Be Hiẹ Ko Biọ Gbọjẹ Jiwheyẹwhe Tọn mẹ Ya?
Be Hiẹ Ko Biọ Gbọjẹ Jiwheyẹwhe Tọn mẹ Ya?
“Ohó Jiwheyẹwhe tọn tin to ogbẹ̀ bo tindo huhlọn.”—HEB. 4:12.
1. Etẹwẹ yin dopo to aliho he mẹ mí sọgan biọ gbọjẹ Jiwheyẹwhe tọn mẹ to egbehe te lẹ mẹ, podọ naegbọn mí sọgan dọ dọ e bọawu nado dọ hugan nado wà?
TO HOSỌ he jẹnukọn mẹ, mí mọdọ mí sọgan biọ gbọjẹ Jiwheyẹwhe tọn mẹ kiki eyin mí nọ yinuwa sọgbe hẹ lẹndai etọn lẹ. E bọawu nado dọ hugan nado wà. Di apajlẹ, eyin mí mọdọ Jehovah gbẹwanna nuhe mí yiwanna de, e sọgan vẹawuna mí nado setonuna ẹn to afọdopolọji. Ehe dohia dọ mí dona plọn nado “wleawufo nado [nọ] setonu.” (Jak. 3:17) To hosọ ehe mẹ, mí na gbadopọnna ninọmẹ he mẹ awuwiwlefo nado yinuwa sọgbe hẹ lẹndai Jiwheyẹwhe tọn—enẹ wẹ nado nọ setonu sọn ahun mẹ wá—sọgan yin whiwhlepọn te delẹ.
2, 3. Etẹwẹ mí dona to wiwà nado hẹn homẹ Jehovah tọn hùn?
2 Obá tẹ mẹ wẹ hiẹ nọ kẹalọyi ayinamẹ sinai do Biblu ji lẹ jẹ? Owe-wiwe lẹ dọ dọ ojlo Jiwheyẹwhe tọn wẹ nado bẹ ‘onú họakuẹ akọta lẹpo tọn’ pli do ede dè. (Hag. 2:7) Na nugbo tọn, whla tintan he suhugan mítọn sè dogbọn nugbo lọ dali, mí ma ko yin gbẹtọ wunmẹ he Jiwheyẹwhe sọgan pọnhlan taidi onú họakuẹ lẹ gba. Etomọṣo, wanyina Jiwheyẹwhe po Visunnu vivẹ́ etọn po whàn mí nado basi diọdo ayidego tọn lẹ to walọ po jijọ mítọn lẹ po mẹ nado sọgan hẹn homẹ Jiwheyẹwhe tọn hùn mlẹnmlẹn. To whenue mí ko hodẹ̀ vẹkuvẹku bo ko dovivẹnu susu nado basi diọdo he jẹ lẹ godo, mí yí baptẹm.—Hia Kọlọsinu lẹ 1:9, 10.
3 Etomọṣo, baptẹm yíyí ma doalọtena avùnhiho sọta mapenọ-yinyin mítọn gba. Dile e na dẹnsọ bọ mí na to mapenọ yin, mí na gbẹ́ to avùnho sọta ẹ janwẹ. Ṣigba, Jehovah na mí jide dọ eyin mí zindonukọn to avùnhiho lọ mẹ bo magbe sinsinyẹn nado to nuhe go mí pé lẹpo wà nado hẹn homẹ emitọn hùn, emi na dona vivẹnudido mítọn.
Whenue Mí Tindo Nuhudo Ayinamẹ Tọn
4. Aliho voovo atọ̀n tẹlẹ mẹ wẹ mí sọgan mọ ayinamẹ Owe-wiwe tọn lẹ yí te?
4 Whẹpo mí nado wazọ́n do awugbopo mítọn lẹ ji, mí dona yọ́n awugbopo lọ lẹ whẹ́. Hodidọ he whànmẹ de sisè to Plitẹnhọ Ahọluduta tọn mẹ kavi hosọ mẹhẹnlẹnnupọn tọn de hihia to owe mítọn lẹ mẹ sọgan zinnudo awugbopo sinsinyẹn mítọn de ji. Ṣigba, eyin mí ma basi vọjlado to whenue mí ko sè hodidọ lọ kavi ko mọ ayinamẹ lẹ hia to owe de mẹ godo, Jehovah sọgan yí Klistiani hatọ de zan nado dọ̀n ayidonugo mítọn wá awugbopo mítọn ji.—Hia Galatianu lẹ 6:1.
