Plọnazọ́n Mẹmẹsunnu lẹ Nado Pegan
Plọnazọ́n Mẹmẹsunnu lẹ Nado Pegan
“Mẹdepope he yin pinplọn ganji nọ taidi mẹplọntọ etọn.”—LUKU 6:40.
1. To lizọnyizọn aigba ji tọn etọn whenu, nawẹ Jesu ze dodonu agun daho de tọn dai gbọn?
APỌSTELI JOHANU dotana kandai owe Wẹndagbe tọn etọn dọmọ: “Na nugbo tọn, onú susu devo lẹ tin he Jesu wà, bọ eyin yé dona yin kinkan to gigọ́ mẹ wẹ, yẹn lẹndọ, aihọn lọsu ma sọgan hẹn owe-hihá he na yin kinkan lẹ.” (Joh. 21:25) To ojlẹ kleun he Jesu yizan to aigba ji whenu, e wazọ́n sinsinyẹn to lizọnyizọn lọ mẹ. E dín sunnu delẹ mọ bo plọnazọ́n yé na yé nido sọgan deanana nulẹ to olọn mẹ yìyì etọn godo. To owhe 33 W.M., e ko plọnazọ́n pipli kleun de, ṣigba e ma dẹn bọ pipli enẹ lẹzun agun daho de he bẹ wẹnlatọ fọtọ́n lẹ hẹn.—Owalọ 2:41, 42; 4:4; 6:7.
2, 3. (a) Naegbọn sunnu he ko yí baptẹm lẹ dona dovivẹnu nado pegan na azọngban? (b) Etẹwẹ mí na gbadopọnna to hosọ ehe mẹ?
2 Po nuhe hugan wẹnlatọ Ahọluduta lọ tọn zohunhunnọ livi ṣinawe he tin to agun 100000 linlán lẹ mẹ to egbehe lẹ po, nuhudo sunnu he na penukundo whẹho gbigbọmẹ tọn lẹ go tọn gbẹ́ tin. Di apajlẹ, mí tindo nuhudo mẹho agun tọn susu devo lẹ tọn. Mẹhe nọ dovivẹnu nado pegan na lẹblanulọkẹyi sinsẹ̀nzọn tọn ehe lẹ jẹna pipà taun, na “azọ́n dagbe de wẹ [yé] jlo.”—1 Tim. 3:1.
3 Ṣigba, e nọ biọ vivẹnudido whẹpo sunnu de nado pegan na lẹblanulọkẹyi lẹ to agun mẹ. E ma yin wepinplọn, nugopipe mẹdetiti tọn, nuwadotana, kavi numimọ he sunnu de tindo to gbẹ̀mẹ wẹ nọ hẹn ẹn pegan na azọ́n ehe. Nado mọ azọngban lẹ yí to agun mẹ, sunnu de dona pegan to gbigbọ-liho bosọ dona tindo jẹhẹnu gbigbọmẹ tọn lẹ. Nawẹ mí sọgan gọalọna mẹmẹsunnu lẹ nado pegan gbọn? Jesu dọmọ: “Mẹdepope he yin pinplọn ganji nọ taidi mẹplọntọ etọn.” (Luku 6:40) To hosọ ehe mẹ, mí na gbadopọnna delẹ to aliho he mẹ Mẹplọntọ Daho lọ, Jesu Klisti, gọalọna devi etọn lẹ nado pegan na azọngban susu dogọ te lẹ mẹ. Humọ, mí na mọ nuhe mí sọgan plọn sọn lehe e gọalọna yé do mẹ.
“Yẹn Ko Ylọ Mì Dọ Họntọn”
