Ayinamẹ lẹ Na Sinsẹ̀n-Bibasi Whẹndo Tọn po Oplọn Mẹdetiti Tọn Po

TO BẸJẸEJI owhe 2009 tọn, agun Kunnudetọ Jehovah tọn lẹ tọn lẹdo aihọn pé jla tito opli yetọn lẹ tọn do. Opli awe he nọ yin bibasi to osẹ gblamẹ lẹ yin kinkọndopọ, podọ mẹlẹpo yin tulina nado nọ yí whèjai he vò lọ zan na sinsẹ̀n-bibasi whẹndo tọn po oplọn mẹdetiti tọn po. Be hiẹ to hihodo tito yọyọ lọ ganji ya? Be hiẹ to alemọyi sọn e mẹ to gigọ́ mẹ ya?

Mẹdelẹ ko kanse yede dọ owe tẹwẹ yé dona yizan to sinsẹ̀n-bibasi whẹndo tọn whenu. E ma yin linlẹn Hagbẹ Anademẹtọ lọ tọn nado ze tito tangan de dai na whẹndo lẹpo nado hodo gba. To whenuena e yindọ ninọmẹ lẹ nọ gbọnvo, e na sọgbe dọ tatọ́ whẹndo tọn dopodopo kavi mẹdopodopo ni gbadopọnna lehe nuwiwa sẹmẹsẹmẹ tọn ehe sọgan yin bibasi to aliho dagbe hugan mẹ do.

Mẹdelẹ nọ yí ojlẹ enẹ zan nado wleawuna opli agun tọn lẹ, ṣigba sinsẹ̀n-bibasi whẹndo tọn ma dona nọte do enẹ kẹdẹ ji gba. Mẹdevo lẹ nọ hia nudọnamẹ Owe-wiwe tọn lẹ, dọhodo yé ji, bo tlẹ nọ basi wadohia yetọn, titengbe na yọpọvu lẹ nido mọaleyi sọn e mẹ. E sọgan nọma yin dandan kavi jlomẹ nado nọ hodo aliho kanbiọ po gblọndo po tọn to whelẹponu, dile e nọ yin bibasi to opli lẹ whenu do. Eyin mẹlẹpo nọ voawu, ehe na zọ́n bọ hodọdopọ lọ na jlọmẹdote bọ mẹlẹpo na tindo mahẹ to e mẹ. Ninọmẹ mọnkọtọn nọ yidogọna nulinlẹnpọn ganji, ehe sọgan zọ́n bọ nuwiwa lọ na yin ayajẹnu he mẹlẹpo na nọ flin.

Otọ́ he tindo ovi atọ̀n de wlan dọmọ: “Suhugan nuhe mí nọ wà lẹ tọn nọ sinai do Biblu hihia ji. Dopodopo mítọn nọ hia weta lẹ jẹnukọn, ovi lẹ nọ de adà delẹ nado basi dodinnanu do yé ji, podọ to enẹgodo, yé nọ ze nuhe yé mọ lẹ donukọnna mí. Michael [he tindo owhe ṣinawe] nọ saba de yẹdide de kavi wlan nuhe e plọn lẹ dai. David po Kaitlyn po [he tindo owhe 13 po 15 po] nọ wlanwe gando kandai Biblu tọn de go sọn pọndohlan mẹhe to nujijọ lọ pọ́n de tọn mẹ. Di apajlẹ, to whenue mí to wehia gando zẹẹmẹ he Josẹfu basi do odlọ nudàtọ po ahànkọnnọtọ Falo tọn po tọn ji go, Kaitlyn wlan nujijọ lọ taidi dọ ewọ yin gàntọ he to nujijọ lọ pọ́n de.”—Gẹnẹsisi, weta 40.

To paa mẹ, ninọmẹ lẹ nọ gbọnvo. Nuhe wà dagbe na mẹde kavi whẹndo de sọgan nọma wà dagbe na devo. Apotin he bọdego bẹ ayinamẹ voovo he sọgan yin yiyizan to sinsẹ̀n-bibasi whẹndo tọn kavi oplọn mẹdetiti tọn whenu lẹ hẹn. Vlavo hiẹ sọgan lẹnnupọndo susu devo lẹ ji.

[Apotin/yẹdide to weda 6, 7]

 Na whẹndo he tindo jọja aflanmẹ lẹ:

• Mì nọ hia bo dọhodo owe Kanbiọ He Jọja lẹ Nọ Kanse—Gblọndo He Wazọ́n Lẹ ji.

• Dile mì to Biblu hia, mì nọ pọ́n mìde hlan taidi mẹhe to gbẹnọ to ojlẹ Biblu tọn mẹ. (Pọ́n Atọ̀họ̀-Nuhihọ́ lọ Tọn 1^er juin 1996, weda 12, hukan 17-18.)

• Mì nọ dọhodo yanwle whenu gaa po whenu gli tọn lẹ po ji.

• Sọn ojlẹ de mẹ jẹ devo mẹ, mì nọ pọ́n bo nọ dọhodo video he sinai do Biblu ji lẹ ji.

• Mì nọ gbadopọnna adà Atọ̀họ̀-Nuhihọ́ lọ Tọn he hosọ etọn yin “Na Jọja Lẹ.”

Na alọwlemẹ he ma tindo ovi lẹ:

• Mì nọ gbadopọnna weta 1, 3, 11-16 to owe Aṣli Ayajẹ Whẹndo Tọn mẹ.

• Mì nọ dọhodo nuhe mì plọn to whenue mì basi dodinnanu do nuagokun de ji to Biblu mẹ lẹ ji.

• Mì nọ wleawuna Biblu Pinplọn Agun tọn kavi Oplọn Atọ̀họ̀-Nuhihọ́ lọ Tọn.

• Mì nọ dọhodo lehe mì sọgan gbloada na lizọnyizọn mìtọn taidi asu po asi po do ji.

Na tlẹnnọ lẹ kavi mẹhe to whẹndo he klan to sinsẹ̀n-liho mẹ lẹ:

• Mì nọ plọn owe yọyọ he yin didetọn to plidopọ agbegbe tọn ji lẹ.

• Mì nọ hia Annuaire agọe tọn po dehe ko wayi lẹ po.

• Mì nọ basi dodinnanu do kanbiọ he nọ saba yin kinkanse to aigba-denamẹ mìtọn ji lẹ ji.

• Mì nọ wleawuna nuzedonukọnnamẹ he mì na yizan to lizọnyizọn kunnudegbe tọn mẹ lẹ.

Na whẹndo he tindo yọpọvu lẹ:

• Mì nọ basi wadohia do nujijọ Biblu tọn lẹ ji.

• Mì nọ daihun nufinflin tọn lẹ taidi dehe nọ sọawuhia to weda 30 po 31 Réveillez-vous! lẹ tọn ji po.

• Sọn ojlẹ de mẹ jẹ devo mẹ, mì nọ dín aliho yọyọ devo lẹ nado plọnnu. (Pọ́n hosọ lọ, “Étudier la Bible au zoo!” to Réveillez-vous! 8 mars 1996 weda 16-19.)

• Mì nọ gbadopọnna adà Atọ̀họ̀-Nuhihọ́ lọ Tọn he hosọ etọn yin “Plọn Ovi Towe Lẹ.”