5. Donù aliho agọ̀ he mẹ mí sọgan yinuwa te delẹ go to whenue mẹde na mí ayinamẹ, podọ basi zẹẹmẹ nuhewutu mẹho agun tọn lẹ dona to alọgọna mí zọnmii tọn.
5 E ma nọ bọawu nado kẹalọyi ayinamẹ gbẹtọvi mapenọ de tọn, eyin mẹlọ tlẹ yí zinzin po owanyi po do na mí ayinamẹ. Etomọṣo, dile Galatianu lẹ 6:1 dohia do, Jehovah degbena mẹhe pegan to gbigbọ-liho lẹ nado “tẹnpọn” bo gọ̀ mí do otẹn mítọn mẹ po “gbigbọ walọmimiọn tọn” po. Eyin mí nọ setonuna yé, mí na to onú họakuẹ yin na Jiwheyẹwhe zọnmii. Na nugbo tọn, mí nọ saba dọna Jehovah to odẹ̀ mẹ dọ mapenọ wẹ mí yin bo nọ ṣinuwa whlasusu. Etomọṣo, eyin mẹde dọ̀n ayidonugo mítọn wá awugbopo tangan de ji, mí nọ saba dín whẹjijọ, yí nukunpẹvi do pọ́n nuhahun lọ, nọ tindo ayihaawe gando mẹwhinwhàn ayinamẹtọ lọ tọn go kavi jẹagọdo aliho he mẹ ayinamẹ lọ yin nina mí te. (2 Ahọ. 5:11) Podọ eyin mẹho agun tọn de na mí ayinamẹ do whẹho tangan de ji—vlavo gando nuyiwa hagbẹ whẹndo tọn mítọn de, nusisọ́ po aṣọ́dido mítọn po, wiwejininọ mítọn to agbasa-liho kavi ayidedai wunmẹ he Jehovah gbẹwanna bọ mí yiwanna de go—enẹ sọgan zọ́n bọ mí na yinuwa po homẹgble po podọ e sọ sọgan hẹn homẹgble mẹhe na mí ayinamẹ lọ ga! Ṣigba to whenue mí wá gọ̀ biọ míde mẹ, mí nọ saba mọdọ ayinamẹ mẹlọ tọn sọgbe.
6. Nawẹ ohó Jiwheyẹwhe tọn nọ do “linlẹn po ojlo ahun mẹ tọn lẹ po” hia gbọn?
6 Wefọ he ji hosọ ehe sinai do dohia dọ ohó Jiwheyẹwhe tọn “tindo huhlọn.” Mọwẹ, ohó Jiwheyẹwhe tọn tindo huhlọn nado diọ gbẹzan mítọn. E tindo huhlọn nado gọalọna mí nado basi diọdo lẹ to baptẹm godo kẹdẹdile e wà do jẹnukọnna baptẹm yíyí mítọn. To wekanhlanmẹ Paulu tọn hlan Heblu lẹ mẹ, e sọ wlan dọ ohó Jiwheyẹwhe tọn “nọ sọ́ omẹ, yèdọ jẹ obá lọ mẹ nado klan alindọn po gbigbọ po, podọ hupetẹn lẹ po ojó yetọn po dovo, e sọ penugo nado yọ́n linlẹn po ojlo ahun mẹ tọn lẹ po.” (Heb. 4:12) To hogbe devo mẹ, lehe mí nọ yinuwa do to whenue mí ko mọnukunnujẹ lẹndai Jiwheyẹwhe tọn mẹ ganji godo nọ do nuhe mí yin to homẹ hia. To whedelẹnu, be awusọhia gbonu tọn mítọn (“alindọn”) nọ gbọnvona nuhe mí yin to homẹ (“gbigbọ”) na taun tọn wẹ ya? (Hia Matiu 23:27, 28.) Lẹnnupọndo lehe hiẹ na yinuwa do to ninọmẹ he bọdego ehelẹ mẹ ji.
