Mẹnu Wẹ Yin Nujọnu Na We Hugan to Gbẹ̀mẹ?
Mẹnu Wẹ Yin Nujọnu Na We Hugan to Gbẹ̀mẹ?
‘Hiẹ dopo kẹdẹ wẹ Gigogán to wẹkẹ lẹpo ji.’—PS. 83:18.
1, 2. Naegbọn oyín Jehovah tọn yinyọnẹn poun ma ko pé nado mọ whlẹngán?
VLAVO whla tintan he hiẹ mọ oyín Jehovah tọn wẹ whenue e yin didohia we to Psalm 83:18 mẹ. E na ko paṣa we nado hia hogbe enẹlẹ he dọ dọ: “Na yé nido yọnẹn dọ, hiẹ, oyín mẹhe tọn dopo kẹdẹ nọ yin Jehovah, wẹ Gigogán to wẹkẹ lẹpo ji.” Matin ayihaawe, sọn whenẹnu gbọ́n wẹ hiẹ na ko nọ yí wefọ enẹ zan nado gọalọna mẹdevo lẹ nado wá yọ́n Jehovah, Jiwheyẹwhe owanyinọ mítọn.—Lom. 10:12, 13.
2 Dile etlẹ yindọ nujọnu wẹ e yin dọ gbẹtọ lẹ ni yọ́n oyín Jehovah tọn, enẹ kẹdẹ ma ko pé. Pọ́n lehe Psalm-kantọ lọ zinnudo nugbo titengbe devo ji na whlẹngán mítọn do to whenuena e dọmọ: ‘Hiẹ dopo kẹdẹ wẹ Gigogán to wẹkẹ lẹpo ji.’ Mọwẹ, mẹdepope ma yin nujọnu sọ Jehovah to wẹkẹ lọ blebu mẹ. Taidi Didatọ nulẹpo tọn, e tindo jlọjẹ lọ nado donukun taliai mlẹnmlẹn sọn nudida etọn lẹpo si. (Osọ. 4:11) Enẹwutu, e sọgbe nado kanse míde dọ, ‘Mẹnu wẹ yin nujọnu na mi hugan to gbẹ̀mẹ?’ Nujọnu wẹ e yin dọ mí ni yí sọwhiwhe do gbeje gblọndo kanbiọ enẹ tọn pọ́n!
Whẹho He Yin Finfọndote to Jipa Edẹni Tọn Mẹ
3, 4. Nawẹ Satani wagbọn do klọ Evi, podọ etẹwẹ yin kọdetọn lọ?
3 Nujijọ he wá aimẹ to jipa Edẹni tọn mẹ lẹ dohia hezeheze dọ whẹho titengbe de wẹ yin finfọndote. To finẹ, angẹli atẹṣitọ lọ he wá yin yinyọnẹn taidi Satani Lẹgba klọ yọnnu tintan lọ, Evi, nado yiwanna ojlo edetiti tọn hugan gbedide Jehovah tọn ma nado dù sọn sinsẹ́n atin tangan de tọn mẹ. (Gẹn. 2:17; 2 Kọl. 11:3) E joawuna oklọ Satani tọn ehe bo gbọnmọ dali do sisi matindo hia nupojipetọ-yinyin Jehovah tọn. Evi dohia dọ e ma yin Jehovah wẹ Mẹhe yin nujọnu na emi hugan to gbẹ̀mẹ. Ṣigba, nawẹ Satani wagbọn do klọ Evi?
4 Satani yí ayiha wintinwintin susu zan to hodọdopọ etọn hẹ Evi mẹ. (Hia Gẹnẹsisi 3:1-5.) Tintan, Satani ma yí oyín jọnun Jehovah tọn zan. “Jiwheyẹwhe” go wẹ e donù poun. Ṣigba, to Heblugbe dowhenu tọn mẹ, mẹhe kàn owe Gẹnẹsisi tọn yí oyín jọnun Jehovah tọn zan to wefọ tintan weta enẹ tọn mẹ. Awetọ, kakati Satani nido donù ‘gbedide’ Jiwheyẹwhe tọn go, e kàn nuhe Jiwheyẹwhe ‘dọ’ sè poun. (Gẹn. 2:16) Gbọn ayiha wintinwintin ehe yiyizan dali, Satani sọgan ko tẹnpọn nado de nujọnu-yinyin gbedide enẹ tọn pò. Atọ̀ntọ, dile etlẹ yindọ Evi kẹdẹ wẹ Satani to hodọna, e yí hogbe he nọ yin yiyizan na mẹsusu, yèdọ “mì” zan na ẹn. Gbọnmọ dali, e sọgan ko to tintẹnpọn nado fọ́n goyiyi dote to ahun Evi tọn mẹ, na Evi nido mọdọ emi yin mẹjọmẹ bo sọgan basi nudide do ewọ po asu etọn po tamẹ. Etẹwẹ yin kọdetọn lọ? E taidi dọ Evi gbọn goyiyi dali basi nudide nado yihodọ do ewọ po asu etọn po tamẹ to whenuena e dọna odàn lọ dọmọ: ‘Mí sọgan dù to sinsẹ́n atin he to jipa mẹ tọn lẹ mẹ.’
