Whẹndo Klistiani lẹ Emi—Mì “Nọ Nukle”
Whẹndo Klistiani lẹ Emi—Mì “Nọ Nukle”
“Mì gbọ mí ni nọ nukle bo gbọṣi lẹnpọn dagbenọ-yinyin mítọn mẹ.”—1 TẸS. 5:6.
1, 2. Etẹwẹ yin bibiọ to hagbẹ whẹndo tọn lẹ si na whẹndo yetọn nido nọ nukle to gbigbọ-liho?
TO WHENUENA apọsteli Paulu to wekanhlan Klistiani Tẹsalonika tọn lẹ gando “azán daho bosọ dobu OKLUNỌ tọn” go, e dọmọ: “Mì mẹmẹsunnu lẹ emi, mì ma tin to zinvlu mẹ, bọ azán enẹ nado wá mì ji dile e nọ yin do na ajotọ lẹ, na mìmẹpo wẹ ovi hinhọ́n tọn lẹ podọ ovi okle tọn lẹ. Mí ma yin ozán tọn kavi zinvlu tọn gba.” Paulu yidogọ dọmọ: “Enẹwutu, to whelọnu lo, mì dike mí damlọn dile mẹhe pò lẹ nọ wà do blo, ṣigba mì gbọ mí ni nọ nukle bo gbọṣi lẹnpọn dagbenọ-yinyin mítọn mẹ.”—Joẹ. 2:31; 1 Tẹs. 5:4-6.
2 Ayinamẹ Paulu tọn na Tẹsalonikanu lẹ wá do gànmẹ titengbe na Klistiani he to gbẹnọ to “ojlẹ opodo lọ tọn” mẹ lẹ. (Dan. 12:4) Dile opodo titonu ylankan ehe tọn to sisẹpọ, Satani to nuhe go e pé lẹpo wà nado lẹ́ sinsẹ̀n-basitọ nugbo susu sọn Jiwheyẹwhe dè. Enẹwutu, nuyọnẹnnu wẹ e yin nado hẹn ayinamẹ Paulu tọn nado gbọṣi nukle to gbigbọ-liho do ayiha mẹ. Eyin whẹndo Klistiani lẹ na penugo nado nọ nukle, nujọnu wẹ e yin dọ hagbẹ whẹndo lọ tọn dopodopo ni hẹn azọngban etọn di sọgbe hẹ Owe-wiwe. To whelọnu lo, adà tẹwẹ asu, asi po ovi lẹ po na yiwà na whẹndo yetọn nido “nọ nukle”?
Asu lẹ Emi—Mì Hodo Apajlẹ “Lẹngbọhọtọ Dagbe lọ” Tọn
3. Sọgbe hẹ 1 Timoti 5:8, etẹwẹ azọngban sunnu tọn taidi tatọ́ whẹndo tọn bẹhẹn?
3 “Sunnu wẹ ota yọnnu tọn,” wẹ Biblu dọ. (1 Kọl. 11:3) Etẹwẹ azọngban sunnu tọn taidi tatọ́ whẹndo tọn bẹhẹn? Owe-wiwe lẹ zinnudo dopo to nuhe azọngban tatọ́-yinyin tọn bẹhẹn lẹ mẹ ji dọmọ: “Eyin mẹdepope ma wleawudaina mẹhe yin etọn titi lẹ, podọ titengbe na mẹhe yin hagbẹ whédo etọn tọn lẹ, ewọ ko mọ́n yise lọ bosọ ylanhu mayisenọ.” (1 Tim. 5:8) Na nugbo tọn, sunnu lẹ dona penukundo whẹndo yetọn go to agbasa-liho. Ṣigba, eyin yé na gọalọna whẹndo yetọn nado nọ nukle to gbigbọ-liho, e ma yin agbasa-liho kẹdẹ wẹ yé na penukundo whẹndo yetọn go te gba. Yé sọ dona jlọ whédo yetọn dote to gbigbọ-liho gbọn alọgigọna hagbẹ whẹndo lọ tọn lẹpo nado hẹn haṣinṣan yetọn hẹ Jiwheyẹwhe lodo dali. (Howh. 24:3, 4) Nawẹ yé sọgan wà ehe gbọn?
