“Nugopọntọ Dagbe Podọ Họntọn Vivẹ́ De”

JOHN (JACK) BARR he sẹ̀n taidi dopo to Hagbẹ Anademẹtọ Kunnudetọ Jehovah tọn lẹ tọn mẹ dotana gbẹzan aigba ji tọn etọn to samedi 4 décembre 2010 to afọnnu. Owhe 97 wẹ e tindo. E yin yinyọnẹn taidi “nugopọntọ dagbe podọ họntọn vivẹ́ de.”

Mẹmẹsunnu Barr yin jiji to Aberdeen, Écosse, podọ ewọ wẹ yọpọvu pete to ovi atọ̀n he mẹjitọ etọn lẹ ji lẹ mẹ. Mẹjitọ etọn awe lẹpo wẹ yin mẹyiamisisadode. Mẹmẹsunnu Barr nọ saba dọho gando ovu-whenu etọn to whẹndo mẹ go po homẹhunhun po; e yọ́n pinpẹn apajlẹ dagbe he otọ́ po onọ̀ yiwanna etọn po zedai na ẹn tọn taun.

To whenuena John Barr biọ owhe aflanmẹ tọn mẹ, e nọ vẹawuna ẹn taun nado dọho hẹ mẹhe e ma jẹakọ hẹ lẹ. Ṣigba e dovivẹnu vẹkuvẹku nado duto nuhahun ehe ji, podọ to gbèdopo to dimanche whèmẹ to 1927, whenue e yin owhe 14 mẹvi, e dọna otọ́ etọn dọ emi ko wleawufo nado nọ hodo e to azọ́n yẹwhehodidọ họndekọn-jẹ-họndekọn tọn mẹ. Enẹ wẹ bẹjẹeji owhe susu he e yizan to sinsẹ̀nzọn Jehovah tọn mẹ tọn. Sọn whenẹnu gbọ́n kakajẹ okú Mẹmẹsunnu Barr tọn, e gbẹ́ hẹn zohunhun etọn go to wẹndagbe lọ lilá mẹ.

Asidan ylankan de he dibla hù onọ̀ vivẹ́ Mẹmẹsunnu Barr he gbẹ́ pò to jọja mẹ to whenẹnu tọn, hẹn ẹn nado lẹnnupọn sisosiso do nuhe yin lẹndai ogbẹ̀ tọn ji, podọ to 1929, e klan gbẹzan etọn do wiwe na Jehovah bo yí dotẹnmẹ tintan he hundote na ẹn zan nado basi yẹhiadonu klandowiwe enẹ tọn to 1934. Enẹgodo to 1939, e lẹzun dopo to hagbẹ whẹndo Bẹtẹli tọn mẹ to Londres, Angleterre. Lehe gbẹzan sinsẹ̀nzọn whenu-gigọ́ tọn he e basi na owhe 71 bẹjẹeji gbọn niyẹn.

To 29 octobre 1960, Mẹmẹsunnu Barr biọ nuhe e ylọdọ “haṣinṣan họakuẹ titengbe de” mẹ to whenue e wlealọ hẹ Mildred Willett he yin gbehosọnalitọ zohunhunnọ whenu dindẹn tọn podọ mẹdehlan de. Mẹmẹsunnu po Mẹmẹyọnnu Barr po yin yinyọnẹn taidi asu po asi po apajlẹ dagbenọ he yiwanna yedelẹ podọ mọ wẹ yé nọ kakajẹ whenue Mildred dotana gbẹzan aigba ji tọn etọn to octobre 2004. To gbẹzan he Mẹmẹsunnu po Mẹmẹyọnnu Barr po zan taidi asu po asi po mẹ, yé nọ hia apadewhe Biblu tọn dopọ to azán dopodopo ji.

Na mẹhe yọ́n John Barr lẹ, yinkọ etọn na nọ flin yé dọ dawe de tin bo nọ namẹ ayinamẹ nuyọnẹn tọn—he nọ to jlẹkaji bo dọnmẹdogo to whepoponu, bosọ nọ sinai do Owe-wiwe ji gligli. E yin azọ́n sinsinyẹn-watọ podọ nugopọntọ mẹtọnhopọntọ owanyinọ podọ họntọn nugbonọ de. Gblọndo etọn lẹ, hodidọ etọn lẹ po odẹ̀ etọn lẹ po nọ do obá he mẹ e yiwanna nugbo lọ jẹ po haṣinṣan pẹkipẹki he e tindo hẹ Jehovah po hia.

Dile etlẹ yindọ mí na jẹdò Mẹmẹsunnu vivẹ́ mítọn Barr tọn, mí jaya hẹ ẹ, na e ko mọ nunina jọmaku tọn yí wutu—yèdọ lẹblanulọkẹyi de he e ko to nukundo bo nọ saba dọho gandego. Nuhe e to nukundo hugan niyẹn.—1 Kọl. 15:53, 54. a

[Nudọnamẹ odò tọn]