Whẹndo Klistiani lẹ Emi—“Mì Wleawudai”
Whẹndo Klistiani lẹ Emi—“Mì Wleawudai”
“Mì wleawudai, na e yọnbasi dọ ogàn he mẹ mì ma lẹn do wẹ Visunnu gbẹtọ tọn ja.”—LUKU 12:40.
1, 2. Naegbọn mí dona hẹn tudohomẹnamẹ Jesu tọn nado “wleawudai” do ayiha mẹ?
“TO WHENUENA Visunnu gbẹtọ tọn na wá to gigo etọn mẹ” bo na klan “gbẹtọ lẹ dovo, yèdọ ode sọn awetọ go,” etẹwẹ na jọ do hiẹ po whẹndo towe po go? (Mat. 25:31, 32) To whenuena e yindọ ogàn he mẹ mí ma lẹn do wẹ ehe na jọ, lehe e yin nujọnu dọ mí ni hẹn tudohomẹnamẹ Jesu tọn nado “wleawudai” do ayiha mẹ do sọ!—Luku 12:40.
2 To hosọ he jẹnukọn mẹ, mí mọ lehe hagbẹ whẹndo tọn dopodopo sọgan gọalọna whẹndo lọ nado gbọṣi nukle to gbigbọ-liho do gbọn nukun nujọnu tọn yíyí do pọ́n azọngban etọn dali. Mì gbọ mí ni gbadopọnna aliho devo he mẹ mí sọgan yidogọna dagbemẹninọ gbigbọmẹ tọn whẹndo mítọn tọn te lẹ.
Hẹn Nukun Towe “Tin to Fidopo”
3, 4. (a) Etẹwẹ whẹndo Klistiani lẹ dona họ́ yede sọta? (b) Etẹwẹ e zẹẹmẹdo nado hẹn nukun mítọn “tin to fidopo”?
3 Nado wleawudaina wiwá Klisti tọn, whẹndo lẹ dona họ́ yede ma nado yin ayihafẹsẹna sọn nuhe gando sinsẹ̀n-bibasi nugbo go lẹ ji. Yé dona to aṣeji ma nado dike ayidedai lẹ ni fẹayihasẹna yé. To whenuena e yindọ whẹndo susu wẹ ko jai jẹ omọ̀ agbasanu lẹ bibẹpli tọn mẹ, mì gbọ mí ni gbadopọnna nuhe Jesu dọ gando nukun mítọn hinhẹn “tin to fidopo” go. (Hia Matiu 6:22, 23.) Kẹdẹdile miyọ́ngbán nọ tá hinhọ́n do omọ́-liho ji bo nọ gọalọna mí ma nado klẹnafọ bo jai do, mọ wẹ nuhe ‘nukun yẹhiadonu tọn ahun mítọn tọn’ nọ mọ lẹ sọgan gọalọna mí ma nado dahli do niyẹn.—Efe. 1:18.
4 To paa mẹ, eyin nukun mítọn na mọ nude ganji, e dona to azọ́nwa ganji bo nasọ to nulọ ji dín in. Nudopolọ wẹ gando nukun ahun mítọn tọn go. To yẹhiadonu-liho, nado hẹn nukun mítọn tin to fidopo zẹẹmẹdo nado ze ayiha mítọn do yanwle dopo ji. Kakati nado nọ yí gbẹzan mítọn lẹpo do doafọna agbasanu lẹ bo nọ dike nuhudo whẹndo tọn mítọn lẹ ni nọ duahunmẹna mí zẹjlẹgo, mí nọ ze nukun mítọn do gbigbọnu lẹ ji. (Mat. 6:33) Ehe zẹẹmẹdo dọ nutindo agbasa tọn mítọn lẹ ni pekọna mí podọ dọ mí ni ze sinsẹ̀n-bibasi hlan Jiwheyẹwhe do otẹn tintan mẹ.—Heb. 13:5.