Zindonukọn po Titobasinanu Jehovah Tọn Po
7, 8. (a) Etẹwẹ na ko whàn Klistiani Ju delẹ nado tẹdo adà Osẹ́n Mose tọn delẹ go? (b) Naegbọn mí sọgan dọ dọ yé yinuwa jẹagọdo lẹndai Jehovah tọn?
7 Susu mítọn wẹ yọ́n nuhe Howhinwhẹn lẹ 4:18 dọ do tamẹ. E dọmọ: “Omọ́ nugbonọ tọn taidi hinhọ́n he sẹ́, he to sisẹ́ yinukọn kakajẹ okle.” Ehe zẹẹmẹdo dọ pọndohlan po nukunnumọjẹnumẹ mítọn gando lẹndai Jiwheyẹwhe tọn lẹ go po na to wunhọ́n dogọ dile ojlẹ to yìyì.
8 Dile mí gbadopọnna to hosọ he jẹnukọn mẹ do, to okú Jesu tọn godo, e gbẹ́ vẹawuna Klistiani Ju delẹ nado tọ́n sọn Osẹ́n Mose tọn glọ. (Owalọ 21:20) Mahopọnna dọ Paulu yí zinzin do dohia dọ Klistiani lẹ masọ to Osẹ́n Mose tọn glọ ba, delẹ to yé mẹ gbẹ́ nuhe e dọ to gbọdo glọ lẹ dai. (Kọl. 2:13-15) Vlavo yé mọdọ eyin emi tẹdo adà Osẹ́n lọ tọn delẹ yìnyìn go, emi ma na mọ homẹkẹn. Depope he whẹho lọ yin, Paulu kanwehlan Klistiani Heblu lẹ bo dọna yé madoadúdẹji dọ e na vẹawuna yé nado biọ gbọjẹ Jiwheyẹwhe tọn mẹ to whenuena e yindọ yé gbẹ́ ma nado yinuwa sọgbe hẹ lẹndai Etọn he yin didehia lọ. a (Heb. 4:1, 2, 6; hia Heblu lẹ 4:11.) Eyin Klistiani Heblu enẹlẹ na mọ nukundagbe Jehovah tọn, yé dona kẹalọyi dọ aliho devo pete mẹ wẹ ewọ to anadena omẹ etọn lẹ te.
9. Nawẹ mí dona nọ yinuwa gbọn to whenue vọjlado de yin bibasi nado tá hinhọ́n do Owe-wiwe lẹ ji?
9 Na nuhe dù nukunnumọjẹnumẹ mítọn gando nuplọnmẹ Biblu tọn delẹ go, vọjlado susu ko yin bibasi to azán mítọn gbè. Mí ni ma dike enẹ ni nọ dotukla mí blo, kakatimọ mì gbọ enẹ ni nọ hẹn jidide mítọn do pipli afanumẹ nugbonọ podọ nuyọnẹntọ lọ tọn go sinyẹn deji. To whenue afọzedaitọ hagbẹ “afanumẹ” lọ tọn lẹ mọdọ e yin dandan nado tá hinhọ́n do nugbo tangan delẹ ji kavi vọ́ yé jlado, yé ma nọ whleawu nado wàmọ. Lẹndai Jiwheyẹwhe tọn he to nukọnzindo lọ nọ duahunmẹna pipli afanumẹ lọ tọn sọmọ bọ e ma nọ whleawu nado basi vọjlado he jẹ lẹ mahopọnna homọdọdomẹgo lẹ. Nawẹ hiẹ nọ yinuwa gbọn to whenue vọjlado de yin bibasi nado tá hinhọ́n do Owe-wiwe lẹ ji?—Hia Luku 5:39.