5. (a) Etẹ ji wẹ Satani hẹn Evi nado ze ayidonugo etọn do? (b) Etẹwẹ Evi dohia to whenue e dù sọn atin he yè dosẹ́n etọn lọ mẹ?
5 Satani sọ dolalo. E dohia dọ Jiwheyẹwhe yin kanylantọ nado biọ to Adam po Evi po si ma nado “dù sọn depope to atin jipa lọ tọn lẹ mẹ, NW.” Humọ, Satani hẹn Evi nado lẹnnupọndo ede po lehe e sọgan hẹn gbẹzan ede tọn pọnte dogọ nado tin “di Jiwheyẹwhe” do ji. To godo mẹ, e hẹn Evi nado ze ayidonugo etọn do atin lọ po sinsẹ́n etọn po ji kakati nido yin haṣinṣan etọn hẹ Mẹhe na ẹn nulẹpo. (Hia Gẹnẹsisi 3:6.) E blawu dọ Evi dù atin-sinsẹ́n lọ bo gbọnmọ dali dohia dọ e ma yin Jehovah wẹ Mẹhe yin nujọnu na emi hugan to gbẹ̀mẹ.
Whẹho He Yin Finfọndote to Azán Job Tọn Gbè
6. Nawẹ Satani diọavunnukunsọ tenọgli Job tọn gbọn, podọ dotẹnmẹ tẹwẹ ehe hùn dotena Job?
6 To owhe kanweko susu lẹ godo, dotẹnmẹ hùn dotena dawe nugbonọ lọ, Job nado do Mẹhe yin nujọnu na ẹn hugan to gbẹ̀mẹ hia. To whenue Jehovah kanhose Satani gando tenọgli Job tọn go, Satani gblọn dọmọ: “Be Job dibusi Jiwheyẹwhe na ovọ́ wẹ?” (Hia Job 1:7-10.) Satani ma gbẹ́ dọ Job ma setonuna Jiwheyẹwhe gba. Kakatimọ, mẹwhinwhàn Job tọn lẹ go wẹ e fọ́n ayihaawe dote gando. E gbọn ayiha gigẹdẹ dali sawhẹdokọna Job dọ ale ṣejannabi tọn wutu wẹ e do to Jehovah sẹ̀n, e ma yin na e yiwanna Jehovah wutu gba. Job kẹdẹ wẹ sọgan na gblọndo avùnnukundiọsọmẹ enẹ tọn, podọ dotẹnmẹ hùn dotena ẹn nado wàmọ.
7, 8. Whlepọn tẹlẹ wẹ Job pehẹ, podọ etẹwẹ nugbonọ-yinyin po akọndonanu etọn po dohia?
7 Jehovah na dotẹnmẹ Satani nado hẹn nugbajẹmẹji debọdo-dego wá Job ji. (Job 1:12-19) Nawẹ Job yinuwa to ninọmẹ ylankan enẹlẹ glọ gbọn? Kandai lọ dohia dọ e “ma waylando, kavi yí nulú do dowhẹ Jiwheyẹwhe gba.” (Job 1:22) Ṣigba agbọ́ ma ko pé Satani. E zindonukọn dọmọ: “Ayú na ayú, mọ wẹ, ehe gbẹtọ tindo lẹpo wẹ e na jo na ogbẹ̀ etọn.” a (Job 2:4) Satani sọalọakọ́n dọ eyin Job lọsu na ede jiya, e na de ma nado kẹalọyi Jehovah taidi Mẹhe yin nujọnu na ẹn hugan to gbẹ̀mẹ.
