Kanbiọ lẹ sọn Wehiatọ lẹ Dè

Etẹwẹ sọha he nọ tin to linlin sinsẹ̀nzọn whemẹwhemẹ tọn mẹ lẹ nọtena?

To whemẹwhemẹ, mí nọ to nukọnpọnhlan nado mọ linlin sinsẹ̀nzọn tọn he nọ sọawuhia to Annuaire mẹ. Homẹ mítọn nọ hùn nado mọ nuhe omẹ Jehovah tọn lẹ taidi pipli de to wiwadotana to azọ́n yẹwhehodidọ Ahọluduta tọn po mẹpinplọn lẹdo aihọn pé po tọn mẹ. Ṣigba, nado mọnukunnujẹ linlin lọ mẹ ganji, mí dona yọ́n nuhe adà po sọha etọn lẹ po zẹẹmẹdo. Mì gbọ mí ni pọ́n apajlẹ delẹ.

Owhe sinsẹ̀nzọn tọn. E nọ bẹsọn septembre owhe de tọn jẹ août owhe he bọdego tọn. Annuaire nọ bẹ linlin owhe he wayi tọn hẹn. Di apajlẹ, Annuaire 2011 tọn bẹ linlin owhe sinsẹ̀nzọn 2010 tọn hẹn, ehe bẹsọn 1^er septembre 2009 jẹ 31 août 2010.

Agayiyi wẹnlatọ lẹ tọn po madozẹnzẹn wẹnlatọ lẹ tọn po. “Wẹnlatọ lẹ” bẹ Kunnudetọ Jehovah tọn he yí baptẹm po dehe ma ko yí baptẹm bo ka pegan nado yin lilátọ Ahọluduta lọ tọn lẹ po hẹn. “Agayiyi wẹnlatọ lẹ tọn” nọtena sọha he yiaga hugan to osun de mẹ to owhe sinsẹ̀nzọn tọn lọ mẹ podọ e sọgan bẹ linlin he gbọwhenu bo ma yin yiyidogọ linlin osun he wayi tọn hẹn. To aliho ehe mẹ, wẹnlatọ delẹ sọgan yin hihia do whla awe ji. Ṣigba, sọha he yiaga hugan lọ ma nọ bẹ wẹnlatọ he tindo mahẹ to lizọnyizọn lọ mẹ bo wọnji nado na linlin yetọn lẹ hẹn gba. Ehe do nuhewutu e do yin nujọnu dọ wẹnlatọ lẹpo ni nọ na linlin yetọn to sunmẹsunmẹ hia. “Madozẹnzẹn wẹnlatọ lẹ tọn” nọtena sọha wẹnlatọ he nọ na linlin to gbesisọ mẹ lẹpo tọn.

Lẹndopọ gànmẹ tọn. Sọgbe hẹ Annuaire 2011 tọn, Kunnudetọ Jehovah tọn lẹ yí hugan gànhiho liva 1,6 zan to lizọnyizọn kunnudegbe tọn mẹ. Ṣigba, lẹndopọ ehe ma nọtena gànhiho he mí nọ yizan to sinsẹ̀n-bibasi mítọn mẹ lẹpo gba, na e ma nọ bẹ whenu he mí nọ yizan to gbesisọ mẹ na dlapọn lẹngbọhọtọ tọn, opli lẹ yìyì, oplọn mẹdetiti tọn po ayihamẹlinlẹnpọn po hẹn wutu.

Akuẹzinzan. To owhe sinsẹ̀nzọn 2010 tọn mẹ, Kunnudetọ Jehovah tọn lẹ yí hugan dọla Amelika tọn livi 155 zan nado penukundo gbehosọnalitọ titengbe, mẹdehlan, po nugopọntọ tomẹyitọ lẹ po go to azọ́ndenamẹ sinsẹ̀nzọn kunnudegbe tọn yetọn lẹ mẹ. Ṣigba, sọha ehe ma bẹ akuẹ he yin yiyizan nado zín owe sinai do Biblu ji lẹ jẹgbonu hẹn, podọ e ma bẹ dehe yin yiyizan nado penukundo mẹdezejotọ hugan 20000 he to azọ́nwa to Bẹtẹli lẹ lẹdo aihọn pé hẹn.

Mahẹtọ Oflin tọn lẹ. Ehe wẹ sọha mẹhe ko yí baptẹm bo tindo mahẹ to yẹhiadonu lẹ mẹ lẹdo aihọn pé to Oflin lọ whenu lẹ tọn. Be ehe nọtena sọha mẹyiamisisadode he tin to aigba ji lẹpo tọn wẹ ya? E ma yinmọ dandan. Di apajlẹ, mẹdelẹ sọgan gbọn nuṣiwa dali lẹndọ yé na yì olọn mẹ na nuyise he yé ko tindo dai de wutu kavi na yé tindo nuhahun to apọ̀nmẹ kavi to numọtolanmẹ-liho. Enẹwutu, e na vẹawu nado yọ́n sọha mẹyiamisisadode he tin to aigba ji lẹ tọn pẹpẹ; podọ mí ma to dandannu glọ nado yọnẹn. Hagbẹ Anademẹtọ lọ ma nọ basi kandai yinkọ mẹhe nọ tindo mahẹ to akla po ovẹn lọ po mẹ to Oflin lọ whenu lẹ tọn gba. a

Nuhe mí yọnẹn wẹ yindọ delẹ to mẹyiamisisadode he yin “afanumẹ Jiwheyẹwhe mítọn tọn lẹ” mẹ na pò to aigba ji to whenue nukunbibia daho lọ na bẹjẹeji. (Osọ. 7:1-3) Dile yé gbẹ́ pò to aigba ji, mẹyiamisisadode lẹ to azọ́n sinsinyẹn wà to azọ́n yẹwhehodidọ po mẹpinplọn po tọn lọ mẹ. Linlin whemẹwhemẹ tọn lọ nọ do nuhe omẹ Jehovah tọn lẹ to wiwà lẹdo aihọn pé to azọ́n titengbe hugan ehe mẹ hia.

[Nudọnamẹ odò tọn]