Mì Nọ Doafọna Jijọho
Mì Nọ Doafọna Jijọho
“Mì gbọ mí ni doafọna nuhe nọ hẹn jijọho wá lẹ.”—LOM. 14:19.
1, 2. Naegbọn jijọho do tin to Kunnudetọ Jehovah tọn lẹ ṣẹnṣẹn?
E VẸAWU nado mọ jijọho nujọnu tọn to aihọn egbehe tọn mẹ. Mẹhe tlẹ wá sọn otò dopolọ mẹ bo nọ do ogbè dopolọ lẹ nọ saba klan to sinsẹ̀n-liho, tonudidọ-liho, podọ na nuhe dù otẹn he mẹ yé tin te. Ṣigba to vogbingbọn mẹ, omẹ Jehovah tọn lẹ tin to kọndopọ mẹ mahopọnna dọ yé wá sọn “akọta lẹpo mẹ, sọn whẹndo lẹpo mẹ, sọn gbẹtọ lẹpo mẹ podọ sọn ogbè lẹpo mẹ.”—Osọ. 7:9.
2 Ninọmẹ jijọho tọn he tin to ṣẹnṣẹn mítọn ma yin kosọ de poun gba. Ehe yinmọ na mí “gbọṣi jijọho mẹ hẹ Jiwheyẹwhe” gbọn yise didohia to Visunnu etọn mẹ dali, mẹhe hùnsọndai etọn nọ ṣinyọnnudo ylando mítọn lẹ. (Lom. 5:1; Efe. 1:7) Humọ, Jiwheyẹwhe nugbo lọ nọ na gbigbọ wiwe devizọnwatọ nugbonọ etọn lẹ, podọ jijọho yin adà dopo to sinsẹ́n gbigbọ enẹ tọn mẹ. (Gal. 5:22) Whẹwhinwhẹ́n devo he wutu mí do nọ nọpọ́ to jijọho mẹ wẹ yindọ mí “ma yin apadewhe aihọn tọn.” (Joh. 15:19) Kakati nado nọ donù whẹho tonudidọ tọn lẹ mẹ, mí nọ nọ̀ kada. Na mí ko ‘yí ohí mítọn do tùn agbogọdọẹ’ wutu, mí ma nọ doalọ to awhàn otò kavi akọta tọn lẹ mẹ.—Isa. 2:4.
3. Etẹwẹ jijọho he mí sọgan duvivi etọn nọ hẹn yọnbasi, podọ etẹwẹ mí na gbadopọnna to hosọ ehe mẹ?
3 Jijọho he mí sọgan duvivi etọn hẹ ode awetọ bẹ nususu hẹn hugan didapana nuhe na gbleawuna mẹmẹsunnu mítọn lẹ wiwà poun. Dile etlẹ yindọ agun he mẹ mí tin te sọgan bẹ mẹhe wá sọn akọ̀ voovo lẹ mẹ bo tindo aṣa voovo lẹ hẹn, mí nọ “yiwanna ode awetọ.” (Joh. 15:17) Jijọho mítọn nọ hẹn mí penugo nado “nọ wà nuhe yin dagbe hlan mẹlẹpo, ṣigba, na taun tọn, hlan mẹhe gando mí go to yise mẹ lẹ.” (Gal. 6:10) Paladisi gbigbọmẹ tọn mítọn he mẹ jijọho tin te yin nuhọakuẹ de he mí dona nọ basi hihọ́na. Enẹwutu, mì gbọ mí ni gbadopọnna lehe mí sọgan doafọna jijọho to agun lọ mẹ do.
To Whenue Mí Dahli
4. Etẹwẹ mí sọgan wà nado doafọna jijọho eyin mí ṣinuwa do mẹde?
4 Devi Jakọbu wlan dọmọ: “Mímẹpo wẹ nọ dahli whlasusu. Eyin mẹde ma nọ dahli to ohó mẹ, omẹ pipé de wẹ ewọ.” (Jak. 3:2) Enẹwutu, wiwọ́ po gbemanọpọ lẹ po na nọ fọ́n to yisenọ hatọ lẹ ṣẹnṣẹn janwẹ. (Flp. 4:2, 3) Ṣigba, mí sọgan nọ didẹ nuhahun lẹ bo ma hẹn jijọho agun lọ tọn gble. Di apajlẹ, lẹnnupọndo ayinamẹ he mí dona yido yizan mẹ eyin mí doayi e go dọ mí ko ṣinuwa do mẹde ji.—Hia Matiu 5:23, 24.