8 Satani yí azọ̀nylankan do hẹn nukunmẹ po agbasa Job tọn po gble podọ asi etọn gbidikọna ẹn nado gbẹ́ Jiwheyẹwhe dai bo kú. To nukọn mẹ, homẹmiọnnamẹtọ lalonọ atọ̀n sawhẹ walọ ylankan tọn dokọna ẹn. (Job 2:11-13; 8:2-6; 22:2, 3) Etomọṣo, mahopọnna oyà he Job ji lẹpo, e ma jogbe. (Hia Job 2:9, 10.) Job doakọnnanu po nugbonọ-yinyin po bo gbọnmọ dali dohia dọ Jehovah wẹ Mẹhe yin nujọnu na emi hugan to gbẹ̀mẹ. Humọ, Job dohia dọ gbẹtọvi mapenọ lẹ sọgan wà nuhe go yé pé lẹpo nado na gblọndo whẹsadokọnamẹ lalo Lẹgba tọn lẹ.—Yijlẹdo Howhinwhẹn lẹ 27:11 go.
Jesu Na Gblọndo to Aliho Pipé Mẹ
9. (a) Nawẹ Satani yí ojlo ṣejannabi tọn zan nado whlé Jesu pọ́n gbọn? (b) Nawẹ Jesu yinuwa to whlepọn lọ nukọn gbọn?
9 Ojlẹ kleun de to baptẹm Jesu tọn godo, Satani tẹnpọn nado klọ Jesu nado doafọna ojlo ṣejannabi tọn lẹ kakati nado dohia dọ Jehovah wẹ Mẹhe yin nujọnu na ẹn hugan to gbẹ̀mẹ. Lẹgba ze whlepọn voovo atọ̀n donukọnna Jesu. Tintan, na Satani yọnẹn dọ huvẹ to Jesu hù wutu, e whlé e pọ́n nado diọ zannu zun akla. (Mat. 4:2, 3) Jesu ṣẹṣẹ blanù fó na azán 40 wẹ, podọ ayihaawe ma tin dọ huvẹ na ko hù i taun. Enẹwutu Lẹgba jlo dọ Jesu ni yí huhlọn azọ́njiawu tọn etọn zan to aliho agọ̀ mẹ nado gbọ huvẹ he to hùhù i lọ. Nawẹ Jesu yinuwa gbọn? To vogbingbọn mẹ na Evi, Jesu na ayidonugo Ohó Jehovah tọn bo gbẹ́ whlepọn lọ dai to afọdopolọji.—Hia Matiu 4:4.
10. Naegbọn Satani whlé Jesu pọ́n nado lọ́n jẹte sọn aga adó tẹmpli lọ tọn?
10 Satani sọ whlé Jesu pọ́n nado yinuwa po ṣejannabi po. E biọ to Jesu si nado lọ́n jẹte sọn aga adó tẹmpli lọ tọn. (Mat. 4:5, 6) Etẹwẹ yin yanwle Satani tọn? Satani dọ dọ eyin Jesu lọ́n jẹte bo ma gbleawu, be enẹ na dohia dọ “visunnu Jiwheyẹwhe tọn” wẹ e yin. E họnwun dọ Lẹgba jlo dọ Jesu ni na ayidonugo ede zẹjlẹgo bo tlẹ do nugopipe etọn hia. Satani yọnẹn dọ goyiyi sọgan sisẹ́ gbẹtọvi depope nado kẹalọyi nuzedonukọnnamẹ owù tọn po linlẹn lọ po ma nado duwinyan to mẹdevo lẹ nukọn. Satani yí wefọ de zan to aliho agọ̀ mẹ, ṣigba Jesu dohia dọ Emi tindo nukunnumọjẹnumẹ gando Ohó Jehovah tọn go to gigọ́ mẹ. (Hia Matiu 4:7.) Na Jesu gbẹ́ nuzedonukọnnamẹ Satani tọn enẹ dai wutu, e dohia whladopo dogọ dọ Jehovah wẹ Mẹhe yin nujọnu na emi hugan to gbẹ̀mẹ.
11. Naegbọn Jesu gbẹ́ nuzedonukọnnamẹ Satani tọn he yin ahọluduta aihọn tọn lẹpo dai?
11 Na Satani gbẹ́ to ogbé Jesu tọn yàn klinkán-klinkán wutu, e ze ahọluduta aihọn tọn lẹpo donukọnna Jesu. (Mat. 4:8, 9) Jesu gbẹ́ nuzedonukọnnamẹ lọ dai to afọdopolọji. E yọnẹn dọ eyin emi kẹalọyi nuzedonukọnnamẹ lọ, enẹ na dohia dọ emi gbẹ́ nupojipetọ-yinyin Jehovah tọn dai—enẹ wẹ jlọjẹ Jiwheyẹwhe tọn nado yin Gigogán. (Hia Matiu 4:10.) To whlepọn lọ lẹ dopodopo whenu, Jesu yí wefọ he bẹ oyín jọnun Jehovah tọn hẹn lẹ zan nado na gblọndo Satani.
