Be Hiẹ Flin Ya?

Be a ko yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Pọ́n eyin a sọgan na gblọndo kanbiọ he bọdego ehelẹ tọn:

• Onú titengbe atọ̀n tẹwẹ sọgan gọalọna mí nado nọavùnte sọta ayilinlẹn nugbomadọ tọn?

Onú lọ lẹ wẹ: (1) Awuwiwlena budisi Jiwheyẹwhe he sọgbe. (1 Pita 3:12) (2) Awuwiwlena ayihadawhẹnamẹnu he yin pinplọn gbọn Biblu dali. (3) Vivẹnudido nado nọ tindo pekọ.—15/4, weda 6-7.

• Nawẹ mí wagbọn do yọnẹn dọ sinsẹ̀n-bibasi mítọn hlan Jiwheyẹwhe yiylọdọ nujọnu ma zẹẹmẹdo dọ mí dona nọ sọawuhia taidi hùnylantọ to whelẹponu kavi dọ mí ma dona nọ deayidai?

Mí sọgan lẹnnupọndo apajlẹ Jesu tọn ji. E dùnú hẹ mẹdevo lẹ to ninọmẹ awuvivi tọn mẹ. Mí yọnẹn dọ ewọ yin họntọnjihẹmẹtọ. Gbẹtọ lẹ, etlẹ yin yọpọvu lẹ nọ dọnsẹpọ ẹ bo nọ voawu to apá etọn.—15/4, weda 10.

• Etẹwẹ asu po asi po de sọgan wà eyin e taidi dọ haṣinṣan yetọn depò to whenue yé jivi godo?

Yé dona hẹn owanyi he yé tindo na yenọzo sinyẹn deji. Asu de sọgan dovivẹnu vẹkuvẹku nado glọnalina nudepope he sọgan hẹn ayimajai wá na asi etọn. Yé omẹ awe lẹ dona dovivẹnu nado nọ dọhodo numọtolanmẹ po nuhudo agbasa tọn yetọn lẹ po ji.—1/7, weda 30-31.

• Etẹwẹ atin olivie tọn lọ nọtena to Lomunu lẹ weta 11 mẹ?

Atin olivie tọn lọ tindo kanṣiṣa hẹ adà awetọ okún Ablaham tọn lọ, yèdọ Islaeli gbigbọmẹ tọn. Adọ̀ atin olivie yẹhiadonu tọn lọ tọn nọtena Jehovah podọ gotò etọn nọtena Jesu. To whenue suhugan Juvi jọnun lẹ tọn gbẹ́ Jesu dai, Kosi he lẹzun yisenọ lẹ sọgan yin tùntùn do otẹn yetọn mẹ, bo gbọnmọ dali wleawuna sọha gigọ́ mẹhe yin adà awetọ okún Ablaham tọn lẹ tọn.—15/5, weda 22-25.

• Wẹndagbe vonọtaun tẹwẹ mí sọgan lá na wamọnọ lẹ?

Wẹndagbe lọ wẹ yindọ: Jiwheyẹwhe ko de Jesu taidi Ahọlu. Ewọ wẹ Gandutọ dagbe he sọgan de ohẹ́n sẹ̀. Etẹwutu? Na e na dugán do gbẹtọvi lẹpo ji bosọ tindo huhlọn nado yinuwa; e nọ vẹawu wamọnọ lẹ, podọ e sọgan doalọtena nuhe nọ hẹn ohẹ́n wá, enẹ wẹ ayilinlẹn ṣejannabi tọn he mí dugu etọn.—1/7, weda 7.

• Be kúnkan he dawe pipé lọ, Jesu sọgan ko wleawuna yin apadewhe ofligọ lọ tọn wẹ ya?

Lala. Dile etlẹ yindọ Jesu sọgan ko jivi bo wleawuna kúnkan he bẹ gbẹtọ pipé liva susu lẹ hẹn, kúnkan he e sọgan ko wleawuna mọnkọtọn ma yin apadewhe ofligọ lọ tọn gba. Ogbẹ̀ pipé Jesu kẹdẹ tọn wẹ sọzẹn hẹ Adam tọn. (1 Tim. 2:6)—15/6, weda 13.

• Nawẹ Klistiani lẹ nọ dohia dọ yé hẹn avase he yin nina gando mẹplọntọ lalo lẹ go to Owalọ lẹ 20:29, 30 mẹ lọ do ayiha mẹ gbọn?

Yé ma nọ kẹalọyi mẹplọntọ lalo lẹ do owhé yetọn gbè kavi dọnudo yé gba. (Lom. 16:17; 2 Joh. 9-11) Klistiani lẹ ma nọ hia owe atẹṣitọ lẹ tọn, pọ́n tito-to-whinnu televiziọn ji tọn he nọ do yé hia kavi nọtẹn Internet tọn he nọ bẹ nuplọnmẹ yetọn lẹ hẹn.—15/7, weda 15-16.