Opli Ayidego Tọn De

“TO WHENUE opli ehe na wá vivọnu, mì na dọ dọ, ‘Opli whemẹwhemẹ yẹwhehọluduta tọn ayidego tọn de wẹ ehe yin na nugbo tọn!’” Po hogbe enẹlẹ po, Stephen Lett, dopo to Hagbẹ Anademẹtọ Kunnudetọ Jehovah tọn lẹ tọn mẹ, yidogọna jejejininọ mẹplidopọ he sọha yetọn sù taun lẹ tọn. Yé pli na opli whemẹwhemẹ tọn sọha 126tọ Watch Tower Bible and Tract Society of Pennsylvania tọn, he yin bibasi to 2 octobre 2010, to Plitẹnhọ Plidopọ Kunnudetọ Jehovah tọn lẹ tọn mẹ to Jersey City, New Jersey, to États-Unis. Etẹwẹ yin delẹ to adà ayidego tọn opli ehe tọn lẹ mẹ?

Mẹmẹsunnu Lett bẹjẹeji po hodidọ zohunhun tọn de po do awhàn-kẹkẹ olọn mẹ tọn Jehovah tọn ji dile e yin zẹẹmẹ basina to owe Ezekiẹli tọn mẹ do. Awhàn-kẹkẹ daho gigonọ ehe nọtena titobasinanu Jiwheyẹwhe tọn he Jehovah lọsu to anadena. Mẹmẹsunnu Lett dọ dọ, adà olọn mẹ tọn etọn bẹ nudida gbigbọnọ he nọ sẹtẹn po awuyiya po taidi hinhọ́n lẹ hẹn—yèdọ tẹnsisẹ he tin to kọndopọ mẹ hẹ linlẹn Jehovah tọn lẹ. Aliho dopolọ mẹ wẹ adà aigba ji tọn titobasinanu lọ tọn to tẹnsẹ te. Mẹmẹsunnu Lett donù nukọnyiyi ayidego tọn delẹ he wá aimẹ to adà yinukundomọ titobasinanu lọ tọn mẹ to owhe agọe tọn lẹ mẹ go.

Di apajlẹ, alahọ susu to yinyin kinkọndopọ bo to yinyin hinhẹn lodo, ehe na hẹn ẹn yọnbasi na mẹsusu he nọ wazọ́n to owhé Bẹtẹli tọn gbè to otò enẹlẹ mẹ nado na ayidonugo azọ́n yẹwhehodidọ tọn. Mẹmẹsunnu Lett dotuhomẹna mẹplidopọ lẹ nado nọ hodẹ̀, na Hagbẹ Anademẹtọ lọ, yèdọ afọzedaitọ pipli afanumẹ lọ tọn, ni zindonukọn nado yin nugbonọ podọ nuyọnẹntọ.—Mat. 24:45-47.

Linlin Tulinamẹ Tọn lẹ po Hokansemẹ Homẹmiọnnamẹ Tọn lẹ Po

Tab Honsberger, dopo to Wedegbẹ́ Alahọ Haïti tọn mẹ, na linlin he whànmẹ de do nuhe jọ to aigba sisọsisọ 12 janvier 2010 tọn he hù gbẹtọ nudi 300000 to otò enẹ mẹ godo ji. E dọ dọ sinsẹ̀ngán lẹ nọ dọna gbẹtọ lẹ dọ Jiwheyẹwhe wẹ sayana mẹhe kú lẹ na yé ma tindo yise wutu, bo basi hihọ́na mẹdagbe lẹ. Ṣigba, danuwatọ fọtọ́n susu mọ tundote to whenue adó gànpa de tọn họ́ to aigba sisọsisọ lọ whenu. Enẹwutu, Haïti-nu ahunjijlọnọ susu nọ mọ homẹmimiọn yí dile yé plọn nugbo lọ gando nuhewutu nuhahun do sù sọmọ to ojlẹ mítọn mẹ go. Mẹmẹsunnu Honsberger vọ́ nuhe mẹmẹsunnu Haïti-nu nugbonọ he hẹn asi etọn bu to nugbajẹmẹji lọ whenu de dọ dọmọ: “N’gbẹ́ nọ viavi kakajẹ egbé. N’ma yọ́n lehe n’na nọ aluẹmẹ dẹnsọ, ṣigba n’jaya dọ n’to vivi owanyi titobasinanu Jehovah tọn dù. N’tindo todido, bosọ magbe nado má ẹn hẹ mẹdevo lẹ.”

