Mọ Ayajẹ to ‘Lẹblanulọkẹyi lọ Nado Yí Homẹdagbe Do Na Nunina’ Mẹ
Mọ Ayajẹ to ‘Lẹblanulọkẹyi lọ Nado Yí Homẹdagbe Do Na Nunina’ Mẹ
KLISTIANI dowhenu Filippi tọn lẹ yin yinyọnẹn taidi mẹhe nọ yí homẹdagbe do nọgodona sinsẹ̀n-bibasi nugbo. To wekanhlanmẹ gbọdo he apọsteli Paulu dohlan yé mẹ, e wlan dọmọ: “Yẹn nọ dopẹna Jiwheyẹwhe ṣie to whepoponu to whedepopenu he yẹn flin mì to ovẹvivẹ ṣie lẹpo gando mìmẹpo go mẹ, dile yẹn yí ayajẹ do to vẹvẹ, na alọgọ he mì ko basi nado nọgodona wẹndagbe lọ sọn azán tintan gbè kakajẹ ojlẹ ehe mẹ wutu.” (Flp. 1:3-5) Paulu gbẹ́ flin whenue Lidia po whédo etọn po yí baptẹm, podọ lehe Lidia sọ yí homẹdagbe do vẹvẹna ewọ po yẹwhehodọtọ-gbẹ́ etọn lẹ po nado wá nọ owhé etọn gbè do.—Owalọ 16:14, 15.
To enẹgodo, e ma dẹn bọ agun Filippi tọn he ṣẹṣẹ yin didoai lọ do nuhe Paulu tindo nuhudo etọn lẹ hlan ẹn whla awe to whenue e nọ yisenọ hatọ lẹ dè na osẹ susu to Tẹsalonika, yèdọ fie dẹn do Filippi na nudi kilomẹtlu 160. (Flp. 4:15, 16) To owhe delẹ godo, whenue Filippinu lẹ po mẹmẹsunnu Makedonia tọn devo lẹ po to yaji bo to “hẹ́njijẹ sinsinyẹn” mẹ wẹ yé sè dọ Klistiani he yin homẹkẹndo to Jelusalẹm lẹ tin to nuhudo mẹ. Mahopọnna enẹ, yé wleawufo nado gọalọna yé. Paulu dekunnu dọ lehe yé gọalọ do “zẹ̀ nugopipe yetọn titi go.” Etomọṣo, e wlan dọmọ: “[Yé] to mí vẹ̀ vẹkuvẹku mapote nado mọ lẹblanulọkẹyi lọ yí nado yí homẹdagbe do na nunina.”—2 Kọl. 8:1-4; Lom. 15:26.
To nudi owhe ao he Filippinu lẹ lẹzun Klistiani godo, yé gbẹ́ to gbigbọ alọtútlú tọn dopolọ dohia. To whenue yé sè dọ Paulu yin wiwle do gànmẹ to Lomu, yé do Epafloditu hlan nado zingbejizọnlin gaa gbọn aigba ji podọ gbọn ohù ji na kilomẹtlu 1287 nado hẹn nuhe apọsteli lọ tindo nuhudo etọn lẹ yì na ẹn. E họnwun dọ Filippinu lẹ wleawu nuhe Paulu tindo nuhudo etọn lẹ tọn na ẹn na yé jlo dọ ewọ ni zindonukọn to azọ́n yẹwhehodidọ tọn lọ mẹ bo to mẹmẹsunnu lẹ hẹn lodo, etlẹ yin to whenue e to gànmẹ.—Flp. 1:12-14; 2:25-30; 4:18.
To egbehe, Klistiani nugbo lẹ nọ pọ́n godoninọna azọ́n yẹwhehodidọ Ahọluduta lọ tọn po mẹhẹnzun devi tọn po hlan taidi lẹblanulọkẹyi de. (Mat. 28:19, 20) Yé nọ yí whenu, huhlọn po akuẹ yetọn po do nọgodona Ahọluduta lọ. Apotin he to odò ehe do aliho he mẹ hiẹ sọgan nọgodona azọ́n yẹwhehodidọ tọn lọ te delẹ hia.
[Apotin to weda 22, 23]
ALIHO HE MẸ MẸDELẸ NỌ BASI NUNINA TE DELẸ
NUNINA LẸ NA AZỌ́N LẸDO AIHỌN PÉ TỌN
Mẹsusu nọ de, kavi klan akuẹ sọha de dovo he yé nọ yí do apotin nunina tọn he go yè kàn “Azọ́n Lẹdo Aihọn Pé Tọn” do lẹ mẹ.