4. Etẹwẹ sọgan gọalọna sunnu he jlo na jlọ whédo yetọn dote to gbigbọ-liho lẹ nado tindo kọdetọn dagbe?
4 To whenuena e yindọ “asu wẹ ota na asi etọn dile Klisti yin ota agun lọ tọn do,” sunnu he ko wlealọ lẹ dona nọ lẹnnupọndo lehe Jesu yí tatọ́-yinyin etọn zan do agun lọ ji do bo nọ hodo apajlẹ etọn. (Efe. 5:23) Mì gbọ mí ni gbadopọnna lehe Jesu basi zẹẹmẹ haṣinṣan he tin to ewọ po hodotọ etọn lẹ po ṣẹnṣẹn do tọn. (Hia Johanu 10:14, 15.) Onú tangan tẹwẹ na gọalọna sunnu he jlo na jlọ whédo yetọn dote to gbigbọ-liho lẹ nado tindo kọdetọn dagbe? Nulọ die: Mì plọn nuhe Jesu dọ bo wà taidi “lẹngbọhọtọ dagbe lọ” bo nọ “hodo afọdòmẹ etọn lẹ pẹkipẹki.”—1 Pita 2:21.
5. Obá tẹ mẹ wẹ Lẹngbọhọtọ Dagbe lọ yọ́n agun lọ jẹ?
5 Mì gbọ mí ni pọ́n nuhe tatọ́ whẹndo tọn lẹ sọgan plọn sọn apajlẹ Klisti tọn mẹ. Haṣinṣan he nọ tin to lẹngbọhọtọ de po lẹngbọ etọn lẹ po ṣẹnṣẹn sinai do lehe yé jẹakọ hẹ yedelẹ bo dejido yedelẹ go do ji. Lẹngbọhọtọ nọ yọ́n nulẹpo gando lẹngbọ etọn lẹ go podọ lẹngbọ lẹ lọsu nọ yọ́n lẹngbọhọtọ yetọn bo nọ dejidego. Yé nọ yọ́n ogbè etọn bo nọ setonuna ẹn. “Yẹn yọ́n lẹngbọ ṣie lẹ, lẹngbọ ṣie lẹ sọ yọ́n mi,” wẹ Jesu dọ. E ma tindo oyọnẹn mọmọ tọn poun gando agun lọ go gba. Hogbe Glẹki tọn he yin lilẹdo “yọ́n” to wefọ ehe mẹ dlẹnalọdo “oyọnẹn sisosiso he mẹde tindo.” Mọwẹ, Lẹngbọhọtọ Dagbe lọ yọ́n lẹngbọ etọn lẹ ganji. E yọ́n nuhudo, madogán po nugopipe dopodopo yetọn tọn po. Nudepope ma tin he Apajlẹnọ mítọn ma yọnẹn gando lẹngbọ etọn lẹ go. Podọ lẹngbọ lẹ lọsu yọ́n lẹngbọhọtọ lọ ganji bo nọ dejido nukọntọ-yinyin etọn go.