 Mark Sanderson, dopo to hagbẹ whẹndo Bẹtẹli tọn lẹ mẹ to Brooklyn, na linlin do otò Philippines tọn ji. Na ewọ yin dopo to Wedegbẹ́ Alahọ otò enẹ tọn mẹ dai wutu, homẹ etọn hùn nado dọhodo agayiyi debọdo-dego 32 he otò lọ tindo to sọha wẹnlatọ Ahọluduta lọ tọn lẹ tọn mẹ po lehe plọnmẹ Biblu lẹ sù taun hugan wẹnlatọ lẹ do po ji. E dọho gando Miguel, mẹmẹsunnu de he ovivi etọn sunnu yin hùhù go. Miguel wà nuhe go e pé lẹpo na hlọnhutọ lọ nido yin whẹdana bo yin zizedo gànpamẹ. To godo mẹ he Miguel to kunnude to gànpa lọ mẹ, e dukosọ hẹ hlọnhutọ lọ. Dile e tlẹ yindọ adi do Miguel, e dọho hẹ ẹ to aliho dagbe mẹ po homẹfa po. To nukọn mẹ, Miguel plọnnu hẹ dawe lọ, bọ ewọ kẹalọyi nuhe plọn e te lẹ bo wá yiwanna Jehovah bosọ yí baptẹm. Miguel lẹzun họntọn vivẹ́ etọn bo to vivẹnudo na mẹmẹsunnu yọyọ etọn nido yawu yin didesọn gànmẹ. a

To enẹgodo, hokansemẹ de wá aimẹ, ehe Mark Noumair, he yin mẹplọntọ to Azọ́nwatẹn Wehọmẹ Yẹwhehọluduta Tọn lẹ Tọn deanana. E kanhose asu po asi po atọ̀n—yèdọ Alex po Sarah Reinmueller po, David po Krista Schafer po, gọna Robert po Ketra Ciranko po. Alex Reinmueller he nọ gọalọ to Wedegbẹ́ Wezinjẹgbonu tọn mẹ dọ lehe ewọ hẹn nugbo lọ zun ede tọn do dile e to gbehosọnalitọ basi to Canada to whenue e tindo owhe 15 poun bo nọ saba wazọ́n edeṣo. To whenue yé kanse Mẹmẹsunnu Reinmueller nado dọ mẹhe yinuwado e ji hugan to Bẹtẹli lẹ, e donù mẹmẹsunnu nugbonọ atọ̀n go bo dọ lehe dopodopo yetọn gọalọna ẹn nado whẹ́n to gbigbọ-liho do. Asi etọn Sarah dọhodo họntọnjiji etọn hẹ mẹmẹyọnnu de he doakọnnanu na owhe susu to gànpa Chine tọn lẹ mẹ na yise etọn wutu ji. Sarah dọ dọ emi plọn nado nọ ganjẹ Jehovah go gbọn odẹ̀ mẹdetiti tọn gblamẹ.

David Schafer he nọ gọalọ to Wedegbẹ́ Mẹpinplọn tọn mẹ, pà onọ̀ etọn na yise dolido etọn bo dọho gando mẹmẹsunnu he deanana ẹn bo gọalọna ẹn nado basi gbehosọnalitọ to jọja whenu lẹ go. Asi etọn Krista yí ahundopo do dọ lehe hagbẹ whẹndo Bẹtẹli tọn mẹhomẹ he do yede hia nado yin “nugbonọ to onú pẹvi pete mẹ” dile Jesu dọ do lẹ yinuwado e ji do.—Luku 16:10.