To osun dopodopo mẹ, agun lẹ nọ do akuẹ ehelẹ hlan wekantẹn Kunnudetọ Jehovah tọn lẹ tọn he nọ penukundo otò yetọn go. Akuẹ he yin nina sọn ojlo mẹ wá lẹ sọgan sọ yin didohlan Association Religieuse Les Témoins de Jéhovah du Bénin (A.R.T.J.B.) tlọlọ kavi hlan wekantẹn alahọ Kunnudetọ Jehovah tọn lẹ tọn he nọ penukundo otò towe go. Eyin hiẹ jlo na basi nunina po akuẹyiwema po, a sọgan wleawuna ẹn do A.R.T.J.B. tamẹ. Aṣọ́donu akuẹgegenu tọn lẹ kavi nuhọakuẹ devo lẹ sọgan sọ yin nina ga. Wekanhlanmẹ kleun de dona hodo nunina ehelẹ bo dohia dọ nunina tlọlọ lẹ wẹ yé yin.
TITO NUNAMẸ HOMẸDAGBE TỌN
Gbọnvona nunina akuẹ tọn tlọlọ lẹ, nunina wunmẹ devo lẹ tin ga na alemọyi azọ́n Ahọluduta lọ tọn lẹdo aihọn pé. Ehelẹ wẹ:
Alọgọ Owù-Nujijọ Tọn: Nunina alọgọ owù-nujijọ gbẹzan tọn kavi tito gbọjẹ gaa/agbasazọ́n jijodo tọn de sọgan yin didohlan A.R.T.J.B.
Akuẹ He Tin to Akuẹsẹdotẹn Lẹ: Akuẹ he tin to akuẹsẹdotẹn lẹ, akuẹ he yin bibẹdo akuẹsẹdotẹn lẹ na ojlẹ tangan de (dépôt à terme), kavi akuẹ gbọjẹ gaa mẹdopodopo tọn lẹ sọgan yin zizedo alọ A.R.T.J.B. tọn mẹ nado nọ yizan kavi mẹde sọgan basi tito dọ to okú emitọn godo, akuẹ lọ ni yin súsú na A.R.T.J.B., to kọndopọ mẹ hẹ nubiọtomẹsi akuẹsẹdotẹn lọ tọn lẹ.
Ale Ajọ́ Tọn Lẹ: Ale ajọ́ tọn lẹ sọgan yin nina taidi nunina tlọlọ de kavi yin didohlan A.R.T.J.B.
Ohọ̀ po Aigba Po: Ohọ̀ po aigba po he sọgan yin sisà sọgan yin nina vlavo gbọn nunina tlọlọ de bibasi dali kavi, na nuhe dù aigba he ji ohọ̀ tin te bọ gbẹtọ gbẹ́ tin to e mẹ, nunamẹtọ lọ sọgan yí i do basi nunina ṣigba e dona dohia dọ emi na gbẹ́ nọ nọ̀ e mẹ dile e na dẹnsọ bọ emi tin to ogbẹ̀. Dọna alahọ otò towe tọn whẹpo do basi nunina ohọ̀ po aigba po tọn depope.
Kandai Gúmima po Nunina lẹ Tọn Po: Nutindo kavi akuẹ sọgan yin nina taidi ogú hlan A.R.T.J.B. gbọn kandai sọgbe hẹ osẹ́n de bibasi dali, kavi yinkọ A.R.T.J.B. tọn sọgan yin kinkandai taidi mẹhe na dugu nunina lẹ tọn.
Dile hogbe lọ “tito nunamẹ homẹdagbe tọn” dohia do, nunina wunmẹ ehelẹ nọ biọ tito delẹ bibasi to adà nunamẹtọ lọ tọn mẹ.
Na nudọnamẹ dogọ, hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn to Bénin, vlavo gbọn wekanhlanmẹ kavi alokan dali, to adlẹsi he yin sislẹ to odò yiyizan mẹ kavi hiẹ sọgan dọnsẹpọ wekantẹn alahọ Kunnudetọ Jehovah tọn lẹ tọn he nọ penukundo otò towe go.
Wekantẹn Alahọ Kunnudetọ Jehovah Tọn lẹ Tọn to Bénin
Association Religieuse Les Témoins de Jéhovah du Bénin
06 B.P. 1131, Akpakpa pk3, Cotonou, Bénin
Alokan: (229) 21 36 01 14