5. Nawẹ mí sọgan doafọna jijọho to whenue mẹde ṣinuwa do mí gbọn?
5 Etẹwẹ lo eyin mẹde ṣinuwa do mi? Be mí na donukun dọ mẹlọ ni wá vẹvẹna mí wẹ ya? “[Owanyi] ma nọ basi kandai nuṣiwa tọn,” wẹ 1 Kọlintinu lẹ 13:5 dọ. To whenue mẹde ṣinuwa do mí, mí nọ doafọna jijọho gbọn jijona mẹlọ bo wọnji nuhahun lọ go dali. (Hia Kọlọsinu lẹ 3:13.) Ehe wẹ aliho dagbe hugan nado didẹ nuhahun flinflin lẹ, na e nọ yidogọna haṣinṣan jijọho tọn tintindo hẹ sinsẹ̀n-basitọ hatọ lẹ bo nọ hẹn mí tindo jijọho ahun mẹ tọn. Howhinwhẹn nuyọnẹn tọn de dọmọ: “Gigo . . . wẹ nado dekọ sọn ylanwa go.”—Howh. 19:11.
6. Etẹwẹ mí dona wà eyin e vẹawuna mí nado wọnji nuhe mẹde ṣiwà do mí de go?
6 Ṣigba, eyin e vẹawuna mí nado wọn nuhe mẹde ṣiwà do mí lo? Matin ayihaawe, e ma na yin nuyọnẹnnu nado jla whẹho lọ pé na mẹdevo lẹ. Mẹnudidọ mọnkọtọn na hẹn jijọho agun lọ tọn gble poun wẹ. Etẹwẹ mí sọgan wà nado didẹ nuhahun lọ to jijọho mẹ? Matiu 18:15 dọmọ: “Eyin mẹmẹsunnu towe waylando de, yì bo do nuṣiwa etọn hia ẹ to hiẹ po ewọ po kẹdẹ ṣẹnṣẹn. Eyin e sè towe, be hiẹ ko duale mẹmẹsunnu towe tọn.” Dile etlẹ yindọ ylando sinsinyẹn de go wẹ Matiu 18:15-17 to hodọ gando, mí sọgan yí nunọwhinnusẹ́n he tin to wefọ 15tọ mẹ zan nado dọnsẹpọ mẹhe ṣinuwa do mí lọ to nuglọ bo tẹnpọn nado jla haṣinṣan jijọho tọn do hẹ ẹ. a
7. Naegbọn mí dona nọ yawu didẹ gbemanọpọ lẹ?
7 Apọsteli Paulu wlan dọmọ: “Mì sọgan gblehomẹ, ṣogan mì waylando blo; mì dike owhè yihọ do mì to homẹgble mẹ blo, mọdopolọ, mì natẹn Lẹgba blo.” (Efe. 4:26, 27) Jesu dọmọ: “Yawu jẹ whẹgbọ ji hẹ mẹhe jlo na hẹn we yì owhẹ̀ nukọn.” (Mat. 5:25) Enẹwutu, afọdidona jijọho nọ biọ dọ mí ni yawu didẹ nuhahun lẹ. Etẹwutu? Na mọwiwà nọ glọnalina nuhahun lẹ ma nado wá ylan taidi agàdá he go yè ma penukundo. Mì gbọ mí ni ma dike goyiyi, awuwhàn, kavi wanyina agbasanu lẹ zẹjlẹgo ni glọnalina mí ma nado nọ yawu didẹ gbemanọpọ lẹ hẹ mẹmẹsunnu mítọn lẹ blo.—Jak. 4:1-6.
Eyin Nuhahun lọ Gando Mẹsusu Go
8, 9. (a) Whẹho tẹwẹ fọ́n to agun owhe kanweko tintan tọn mẹ to Lomu? (b) Ayinamẹ tẹwẹ Paulu na Klistiani Lomu tọn lẹ gando nudindọn yetọn go?