12. Etẹwẹ hẹn ayimajai sinsinyẹn wá na Jesu? Ṣigba, nawẹ e yinuwa gbọn, podọ etẹwẹ nuyiwa etọn plọn mí?
12 Sẹpọ vivọnu gbẹzan Jesu tọn to aigba ji, e pannukọn nudide he kàn dẹpẹ biọ de. To lizọnyizọn Jesu tọn blebu whenu, e do ojlo etọn nado yí ogbẹ̀ etọn do sanvọ́ hia. (Mat. 20:17-19, 28; Luku 12:50; Joh. 16:28) Ṣigba, Jesu sọ yọnẹn dọ gbẹtọ lẹ na sawhẹ agọ̀ dokọna emi podọ yé na gblewhẹdo emi to whẹdatẹn Ju lẹ tọn bọ emi na yin hùhù taidi nùzantọ de. Okú wunmẹ ehe hẹn ayimajai sinsinyẹn wá na Jesu. E hodẹ̀ dọmọ: “Otọ́ ṣie, eyin e yọnbasi, dike kọfo ehe ni juwayi sọn dè e.” Ṣigba e zindonukọn dọmọ: “Ṣogan, e ma yin dile yẹn jlo do gba, ṣigba dile hiẹ jlo do.” (Mat. 26:39) Mọwẹ, ayihaawe ma tin dọ nugbonọ-yinyin Jesu tọn kakajẹ okú do Mẹhe yin nujọnu na ẹn hugan to gbẹ̀mẹ hia!
Lehe Mí Sọgan Na Gblọndo Whẹho lọ Do
13. Etẹwẹ apajlẹ Evi, Job po Jesu Klisti po tọn plọn mí?
13 Etẹwẹ apajlẹ ehelẹ plọn mí? To whẹho Evi tọn mẹ, mí plọn dọ mẹhe nọ joawuna ojlo ṣejannabi tọn kavi numọtolanmẹ mẹjọmẹ-yinyin tọn lẹ nọ dohia dọ e ma yin Jehovah wẹ Mẹhe yin nujọnu na yé hugan to gbẹ̀mẹ. To vogbingbọn mẹ, tenọgli Job tọn plọn mí dọ gbẹtọvi mapenọ lẹ lọsu sọgan dohia dọ Jehovah tin to otẹn tintan mẹ na yé gbọn akọndidona nuhahun lẹ po nugbonọ-yinyin po dali—etlẹ yin to whenue yé ma yọ́n adọ̀ nuhahun lọ lẹ tọn to gigọ́ mẹ. (Jak. 5:11) Hú popolẹpo, apajlẹ Jesu tọn plọn mí ma nado nọ hò winyan pọ́n podọ ma nado nọ na ayidonugo míde zẹjlẹgo po linlẹn lọ po dọ mí yin nujọnu. (Heb. 12:2) Ṣigba, nawẹ mí sọgan yí nuplọnmẹ ehelẹ do yizan mẹ gbọn?
14, 15. Nawẹ nuyiwa Jesu tọn to whlepọn nukọn gbọnvona nuyiwa Evi tọn gbọn, podọ nawẹ mí sọgan hodo apajlẹ Jesu tọn do? (Yí yẹdide he to weda 18tọ ji do na gblọndo.)
14 Ma dike whlepọn lẹ ni hẹn we nado wọnji Jehovah go gbede blo. Evi dike whlepọn he pannukọn ẹn lọ ni yinuwado e ji to afọdopolọji. E mọdọ atin-sinsẹ́n lọ “yọ́n na dùdù bosọ yọ́npọ́n to nukunta, mọwẹ, atin lọ yọ́npọ́n taun.” (Gẹn. 3:6, NW) Lehe nuyiwa Jesu tọn to whlepọn atọ̀n lọ lẹ nukọn gbọnvo do sọ! To whlepọn lọ lẹ dopodopo whenu, e ma dike whlepọn he e pannukọn lọ ni hẹn ẹn nado wọnji kọdetọn nuyiwa etọn lẹ tọn go. E dejido Ohó Jiwheyẹwhe tọn go bosọ yí oyín Jehovah tọn zan.