4. Nawẹ Jesu do ede hia taidi họntọn vivẹ́ de na devi etọn lẹ gbọn?
4 Jesu yinuwa hẹ devi etọn lẹ taidi họntọn, e ma yin taidi mẹhe yiaga hú yé gba. E yí whenu zan hẹ yé, dejido yé go bo ‘hẹn nuhe e ko sè sọn Otọ́ etọn dè lẹpo zun yinyọnẹn na yé.’ (Hia Johanu 15:15.) To ojlẹ de mẹ, devi etọn lẹ kanse e dọmọ: “Etẹwẹ na yin ohia tintin tofi towe tọn po vivọnu titonu lọ tọn po?” (Mat. 24:3, 4) Yí nukun homẹ tọn do pọ́n lehe homẹ na ko hùn yé do to whenue Jesu na gblọndo kanbiọ lọ tọn. E sọ nọ dọ linlẹn po numọtolanmẹ etọn lẹ po na yé. Di apajlẹ, to ozán he mẹ Jesu yin didehia, e plan Pita, Jakọbu po Johanu po yì jipa Gẹtsemani tọn mẹ, fie e hodẹ̀ vẹkuvẹku sọn ahun mẹ te. Apọsteli atọ̀n lọ lẹ sọgan nọma ko sè nuhe Jesu to didọ to odẹ̀ etọn mẹ, ṣigba e họnwun dọ yé na ko doayi e go dọ ojlẹ sinsinyẹn de mẹ wẹ e to jujugbọn. (Malku 14:33-38) Sọ pọ́n lehe wunmẹdidiọ lọ na ko yinuwado yé omẹ atọ̀n lẹ ji to ojlẹ de mẹ wayi do. (Malku 9:2-8; 2 Pita 1:16-18) Haṣinṣan pẹkipẹki he Jesu wleawuna hẹ devi etọn lẹ gọalọna yé dile yé to azọngban sinsinyẹn lẹ hẹndi to godo mẹ.
5. Nawẹ mẹho agun tọn lẹ sọgan gọalọna mẹdevo lẹ gbọn?
5 Taidi Jesu, mẹho agun tọn lẹ to egbehe nọ jihọntọn hẹ mẹdevo lẹ bo nọ gọalọna yé. Yé nọ wleawuna haṣinṣan pẹkipẹki de hẹ yisenọ hatọ yetọn lẹ bo nọ dohia yé dọ emi tindo ojlo ahundopo tọn to yé mẹ. Dile etlẹ yindọ mẹho lẹ yọnẹn dọ nujọnu wẹ e yin nado hẹn aṣlihó, yé ma nọ whla nulẹpo do mẹmẹsunnu yetọn lẹ. Yé nọ dejido mẹmẹsunnu yetọn lẹ go bo nọ dọhodo nuhe yé plọn sọn Biblu mẹ lẹ ji hẹ yé. Mẹho lẹ ma nọ mọdọ emi yiaga hú devizọnwatọ lizọnyizọnwiwa tọn de, eyin e tlẹ yin jọja. Kakatimọ, yé nọ pọ́n ẹn hlan taidi gbẹtọ gbigbọnọ he tindo nugopipe lẹ bo to azọngban họakuẹ de hẹndi to agun lọ mẹ.
“Ohia Wẹ Yẹn Zedai Na Mì”
6, 7. Apajlẹ tẹwẹ Jesu zedai na devi etọn lẹ, podọ nawẹ ehe yinuwado yé ji gbọn?
6 Dile etlẹ yindọ devi Jesu tọn lẹ yọ́n pinpẹn gbigbọnu lẹ tọn, lẹdo he mẹ yé whẹ́n te po aṣa yetọn po nọ yinuwado pọndohlan yetọn ji to whedelẹnu. (Mat. 19:9, 10; Luku 9:46-48; Joh. 4:27) Etomọṣo, Jesu ma nọ mọhodọdo devi etọn lẹ go kavi gblehomẹ do yé go. E ma nọ biọ nuhe zẹ̀ nugopipe yetọn go to yé si kavi biọ dọ yé ni wà nude to whenue ewọ lọsu to nudevo wà. Kakatimọ, Jesu plọn yé gbọn apajlẹ zizedai na yé dali.—Hia Johanu 13:15.