Robert Ciranko he nọ gọalọ to Wedegbẹ́ Wekinkan tọn mẹ dọhodo mẹjitọ daho etọn ẹnẹ lẹ he wá sọn Hongrie bo yin mẹyiamisisadode ji. Taidi jọja de, e yin nuyiwadeji to whenue e yì plidopọ daho he yin bibasi to 1950 gblamẹ lẹ bo wá mọdọ titobasinanu Jehovah tọn gbloada taun hugan agun he mẹ e tin te. Asi etọn Ketra dọ lehe e plọn nado yin nugbonọ do to whenue e to sinsẹ̀n taidi  gbehosọnalitọ to agun de he mẹ atẹṣitọ lẹ po nuhahun lẹ po sù te. E doakọnnanu podọ to godo mẹ, e yin azọ́ndena nado yì sẹ̀n taidi gbehosọnalitọ titengbe to agun he pọninọ etọn yinuwado e ji taun de mẹ.

Enẹgodo, Manfred Tonak na linlin gando Ethiopie go. Otò ehe ko tin sọn ojlẹ Biblu tọn mẹ, podọ todin e ko yin didona po wẹnlatọ wẹndagbe lọ tọn he hugan 9000 po. Suhugan yetọn wẹ nọ nọ̀ tatọ́-tònọ lọ, Addis Abeba kavi fihe sẹpọ finẹ. Enẹwutu, lẹdo he to olá lẹ tindo nuhudo wẹnlatọ tọn taun. Nado penukundo nuhudo ehe go, Kunnudetọ Ethiopie-nu he nọ nọ̀ otò devo mẹ lẹ yin oylọ-basina nado wá dekunnu to lẹdo otò lọ tọn he to olá delẹ mẹ. Susu yetọn wá bo dozolanmẹna Kunnudetọ lẹdo lọ tọn lẹ bosọ mọ jlodotọ lẹ.

Adà titengbe tito-to-whinnu lọ tọn devo wẹ hómadọ he gando Kunnudetọ Jehovah tọn Russie tọn lẹ po whẹho owhẹ̀ nukọn yìyì tọn yetọn lẹ po go. Aulis Bergdahl, dopo to Wedegbẹ́ Alahọ Russie tọn mẹ dọ lehe Kunnudetọ lẹ to yinyin homẹkẹndo to Russie, titengbe to Moscou do. Philip Brumley he nọ wazọ́n to Azọ́nwatẹn He Nọ Penukundo Whẹho Osẹ́n Tọn Go to alahọ États-Unis tọn mẹ, dọhodo nukọnyiyi ojlofọndotenamẹ tọn he wá aimẹ to osun agọe tọn lẹ mẹ to whenue Whẹdatẹn Europe Tọn Na Jlọjẹ Gbẹtọvi lẹ Tọn dotoaina owhẹ̀ ṣinẹnẹ he yin sisadokọna Kunnudetọ lẹ ji. Whẹdatẹn lọ mọdọ depope to whẹsadokọnamẹ ṣinẹnẹ lọ lẹ mẹ ma sọgbe, podọ yé tlẹ sọ dovivẹnu nado basi zẹẹmẹ gigọ́ do nuhewutu suhugan yetọn ma do sọgbe ji. Dile etlẹ yindọ mí to tenọpọn kọdetọn he ehe na hẹnwa lẹ, Mẹmẹsunnu Brumley dọho po todido po dọ nudide Whẹdatẹn lọ tọn enẹ sọgan yinuwado whẹho whẹdidọ tọn otò devo lẹ tọn ji.

