
• Aliho tẹlẹ mẹ wẹ Psalm 4tọ sọgan hẹn jidide mítọn do Jehovah go sinyẹn deji te?
• Nawẹ jidide mlẹnmlẹn do Jiwheyẹwhe go sọgan hẹn ale wá na mí gbọn?
[Kanbiọ Oplọn tọn lẹ]
[Yẹdide to weda 29]
Etlẹ yin to whenue Davidi to hinhọ̀nna Absalọmi, e dejido Jehovah go
[Yẹdide to weda 32]
Be hiẹ nọ deji mlẹnmlẹn do Jehovah go ya?