6. Nawẹ asu lẹ sọgan hodo apajlẹ Lẹngbọhọtọ Dagbe lọ tọn gbọn?
6 Na asu lẹ nido hẹn tatọ́-yinyin yetọn di dile Klisti wà do, yé dona plọn nado nọ pọ́n yede hlan taidi lẹngbọhọtọ podọ mẹhe go yé to nukunpedo lẹ taidi lẹngbọ lẹ. Yé dona tẹnpọn nado yọ́n whẹndo yetọn ganji. Be ehe sọgan pà asu lẹ ya? Mọwẹ, eyin yé nọ dọhodopọ hẹ hagbẹ whẹndo tọn yetọn lẹpo, nọ dotoaina ahunmẹdunamẹnu yetọn lẹ, nọ yin tọ́ntlọ́ngbọ́n to nuwiwa whẹndo tọn lẹ mẹ, bo nọ dovivẹnu nado basi nudide dagbe lẹ gando sinsẹ̀n-bibasi whẹndo tọn, opli lẹ yìyì, kunnudegbe, po ayidedai po go. Eyin asu Klistiani lẹ nọ yí sọwhiwhe do plọn nuhe Ohó Jiwheyẹwhe tọn dọ bo jẹakọ hẹ hagbẹ whẹndo tọn yetọn lẹ ganji nado sọgan ze apajlẹ dagbe dai na yé bosọ nọ basi nudide nuyọnẹn tọn lẹ, ayihaawe ma tin dọ hagbẹ whẹndo tọn yetọn lẹ na dejido tatọ́-yinyin yetọn go podọ homẹ asu lẹ lọsu tọn na hùn nado mọdọ hagbẹ whẹndo tọn yetọn lẹ hẹn pọninọ go to sinsẹ̀n-bibasi nugbo mẹ.
7, 8. Na nuhe dù owanyi sisosiso didohia mẹhe go asu lẹ to nukunpedo lẹ, nawẹ yé sọgan hodo apajlẹ Lẹngbọhọtọ Dagbe lọ tọn gbọn?
7 Lẹngbọhọtọ dagbe de sọ nọ tindo owanyi sisosiso na lẹngbọ etọn lẹ. Dogbigbapọnna kandai owe Wẹndagbe lẹ tọn gando gbẹzan po lizọnyizọn Jesu tọn po go na whàn mí nado yọ́n pinpẹn owanyi sisosiso he Jesu dohia devi etọn lẹ tọn. E tlẹ sọ ‘ze alindọn etọn jo do ota lẹngbọ lẹ tọn mẹ.’ Asu lẹ dona nọ hodo apajlẹ Jesu tọn bo nọ do owanyi sisosiso hia mẹhe go yé to nukunpedo lẹ. Kakati nado nọ paṣẹ glanglan do asi etọn ji, asu he jlo na mọ nukundagbe Jiwheyẹwhe tọn na nọ yiwanna asi etọn “kẹdẹdile Klisti yiwanna agun lọ do.” (Efe. 5:25) E dona nọ do homẹdagbe po mẹtọnhopọn po hia to hogbe etọn lẹ mẹ, na asi etọn jẹna gbégbò.—1 Pita 3:7.
8 Tatọ́ whẹndo tọn lẹ dona tẹdo nunọwhinnusẹ́n Jiwheyẹwhe tọn lẹ go gligli dile yé to ovi lẹ plọn. Etomọṣo, yé ma dona gboawupo nado nọ do owanyi sisosiso hia ovi yetọn lẹ. Mẹplọnlọ he jẹ dona nọ yin dido yé go po owanyi po. E sọgan yí whenu susu to ovi delẹ si nado mọnukunnujẹ nuhe mẹjitọ lẹ to bibiọ to yé si mẹ hugan ovi devo lẹ. To whẹho mọnkọtọn mẹ, otọ́ lẹ dona nọ fahomẹ taun. Eyin sunnu lẹ hodo apajlẹ Jesu tọn pẹkipẹki, hagbẹ whẹndo tọn yetọn lẹ na nọ voawu. Whẹndo yetọn na duvivi hihọ́ gbigbọmẹ tọn he nkọ Psalm-kantọ lọ jihàn gandego tọn.—Hia Psalm 23:1-6.
9. Taidi tọgbo Noa, azọngban tẹwẹ asu Klistiani lẹ tindo, podọ etẹwẹ na gọalọna yé nado hẹn ẹn di?
9 Apajlẹ dagbenọ devo na tatọ́ whẹndo Klistiani lẹ tọn wẹ Noa. Tọgbo Noa nọgbẹ̀ to ojlẹ opodo tọn aihọn azán etọn gbè tọn mẹ. Ṣigba Jehovah whlẹn ẹn gán ‘po omẹ ṣinawe devo lẹ po to whenuena e hẹn singigọ wá aihọn omẹ jijọ-madi-Jiwheyẹwhe tọn lẹ tọn de ji.’ (2 Pita 2:5) Azọngban Noa tọn wẹ nado gọalọna whẹndo etọn nado lùn Singigọ lọ tọ́n. Ninọmẹ dopolọ mẹ wẹ tatọ́ whẹndo Klistiani tọn lẹ tin te to azán godo tọn ehelẹ mẹ. (Mat. 24:37) Podọ yé sọgan gọalọna whẹndo yetọn kiki eyin yé plọnnu sọn nuyiwa Lẹngbọhọtọ Dagbe lọ tọn mẹ bo dovivẹnu nado hodo apajlẹ etọn.