To nulila ojlofọndotenamẹ tọn ehe godo, Mẹmẹsunnu Lett lá dọ Whẹdatẹn ehe ko yigbe nado gbeje whẹho takuẹ súsú tọn he ko to ote sọn ojlẹ dindẹn die to Kunnudetọ Jehovah tọn lẹ po gandudu France tọn po ṣẹnṣẹn pọ́n. Owhẹ̀ vude poun wẹ Whẹdatẹn he nọ yin sisi na taun ehe nọ kẹalọyi to dehe yin zizedonukọnna ẹn lẹ mẹ. Kakajẹ din, Whẹdatẹn ehe ko gbeje owhẹ̀ 39 pọ́n gando Kunnudetọ Jehovah tọn lẹ go bo ko basi nudide dagbe do ota mítọn mẹ to owhẹ̀ 37 mẹ. Mẹmẹsunnu Lett na tuli omẹ Jiwheyẹwhe tọn lẹpo nado ze whẹho he to aimẹ ehe donukọnna Jehovah Jiwheyẹwhe to odẹ̀ mẹ.

Richard Morlan he yin mẹplọntọ to Wehọmẹ Mẹho Agun Tọn lẹ Tọn mẹ wẹ ze linlin godo tọn do nukọnamẹ. E yí zohunhun do dọho gando wehọmẹ lọ po hogbe pinpẹn-nutọn-yinyọnẹn tọn he mẹho he yì wehọmẹ lọ lẹ dọ lẹ po go.

 Hodidọ Devo lẹ Gbọn Mẹhe Tin to Hagbẹ Anademẹtọ lọ mẹ lẹ Dali

Guy Pierce na hodidọ ahundopo tọn de sinai do hosọ owhe 2011 tọn he yin “Dín fibẹtado to oyín Jehovah tọn mẹ” ji. (Zẹf. 3:12) E zinnudeji dọ dile etlẹ yindọ ojlẹ ayajẹ tọn wẹ ehe yin to aliho susu mẹ na omẹ Jehovah tọn lẹ, e sọ yin ojlẹ sinsinyẹn de nado lẹnnupọn. Azán daho Jehovah tọn sẹpọ; etomọṣo, gbẹtọ lẹ gbẹ́ to fibẹtado dín to sinsẹ̀n lalo, tonudidọ, adọkunnu, po onú mọnkọtọn lẹ po mẹ. Nado mọ fibẹtado nujọnu tọn, mí dona dawhá ylọ Jehovah, ehe bẹ nado yọ́n Mẹlọ he tindo oyín enẹ, tindo sisi sisosiso na ẹn bo dejido ewọ go bosọ yiwanna ẹn po nuhe mí tindo lẹpo po hẹn.

David Splane na hodidọ zohunhun tọn he hẹnmẹ lẹnnupọn de do hosọ lọ, “Be Hiẹ Ko Biọ Gbọjẹ Jiwheyẹwhe Tọn mẹ Ya?” ji. E dohia dọ gbọjẹ Jiwheyẹwhe tọn ma zẹẹmẹdo alọdidotena nuwiwa gba, na Jehovah po Visunnu etọn po “zindonukọn to azọ́nwiwa mẹ” to azán gbọjẹ tọn yẹhiadonu tọn enẹ blebu mẹ nado sọgan hẹn lẹndai Jiwheyẹwhe tọn na nudida aigba ji tọn lẹ di po kọdetọn dagbe po. (Joh. 5:17) To whelọnu lọ, nawẹ mí sọgan biọ gbọjẹ Jiwheyẹwhe tọn mẹ gbọn? Adà gblọndo lọ tọn de poun wẹ nado dapana ylando po azọ́n whẹsuna mẹdetiti tọn lẹ po. Mí dona do yise hia bo nọgbẹ̀ po lẹndai Jiwheyẹwhe tọn po to ayiha mẹ, bo wà nuhe go mí pé lẹpo nado nọgodona lẹndai enẹ. To whedelẹnu, enẹ sọgan yin avùnnukundiọsọmẹnu titengbe de, ṣigba mí dona kẹalọyi ayinamẹ bo kọngbedopọ hẹ anademẹ titobasinanu Jehovah tọn. Mẹmẹsunnu Splane vẹ̀ mẹplidopọ lẹ nado wà nulẹpo nado biọ gbọjẹ Jiwheyẹwhe tọn mẹ.

