Ayinamẹ Nuyọnẹn Tọn Do Tlẹnmẹninọ po Alọwle po Ji
Ayinamẹ Nuyọnẹn Tọn Do Tlẹnmẹninọ po Alọwle po Ji
“Yẹn to ehe dọ . . . nado whàn mì nado wà nuhe sọgbe podọ nuhe nọtena devizọnwiwa to whepoponu na Oklunọ matin ayihafẹsẹnamẹ.”—1 KỌL. 7:35.
1, 2. Naegbọn mí dona gbadopọnna ayinamẹ Biblu tọn do tlẹnmẹninọ po alọwle po ji?
ADÀ gbẹzan tọn he nọ hẹn ayajẹ, flumẹjijẹ, po nuhiha po wá sọ nuyiwa hẹ vijinu awetọnọ ma sù. Nado pehẹ numọtolanmẹ mọnkọtọn lẹ po kọdetọn dagbe po mí dona dín anademẹ Jiwheyẹwhe tọn, ṣigba whẹwhinwhẹ́n devo lẹ tin he wutu mí dona wàmọ. Klistiani he tindo pekọ to tlẹnmẹninọ mẹ de sọgan mọdọ hagbẹ whẹndo tọn kavi họntọn etọn lẹ to kọgbidina ẹn nado wlealọ. Mẹdevo sọgan jlo nado wlealọ ṣigba bo ma ko mọ alọwlemẹ he sọgbe hẹ ẹ. Mẹdelẹ tindo nuhudo anademẹ tọn do lehe yé na wleawudaina azọngban asu kavi asi tọn do ji. Podọ Klistiani tlẹnnọ po alọwlemẹ lẹ po wẹ nọ pehẹ whlepọn fẹnnuwiwa zanhẹmẹ tọn lẹ.
2 Gbọnvona ayajẹ mẹdetiti tọn mítọn, whẹho ehelẹ sọ gando teninọ mítọn to Jehovah Jiwheyẹwhe nukọn go. To weta 7tọ wekanhlanmẹ tintan Paulu tọn hlan Kọlintinu lẹ mẹ, e na anademẹ do tlẹnmẹninọ po alọwle po ji. Yanwle etọn wẹ nado whàn wehiatọ etọn lẹ nado “wà nuhe sọgbe podọ nuhe nọtena devizọnwiwa to whepoponu na Oklunọ matin ayihafẹsẹnamẹ.” (1 Kọl. 7:35) Dile hiẹ to dogbapọnna ayinamẹ etọn do whẹho titengbe ehelẹ ji, tẹnpọn nado pọ́n ninọmẹ towe—vlavo a yin tlẹnnọ kavi alọwlemẹ—taidi aliho de nado sẹ̀n Jehovah to gigọ́ mẹ dogọ.
Nudide Mẹdetiti Tọn Titengbe De
3, 4. (a) Nuhahun tẹlẹ wẹ sọgan fọ́n to whedelẹnu eyin gbẹtọ lẹ yin ahunmẹduna zẹjlẹgo gando họntọn kavi hẹnnumẹ he ma ko wlealọ de go? (b) Nawẹ ayinamẹ Paulu tọn dona gọalọna mí nado tindo pọndohlan jlẹkaji tọn gando alọwle go gbọn?
3 Taidi akọta Ju owhe kanweko tintan tọn, akọ̀ susu to egbehe nọ zinnudo alọwle ji taidi nuhe yọ́n hugan. Eyin jọja sunnu kavi yọnnu de zẹ̀ owhe tangan de go bo ma wlealọ, họntọn po hẹnnumẹ he yin ahunmẹduna lẹ po sọgan yin whinwhàn nado na ẹn ayinamẹ delẹ. To hodọdopọ whenu, yé sọgan na ẹn ayinamẹ dọ ni dovivẹnu nado dín alọwlemẹ de. Yé sọgan dọhona ẹn to aliho mayin tlọlọ mẹ gando vijinu awetọnọ he ko wleawufo de go. Yé tlẹ sọgan yí ayiha wintinwintin zan nado hẹn mẹhe ma ko wlealọ awe nado pé yede. Nuyiwa ehelẹ nọ hẹn winyan po homẹgble po wá bo nọ hẹn họntọn lẹ gble to whedelẹnu.