15 To whenue mí pannukọn whlepọn nado wà nuhe na hẹn homẹgble Jehovah, etẹ ji wẹ mí nọ ze ayiha mítọn do? Lehe mí ze ayiha mítọn do whlepọn lọ ji sọ, mọ wẹ ojlo ylankan enẹ na sinyẹn deji do niyẹn. (Jak. 1:14, 15) Mí dona yinuwa to afọdopolọji nado họ̀nadọna ojlo ylankan lọ sọn ahun mítọn mẹ, eyin mọwiwà tlẹ vẹawuna mí taidi dọ mí to awutugonu mítọn de sán sẹ̀ wẹ nkọ. (Mat. 5:29, 30) Taidi Jesu, mí dona nọ na ayidonugo kọdetọn nuyiwa mítọn lẹ tọn—enẹ wẹ lehe yé na yinuwado haṣinṣan mítọn hẹ Jehovah do ji. Mí dona nọ flin nuhe Ohó etọn, Biblu dọ. Aliho dopo akàn he mẹ mí sọgan dohia dọ Jehovah wẹ Mẹhe yin nujọnu na mí hugan to gbẹ̀mẹ te niyẹn.
16-18. (a) Etẹlẹ wẹ sọgan hẹn mí jẹflumẹ? (b) Etẹlẹ wẹ na gọalọna mí nado pehẹ ninọmẹ ayimajai tọn lẹ?
16 Ma dike adángbòmẹ lẹ ni hẹn we nado gblehomẹ do Jehovah go gbede blo. (Howh. 19:3) Dile opodo aihọn ylankan ehe tọn to sisẹpọ, susu omẹ Jehovah tọn lẹ tọn to pipehẹ nugbajẹmẹji po adángbòmẹ lẹ po. To ninọmẹ mọnkọtọn lẹ glọ, mí ma nọ donukun dọ Jiwheyẹwhe ni basi hihọ́na mí to azọ́njiawu-liho gba. Ṣigba, dile e yin do na Job, mí sọgan jẹflumẹ to whenue mẹyiwanna mítọn de kú kavi to whenue mí to yaji na nuhahun lẹ wutu.
17 Job ma yọ́n nuhewutu Jehovah na dotẹnmẹ onú delẹ nado jọ do e go, podọ mílọsu sọgan nọma yọ́n nuhewutu nuylankan lẹ do nọ jọ to whedelẹnu. Vlavo mí sọgan ko sè dogbọn aigba-sisọsisọ he hù mẹmẹsunnu nugbonọ susu taidi dehe jọ to Haïti kavi nugbajẹmẹji jọwamọ tọn devo lẹ dali. Kavi mí sọgan ko yọ́n Klistiani nugbonọ de he go yè wadanu do kavi he kú to asidan ylankan de mẹ. Kavi mí tlẹ sọgan pehẹ ninọmẹ ayimajai tọn delẹ kavi jiya whẹdida mawadodo tọn delẹ. Awufiẹsa he mọ mí te sọgan hẹn mí nado wule dọ: ‘Etẹ dódó die Jehovah E. Naegbọn ehe do to jijọ do go e? Ylando tẹ n’wà?’ (Hab. 1:2, 3) Etẹlẹ wẹ na gọalọna mí nado pehẹ ninọmẹ mọnkọtọn lẹ?
18 Mí dona họ́ míde ma nado nọ lẹndọ nujijọ mọnkọtọn lẹ yin kunnudenu dọ Jehovah ko gbẹ́ mí dai. Jesu zinnudo nugbo ehe ji to whenuena e dọhodo nugbajẹmẹji awe he wá aimẹ to azán etọn gbè ji. (Hia Luku 13:1-5.) “Ojlẹ po kosọ po” nọ hẹn nugbajẹmẹji susu wá. (Yẹwh. 9:11) Ṣigba, mahopọnna nudepope he na hẹn ayimajai wá mí ji, mí sọgan doakọnna eyin mí lẹhlan “Jiwheyẹwhe homẹmimiọn lẹpo tọn.” E na na mí huhlọn he mí tindo nuhudo etọn nado zindonukọn po nugbonọ-yinyin po.—2 Kọl. 1:3-6.
19, 20. Etẹwẹ gọalọna Jesu nado doakọnna ninọmẹ winyan tọn lẹ, podọ etẹwẹ na gọalọna mí nado wà nudopolọ?