10, 11. Etẹwẹ Biblu plọntọ delẹ wà to whenue afanumẹ nugbonọ podọ nuyọnẹntọ lọ dọna yé nado tẹ́n aliho kunnudide tọn yọyọ delẹ pọ́n, podọ etẹwẹ nuyiwa yetọn plọn mí?
10 Mì gbọ mí ni lẹnnupọndo apajlẹ devo ji. To vivọnu owhe kanweko 19tọ po bẹjẹeji owhe kanweko 20tọ tọn po, Biblu Plọntọ he nọ na hodidọ gbangba tọn he tátá delẹ lẹndọ enẹ wẹ aliho dagbe hugan lọ nado dọyẹwheho. Yé yiwanna hodidọ to gbẹtọgun lẹ nukọn, podọ homẹ nọ hùn delẹ to yé mẹ taun eyin gbẹtọ lẹ pà yé na hodidọ yetọn. Ṣigba to godo mẹ, e wá họnwun dọ Jehovah jlo dọ omẹ emitọn lẹ ni hẹn alọnu ján to yẹwhehodidọ wunmẹ voovo lẹ mẹ, ehe bẹ azọ́n whédegbè jẹ whédegbè tọn hẹn. Delẹ to mẹhe nọ na hodidọ he tátá enẹlẹ mẹ ma jlo na wà enẹ. Yé nọ sọawuhia to gbangba di gbẹtọ gbigbọnọ he ze yede jo mlẹnmlẹn na azọ́n Oklunọ tọn. Ṣigba, to whenue lẹndai Jiwheyẹwhe tọn gando azọ́n yẹwhehodidọ tọn lọ go wá họnwun, nuhe yé yin to homẹ—enẹ wẹ ojlo po mẹwhinwhàn yetọn lẹ po—wá sọawuhia hezeheze. Etẹwẹ yin numọtolanmẹ Jehovah tọn gando yé go? E ma hùnhomẹ do yé go. Yé jo titobasinanu lọ do.—Mat. 10:1-6; Owalọ 5:42; 20:20.
11 Ehe ma dohia dọ mẹhe tẹdo titobasinanu lọ go lẹpo wẹ yẹwhehodidọ gbangba tọn bọawuna gba. Mẹsusu wẹ mọ ẹn taidi nuhe vẹawu, titengbe to tintan whenu. Etomọṣo, yé ma jogbe. To nukọn mẹ, yé duto obu yetọn ji bọ Jehovah dona yé susugege. Nawẹ hiẹ nọ yinuwa gbọn eyin afanumẹ nugbonọ podọ nuyọnẹntọ lọ dọna mí nado tẹ́n aliho kunnudide tọn he mí ma jẹakọ hẹ delẹ pọ́n? Be hiẹ nọ setonuna ayinamẹ etọn eyin mọwiwà tlẹ kàn dẹpẹ biọ ya?
Whenue Mẹvivẹ Mítọn de Jo Jehovah Do
12, 13. (a) Etẹwẹ yin lẹndai Jehovah tọn gando ylanwatọ he ma lẹnvọjọ bo yin didesẹ sọn agun mẹ lẹ go? (b) Whlepọn tẹwẹ mẹjitọ Klistiani delẹ nọ pehẹ, podọ etẹwutu ninọmẹ enẹ nọ kàn dẹpẹ biọ?
12 Ayihaawe ma tin dọ mímẹpo wẹ jẹakọ hẹ nunọwhinnusẹ́n lọ nado gbọṣi wiweji to agbasa-liho, to walọyizan-liho podọ to gbigbọ-liho nado hẹn homẹ Jiwheyẹwhe tọn hùn. (Hia Titu 2:14.) Ṣigba, ninọmẹ delẹ sọgan hẹn ẹn vẹawuna mí nado setonuna gbedide ehe. Di apajlẹ, lẹnnupọndo ninọmẹ ehe ji: Mí ni dọ dọ visunnu dopo gee Klistiani asu po asi po apajlẹ dagbenọ de tọn jo nugbo lọ do. Na visunnu lọ jlo nado “dugbẹ ylando tọn na ojlẹ gli de” kakati nado hẹn haṣinṣan dagbe de go hẹ Jehovah podọ hẹ mẹjitọ etọn he dibusi Jiwheyẹwhe lẹ wutu, dẹpẹ lọ yin didesẹ sọn agun mẹ.—Heb. 11:25.