Asi lẹ Emi—‘Mì Jlọ Whédo Mìtọn Dote’
10. Etẹwẹ e zẹẹmẹdo na asi de nado yin mẹmẹglọ na asu etọn?
10 Apọsteli Paulu wlan dọmọ: “Mì gbọ asi lẹ ni nọ yin mẹmẹglọ hlan asu yetọn taidi hlan Oklunọ.” (Efe. 5:22) Wefọ enẹ ma to didohia dọ otẹn he yìdo pete de mẹ wẹ yọnnu lẹ te gba. Whẹpo Jiwheyẹwhe nugbo lọ do dá yọnnu tintan lọ, Evi, e dọmọ: “E ma yọ́n na sunnu lọ ni yin dopo kẹdẹ gba, yẹn na hẹn ẹn basi alọgọtọ de he jẹ na ẹn.” (Gẹn. 2:18) Na nugbo tọn, azọngban yẹyi tọn de wẹ asi de tindo nado yin “alọgọtọ” asu etọn tọn gbọn godoninọna ẹn dali dile asu lọ to azọngban whẹndo tọn etọn lẹ hẹndi.
11. Nawẹ asi apajlẹ dagbenọ de nọ ‘jlọ whédo etọn dote’ gbọn?
11 Asi apajlẹ dagbenọ de nọ dín dagbemẹninọ whédo etọn tọn. (Hia Howhinwhẹn lẹ 14:1.) To vogbingbọn mẹ na yọnnu nulunọ he ma nọ do sisi hia tito tatọ́-yinyin tọn, yọnnu nuyọnẹntọ nọ do sisi sisosiso hia tito tatọ́-yinyin tọn. Kakati nado nọ do gbigbọ tolivivẹ po mẹdekannujẹ tọn he gbayipe to aihọn lọ mẹ po hia, asi nuyọnẹntọ nọ litaina asu etọn. (Efe. 2:2) Asi he yin nulunọ ma nọ whleawu nado dọho ylankan gando asu etọn go, ṣigba yọnnu nuyọnẹntọ nọ tẹnpọn nado yidogọna sisi he ovi etọn lẹ po mẹdevo lẹ po nọ tindo na asu etọn. Asi mọnkọtọn nọ họ́ ede ma nado de sisi he asu etọn he yin tatọ́ etọn jẹna pò gbọn nutitlọ kavi nudindọn hẹ ẹ dali. E sọ nọ dowénanu taun. Yọnnu nulunọ sọgan zan nuhe whẹndo lọ jiya do dín lẹ do apà mẹ. Asi he nọ nọgodona asu etọn ma nọ wàmọ gba. E nọ kọngbedopọ hẹ asu etọn to whẹho akuẹzinzan tọn lẹ mẹ. Aliho he mẹ yọnnu de nọ yinuwa po zinzin po bo nọ dowénanu te wẹ nọ dohiagona ẹn taidi nuyọnẹntọ. E ma nọ gbidikọna asu etọn nado wà gàngodo-zọ́n.
12. Nawẹ asi de sọgan gọalọna whẹndo etọn nado “nọ nukle” gbọn?
12 Asi apajlẹ dagbenọ nọ gọalọna whẹndo etọn nado “nọ nukle” gbọn alọgigọna asu etọn nado plọnnu ovi lẹ gando Jehovah go dali. (Howh. 1:8) E nọ yí zohunhun do nọgodona tito sinsẹ̀n-bibasi whẹndo tọn. Humọ, e nọ nọgodona asu etọn to whenuena e to ayinamẹ na ovi yetọn lẹ bo to mẹplọnlọ do yé go. Lehe e gbọnvona asi he ma nọ kọngbedopọ hẹ asu etọn, mẹhe ovi etọn lẹ nọ jiya to agbasa-liho podọ to gbigbọ-liho do sọ!