5. Etẹwẹ awhli de wà nado dohia dọ “nukun” etọn tin to sinsẹ̀nzọn Jiwheyẹwhe tọn ji?
5 Lehe e nọ yin alenu to whenue mẹjitọ lẹ plọn ovi yetọn lẹ nado ze nukun yetọn do fidopo do sọ! Mì gbọ mí ni lẹnnupọndo apajlẹ awhli de tọn ji, he nọ nọ̀ otò Ethiopie tọn mẹ. Na e nọ wazọ́n ganji to wehọmẹ wutu, whenuena e fó wehọmẹ, e mọ gbedewema yí nado yì plọnwe dogọ vọnu. Ṣigba, na e ze nukun etọn do sinsẹ̀nzọn Jehovah tọn ji wutu, e gbẹ́ nuzedonukọnnamẹ ehe dai. Ojlẹ kleun de to enẹgodo, e mọ azọ́n de he sunmẹ-kuẹ etọn yì euros 3000 (nudi 1968000F CFA), yèdọ azọ́nkuẹ he yiaga taun yijlẹdo dehe gbẹtọ lẹ nọ dù to paa mẹ to otò lọ mẹ go. Ṣigba sinsẹ̀nzọn gbehosọnalitọ tọn ji wẹ awhli lọ ze “nukun” etọn do. E ma tlẹ kanhose mẹjitọ etọn lẹ whẹpo do gbẹ́ azọ́n lọ dai. Numọtolanmẹ tẹwẹ mẹjitọ awhli lọ tọn lẹ tindo to whenue yé sè nuhe viyọnnu yetọn wà? Homẹ yetọn hùn do viyọnnu yetọn go taun bọ yé dọna ẹn dọ emi doawagun to nuhe e wà lọ mẹ!
6, 7. Owù tẹ go wẹ ‘nukun mítọn dona to hùnhùn’ gando?
6 Jesu na avase he họnwun gando nukunkẹn go to Matiu 6:22, 23 mẹ. Jesu ma dohia dọ nukun he ma “tin to fidopo” “doglẹ” gba, kakatimọ dọ e yin “ylankan.” Hogbe Glẹki tọn he yin lilẹdo “ylankan” sọ sọgan zẹẹmẹdo “nukunkẹn.” (Mat. 6:23) Etẹwẹ yin pọndohlan Jehovah tọn gando nukunkẹn go? “Mì gbọ galilọ po mawé wunmẹ lẹpo po kavi nukunkẹn ni ma tlẹ yin nùdego to ṣẹnṣẹn mìtọn blo,” wẹ Biblu dọ.—Efe. 5:3.
7 E nọ bọawu nado mọdọ mẹdevo lẹ yin nukunkẹnnọ, ṣigba mílọsu ma nọ yawu doayi e go dọ mí yin nukunkẹnnọ. Enẹwutu, nuyọnẹnnu wẹ e yin nado hodo ayinamẹ Jesu tọn dọmọ: “Mì hùn nukun mìtọn lẹ bo họ́ mìde sọta nukunkẹn wunmẹ lẹpo.” (Luku 12:15) Mọwiwà biọ dọ mí ni gbeje míde pọ́n nado yọ́n nuhe ji mí nọ ze ayiha do. Whẹndo Klistiani lẹ dona yí sọwhiwhe do lẹnnupọndo whenu podọ akuẹ he yé nọ zan na ayidedai po nutindo agbasa tọn lẹ po ji.
8. Nawẹ ‘nukun mítọn sọgan nọ hùnhùn’ gando nuhihọ go gbọn?
8 Nado họ̀ nude bẹ nususu hẹn hugan nado yọnẹn eyin a na penugo nado họ̀ nulọ kavi lala. Lẹnnupọndo kanbiọ ehelẹ ji: ‘Be n’na tindo whenu nado nọ zan nuhe n’họ̀ lọ whẹwhẹ bosọ penukundego ya? Nawẹ e na dẹnsọ whẹpo n’na do yọ́n alọ nuhe n’họ̀ lọ tọn ganji?’ Jọja lẹ emi, mì ma nọ yí ajọjijla aihọn tọn lẹpo sè bo gbọnmọ dali basi nudide nulú tọn nado họ̀ avọ̀ kavi nuyọyọ he to zoji bo vẹakuẹ lẹ blo. Mì nọ duto mìde ji. Humọ, mì nọ lẹnnupọn nado yọnẹn eyin nuhe mì jlo na họ̀ lọ na gọalọna whẹndo mìtọn nado wleawudaina wiwá Visunnu gbẹtọ tọn. Mì dejido opagbe Jehovah tọn go dọmọ: “Yẹn ma na jo mì do to aliho depope mẹ kavi gbẹ́ mì dai to aliho depope mẹ.”—Heb. 13:5.
