Kanbiọ lẹ sọn Wehiatọ lẹ Dè

Be e yọnbasi nado yọ́n ogàn he mẹ Jesu Klisti yin whiwhè do nùgo te pẹpẹ ya?

Kanbiọ ehe nọ yin finfọndote, na e taidi dọ vogbingbọn tin to kandai gbọdo he Wẹndagbe-kantọ Malku po apọsteli Johanu po basi gando okú Jesu tọn go ṣẹnṣẹn. Malku wlan dọmọ: “Todin, to gànhiho atọ̀ntọ mẹ wẹ yé [awhànfuntọ lẹ] whè e do núgo.” (Malku 15:25) Sọgbe hẹ kandai Johanu tọn, “nudi gànhiho ṣidopotọ mẹ” wẹ Pilati ze Jesu do alọmẹ na Ju lẹ nado whè e do nùgo. (Joh. 19:14-16) Zẹẹmẹ susu wẹ weyọnẹntọ Biblu tọn lẹ ko basi nado tá hinhọ́n do wefọ awe ehelẹ ji. Ṣigba, Owe-wiwe lẹ ma bẹ nudọnamẹ gigọ́ he do vogbingbọn he tin to kandai awe lọ lẹ ṣẹnṣẹn hia hẹn gba. Etomọṣo, alenu wẹ e na yin nado yọ́n lehe gbẹtọ lẹ nọ wagbọn to whenẹnu nado yọ́n ogàn he to hihò to ojlẹ dopodopo mẹ.

To owhe kanweko tintan W.M., Ju lẹ má okle do gànhiho 12 bo nọ jẹ mimá lọ lẹ hia ji bẹsọn ojlẹ he mẹ owhè zẹ̀. (Joh. 11:9) Enẹwutu, “gànhiho atọ̀ntọ” nọ bẹsọn ogàn ṣinatọ̀n mẹ afọnnu jẹ ogàn ṣinẹnẹ mẹ afọnnu, podọ “gànhiho ṣidopotọ” nọ wá vivọnu to nudi ogàn wiawe mẹ whèmẹ. Na nugbo tọn, ojlẹ voovo mẹ wẹ owhè nọ zẹ̀ bo nọ yihọ te to owhe lọ gblamẹ. Enẹwutu, tedidi okle tọn nọ diọ sọgbe hẹ ojlẹ owhe lọ tọn lẹ. Humọ, owhè wẹ gbẹtọ lẹ nọ pọ́n nado yọ́n ogàn he to hihò to ojlẹ dopodopo mẹ. Enẹwutu, yé ma nọ penugo nado yọ́n ogàn he to hihò pẹpẹ. Owe-wiwe Glẹki tọn lẹ nọ saba donù nujijọ he wá aimẹ to gànhiho atọ̀ntọ, ṣidopotọ kavi ṣinẹnẹtọ mẹ lẹ go nado dohia dọ nujijọ lọ lẹ wá aimẹ to gànhiho enẹlẹ gblamẹ. (Mat. 20:3, 5; Owalọ 10:3, 9, 30) Ṣigba, ojlẹ tangan de taidi “gànhiho ṣinawetọ” nọ yin nùdego kiki eyin gànmẹ lọ pẹpẹ yinyọnẹn yin nujọnu taun to kandai he yin bibasi lọ mẹ.—Joh. 4:52.

Kandai owe Wẹndagbe tọn lẹ gando ojlẹ he mẹ nujijọ azán godo tọn Jesu tọn to aigba ji lẹ wá aimẹ te go sọgbe hẹ yede. Wẹndagbe-kantọ ẹnẹ lọ lẹpo wẹ dohia dọ yẹwhenọ po sunnu mẹho lẹ po pli dopọ to whenue ai ko họ́n bo ze Jesu do alọmẹ na Togán Lomu tọn Pọntiu Pilati. (Mat. 27:1; Malku 15:1; Luku 22:66; Joh. 18:28) Kandai he Matiu, Malku po Luku po basi lẹ dohia dọ bẹsọn gànhiho ṣidopotọ mẹ, to whenue Jesu ko yin whiwhè do yatin go godo, zinvlu ṣinyọ́n aigba lọ ji “kakajẹ gànhiho ṣinẹnẹtọ mẹ.”—Mat. 27:45, 46; Malku 15:33, 34; Luku 23:44.

Onú tangan he sọgan gọalọna mí nado yọ́n ogàn he mẹ Jesu yin whiwhè do nùgo te wẹ yindọ gbẹtọ lẹ nọ pọ́n yasanamẹ kavi nulimẹ hlan taidi apadewhe mẹwhiwhè do nùgo tọn. To whedelẹnu, gbẹtọ lẹ nọ linú mẹhe yé jlo na whèdo núgo lọ sọmọ bọ mẹlọ nọ kú. Gbẹtọ lẹ na ko sayana Jesu taun. Nuhe zọ́n niyẹn bọ to whenue e ko didá yatin etọn na ojlẹ de godo, yè biọ to dawe devo si nado didá yatin lọ na ẹn. (Luku 23:26; Joh. 19:17) Eyin gbẹtọ lẹ nọ sayanamẹ whẹpo do whèmẹ do núgo, be ojlẹ de na ko juwayi whẹpo Jesu do yin whiwhè do yatin go. Enẹwutu, gànmẹ he go wekantọ lọ lẹ donú to kandai yetọn lẹ mẹ sọgan gbọnvo sọgbe hẹ adà mẹwhiwhè do núgo tọn he go wekantọ dopodopo doayi.

Wẹndagbe-kantọ atọ̀n he jẹnukọn lẹ ko basi kandai yetọn owhe susu whẹpo apọsteli Johanu do basi kandai etọn. Enẹwutu, e họnwun dọ Johanu na ko mọ kandai yetọn lẹ. Nugbo wẹ dọ gànhiho voovo go wẹ Johanu po Malku po donù. Ṣigba, ehe hẹn mí kudeji dọ Johanu ma pọ́n do kandai Malku tọn go poun nado basi kandai etọn. Jiwheyẹwhe wẹ gbọdo Johanu po Malku po. Dile etlẹ yindọ Owe-wiwe lẹ ma bẹ nudọnamẹ gigọ́ he do vogbingbọn he tin to kandai awe ehelẹ ṣẹnṣẹn hia hẹn, mí sọgan dejido kandai owe Wẹndagbe tọn lẹ go.