13 Mẹjitọ lọ lẹ jẹflumẹ sinsinyẹn! Yé yọ́n nuhe Biblu dọ gando whẹho mẹdesẹ sọn agun mẹ tọn go ganji, enẹ wẹ “ma nado dogbẹ́ hẹ mẹdepope he yin yiylọdọ mẹmẹsunnu he yin galọtọ kavi nukunkẹnnọ kavi boṣiọ-sẹ̀ntọ kavi mẹvlẹtọ kavi ahànnumunọ kavi alọslonamẹtọ de [kavi] tlẹ dùnú hẹ omẹ mọnkọtọn.” (1 Kọl. 5:11, 13) Humọ, yé yọnẹn dọ hogbe lọ “mẹdepope” he yin yiyizan to wefọ ehe mẹ bẹ hagbẹ whẹndo tọn he ma nọ nọ̀ owhé dopolọ gbè hẹ yé hẹn. Ṣigba, ovi vivẹ́ de wẹ visunnu lọ yin na yé! Humọ, owanyi sinsinyẹn he yé tindo na visunnu yetọn sọgan hẹn yé nado lẹndọ: ‘Nawẹ mí na gọalọna visunnu mítọn nado lẹkọwa Jehovah dè gbọn eyin mí sánkanna haṣinṣan mítọn hẹ ẹ pete? Be e ma yin hodidọ hẹ ẹ whẹwhẹ wẹ na gọalọna ẹn nado yawu lẹkọ ya?’ b
14, 15. Etẹwẹ mẹjitọ lẹ dona nọ flin to whenue yé to nudide basi gando hodidọ hẹ ovi yetọn he yin didesẹ sọn agun mẹ go?
14 Onú mẹjitọ enẹlẹ tọn nọ biọlanmẹna mí taun. To popolẹpo mẹ, visunnu yetọn tindo jlọjẹ lọ nado basi nudide, podọ e ko de nado doafọna gbẹzan he ma sọgbe kakati dọ ni de nado to vivi haṣinṣan pẹkipẹki mẹjitọ etọn lẹ tọn po yisenọ hatọ devo lẹ tọn po dù zọnmii. Ṣigba mẹjitọ etọn lẹ ma sọgan hò jlọjẹ etọn yí. Nuhe zọ́n niyẹn bọ yé jẹflumẹ!
15 Ṣigba, etẹwẹ mẹjitọ enẹlẹ sọgan wà to ninọmẹ mọnkọtọn mẹ? Be yé na setonuna anademẹ họnwun Jehovah tọn ya? Kavi yé na dín whẹjijọ dọ emi sọgan nọ dọho hẹ visunnu emitọn he yin didesẹ sọn agun mẹ lọ whẹwhẹ po linlẹn lọ po dọ whẹho whẹndo tọn wẹ e yin wẹ ya? Mẹjitọ lẹ dona nọ flin nujinọtedo Jehovah tọn lẹ to whenue yé to nudide basi do whẹho ehe ji. Ojlo etọn wẹ nado hẹn titobasinanu lọ do wiweji, podọ eyin e yọnbasi nado dotuhomẹna ylanwatọ lẹ nado gọ̀ biọ yede mẹ. Nawẹ mẹjitọ Klistiani lẹ sọgan dohia dọ emi kọngbedopọ hẹ ojlo Jehovah tọn enẹ gbọn?
16, 17. Etẹwẹ apajlẹ Aalọn tọn plọn mí?