13. Naegbọn e yin nujọnu dọ asi de ni nọgodona asu etọn dile asu lọ hẹn alọnu etọn ján to nuwiwa yẹwhehọluduta tọn lẹ mẹ?
13 Numọtolanmẹ tẹwẹ asi he nọ nọgodona asu etọn nọ tindo dile asu etọn yí zohunhun do to azọngban agun tọn lẹ hẹndi? Homẹ etọn nọ hùn taun! Vlavo asu etọn yin devizọnwatọ lizọnyizọnwiwa tọn, mẹho agun tọn, kavi vlavo dopo to hagbẹ Wedegbẹ́ Whẹgbọtọ Dotowhé tọn kavi Wedegbẹ́ Họgbigbá Tòpọnla tọn lẹ mẹ, e nọ hùnhomẹ do lẹblanulọkẹyi asu etọn tọn go. E họnwun dọ e nọ biọ avọ́sinsan to e si nado nọgodona asu etọn to ohó po nuyiwa etọn lẹ po mẹ. Ṣigba e yọnẹn dọ dile asu emitọn hẹn alọnu ján to nuwiwa yẹwhehọluduta tọn lẹ mẹ, enẹ nọ gọalọna whẹndo lọ blebu nado gbọṣi nukle to gbigbọ-liho.
14. (a) Whetẹnu wẹ e sọgan vẹawuna asi de nado nọgodona asu etọn, podọ nawẹ asi lọ sọgan pehẹ ninọmẹ ehe gbọn? (b) Nawẹ asi de nọ yidogọna dagbemẹninọ whẹndo lọ blebu tọn gbọn?
14 E sọgan vẹawuna asi de nado nọgodona asu etọn eyin sunnu lọ basi nudide de he ma jẹ etọn ji. Etomọṣo, e nọ do “gbigbọ abọẹninọ po walọmimiọn tọn po” hia bo nọ kọngbedopọ hẹ asu lọ na nudide etọn nido tindo kọdetọn dagbe. (1 Pita 3:4) Asi dagbe de nọ tẹnpọn nado hodo apajlẹ dagbe yọnnu jijọ-di-Jiwheyẹwhe hohowhenu tọn lẹ taidi Sala, Luti, Abigaili po Malia, onọ̀ Jesu tọn po tọn. (1 Pita 3:5, 6) E sọ nọ hodo apajlẹ yọnnu mẹhomẹ egbezangbe tọn he “tindo budisi to walọ mẹ” lẹ tọn. (Titu 2:3, 4) Asi apajlẹ dagbenọ de nọ yidogọna kọdetọn dagbe alọwle etọn tọn po dagbemẹninọ whẹndo lọ blebu tọn po gbọn owanyi po sisi didohia asu etọn po dali. Hagbẹ whẹndo tọn etọn lẹ nọ voawu. Asu gbigbọnọ de nọ yọ́n pinpẹn godonọnamẹ asi etọn tọn taun!—Howh. 18:22.
Jọja lẹ Emi—‘Mì Ze Nukun Mìtọn lẹ Do Nuhe Ma Nọ Yin Mimọ lẹ Ji’
15. Nawẹ jọja lẹ sọgan kọngbedopọ hẹ mẹjitọ yetọn lẹ na whẹndo yetọn nido “nọ nukle” to gbigbọ-liho gbọn?
15 Nawẹ mì jọja lẹ sọgan kọngbedopọ hẹ mẹjitọ mìtọn lẹ na whẹndo mìtọn nido “nọ nukle” to gbigbọ-liho gbọn? Mì lẹnnupọndo ale he Jehovah zedonukọnna mì ji. Vlavo sọn ovu whenu gbọ́n wẹ mẹjitọ mìtọn lẹ na ko do yẹdide lehe gbẹninọ na te to Paladisi mẹ do tọn lẹ hia mì. Dile mì to whinwhẹ́n, e yọnbasi dọ yé ni ko nọ yí Biblu po owe sinai do Biblu ji lẹ po do gọalọna mì, na mì nido yí nukun homẹ tọn do pọ́n lehe ogbẹ̀ madopodo na te do to aihọn yọyọ lọ mẹ. Eyin mì ze nukun mìtọn do sinsẹ̀n-bibasi hlan Jehovah ji bo nọgbẹ̀ sọgbe hẹ ẹ, enẹ na gọalọna mì nado “nọ nukle.”