4 Paulu ma gbidikọna mẹdevo lẹ nado wlealọ kavi gbọṣi tlẹnmẹ pọ́n gbede. (1 Kọl. 7:7) E mọ pekọ dile e to Jehovah sẹ̀n matin asi, ṣigba e nọ na sisi jlọjẹ mẹdevo lẹ tọn nado duvivi alọwle tọn. To egbehe, Klistiani dopodopo wẹ tindo jlọjẹ nado de eyin ewọ na wlealọ kavi gbọṣi tlẹnmẹ. Mẹdevo lẹ ma dona nọ gbidikọna yé nado basi nudide de kavi devo gba.
Kọdetọn Dagbe Tintindo to Tlẹnmẹninọ Mẹ
5, 6. Naegbọn Paulu na tuli Klistiani lẹ nado gbọṣi tlẹnmẹ?
5 Nuhe jẹna ayidego to hodidọ Paulu tọn hlan Klistiani lẹ mẹ wẹ pọndohlan jlẹkaji tọn he e tindo gando tlẹnmẹninọ go. (Hia 1 Kọlintinu lẹ 7:8.) Dile etlẹ yindọ Paulu ma wlealọ, e ma ze ede daga do mẹhe wlealọ lẹ ji, dile nukọntọ sinsẹ̀n Mẹylọhodotọklisti tọn he yin tlẹnnọ lẹ nọ wà do gba. Kakatimọ, apọsteli lọ zinnudo ale he susu lizọnyizọnwatọ he ma wlealọ lẹ tọn nọ duvivi etọn de ji. Ale tẹwẹ?
6 E nọ saba bọawuna Klistiani tlẹnnọ de nado kẹalọyi azọ́ndenamẹ lẹ to sinsẹ̀nzọn Jehovah tọn mẹ, ehe sọgan vẹawuna mẹhe ko wlealọ lẹ. Paulu tindo lẹblanulọkẹyi titengbe de nado yin “apọsteli de na akọta lẹ.” (Lom. 11:13) Hia Owalọ lẹ weta 13 jẹ 20, bo yí nukun homẹ tọn do pọ́n lehe ewọ po mẹdehlan hatọ etọn lẹ po yì aigba-denamẹ yọyọ lẹ ji bo do agun lẹ ai sọn fide jẹ fidevo do. To lizọnyizọn Paulu tọn mẹ, e doakọnna awusinyẹnnamẹnu lẹ he susu mítọn ma na pehẹ to egbehe. (2 Kọl. 11:23-27, 32, 33) Ṣigba, ayajẹ he e mọ to alọgigọna mẹsusu nado lẹzun devi lẹ mẹ zọ́n bọ akọndidona nuhahun enẹlẹ ma yin ovọ́. (1 Tẹs. 1:2-7, 9; 2:19) Be e sọgan wà ehe lẹpo eyin e wlealọ kavi tindo whẹndo de ya? E na vẹawu.
7. Na apajlẹ de gando Kunnudetọ he ma ko wlealọ bo yí ninọmẹ yetọn zan na nukọnyiyi Ahọluduta lọ tọn lẹ go.
7 Klistiani he ma ko wlealọ susu wẹ nọ yí ninọmẹ yetọn dintọn zan nado wà nususu do Ahọluduta lọ tamẹ. Sara po Limbania po he yin gbehosọnalitọ tlẹnnọ lẹ to Bolivie, sẹtẹn yì gbétatò de mẹ, fie mẹde ma dọyẹwheho te na owhe susu. Be miyọ́n lẹtliki tọn he ma tin yin nuhahun de wẹ ya? Yé na linlin dọ: “Ladio kavi televiziọn depope ma tin, enẹwutu nude ma nọ fẹayihasẹna gbẹtọ lọ lẹ sọn nuhe nọ hẹn awuvivi wá na yé kọ̀n, enẹ wẹ wehihia.” Mẹdelẹ to gbétatò lọ mẹ do owe Kunnudetọ Jehovah tọn lẹ tọn he ma nọ yin zinzinjẹgbonu ba he yé gbẹ́ to hihia lẹ hia gbehosọnalitọ lọ lẹ. Diblayin ohọ̀n lẹpo kọ̀n wẹ mẹmẹyọnnu lọ lẹ nọ mọ mẹhe do ojlo hia te, enẹwutu yé ma sọgan dla whétọ lẹpo pọ́n to aigba-denamẹ lọ ji. Nawe mẹhomẹ de dọna yé dọmọ: “To whenuena e yindọ Kunnudetọ Jehovah tọn lẹ wá dla mí pọ́n todin, ehe dohia dọ opodo lọ dona ko sẹpọ.” To madẹnmẹ, mẹdelẹ to gbétatò enẹ mẹ jẹ opli agun tọn lẹ yì ji.