8 To whedelẹnu, gbemanọpọ he nọ fọ́n to agun lọ mẹ lẹ nọ gando mẹsusu go. Nuhe jọ to whẹho Klistiani Lomu tọn he apọsteli Paulu wlan wekanhlanmẹ gbọdo de hlan lẹ tọn mẹ niyẹn. Nudindọn de tin to Klistiani Juvi lẹ po Kosi he lẹzun Klistiani lẹ po ṣẹnṣẹn. E họnwun dọ mẹdelẹ to agun enẹ mẹ nọ yí nukunpẹvi do pọ́n mẹhe ayihadawhẹnamẹnu yetọn madogán, kavi ma nọ kẹalọyi nususu lẹ. Omẹ mọnkọtọn lẹ nọ dawhẹna mẹdevo lẹ to aliho agọ̀ mẹ gando whẹho mẹdetiti tọn lẹ go. Ayinamẹ tẹwẹ Paulu na agun lọ?—Lom. 14:1-6.
9 Paulu na ayinamẹ pipli awe he to nudọn lọ lẹ dopodopo. E dọna mẹhe mọnukunnujẹemẹ dọ yé masọ tin to Osẹ́n Mose tọn glọ lẹ ma nado nọ yí nukunpẹvi do pọ́n mẹmẹsunnu yetọn lẹ. (Lom. 14:2, 10) Walọ mọnkọtọn sọgan hẹn yisenọ he gbẹ́ nọ mọdọ e ma sọgbe nado dù nuhe ma yin alọkẹyi to Osẹ́n lọ glọ lẹ dahli. “Hiẹ sọ họ́ azọ́n Jiwheyẹwhe tọn liai na núdùdù wutu ba blo,” wẹ Paulu dotuhomẹna yé dọ. “E pọnte ma nado dù olàn kavi nù ovẹn kavi wà onú depope he na hẹn mẹmẹsunnu towe dahli.” (Lom. 14:14, 15, 20, 21) To alọ devo mẹ, Paulu na ayinamẹ Klistiani he ayihadawhẹnamẹnu yetọn ma nọ kẹalọyi nususu lẹ ma nado nọ dawhẹna mẹhe tindo pọndohlan he gbloada lẹ taidi mẹhe ma yin nugbonọ. (Lom. 14:13) E dọna ‘mẹhe to yé ṣẹnṣẹn to finẹ lẹpo ma nado nọ lẹn yede tọn glanglan hú lehe e jẹ nado nọ lẹn do.’ (Lom. 12:3) To ayinamẹ nina pipli awe he to nudọn lọ lẹ godo, Paulu wlan dọmọ: “Enẹwutu, to whelọnu lo, mì gbọ mí ni doafọna nuhe nọ hẹn jijọho wá lẹ po nuhe nọ jlọ ode awetọ dote lẹ po.”—Lom. 14:19.
10. Dile e yindo to whẹho Klistiani Lomu tọn lẹ tọn mẹ, etẹwẹ mẹhe go gbemanọpọ de gando lẹ dona wà nado didẹ nuhahun lọ?
10 Mí sọgan deji dọ agun he tin to Lomu lọ kẹalọyi ayinamẹ Paulu tọn bo basi vọjlado he jẹ lẹ. Eyin gbemanọpọ lẹ fọ́n to Klistiani hatọ lẹ ṣẹnṣẹn to egbehe, be mí ma dona nọ didẹ yé po ojọmiọn po gbọn whiwhẹ yíyí do dín ayinamẹ Owe-wiwe tọn lẹ bo yí yé do yizan mẹ dali ya? Dile e yin do to whẹho Lomunu lẹ tọn mẹ, eyin nuhahun de fọ́n to agun lọ mẹ to egbehe, e na biọ dọ mẹhe go gbemanọpọ lọ gando lẹ ni basi vọjlado lẹ nado sọgan ‘nọ jijọho hẹ ode awetọ yetọn.’—Malku 9:50.