Nọ Doafọna Yanwle Gbigbọmẹ Tọn Lẹ
9. Etẹwẹ yanwle gbigbọmẹ tọn lẹ zizedai sọgan gọalọna whẹndo lẹ nado wà?
9 Aliho devo he mẹ hagbẹ whẹndo tọn lẹ sọgan hẹn yise yetọn lodo bo yidogọna dagbemẹninọ gbigbọmẹ tọn whẹndo lọ blebu tọn te wẹ nado ze yanwle gbigbọmẹ tọn lẹ dai bosọ doafọna yé. Mọwiwà na gọalọna whẹndo lẹ nado yọ́n fie yé yinukọn to sinsẹ̀nzọn Jehovah tọn mẹ jẹ podọ e nasọ hẹn yé penugo nado mọdona nuhe yin nujọnu hugan lẹ.—Hia Filippinu lẹ 1:10.
10, 11. Taidi whẹndo de, yanwle gbigbọmẹ tọn tẹlẹ wẹ mì to afọdona to alọnu, podọ yanwle devo tẹlẹ wẹ mì jlo na zedai?
10 Yanwle dagbe whenu-gli tọn he kọ̀n hagbẹ whẹndo tọn lẹpo sọgan jẹ lẹ zizedai tlẹ sọgan hẹn ale susu wá. Di apajlẹ, mì gbọ mí ni lẹnnupọndo yanwle lọ nado nọ gbadopọnna wefọ egbesọ tọn to gbesisọ mẹ ji. Zẹẹmẹ he hagbẹ whẹndo lọ tọn lẹ nọ basi sọgan gọalọna tatọ́ whẹndo tọn lọ nado yọ́n obá he mẹ yé whèwhín jẹ to gbigbọ-liho. Yanwle lọ nado nọ hia Biblu dopọ to gbesisọ mẹ to whẹndo mẹ nọ gọalọna ovi lẹ nado hẹn wehihia po nukunnumọjẹnumẹ yetọn gando owẹ̀n Biblu tọn go po pọnte dogọ. (Ps. 1:1, 2) Humọ, be e ma jẹ dọ mí ni yí i do dó yanwle nado hẹn odẹ̀ mítọn lẹ pọnte dogọ ya? Yanwle dagbe devo he mí sọgan zedai wẹ nado wleawuna adà sinsẹ́n gbigbọ tọn lẹ to gigọ́ mẹ. (Gal. 5:22, 23) Kavi etẹwẹ dogbọn dotẹnmẹ hundote lẹ dindin nado nọ vẹawu mẹhe mí nọ dukosọ hẹ to lizọnyizọn lọ mẹ lẹ dali? Eyin whẹndo lẹ nọ dovivẹnu nado jẹ yanwle ehelẹ kọ̀n, e sọgan gọalọna ovi lẹ nado plọn lehe yè nọ do awuvẹmẹ hia do, podọ e yọnbasi dọ yé ni wleawuna ojlo lọ nado sẹ̀n taidi gbehosọnalitọ whepoponu tọn kavi mẹdehlan.
11 Naegbọn hiẹ po whẹndo towe po ma na lẹnnupọndo yanwle he mì sọgan doafọna delẹ ji? Be whẹndo towe sọgan ze yanwle lọ dai nado nọ yí whenu susu dogọ zan to lizọnyizọn lọ mẹ ya? Be hiẹ sọgan ze yanwle lọ dai nado wleawuna adọgbigbo nado nọ dekunnu to alokan ji, dekunnu to tòhomẹ-liho ji kavi to ajọwatẹn lẹ ya? Etẹwẹ dogbọn sinsẹ̀n to fie nuhudo wẹnlatọ Ahọluduta lọ tọn lẹ sù te dali? Be dopo to hagbẹ whẹndo tọn mìtọn lẹ mẹ sọgan plọn ogbè yọyọ de nado sọgan lá wẹndagbe lọ na mẹhe wá sọn otò devo mẹ lẹ ya?