16 Aalọn, yèdọ mẹdaho Mose tọn pehẹ ninọmẹ sinsinyẹn de he gando awe to visunnu etọn lẹ mẹ go. Pọ́n nuhe na ko yin numọtolanmẹ etọn to whenue visunnu etọn Nadabi po Abihu po mẹ̀n nuyọnwan he ma sọgbe hẹ osẹ́n to Jehovah nukọn bọ Jehovah hù yé. Na nugbo tọn, okú yetọn sánkanna haṣinṣan yetọn hẹ mẹjitọ yetọn lẹ. Ṣigba whẹho lọ ma ko fó do finẹ. Jehovah dọna Aalọn po visunnu nugbonọ etọn lẹ po dọmọ: “Mì jo oda ota mìtọn tọn do wọ̀wọ́ blo, mọ mì sọ tlẹ́n avọ̀ mìtọn lẹ [to awubla mẹ] blo; na mì ni ma do kú gba, podọ na [Jehovah] ma na yin homẹgblenọ po agun lọ lẹpo po.” (Lev. 10:1-6) Nuhe dọ wefọ lọ te họnwun. Owanyi mítọn na Jehovah dona sinyẹn hugan dehe mí tindo na hagbẹ whẹndo tọn mítọn he ma gbọṣi nugbonọ-yinyin mẹ na Jehovah lẹ.
17 To egbehe, Jehovah masọ nọ hù mẹhe gbàsẹ́n etọn lẹ to afọdopolọji ba. Kakatimọ, e nọ gbọn owanyi dali na dotẹnmẹ ylanwatọ lẹ nado lẹnvọjọ. Ṣigba, etẹwẹ na yin numọtolanmẹ Jehovah tọn eyin mẹjitọ lẹ vẹtolina gbedide etọn bo lẹndọ emi tindo whẹwhinwhẹ́n susu nado nọ dọho hẹ visunnu kavi viyọnnu emitọn he yin didesẹ sọn agun mẹ lọ?
18, 19. Dona tẹlẹ wẹ hagbẹ whẹndo tọn he nọ yinuwa sọgbe hẹ anademẹ Jehovah tọn gando mẹhe yin didesẹ sọn agun mẹ go lẹ sọgan mọyi?
18 Susu mẹhe yin didesẹ sọn agun mẹ lẹ tọn wẹ yigbe dọ teninọ nujikudo tọn he họntọn po hagbẹ whẹndo tọn yetọn lẹ po ze wẹ gọalọna yé nado gọ̀ biọ yede mẹ. Di apajlẹ, awhli de dọna mẹho agun tọn lẹ dọ dopo to nuhe whàn emi nado basi vọjlado lẹ mẹ wẹ lehe mẹdaho emitọn sunnu yinuwa do. Mẹdaho lọ gbọṣi nugbonọ-yinyin mẹ na Jehovah bo setonuna gbedide etọn gando mẹdidesẹ̀ sọn agun mẹ go. Ehe zọ́n bọ e lẹkọwa agun mẹ.
19 Etẹwẹ apajlẹ enẹ plọn mí? Nulọ wẹ yindọ mí dona nọ hoavùn sọta ayilinlẹn mape tọn mítọn nado yinuwa jẹagọdo ayinamẹ Owe-wiwe tọn lẹ. Mí dona tindo nujikudo mlẹnmlẹn dọ aliho he mẹ Jiwheyẹwhe nọ penukundo whẹho lẹ go te wẹ yọ́n hugan.
“Ohó Jiwheyẹwhe Tọn Tin to Ogbẹ̀”