Lehe Mẹho lẹ Sọgan Gọalọ Do
11. Etẹwẹ mẹho de dona wà eyin Klistiani de jlo na dọhona ẹn gando gbemanọpọ he e tindo hẹ yisenọ hatọ de go?
11 Etẹwẹ lo eyin Klistiani de jlo na dọhona mẹho agun tọn de gando nuhahun he ewọ tindo hẹ hẹnnumẹ kavi yisenọ hatọ de go? Howhinwhẹn lẹ 21:13 dọmọ: “Mẹhe sú otó etọn do awhá wamọnọ lẹ tọn go, ewọ lọsu na dawhá ga, ṣigba yè ma na sè.” Na nugbo tọn, mẹho de ma na jlo nado “sú otó etọn.” Etomọṣo, howhinwhẹn devo na avase dọmọ: “Omẹ tintan to owhẹ̀ etọn mẹ nọ taidi [mẹhe] owhẹ̀ etọn whẹ́n, ṣigba awetọ etọn wá bosọ dedona ẹn.” (Howh. 18:17) Mẹho de dona dotoai po sọwhiwhe po, ṣigba e dona payi ma nado yíwhẹ̀ do mẹhe wá jẹwhẹ na ẹn jẹnukọn lọ ji. To todidoai na mẹlọ godo, mẹho lọ sọgan kanse e eyin ewọ ko dọhodo whẹho lọ ji hẹ mẹhe ṣinuwa do e. Mẹho lọ sọgan sọ gbadopọnna afọdide sinai do Owe-wiwe ji he mẹhe yè ṣinuwa do lọ sọgan ze nado doafọna jijọho lẹ hẹ ẹ.
12. Dọ apajlẹ delẹ he do lehe e yin owùnu nado nọ yinuwa aplà to whenue mẹde jẹwhẹ na mí do hia.
12 Apajlẹ Biblu tọn atọ̀n zinnudo lehe eyin owùnu do nado nọ yinuwa aplà to whenue mí sèhó mẹdopo poun tọn to mẹhe go nuhahun de gando lẹ mẹ ji. Pọtifali yí lalo he asi etọn do, dọ Josẹfu jlo na yí huhlọn do zanhẹ emi sè bo gbọn homẹgble agọ̀ dali ze Josẹfu do gànpamẹ. (Gẹn. 39:19, 20) Ahọlu Davidi yí Ziba sè, mẹhe dọna ẹn dọ Mẹfiboṣẹti, klunọ emitọn ko kọnawudopọ hẹ kẹntọ Davidi tọn lẹ. Podọ Davidi gbọn nuyiwa aplà dali dọna ẹn dọmọ: “Doayi e go, towe wẹ onú lẹpo he tin hlan Mẹfiboṣẹti yin.” (2 Sam. 16:4; 19:25-27) Yè dọna Ahọlu Altakẹlikesi dọ Ju lẹ to adó Jelusalẹm tọn lẹ vọ́ gbá bo jlo na ṣiatẹ sọta Ahọluigba Pẹlsia tọn. Ahọlu lọ yí linlin lalo ehe sè bo degbe dọ azọ́n họ̀gbigbá tọn he to yìyì to Jelusalẹm lẹpo ni doalọte. Taidi kọdetọn de, Ju lẹ doalọtena azọ́n tẹmpli Jiwheyẹwhe tọn vivọgbá tọn. (Ẹzla 4:11-13, 23, 24) Nuyọnẹnnu wẹ e na yin na mẹho agun tọn lẹ nado nọ hodo ayinamẹ he Paulu na Timoti ma nado nọ dawhẹ aplà.—Hia 1 Timoti 5:21.
13, 14. (a) Dogbó tẹwẹ mímẹpo tindo gando gbemanọpọ he nọ fọ́n to mẹdevo lẹ ṣẹnṣẹn go? (b) Etẹwẹ sọgan gọalọna mẹho lẹ nado nọ dawhẹ to aliho dagbe mẹ?