8, 9. (a) Etẹwẹ Paulu tindo to ayiha mẹ to whenue e dọho to aliho dagbe mẹ gando tlẹnmẹninọ go? (b) Dotẹnmẹ hundote tẹlẹ wẹ Klistiani he ma wlealọ lẹ tindo?
8 Na nugbo tọn, Klistiani he wlealọ lẹ lọsu nọ tindo kọdetọn dagbe dile yé to yẹwheho wẹndagbe lọ tọn dọ to aigba-denamẹ he vẹawu lẹ ji. Ṣigba, dotẹnmẹ azọ́ndenamẹ tọn he nọ hundote na gbehosọnalitọ tlẹnnọ lẹ sọgan vẹawuna mẹhe ko wlealọ kavi tindo ovi lẹ. Paulu lẹnnupọndo kọdetọn dagbe he wẹndagbe lọ hinhẹn gbayipe to agun lẹ mẹ sọgan hẹnwa ji. E jlo dọ mẹlẹpo ni tindo ayajẹ dile ewọ tindo do. Enẹwutu wẹ e do dọho to aliho dagbe mẹ gando Jehovah sinsẹ̀n taidi tlẹnnọ go.
9 Mẹmẹyọnnu tlẹnnọ gbehosọnalitọ de to États-Unis wlan dọmọ: “Mẹdelẹ nọ lẹndọ mẹhe ma wlealọ lẹ ma sọgan tindo ayajẹ gbede. Ṣigba, n’mọdọ haṣinṣan mẹdetiti tọn hẹ Jehovah ji wẹ ayajẹ dẹn-to-aimẹ sinai do. Dile etlẹ yindọ avọ́sinsan de wẹ tlẹnmẹninọ yin, nunina jiawu de wẹ e yin eyin hiẹ yí i zan ganji.” E wlan gando ayajẹ mimọ go dọmọ: “Tlẹnmẹninọ sọgan hẹnmẹ jẹ ayajẹ kọ̀n, e ma nọ glọnalina ẹn gba. N’yọnẹn dọ Jehovah ma nọ de mẹde dovo to owanyi sisosiso etọn mẹ, vlavo mẹlọ yin tlẹnnọ kavi alọwlemẹ.” E to sinsẹ̀n todin to fihe nuhudo wẹnlatọ Ahọluduta lọ tọn sù hugan te. Eyin tlẹnnọ wẹ hiẹ yin, be a sọgan yí mẹdekannujẹ towe zan nado gbloada na mahẹ he a nọ tindo to nugbo lọ pinplọn mẹdevo lẹ mẹ ya? Hiẹ lọsu sọgan mọdọ tlẹnmẹninọ yin nunina họakuẹ de sọn Jehovah dè.
Tlẹnnọ He Jlo Nado Wlealọ Lẹ
10, 11. Nawẹ Jehovah nọ gọalọna mẹhe jlo nado wlealọ ṣigba bo ma ko mọ alọwlemẹ he sọgbe lẹ gbọn?
10 Devizọnwatọ nugbonọ Jehovah tọn susu wẹ nọ de nado dín alọwlemẹ de to whenue yé ko nọ tlẹnmẹ na ojlẹ de godo. Na yé yọnẹn dọ emi tindo nuhudo anademẹ tọn wutu, yé nọ biọ alọgọ sọn Jehovah dè nado sọgan mọ alọwlemẹ he sọgbe de.—Hia 1 Kọlintinu lẹ 7:36.
11 Eyin a jlo nado wlealọ hẹ mẹhe tindo ojlo dopolọ hẹ we nado sẹ̀n Jehovah po ahun lẹpo po, ze whẹho lọ donukọnna Ẹn to odẹ̀ mẹ. (Flp. 4:6, 7) Mahopọnna lehe a na nọte dẹnsọ, ma hẹn todido bu blo. Dejido Jiwheyẹwhe owanyinọ mítọn go taidi Alọgọtọ towe, podọ ewọ na nọgodona we to numọtolanmẹ-liho sọgbe hẹ nuhudo towe.—Heb. 13:6.