Anthony Morris na hodidọ godo tọn he hosọ etọn yin “Etẹwẹ Mí to Tenọpọn?” Mẹmẹsunnu Morris dọho po numọtolanmẹ niyaniya-yinyin tọn po podọ taidi otọ́ owanyinọ de, bo flinnu mẹplidopọ lẹ gando hẹndi dọdai tọn he ja to nukọn mẹ lẹ go, yèdọ nujijọ he nugbonọ lẹpo to tenọpọn po jejejininọ po. Ehelẹ bẹ awhá “Jijọho po hihọ́ po!” tọn dido gọna vasudo sinsẹ̀n lalo tọn hẹn. (1 Tẹs. 5:2, 3; Osọ. 17:15-17) Mẹmẹsunnu Morris na avase dọ e ma sọgbe nado nọ dọ dọ, “Amagẹdọni die,” to whenue mí sè linlin gando nujijọ he ma yin hẹndi dọdai mọnkọtọn lẹ tọn go. E na ayinamẹ dọ mí ni wleawuna ayajẹ, homẹfa po gbigbọ sọwhiwhe tọn po dile Mika 7:7 dohia do. Ṣigba, e sọ na tuli mẹlẹpo nado wazọ́n to kọndopọ mẹ hẹ Hagbẹ Anademẹtọ lọ taidi awhànfuntọ lẹ to awhàngbenu. E dọmọ: “[Mì] gbọ ayiha mìtọn ni deji, mì he do todido to OKLUNỌ mẹ lẹpo.”—Ps. 31:24.

To vivọnu, nulila ayidego tọn delẹ yin bibasi. Geoffrey Jackson lá dọ tito to yinyin bibasi nado wleawuna zinjẹgbonu oplọn tọn Atọ̀họ̀-Nuhihọ́ lọ Tọn he bọawu na mẹhe ma sè Glẹnsigbe ganji lẹ nado pọ́n eyin e na yọ́n-na-yizan. Enẹgodo, Stephen Lett lá dọ Hagbẹ Anademẹtọ lọ na basi tito na dlapọn lẹngbọhọtọ tọn nido yin bibasina nugopọntọ agbegbe tọn he to États-Unis lẹ po asi yetọn lẹ po. E sọ lá dọ sọn din, Wehọmẹ Azọ́nplọnmẹ Devizọnwiwa tọn na nọ yin yiylọdọ Wehọmẹ Biblu Pinplọn Tọn Na Mẹmẹsunnu Tlẹnnọ Lẹ. E sọ dọ dọ to nukọn mẹ, wehọmẹ yọyọ de he na yin yiylọdọ Wehọmẹ Biblu Pinplọn Tọn Na Alọwlemẹ Lẹ na tin. Wehọmẹ ehe na plọnazọ́n alọwlemẹ lẹ nado yọ́n-na-yizan dogọ na titobasinanu Jehovah tọn. Mẹmẹsunnu Lett sọ basi nulila dọ klasi awe awe wẹ na nọ yin bibasi to Wehọmẹ Nugopọntọ Tomẹyitọ lẹ po Asi Yetọn lẹ po Tọn podọ na Wehọmẹ Hagbẹ Wedegbẹ́ Alahọ Tọn lẹ po Asi Yetọn lẹ po Tọn to whemẹwhemẹ to Patterson, bọ tito ko yin bibasi na mẹhe ko yì dai lẹ nido yì whla awetọ.

John E. Barr he tindo owhe 97 bo yin dopo to Hagbẹ Anademẹtọ lọ mẹ na ojlẹ dindẹn dotana tito-to-whinnu lọ to aliho he whànmẹ taun de mẹ gbọn odẹ̀ whiwhẹ po ahundopo tọn de po hihò dali. b To opli lọ godo, mẹlẹpo wẹ tindo numọtolanmẹ lọ dọ azán ayidego tọn de wẹ ehe yin na nugbo tọn.

[Nudọnamẹ odò tọn]

[Blurb on page 19]

Mẹplidopọ lẹpo duvivi hokansemẹ lẹ tọn

[Blurb on page 20]

Jehovah ko dona azọ́n yẹwhehodidọ tọn lọ to Ethiopie