20. Aliho voovo awe tẹlẹ mẹ wẹ Heblu lẹ 4:12 yọ́n-na-yizan te? (Pọ́n nudọnamẹ odò tọn.)
20 To whenue Paulu wlan dọ “ohó Jiwheyẹwhe tọn tin to ogbẹ̀,” e ma yin Biblu, yèdọ Ohó kandai Jiwheyẹwhe tọn hodọ wẹ e te dandan gba. c Lẹdo wefọ lọ tọn dohia dọ opagbe Jiwheyẹwhe tọn go wẹ e to hodọ gando. Nuhe dọ Paulu te wẹ yindọ opagbe Jiwheyẹwhe tọn lẹ ma nọ gboawupo gbede. Jehovah do nugbo-yinyin enẹ tọn hia gbọn yẹwhegán Isaia gblamẹ dọmọ: “Ohó ṣie . . . ma na lẹgọwa dè e agbá, ṣigba . . . e na wà dagbe to onú he mẹ yẹn do e hlan te.” (Isa. 55:11) Enẹwutu, mí ma dona nọ gblehomẹ dọ hẹndi opagbe Jiwheyẹwhe tọn lẹ tọn ma yawu wá. Jehovah gbẹ́ “zindonukọn to azọ́nwiwa mẹ” po linlẹn lọ po nado hẹn opagbe etọn lẹ di to gigọ́ mẹ.—Joh. 5:17.
21. Nawẹ Heblu lẹ 4:12 yin tulinamẹnu de na mẹhomẹ nugbonọ he yin apadewhe “gbẹtọ susugege” lọ tọn lẹ gbọn?
21 Mẹhomẹ nugbonọ susu he yin apadewhe “gbẹtọ susugege” lọ tọn lẹ wẹ to Jehovah sẹ̀n sọn whenu dindẹn die. (Osọ. 7:9) Susu yetọn ma lẹndọ aihọn ylankan ehe na gbẹ́ pò to ote kaka bọ emi na poyọnho. Etomọṣo, yé ma gbọjọ. (Ps. 92:14) Yé yọnẹn dọ opagbe Jiwheyẹwhe tọn ma yin odlọ de poun gba—e na mọ hẹndi dandan, podọ Jehovah to azọ́nwa na e nido mọ hẹndi. To whenue e yindọ Jiwheyẹwhe ma wọnji lẹndai etọn go, homẹ nọ hùn in nado mọdọ mí hẹn lẹndai enẹ do ayiha mẹ gligli. Lẹndai Jehovah tọn na mọ hẹndi dandan to azán ṣinawetọ he yin gbọjẹzan etọn ehe whenu. Podọ e yọnẹn dọ taidi pipli de, omẹ emitọn lẹ na to nuyiwa sọgbe hẹ lẹndai emitọn. Hiẹ lo? Be a ko biọ gbọjẹ Jiwheyẹwhe tọn mẹ ya?
[Nudọnamẹ odò tọn]
a Susu to nukọntọ Ju lẹ tọn mẹ tẹdo Osẹ́n Mose tọn go sọmọ bọ to whenue Mẹsia lọ wá, yé ma kẹalọyi i. Yé ma zinzọnlin afọsu-afọsi hẹ lẹndai Jiwheyẹwhe tọn he to nukọnzindo lọ.
b Pọ́n owe lọ Mì Gbọṣi Owanyi Jiwheyẹwhe Tọn Mẹ, weda 207-209.
c To egbehe, Jiwheyẹwhe nọ dọhona mí gbọn Ohó etọn he tindo huhlọn nado diọ gbẹzan mítọn gblamẹ. Enẹwutu, to paa mẹ, nuhe Paulu dọ to Heblu lẹ 4:12 mẹ sọ gando Biblu lọsu go ga.
Be Hiẹ Flin Ya?
• Etẹwẹ mí dona wà nado biọ gbọjẹ Jiwheyẹwhe tọn mẹ to egbehe?
• Kanṣiṣa tẹwẹ tin to lẹndai Jiwheyẹwhe tọn po awuwiwlefo nado nọ kẹalọyi ayinamẹ Owe-wiwe lẹ tọn po ṣẹnṣẹn?
• Ninọmẹ tẹlẹ mẹ wẹ tonusisena anademẹ Owe-wiwe tọn lẹ sọgan vẹawu te, podọ naegbọn e yin dandannu dọ mí ni nọ setonu?
• Aliho voovo awe tẹlẹ mẹ wẹ Heblu lẹ 4:12 yọ́n-na-yizan te?
[Kanbiọ Oplọn tọn lẹ]
[Yẹdide to weda 31]
Mẹjitọ lọ lẹ jẹflumẹ sinsinyẹn!