12. Naegbọn Klistiani de dona yí sọwhiwhe do gbeje nuzedonukọnnamẹ alọwle tọn pọ́n?
12 Mẹhe ma lodo to gbigbọ-liho kavi mayisenọ de sọgan biọ to Klistiani tlẹnnọ he jlo nado wlealọ de si dọ ni dà emi. Eyin enẹ wá jọ do gowe, flindọ awufiẹsa he alọwlemẹ he ma sọgbe de dide sọgan hẹnwa nọ sinyẹn taun hugan numọtolanmẹ ṣokẹdẹninọ tọn he a tindo to whenue a to tlẹnmẹ. Podọ eyin a ko wlealọ, yọnẹn dọ na dagbe kavi na oylan wẹ, na a ko yin sìnsìn do alọwlemẹ towe go dile a na nọgbẹ̀ dẹnsọ. (1 Kọl. 7:27) Ma nọ plaplaji do basi nudide nado wlealọ blo, eyin e ma yinmọ, e na wá vẹna we to godo mẹ.—Hia 1 Kọlintinu lẹ 7:39.
Wleawudaina Alọwle
13-15. Whẹho he sọgan hẹn nukunbibia wá alọwle mẹ tẹlẹ ji wẹ mẹhe jlo na wlealọ lẹ dona dọhodo to họntọnmẹninọ whenu?
13 Dile etlẹ yindọ Paulu na ayinamẹ dọ mí ni nọ tlẹnmẹ do sẹ̀n Jehovah, e ma yí nukunpẹvi do pọ́n mẹhe de nado wlealọ lẹ. Kakatimọ, ayinamẹ gbọdo etọn gọalọna alọwlemẹ lẹ nado pehẹ nuhe gbẹzan alọwle tọn nọ bẹhẹn lẹ podọ nado hẹn kọndopọ yetọn go zọnmii.
14 Mẹhe jlo na wlealọ delẹ tindo nuhudo nado diọ pọndohlan yetọn gando nuhe yé nọ donukun sọn alọwle mẹ go. Dile omẹ awe to họntọn mẹ, yé sọgan mọdọ yé yiwanna yede taun, bọ alọwle yetọn na tindo ayajẹ dandan. Yé nọ wá wlealọ po numọtolanmẹ enẹlẹ po bo nọ yise dọ nude ma sọgan hẹn ayajẹ yetọn gble. Linlẹn mọnkọtọn ma sọgbe. Nugbo wẹ dọ owanyi didohia alọwlemẹ mẹtọn nọ hẹn awuvivi wá, ṣigba ehe kẹdẹ ma ko pé nado hẹn asu po asi po de penugo nado pehẹ nukunbibia he alọwle lẹpo nọ tindo gba.—Hia 1 Kọlintinu lẹ 7:28. a
15 E nọ wá paṣa alọwlemẹ yọyọ susu, bọ yé tlẹ nọ jẹflumẹ to whenue alọwlemẹ yetọn ma kọngbedopọ hẹ yé do whẹho titengbe lẹ ji. Yé omẹ awe lẹ sọgan mọdọ yé ma kọngbedopọ do fie yé na nọ, lehe yé na nọ zan akuẹ po whenu ayidedai tọn po do, po whla nẹmu he yé na nọ yì dla yọnwẹn lẹ pọ́n po ji. Podọ dopodopo yetọn tindo awugbopo delẹ he sọgan gbleawuna ode awetọ. To họntọnmẹninọ whenu, e nọ bọawu nado dovọ́na hodidọ do whẹho titengbe enẹlẹ ji, ṣigba yé sọgan hẹn nuhahun susu wá alọwle mẹ to godo mẹ. Enẹwutu, mẹhe jlo na wlealọ lẹ na wà dagbe nado dọhodo onú ehelẹ ji jẹnukọn.
16. Naegbọn asu po asi po lẹ dona kọngbedopọ do lehe yé na pehẹ avùnnukundiọsọmẹnu alọwle tọn lẹ do ji?
16 Nado tindo kọdetọn dagbe bo yin ayajẹnọ, asu po asi po lẹ dona nọ wazọ́n dopọ nado pehẹ avùnnukundiọsọmẹnu yetọn lẹ. Yé dona kọngbedopọ do lehe yé na domẹplọnlọ ovi yetọn lẹ go do po lehe yé na penukundo mẹjitọ yọnhonọ yetọn lẹ go do po ji. Kọgbidinamẹ he nuhahun whẹndo tọn lẹ nọ hẹnwa ma dona klan yé omẹ awe lẹ. Ayinamẹ Biblu tọn lẹ yíyí-do-yizan mẹ na gọalọna yé nado didẹ nuhahun susu lẹ, bo doakọnna dehe pò lẹ, bosọ gbọṣi ayajẹ mẹ dopọ.—1 Kọl. 7:10, 11.
