Kanbiọ lẹ sọn Wehiatọ lẹ Dè

Be e yọnbasi nado dọ sọha dọdai he gando Mẹsia lọ go lẹ tọn he tin to Owe-wiwe Heblu tọn lẹ mẹ pẹpẹ ya?

Owe-wiwe Heblu tọn lẹ pinplọn po sọwhiwhe po gọalọna mí nado yọ́n dọdai susu he ko mọ hẹndi gando Jesu Klisti go lẹ. Dọdai ehelẹ bẹ nudọnamẹ gigọ́ hẹn gando ovu whenu Mẹsia lọ tọn, ojlẹ he mẹ e na sọawuhia te, nuyiwa etọn lẹ, lehe e na yin nuyiwa hẹ do, po otẹn etọn to lẹndai Jehovah Jiwheyẹwhe tọn mẹ po go. Ehe lẹpo to pọmẹ wleawuna ohia tangan de he gọalọna mí nado yọnẹn dọ Jesu wẹ Mẹsia lọ. Etomọṣo, mí dona payi eyin mí to tintẹnpọn nado yọ́n sọha dọdai he yin mimọ to Owe-wiwe Heblu tọn lẹ mẹ gando Mẹsia lọ go lẹ tọn pẹpẹ.

E ma yin mẹlẹpo wẹ kọngbedopọ do dọdai he gando Mẹsia lọ go kavi dehe ma gandego lẹ ji gba. Alfred Edersheim dọ to owe etọn The Life and Times of Jesus the Messiah mẹ dọ, to Sinagọgu Juvi hohowhenu tọn lẹ tọn mẹ, wefọ 456 yin sislẹ sọn Owe-wiwe Heblu tọn lẹ mẹ taidi dehe gando Mẹsia lọ go lẹ, dile etlẹ yindọ susu to yé mẹ ma donù Mẹsia lọ go tlọlọ. Sọwhiwhe yíyí do lẹnnupọndo wefọ 456 ehelẹ ji fọ́n ayihaawe dote vlavo eyin delẹ to yé mẹ yin dọdai he gando Jesu Klisti go lẹ. Di apajlẹ, Edersheim dọ dọ Ju lẹ nọ pọ́n Gẹnẹsisi 8:11 di dọdai he gando Mẹsia lọ go. Yé yise dọ “Osó Mẹsia lọ tọn ji wẹ apoe lọ hẹn amà olivie tọn lọ wá sọn.” E sọ donù Eksọdusi 12:42 go. Dile e to zẹẹmẹ basi do lehe Ju lẹ mọnukunnujẹ wefọ ehe mẹ to aliho agọ̀ mẹ do ji, e wlan dọmọ: “Kẹdẹdile Mose tọ́n wá sọn zungbo mẹ do, mọwẹ Mẹsia lọ tọ́n wá sọn Lomu do niyẹn.” Matin ayihaawe, e na vẹawuna weyọnẹntọ susu po mẹdevo lẹ po nado yí wefọ awe ehelẹ po zẹẹmẹ agọ̀ ehelẹ po zan na Jesu Klisti.

Eyin mí tlẹ na ayidonugo dọdai he mọ hẹndi gando Jesu Klisti go lẹ kẹdẹ, e na vẹawu nado kọngbedopọ do sọha tangan de ji. Di apajlẹ, pọ́n Isaia weta 53 he bẹ dọdai susu hẹn gando Mẹsia lọ go. Isaia 53:2-7 dọ dọdai dọmọ: “Awutu-hia etọn ma yọ́n . . . Yè vlẹ ẹ, yè sọ gbẹ́ ẹ to gbẹtọ lẹ dè . . . Ewọ ko hẹn awubla mítọn . . . Yè húnú in na ylando mítọn . . . yè hẹn ẹn wá di lẹngbọvu de jẹ hùhùtọ dè.” Be adà ehe lẹpo to Isaia weta 53 mẹ dona yin pinpọnhlan taidi dọdai dopo gando Mẹsia lọ go wẹ ya, kavi dopodopo nuhe yin didọ gando Mẹsia lọ go ehelẹ tọn dona yin pinpọnhlan taidi dọdai voovo lẹ?

Sọ lẹnnupọndo Isaia 11:1 ji, e hia dọmọ: “Opò de na sọn dodonu Jẹsse tọn mẹ, alà de nasọ tọ́nkun sọn adọ̀ etọn mẹ.” To wefọ 10tọ mẹ, dọdai ehe sọ sọawuhia whladopo dogọ, po hogbe he dibla yin dopolọ lẹ po. Be mí dona lẹn wefọ awe ehelẹ taidi dọdai voovo awe wẹ ya kavi taidi dọdai dopo he yin vivọdọ? E họnwun dọ nudide he yin bibasi do Isaia weta 53 po Isaia weta 11 po ji na yinuwado sọha dọdai he gando Mẹsia lọ go lẹ tọn ji.

Enẹwutu, mí na wà dagbe ma nado dike sọha dọdai he gando Mẹsia lọ go to Owe-wiwe Heblu tọn lẹ mẹ lẹ tọn ni duahunmẹna mí zẹjlẹgo. Titobasinanu Jehovah tọn ko zín todohukanji dọdai he gando Jesu go po hẹndi yetọn lẹ po tọn susu jẹgbonu. a Todohukanji ehelẹ sọgan gọalọna mí bo na mí tuli to oplọn mẹdetiti tọn, oplọn whẹndo tọn po lizọnyizọn gbangba tọn mítọn po whenu. Humọ, dọdai susu he gando Mẹsia lọ go lẹ, nọ na mí kunnudenu dolido dọ Jesu wẹ Klisti kavi Mẹsia lọ, mahopọnna sọha yetọn.

[Nudọnamẹ odò tọn]