12. Etẹwẹ tatọ́ whẹndo tọn lẹ sọgan wà na hagbẹ whẹndo tọn yetọn lẹ nido whèwhín to gbigbọ-liho?
12 Taidi tatọ́ whẹndo tọn de, doayi adà he mẹ whẹndo towe sọgan yinukọn to gbigbọ-liho te lẹ go. Enẹgodo, mì ze yanwle tangan he kọ̀n mì sọgan jẹ lẹ dai. Yanwle he mì zedai to whẹndo mẹ lẹ dona sọgbe hẹ lẹnpọn dagbe, na mì nido sọgan jẹ yé kọ̀n sọgbe hẹ ninọmẹ po nugopipe mìtọn po. (Howh. 13:12) Na nugbo tọn, vivẹnudido nado jẹ yanwle dagbe de kọ̀n nọ biọ whenu. Enẹwutu, mì fli ojlẹ he mì nọ yizan na televiziọn pinpọn nado jẹ yanwle gbigbọmẹ tọn lẹ kọ̀n. (Efe. 5:15, 16) Mì dovivẹnu vẹkuvẹku nado jẹ yanwle he mì zedai to whẹndo mìtọn mẹ lẹ kọ̀n. (Gal. 6:9) Eyin whẹndo de nọ doafọna yanwle gbigbọmẹ tọn lẹ, nukọnyiyi etọn na “họnwun na gbẹtọ lẹpo.”—1 Tim. 4:15.
Tẹdo Sinsẹ̀n-Bibasi Whẹndo Tọn Go
13. Diọdo tẹwẹ wá aimẹ gando opli sẹmẹsẹmẹ tọn lẹ go, podọ kanbiọ tẹlẹ ji wẹ mí dona lẹnnupọndo?
13 Na taun tọn, nuhe na gọalọna whẹndo lẹ nado ‘wleawudaina’ wiwá Visunnu gbẹtọ tọn wẹ diọdo ayidego tọn he wá aimẹ gando opli sẹmẹsẹmẹ tọn lẹ go to 1er janvier 2009. Mí masọ nọ pli to azán devo ji to osẹ lọ mẹ na opli he nọ yin yiylọdọ Oplọn Agunwe to dai ba. Todin, opli ehe ko yin kinkọndopọ hẹ Wehọmẹ Lizọnyizọn Yẹwhehọluduta tọn po Opli Sinsẹ̀nzọn tọn po. Diọdo enẹ wá aimẹ na whẹndo Klistiani lẹ nido hẹn gbigbọnọ-yinyin yetọn pọnte dogọ gbọn whèjai tangan de didedovo na sinsẹ̀n-bibasi whẹndo tọn to sẹmẹsẹmẹ dali. Todin he ojlẹ delẹ ko juwayi sọn whenue gbọ́n diọdo enẹ wá aimẹ, mí sọgan kanse míde dọ: ‘Be n’tẹdo tito sinsẹ̀n-bibasi whẹndo tọn kavi oplọn mẹdetiti tọn lọ go ya? Be n’nọ jẹ yanwle tito enẹ tọn kọ̀n ya?’
14. (a) Etẹwẹ yin lẹndai tintan he wutu mí dona tẹdo sinsẹ̀n-bibasi whẹndo tọn kavi oplọn mẹdetiti tọn go? (b) Naegbọn whèjai tangan de didedovo na nupinplọn do yin dandannu?
14 Lẹndai tintan he wutu mí dona tẹdo sinsẹ̀n-bibasi whẹndo tọn kavi oplọn mẹdetiti tọn go wẹ nado dọnsẹpọ Jiwheyẹwhe dogọ. (Jak. 4:8) Eyin mí nọ yí whenu zan nado plọn Biblu to gbesisọ mẹ, bo tindo oyọnẹn sisosiso gando Mẹdatọ lọ go, haṣinṣan he mí tindo hẹ ẹ na sinyẹn deji. Lehe mí dọnsẹpọ Jehovah dogọ sọ, mọ wẹ mí na yin whinwhàn nado ‘yí ahun mítọn lẹpo, alindọn mítọn lẹpo, ayiha mítọn lẹpo, podọ huhlọn mítọn lẹpo’ do yiwanna ẹn do niyẹn. (Malku 12:30) Na nugbo tọn, apàpà nọ sọ́ mí nado setonuna Jiwheyẹwhe bo hodo apajlẹ etọn. (Efe. 5:1) Enẹwutu, sinsẹ̀n-bibasi whẹndo tọn go titẹdo yin dandannu nado gọalọna hagbẹ whẹndo tọn lẹpo nado “wleawudai” to gbigbọ-liho dile mí to nukundo “nukunbibia daho” he yin didọdai lọ. (Mat. 24:21) Nujọnu wẹ e yin na whlẹngán.