16, 17. Etẹwẹ jọja lẹ sọgan wà nado họ̀n alewezun lọ jẹ vivọnu?
16 Mì hẹn hogbe apọsteli Paulu tọn he tin to 1 Kọlintinu lẹ 9:24 mẹ lẹ do ayiha mẹ. (Hia.) Apọsteli Paulu yí sinsẹ̀n-bibasi mítọn hlan Jehovah jlẹdo wezun de go ehe ogbẹ̀ madopodo yin ale etọn. Dile mì to wezun ogbẹ̀ tọn lọ họ̀n, mì magbe sinsinyẹn nado mọ ale lọ yí. Mì ze ali he na plan mì jẹ ale ogbẹ̀ madopodo tọn lọ kọ̀n. Mẹsusu ko dike afọdidona agbasanu lẹ ni fẹayihasẹna yé sọn ale lọ ji. Nulunu nankọ die! Gbẹzan mẹtọn blebu yíyí do doafọna adọkun ma nọ hẹn ayajẹ nujọnu tọn wá gba. Nuhe akuẹ nọ họ̀ lẹ ma nọ dẹn-to-aimẹ. Enẹwutu, mì ze nukun mìtọn lẹ do “nuhe ma nọ yin mimọ lẹ ji.” Etẹwutu? Na “nuhe ma nọ yin mimọ lẹ yin madopodo tọn.”—2 Kọl. 4:18.
17 “Nuhe ma nọ yin mimọ lẹ” bẹ dona Ahọluduta lọ tọn lẹ hẹn. Mì dike lehe mì to gbẹzan mìtọn zan do ni gọalọna mì nado mọ dona enẹlẹ yí. Gbẹzan mẹtọn yíyí do sẹ̀n Jehovah wẹ nọ hẹn ayajẹ nujọnu tọn wá. Sinsẹ̀n-bibasi hlan Jiwheyẹwhe nugbo lọ nọ hùn dotẹnmẹ dotenamẹ nado jẹ yanwle whenu-gli po whenu-gaa tọn lẹ po kọ̀n. a Enẹwutu, eyin mì ze yanwle dagbe gbigbọmẹ tọn lẹ donukọnna mìde, enẹ na gọalọna mì nado na ayidonugo sinsẹ̀n-bibasi hlan Jiwheyẹwhe bo gbọnmọ dali jẹ ale ogbẹ̀ madopodo tọn lọ kọ̀n.—1 Joh. 2:17.
18, 19. Nawẹ jọja lẹ sọgan yọnẹn eyin yé hẹn nugbo lọ zun yede tọn gbọn?
18 Jọja lẹ emi, afọdide tintan lọ nado mọ ogbẹ̀ madopodo wẹ nado hẹn nugbo lọ zun mìtọn. Be mì ko ze afọdide ehe ya? Kanse dewe dọ: ‘Be n’yin gbẹtọ gbigbọnọ ya, kavi mẹjitọ ṣie lẹ wutu wẹ n’do nọ tindo mahẹ to nuwiwa gbigbọmẹ tọn lẹ mẹ? Be n’nọ wleawuna jẹhẹnu he na zọ́n bọ homẹ Jiwheyẹwhe tọn na hùn do go e lẹ ya? Be n’nọ dovivẹnu vẹkuvẹku nado tindo mahẹ to nuwiwa gbigbọmẹ tọn he gando sinsẹ̀n-bibasi nugbo go lẹ mẹ taidi dẹ̀hiho, nupinplọn, opli po kunnudegbe yìyì po to gbesisọ mẹ ya? Be n’nọ dọnsẹpọ Jiwheyẹwhe gbọn awuwiwlena haṣinṣan mẹdetiti tọn de hẹ ẹ dali ya?’—Jak. 4:8.