13 Etlẹ yin to whenue mí ko sèhó sọn omẹ voovo he go nujijọ lọ gando lẹ dè, onú titengbe wẹ e yin nado yọnẹn dọ “eyin mẹdepope lẹndọ emi tindo oyọnẹn gando nude go, be ewọ ma ko yọ́n ẹn dile e dona yọ́n ẹn do.” (1 Kọl. 8:2) Be mí yọ́n nulẹpo gando nuhe hẹn gbemanọpọ lọ wá lẹ go ya? Be mí sọgan yọ́n ninọmẹ mẹhe go whẹho lọ gando lẹ tọn to gigọ́ mẹ ya? To whenue mẹho lẹ to nukunpedo ninọmẹ mọnkọtọn de go, yé dona tin to aṣeji taun bo ma na dike mẹde ni klọ yé gbọn lalodido kavi yèdọ-yèdọ lẹ dali. Jesu Klisti, Whẹdatọ dide Jiwheyẹwhe tọn lọ nọ dawhẹ to dodo mẹ. E ma nọ “dawhẹ dile nukunmẹ etọn te, mọ e ma na dawhẹ di sisè otó etọn tọn.” (Isa. 11:3, 4) Kakatimọ, gbigbọ wiwe Jehovah tọn wẹ nọ deanana Jesu. Mẹho agun tọn lẹ lọsu tindo lẹblanulọkẹyi lọ nado yin anadena gbọn gbigbọ wiwe Jiwheyẹwhe tọn dali.
14 Whẹpo mẹho lẹ nado penukundo whẹho de go, yé dona nọ biọ gbigbọ wiwe Jehovah tọn to odẹ̀ mẹ bo nọ dike gbigbọ Jiwheyẹwhe tọn ni deanana yé dile yé to Biblu po owe “afanumẹ nugbonọ podọ nuyọnẹntọ lọ” tọn lẹ po yizan.—Mat. 24:45.
Be Ninọmẹ Lẹpo mẹ Wẹ Mí Dona Nọ Dín Jijọho te Ya?
15. Whetẹnu wẹ mí dona dọ ylando sinsinyẹn he mí mọdona de?
15 Klistiani lẹ yin tudohomẹna nado nọ doafọna jijọho. Ṣigba, Biblu sọ dọna mí dọmọ: “Jẹnukọn whẹ́, nuyọnẹn he wá sọn aga wé, enẹgodo e yin jijọho-dintọ.” (Jak. 3:17) Eyin mẹde na yin jijọho-dintọ, e sọ dona nọ wiweji, enẹ wẹ nado tẹdo nujinọtedo walọ dagbe tọn Jiwheyẹwhe tọn lẹ go bo jẹ nubiọtomẹsi dodo tọn etọn lẹ kọ̀n. Eyin Klistiani de doayi e go dọ yisenọ hatọ de wà ylando sinsinyẹn, ewọ dona na ẹn tuli nado yì dọna mẹho lẹ. (1 Kọl. 6:9, 10; Jak. 5:14-16) To whenue ylanwatọ lọ ma wàmọ, Klistiani he mọdona ylando lọ dona dọna mẹho lẹ. Eyin ewọ gboawupo nado wà ehe po linlẹn lọ po nado gbọṣi jijọho mẹ hẹ ylanwatọ lọ, be ewọ lọsu to ylando wà niyẹn.—Lev. 5:1; hia Howhinwhẹn lẹ 29:24.
16. Etẹwẹ mí sọgan plọn sọn afọdide he Jehu ze sọta Ahọlu Jeholami mẹ?
16 Kandai he gando Jehu go de dohia dọ dodowiwa Jiwheyẹwhe tọn dona jẹnukọnna jijọho dindin. Jiwheyẹwhe do Jehu hlan nado yì hẹn whẹdida Etọn ṣẹ do owhé Ahọlu Ahabi tọn ji. Ahọlu ylankan lọ Jeholami, yèdọ visunnu Ahabi po Jezebẹli po tọn, kùn awhàn-kẹkẹ etọn nado yì pé Jehu bo dọmọ: “Jijọho e yin, Jehu?” Gblọndo tẹwẹ Jehu na ẹn? E dọmọ: “Jijọho tẹ, dẹnsọ mọ le galilọ Jezebẹli onọ̀ towe tọn lẹ, po afinyọn etọn lẹ po yin susu sọmọ?” (2 Ahọ. 9:22) Enẹgodo, Jehu dọ̀n ogába etọn bo de e do Jeholami bọ e biọ ahun etọn mẹ. Taidi Jehu, mẹho lẹ ma dona nọ kọngbedopọ hẹ ylanwatọ he ma jlo na lẹnvọjọ lẹ nado sọgan dín jijọho gba. Yé nọ de ylanwatọ he ma jlo na lẹnvọjọ lẹ sẹ̀ na agun lọ nido sọgan tin to jijọho mẹ hẹ Jiwheyẹwhe zọnmii.—1 Kọl. 5:1, 2, 11-13.