15. Nuyiwadomẹji tẹwẹ sinsẹ̀n-bibasi whẹndo tọn sọgan tindo do nukun he hagbẹ whẹndo tọn lẹ nọ yí do pọ́n ode awetọ ji?
15 Tito sinsẹ̀n-bibasi whẹndo tọn sọ tindo lẹndai devo—enẹ wẹ nado gọalọna hagbẹ whẹndo tọn lẹ nado dọnsẹpọ ode awetọ dogọ. Whenu yiyizan dopọ nado dọhodo gbigbọnu lẹ ji to sẹmẹsẹmẹ nọ yinuwado nukun he hagbẹ whẹndo tọn lẹ nọ yí do pọ́n ode awetọ ji taun. Lehe alọwlemẹ lẹ nọ vẹ́ dogọ to whenue yé mọ ayajẹ he nọ wá sọn Biblu pinplọn dopọ mẹ do sọ! (Hia Yẹwhehodọtọ 4:12.) E yọnbasi dọ mẹjitọ po ovi he nọ plọnnu to pọmẹ lẹ po ni yin kinkọndopọ to owanyi, yèdọ “gẹdẹ he nọ kọ̀n gbẹtọ lẹ dopọ” mẹ.—Kọl. 3:14.
16. Basi zẹẹmẹ lehe mẹmẹyọnnu atọ̀n to alemọyi sọn tito whèjai de didedovo na Biblu pinplọn mẹ do tọn.
16 Mì gbọ mí ni pọ́n lehe mẹmẹyọnnu atọ̀n mọaleyi sọn whèjai de didedovo na Biblu pinplọn do. Dile etlẹ yindọ asuṣiọsi mẹhomẹ atọ̀n ehelẹ ma yin hẹnnumẹ, tòhò dopolọ mẹ wẹ yé nọ nọ̀ bosọ yin họntọn vivẹ́ na owhe susu. Na yé jlo na vẹ́ dogọ bosọ jlo dọ gbẹdido yetọn ni jlọ yé dote to gbigbọ-liho kakati nido yin gbẹdido paa wutu, yé de whèjai de dovo nado nọ pli dopọ bo plọn Biblu. Yé bẹjẹeji po owe lọ ‘Dekunnu Mlẹnmlẹn’ Gando Ahọluduta Jiwheyẹwhe Tọn Go pinplọn po. Dopo to yé mẹ dọ dọ, “Mí nọ duvivi gbẹdido mítọn tọn sọmọ bọ mí nọ plọnnu hugan gànhiho dopo. Mí nọ yí nukun homẹ tọn do pọ́n ninọmẹ he mẹ mẹmẹsunnu mítọn owhe kanweko tintan tọn lẹ jugbọn lẹ bo nọ dọhodo nuhe mí na wà eyin mí wá pehẹ ninọmẹ yetọn nkọ lẹ ji. Enẹgodo, mí nọ tẹnpọn nado yí nuhe mí plọn lẹ zan to lizọnyizọn lọ mẹ. Ehe zọ́n bọ mí nọ mọ awuvivi to azọ́n Ahọluduta lọ tọn lilá po mẹhẹnzun devi tọn lọ po mẹ bosọ nọ tindo kọdetọn dagbe to e mẹ hugan dai tọn.” Gbọnvona dọ tito nupinplọn tọn ehe hẹn họntọn ehelẹ lodo to gbigbọ-liho, e sọ zọ́n bọ yé vẹ́ dogọ. Yé dọmọ: “Mí yọ́n pinpẹn tito ehe tọn taun.”