19 Mì lẹnnupọndo apajlẹ Mose tọn ji. Dile etlẹ yindọ aṣa otò devo tọn mẹ wẹ Mose whẹ́n te, e de nado yin yinyọnẹn taidi sinsẹ̀n-basitọ Jehovah tọn kakati nido yin visunnu viyọnnu Falo tọn. (Hia Heblu lẹ 11:24-27.) Jọja Klistiani lẹ emi, mìlọsu dona magbe nado sẹ̀n Jehovah po nugbonọ-yinyin po. Eyin mì wàmọ, mì na tindo ayajẹ nujọnu tọn, gbẹzan mìtọn na pọnte dogọ todin, podọ mì nasọ tindo todido lọ nado tẹdo “ogbẹ̀ nujọnu tọn lọ go gligli.”—1 Tim. 6:19.
20. Na nuhe dù alewezun ogbẹ̀ tọn lọ, mẹnu lẹ wẹ na mọ ale lọ yí?
20 To mẹhe nọ họ̀n alewezun to hohowhenu lẹ mẹ, mẹdopo gee wẹ nọ mọ ale lọ yí. Ṣigba alewezun ogbẹ̀ tọn lọ tọn ma yinmọ. Ojlo Jiwheyẹwhe tọn wẹ “yindọ gbẹtọ wunmẹ lẹpo ni yin whinwhlẹngán bo wá oyọnẹn he pegan nugbo tọn kọ̀n.” (1 Tim. 2:3, 4) Mẹsusu wẹ ko họ̀n alewezun lọ jẹ vivọnu, podọ mẹsusu devo lẹ gbẹsọ to wezun lọ họ̀n hẹ mì. (Heb. 12:1, 2) Mẹhe ma jogbe lẹpo wẹ na mọ ale lọ yí. Enẹwutu, mì magbe nado họ̀n alewezun lọ kakajẹ vivọnu!
21. Etẹwẹ mí na gbadopọnna to hosọ he bọdego mẹ?
21 “Azán daho osinọ OKLUNỌ tọn lọ” na wá dandan. (Mal. 4:5) Azán enẹ ma dona wá whẹndo Klistiani lẹ ji to ajiji mẹ gba. Nujọnu wẹ e yin dọ hagbẹ whẹndo tọn lẹpo ni hẹn azọngban yetọn di sọgbe hẹ Owe-wiwe. Nudevo tẹlẹ wẹ na gọalọna mì nado gbọṣi nukle to gbigbọ-liho bo hẹn haṣinṣan mìtọn hẹ Jiwheyẹwhe lodo? Hosọ he bọdego na dọhodo onú atọ̀n he nọ yidogọna dagbemẹninọ gbigbọmẹ tọn whẹndo lẹ tọn ji.
[Nudọnamẹ odò tọn]
a Pọ́n Atọ̀họ̀-Nuhihọ́ lọ Tọn 15 novembre 2010, weda 12-16; 15 juillet 2004, weda 21-23.
Etẹwẹ Hiẹ Plọn?
• Naegbọn e yin nujọnu na whẹndo Klistiani lẹ nado “nọ nukle”?
• Nawẹ asu lẹ sọgan hodo apajlẹ Lẹngbọhọtọ Dagbe lọ tọn gbọn?
• Etẹwẹ asi apajlẹ dagbenọ de sọgan wà nado nọgodona asu etọn?
• Nawẹ jọja lẹ sọgan kọngbedopọ hẹ mẹjitọ yetọn lẹ na whẹndo yetọn nido gbọṣi nukle to gbigbọ-liho gbọn?
[Kanbiọ Oplọn tọn lẹ]
[Yẹdide to weda 9]
Asu gbigbọnọ de nọ yọ́n pinpẹn godonọnamẹ asi etọn tọn taun