17. Ahunmẹdunamẹnu tẹwẹ asu po asi po lẹ na donukun nado tindo gando “onú aihọn tọn lẹ” go?
17 Paulu dọ nugbo devo gando alọwle go to 1 Kọlintinu lẹ 7:32-34 mẹ. (Hia.) Mẹhe wlealọ lẹ to dandannu glọ nado “nọ jẹtukla na onú aihọn tọn lẹ,” taidi núdùdù, avọ̀, adọtẹn, po nuhe ma yin gbigbọmẹ tọn devo lẹ po. Naegbọn e do yinmọ? Whenue mẹmẹsunnu de to tlẹnmẹ, e sọgan ko ze ede jo mlẹnmlẹn na lizọnyizọn lọ. Ṣigba, eyin e wá yin asu de, e na mọdọ emi dona yí delẹ to whenu po huhlọn enẹ po mẹ zan nado penukundo asi emitọn go bo gbọnmọ dali tindo alọkẹyi etọn. Nudopolọ wẹ asi lọsu nọ wà na asu etọn. Na Jehovah tindo nuyọnẹn wutu, e yọ́n nuhudo ehe. Ewọ yọnẹn dọ alọwle kọdetọn dagbenọ de nọ saba biọ dọ asu po asi po lẹ ni yí delẹ to whenu po huhlọn he yé ko nọ yizan to sinsẹ̀nzọn Emitọn mẹ to whenue yé gbẹ́ to tlẹnmẹ po mẹ lẹ zan.
18. Vọjlado tẹwẹ mẹdelẹ dona basi gando ayidedai go to alọwle godo?
18 Ṣigba nuhe mí plọn ma nọte do finẹ. Eyin asu po asi po lẹ na yí delẹ to whenu po huhlọn he yé ko nọ yizan na sinsẹ̀nzọn Jiwheyẹwhe tọn po mẹ lẹ zan nado penukundo ode awetọ go, be e ma jẹ dọ yé ni wà nudopolọ na dehe yé ko nọ yizan na ayidedai to whenue yé to tlẹnmẹ ya? Etẹwẹ na yin numọtolanmẹ asi de tọn eyin asu etọn gbẹ́ nọ tindo mahẹ gigọ́ to aihundida lanmẹyiya tọn mẹ hẹ họntọn etọn lẹ? Kavi etẹwẹ na yin numọtolanmẹ asu de tọn eyin asi etọn gbẹ́ nọ yí whenu susu zan na ayidedai hẹ họntọn etọn lẹ? Alọwlemẹ he yin vọdona lọ sọgan tindo numọtolanmẹ ṣokẹdẹninọ tọn, bo ma na tindo ayajẹ, bo nasọ lẹndọ alọwlemẹ emitọn ma yiwanna emi. Mẹhe wlealọ lẹ sọgan dapana ehe eyin yé wà nuhe go yé pé lẹpo nado hẹn kanṣiṣa yetọn lodo taidi asu po asi po.—Efe. 5:31.
Jehovah Biọ Wiwejininọ to Walọyizan-Liho to Mí Si
19, 20. (a) Naegbọn mẹhe wlealọ lẹ ma ko gán sọn whlepọn fẹnnuwiwa tọn si? (b) Owù tẹ mẹ wẹ asu po asi po de to yede zedo eyin yé nọ jo yedelẹ do na ojlẹ dindẹn?
19 Devizọnwatọ Jehovah tọn lẹ ko magbe nado gbọṣi wiweji to walọyizan-liho. Mẹdelẹ de nado wlealọ nado sọgan dapana nuhahun lẹ to adà ehe mẹ. Etomọṣo, alọwle ma nọ basi hihọ́namẹ sọta fẹnnuwiwa zanhẹmẹ tọn gba. To ojlẹ Biblu tọn mẹ, adó tòdaho he lodo de tọn nọ basi hihọ́na gbẹtọ lẹ kiki eyin yé gbọṣi e mẹ. Eyin mẹde tọ́nyi gbonu họngbo lọ tọn to whenue danuwatọ lẹ po mẹhutọ lẹ po to finẹ, yé sọgan jajo do e kavi hù i. Mọdopolọ, mẹhe wlealọ lẹ nọ yin hihọ́-basina sọta fẹnnuwiwa kiki eyin yé ma zẹ̀ dogbó zanhẹmẹ tọn he Dowatọ alọwle tọn ko zedai na yé lẹ go.