17. Etẹlẹ wẹ nọ zọ́n bọ sinsẹ̀n-bibasi whẹndo tọn nọ tindo kọdetọn dagbe?
17 Hiẹ lo? Nawẹ hiẹ to alemọyi sọn whèjai he yin didedovo na sinsẹ̀n-bibasi whẹndo tọn kavi oplọn mẹdetiti tọn mẹ gbọn? Eyin tito lọ nọ súnadu, e ma na jẹ yanwle etọn lẹ kọ̀n gbede. Hagbẹ whẹndo tọn dopodopo dona tin to gbesisọ mẹ nado nọ plọnnu to ojlẹ he yin dedovo lọ mẹ. Numadinu lẹ ma dona nọ jántẹnna tito nupinplọn tọn lọ. Humọ, nuhe ji nupinplọn lọ na sinai do dona sọgbe hẹ nuhudo whẹndo lọ tọn lẹ. Etẹwẹ hiẹ sọgan wà nado hẹn ojlẹ nupinplọn tọn ehelẹ zun awuvivi tọn? Nọ yí aliho nupinplọn tọn he nọ tindo kọdetọn dagbe lẹ zan bo nọ dike hagbẹ whẹndo tọn dopodopo ni nọ voawu bo duvivi nupinplọn lọ tọn.—Jak. 3:18. a
“Nọ Nukle” bo “Wleawudai”
18, 19. Nawẹ yinyọnẹn dọ wiwá Visunnu gbẹtọ tọn ko sẹpọ dona yinuwado hiẹ po whẹndo towe po ji gbọn?
18 Ninọmẹ aihọn lọ tọn he fọ́n bo to yinylan deji to azán mítọn gbè lẹ yin kunnudenu dọ aihọn Satani tọn ko biọ azán godo tọn etọn lẹ mẹ sọn 1914 gbọ́n. Amagẹdọni ko sẹpọ taun. To madẹnmẹ, ojlẹ na sọ na Visunnu gbẹtọ tọn nado hẹn whẹdida Jehovah tọn ṣẹ do mẹylankan lẹ ji. (Ps. 37:10; Howh. 2:21, 22) Be enẹ ma na gando hiẹ po whẹndo towe po go vlavo nẹ?
19 Be hiẹ to ayinamẹ Jesu tọn hodo nado hẹn nukun towe “tin to fidopo” ya? To whenuena e yindọ mẹhe to aihọn mẹ lẹ nọ doafọna adọkun, yindidi kavi ogántẹn, be whẹndo towe to afọdona yanwle gbigbọmẹ tọn lẹ ya? Be tito sinsẹ̀n-bibasi whẹndo tọn kavi oplọn mẹdetiti tọn towe to yìyì ya? Be e to alọgọna hagbẹ whẹndo tọn towe lẹ nado dọnsẹpọ ode awetọ podọ nado dọnsẹpọ Jehovah dogọ ya? Dile hosọ he jẹnukọn dohia do, be hiẹ to azọngban towe hẹndi sọgbe hẹ Owe-wiwe taidi asu, asi kavi ovi bo gbọnmọ dali to alọgọna hagbẹ whẹndo tọn towe lẹpo nado “nọ nukle” ya? (1 Tẹs. 5:6) Eyin mọ wẹ, be hiẹ to ‘awuwledaina’ wiwá Visunnu gbẹtọ tọn niyẹn.
[Nudọnamẹ odò tọn]
a Na nudọnamẹ dogọ gando nuhe na yin pinplọn to sinsẹ̀n-bibasi whẹndo tọn whenu gọna lehe e na hẹn ale po awuvivi po wá na hagbẹ whẹndo tọn lẹ do go, pọ́n Atọ̀họ̀-Nuhihọ́ lọ Tọn, 15 octobre 2009, weda 29-31.
Etẹwẹ Hiẹ Plọn?
• Basi zẹẹmẹ lehe whẹndo Klistiani lẹ sọgan “wleawudai” do tọn gbọn . . .
nukun hinhẹn “tin to fidopo” dali.
yanwle gbigbọmẹ tọn lẹ zizedai po afọdidona yé po dali.
titẹdo sinsẹ̀n-bibasi whẹndo tọn go dali.
[Kanbiọ Oplọn tọn lẹ]
[Yẹdide to weda 13]
Nukun he “tin to fidopo” na whàn mí nado nọavùnte sọta ayihafẹsẹnamẹnu aihọn tọn lẹ