17. Adà tẹwẹ Klistiani lẹpo nọ yiwà to afọdidona jijọho mẹ?
17 Suhugan gbemanọpọ he nọ fọ́n to mẹmẹsunnu lẹ ṣẹnṣẹn lẹ tọn ma nọ yin ylando sinsinyẹn he na biọ afọdide whẹdida tọn gba. Enẹwutu, nuyiwa owanyi tọn wẹ e yin nado nọ ṣinyọnnudo nuṣiwa flinflin mẹdevo lẹ tọn. Ohó Jiwheyẹwhe tọn dọmọ: “Ewọ he ṣinyọnnudo ylanwa, to owanyi dín; ṣigba ewọ he vọ́ owhẹ̀ dà dai, klan họntọn lọsu lọsu lẹ.” (Howh. 17:9) Nuyiwa sọgbe hẹ hogbe enẹlẹ na gọalọna mímẹpo nado hẹn jijọho go to agun lọ mẹ bo hẹn haṣinṣan dagbe de go hẹ Jehovah.—Mat. 6:14, 15.
Afọdidona Jijọho Nọ Hẹn Dona lẹ Wá
18, 19. Ale tẹlẹ wẹ afọdidona jijọho nọ hẹnwa?
18 Afọdidona “nuhe nọ hẹn jijọho wá lẹ” nọ hẹn dona susugege lẹ wá. Mí nọ duvivi haṣinṣan pẹkipẹki de tọn hẹ Jehovah dile mí to apajlẹ etọn hodo, podọ mí nọ yidogọna pọninọ jijọho tọn paladisi gbigbọmẹ tọn mítọn. Afọdidona jijọho to agun lọ mẹ sọ nọ gọalọna mí nado yọ́n lehe mí sọgan doafọna jijọho hẹ mẹhe mi nọ dọyẹwheho “wẹndagbe jijọho tọn” na lẹ. (Efe. 6:15) Mí nọ wleawufo nado ‘nọ wà dẹẹdẹ hlan mẹlẹpo, bo nọ duto míde ji to whenue mí to akọndona oylan.’—2 Tim. 2:24.
19 Mí sọ dona flindọ, “fọnsọnku dodonọ lẹ po mawadodonọ lẹ tọn po de” na tin. (Owalọ 24:15) To whenue todido enẹ na mọ hẹndi to aigba ji fi, gbẹtọ livi susu he wá sọn akọ̀ voovo mẹ bo tindo jijọ po gbẹtọ-yinyin voovo po lẹ na yin hinhẹngọwa ogbẹ̀—etlẹ yin kakajẹ mẹhe ko kú sọn “didá aihọn tọn” whenu gbọ́n lẹ ji! (Luku 11:50, 51) Na nugbo tọn, lẹblanulọkẹyi daho de wẹ e na yin nado plọn aliho jijọho tọn mẹhe na yin finfọnsọnku lẹ. Lehe azọ́nplọnmẹ he mí to mimọyi todin taidi jijọho-dintọ lẹ na yin alọgọ daho na mí to ojlẹ enẹ mẹ do sọ!
[Nudọnamẹ odò tọn]
a Na anademẹ Owe-wiwe tọn lẹ nado didẹ ylando sinsinyẹn lẹ taidi mẹhẹngble po mẹhodu po, pọ́n Atọ̀họ̀-Nuhihọ́ lọ Tọn, 15 octobre 1999, weda 17-22.
Etẹwẹ Hiẹ Plọn?
• Eyin mí ṣinuwa do mẹde, nawẹ mí sọgan doafọna jijọho gbọn?
• Etẹwẹ mí dona wà nado doafọna jijọho eyin mẹde ṣinuwa do mí?
• Naegbọn e ma do yin nuyọnẹnnu nado nọ yíwhẹ̀ do mẹde ji to whenue gbemanọpọ fọ́n to omẹ awe ṣẹnṣẹn?
• Basi zẹẹmẹ nuhewutu mí ma dona nọ dín jijọho to ninọmẹ lẹpo mẹ tọn.
[Kanbiọ Oplọn tọn lẹ]
[Yẹdide to weda 29]
Jehovah yiwanna mẹhe nọ jona mẹdevo lẹ sọn ojlo mẹ wá lẹ