19 Ma dike numọtolanmẹ mẹjọmẹ-yinyin tọn kavi obu lọ nado duwinyan ni nọ duahunmẹna we zẹjlẹgo gbede blo. Na Jesu whiwhẹ ede wutu, e penugo nado “jo onú lẹpo do bo taidi afanumẹ de.” (Flp. 2:5-8) Na e ganjẹ Jehovah go wutu, e penugo nado doakọnna ninọmẹ winyan tọn susu. (1 Pita 2:23, 24) Gbọnmọ dali, Jesu ze ojlo Jehovah tọn wiwà do otẹn tintan mẹ podọ ehe zọ́n bọ Jiwheyẹwhe ze e daga do otẹn he yiaga de mẹ. (Flp. 2:9) Jesu dotuhomẹna devi etọn lẹ nado hodo apajlẹ etọn.—Mat. 23:11, 12; Luku 9:26.
20 To whedelẹnu, e sọgan vẹawuna mí nado doakọnna whlepọn lẹ. Etomọṣo, mí dona tindo jidide apọsteli Paulu tọn nkọ, mẹhe dọmọ: “Na ehe tọn wutu wẹ yẹn sọ to oyà onú ehelẹ tọn ji, ṣigba winyan ma hù mi. Na yẹn yọ́n omẹ lọ he yẹn yise, podọ yẹn deji dọ ewọ penugo nado basi hihọ́na nuhe yẹn ko zedo alọmẹ na ẹn lọ kakajẹ azán enẹ gbè.”—2 Tim. 1:12.
21. Mahopọnna gbigbọ ṣejannabi tọn he gbayipe to aihọn lọ mẹ, etẹwẹ a magbe nado wà?
21 Biblu dọ dọdai dọ to ojlẹ mítọn mẹ, “gbẹtọ lẹ na yin wanyina mẹdetiti tọ́.” (2 Tim. 3:2) Abajọ, gbigbọ ṣejannabi tọn do gbayipe sọmọ. Mì dike gbigbọ enẹ bẹpla mí gbede blo! Kakatimọ, vlavo mí to pipehẹ whlepọn, adángbòmẹ kavi ninọmẹ winyan tọn lẹ, mì gbọ dopodopo mítọn ni magbe nado dohia dọ Jehovah wẹ Mẹhe yin nujọnu na mí hugan to gbẹ̀mẹ nugbonugbo!
[Nudọnamẹ odò tọn]
a Weyọnẹntọ Biblu tọn delẹ lẹndọ hogbe lọ “ayú na ayú” sọgan zẹẹmẹdo dọ Job na gbọn ṣejannabi dali dike ovi etọn lẹ kavi kanlin etọn lẹ ni kinkọ́n ayú kavi kú to whenuena nudepope ma na gando ayú kavi ogbẹ̀ edetiti tọn go. Ṣigba, nuhe weyọnẹntọ Biblu tọn devo lẹ lẹn wẹ yindọ hogbe lọ to didohia dọ mẹde sọgan desọn ojlo mẹ nado kinkọ́n ayú nado whlẹn ogbẹ̀ ede tọn. Di apajlẹ, mẹde sọgan yí awà etọn do glọnalina akotokún ma nado jẹ ota etọn go. Gbọnmọ dali, apadewhe ayú etọn tọn na kinkọ́n kakati nido yin ayú etọn lẹpo. Depope he zẹẹmẹ hogbe lọ tọn sọgan ko yin, nuhe họnwun wẹ yindọ hogbe lọ to didohia dọ Job na hùnhomẹ nado ze nudepope jo to whenuena nude ma na gando ogbẹ̀ ewọ lọsu tọn go.
Etẹwẹ Mí Sọgan Plọn sọn . . .
• lehe Satani klọ Evi do mẹ?
• lehe Job yinuwa gbọn to whenue adángbò e mẹ?
• nuhe yin nujọnu hugan na Jesu mẹ?
[Kanbiọ Oplọn tọn lẹ]
[Yẹdide to weda 17]
Evi ma na ayidonugo haṣinṣan etọn hẹ Jehovah
[Yẹdide to weda 18]
Jesu gbẹ́ nuzedonukọnnamẹ Satani tọn dai bo na ayidonugo ojlo Jehovah tọn wiwà
[Yẹdide lẹ to weda 20]
Kunnudide sọn gòhọ de mẹ jẹ devo mẹ to aigba sisọsisọ Haïti tọn godo
To ojlẹ ayimajai tọn lẹ mẹ, mí sọgan lẹhlan “Jiwheyẹwhe homẹmimiọn lẹpo tọn”