20 Paulu basi zẹẹmẹ dogbó enẹlẹ tọn to 1 Kọlintinu lẹ 7:2-5 mẹ. Asi tindo jlọjẹ mlẹnmlẹn dọ ewọ kẹdẹ wẹ asu etọn dona tindo kọndopọ zanhẹmẹ tọn hẹ; mọjanwẹ asu lọsu tindo jlọjẹ dopolọ do niyẹn. E yin nukundo to dopodopo yetọn si nado nọ na ode awetọ “jlọjẹ” alọwle tọn, kavi kọndopọ zanhẹmẹ tọn he alọwlemẹ de tindo jlọjẹ nado mọyi. Ṣigba, asu po asi po delẹ nọ yí whenu susu zan to olá na ode awetọ—yé nọ yì na gbọjẹ to ofi voovo kavi nọ jo ode awetọ do na agbasazọ́n wutu, bo nọ gbọnmọ dali tẹ̀ “jlọjẹ” lọ ode awetọ yetọn. Yí nukun homẹ tọn do pọ́n nugbajẹmẹji lọ eyin “nugomape nado duto mẹdetiti ji” wá hẹn mẹdopo nado joawuna kọgbidinamẹ Satani tọn bo deayọ. Jehovah nọ dona tatọ́ whẹndo tọn he ma nọ ze alọwle yetọn do owù mẹ dile yé to awuwledaina whẹndo yetọn lẹ.—Ps. 37:25.
Ale He Tonusisena Ayinamẹ Biblu Tọn Nọ Hẹnwa
21. (a) Naegbọn nudide lẹ bibasi gando tlẹnmẹninọ po alọwle po go do vẹawu? (b) Naegbọn ayinamẹ he tin to 1 Kọlintinu lẹ weta 7 mẹ lẹ do yọ́n-na-yizan?
21 Nudide bibasi gando tlẹnmẹninọ po alọwle po go yin dopo to nudide he nọ vẹawu taun lẹ mẹ. Gbẹtọvi lẹpo wẹ dugu mape he yin asisa suhugan nuhahun gbẹtọvi tọn lẹ tọn. Enẹwutu, mẹhe tlẹ tindo nukundagbe po dona Jehovah tọn po lẹ ma sọgan dapana flumẹjijẹ, vlavo yé yin tlẹnnọ kavi alọwlemẹ. Eyin mì yí ayinamẹ dagbe he tin to 1 Kọlintinu lẹ weta 7 mẹ lẹ do yizan mẹ, mì sọgan de nuhahun enẹlẹ pò. Hiẹ na “wà dagbe” to nukun Jehovah tọn mẹ, vlavo a yin tlẹnnọ kavi alọwlemẹ. (Hia 1 Kọlintinu lẹ 7:37, 38.) Yanwle daho hugan he kọ̀n hiẹ sọgan jẹ wẹ nado mọ nukundagbe Jiwheyẹwhe tọn. Gbọnmọ dali, a sọgan zindonukọn nado mọ ogbẹ̀ to aihọn yọyọ etọn mẹ. To finẹ, haṣinṣan to sunnu po yọnnu po ṣẹnṣẹn ma na bẹ avùnnukundiọsọmẹnu he gbayipe to egbehe lẹ hẹn ba.
[Nudọnamẹ odò tọn]
a Pọ́n Aṣli Ayajẹ Whẹndo Tọn, weta 2, hukan 16-19.
Be Hiẹ Sọgan Na Gblọndo Ya?
• Naegbọn mí ma dona gbidikọna mẹdevo lẹ nado wlealọ?
• Nawẹ hiẹ sọgan yí whenu towe zan ganji taidi tlẹnnọ de nado sẹ̀n Jehovah gbọn?
• Nawẹ mẹhe to họntọn mẹ lẹ sọgan wleawudaina avùnnukundiọsọmẹnu alọwle tọn lẹ gbọn?
• Naegbọn alọwle ma nọ basi hihọ́namẹ sọn fẹnnuwiwa zanhẹmẹ tọn si?
[Kanbiọ Oplọn tọn lẹ]
[Yẹdide to weda 14]
Klistiani he ma wlealọ bo nọ yí whenu yetọn zan nado gbloada na lizọnyizọn yetọn lẹ nọ tindo ayajẹ
[Yẹdide to weda 16]
Vọjlado tẹwẹ mẹdelẹ dona basi gando ayidedai go to alọwle godo?