7 Apajlẹ nankọ wẹ Jesu zedai na devi etọn lẹ? (1 Pita 2:21) E hẹn gbẹzan ede tọn bọawu nado sọgan yilizọn na mẹdevo lẹ to gigọ́ mẹ. (Luku 9:58) Jesu ma nọ plọn gbẹtọ lẹ linlẹn etọn titi lẹ gba, kakatimọ e nọ ze nuplọnmẹ etọn sinai do Owe-wiwe lẹ ji to whepoponu. (Joh. 5:19; 17:14, 17) E yọ́n dọnsẹpọ bo jọmẹ. Owanyi wẹ nọ deanana nuhe e nọ wà lẹpo. (Mat. 19:13-15; Joh. 15:12) Apajlẹ Jesu tọn yinuwado apọsteli etọn lẹ ji taun. Di dohia, Jakọbu yí adọgbigbo do sẹ̀n Jiwheyẹwhe po nugbonọ-yinyin po kakajẹ whenue e yin hùhù. (Owalọ 12:1, 2) Johanu lọsu hodo afọdòmẹ Jesu tọn pẹkipẹki na owhe 60 linlán.—Osọ. 1:1, 2, 9.
8. Apajlẹ tẹwẹ mẹho lẹ nọ zedai na sunnu jọja lẹ po mẹdevo lẹ po?
8 Mẹho he nọ do gbigbọ mẹde-yido-sanvọ́ tọn, whiwhẹ po owanyi po hia lẹ nọ ze apajlẹ dagbe dai na sunnu jọja lẹ. (1 Pita 5:2, 3) Humọ, mẹho he yin apajlẹ dagbenọ to yise didohia mẹ, to mẹpinplọn mẹ, to gbẹzan yetọn mẹ podọ to lizọnyizọn lọ mẹ lẹ nọ jaya, na yé yọnẹn dọ mẹdevo lẹ sọgan hodo apajlẹ yise yetọn tọn.—Heb. 13:7.
‘Jesu Na Yé Gbedide lẹ, bo Do Yé Hlan’
9. Nawẹ mí wagbọn do yọnẹn dọ Jesu plọnazọ́n devi etọn lẹ nado hẹn azọ́n wẹndagbe lilá tọn lọ di?
9 To whenue Jesu ko yí nudi owhe awe zan to lizọnyizọn lọ mẹ po zohunhun po godo, e do apọsteli 12 etọn lẹ hlan nado dọyẹwheho bo gbọnmọ dali gbloada na azọ́n yẹwhehodidọ tọn lọ. Ṣigba jẹnukọn whẹ́, e na yé anademẹ lẹ. (Mat. 10:5-14) To whenue Jesu jlo na na núdùdù gbẹtọgun de to azọ́njiawu-liho, yèdọ gbẹtọgun de he bẹ omẹ fọtọ́n susu hẹn, e na anademẹ devi etọn lẹ gando lehe e jlo dọ yé ni tò gbẹtọ lẹ bo má núdùdù lọ na yé do go. (Luku 9:12-17) Enẹwutu, e họnwun dọ Jesu plọnazọ́n devi etọn lẹ gbọn anademẹ he họnwun lẹ nina yé dali. Aliho he mẹ e plọnazọ́n yé te po nuyiwadomẹji huhlọnnọ gbigbọ wiwe tọn po gọalọna apọsteli lẹ to godo mẹ nado deanana azọ́n yẹwhehodidọ tọn he bẹjẹeji to owhe 33 W.M.
10, 11. Nawẹ mẹyọyọ lẹ sọgan mọ azọ́nplọnmẹ yí vudevude gbọn?
10 To egbehe, mí nọ jẹ azọ́nplọn sunnu de ji to whenue e kẹalọyi plọnmẹ Biblu de. E sọgan biọ dọ mí ni gọalọna ẹn nado yọ́n wehia ganji. Alọgọ lọ nọ zindonukọn dile mí to Biblu plọn hẹ ẹ. Eyin e jẹ opli agun tọn lẹ yì ji to gbesisọ mẹ, azọ́nplọnmẹ lọ nọ zindonukọn dile e ze yinkọ dai to Wehọmẹ Lizọnyizọn Yẹwhehọluduta tọn, lẹzun wẹnlatọ he ma ko yí baptẹm, po mọmọ po sọyi. To baptẹm etọn godo, azọ́nplọnmẹ lọ sọgan bẹ nudevo lẹ hẹn taidi alọgigọ nado penukundo Plitẹnhọ Ahọluduta tọn go. Dile ojlẹ to yìyì, mí sọgan gọalọna mẹmẹsunnu de nado mọ nuhe e dona wà nado pegan taidi devizọnwatọ lizọnyizọnwiwa tọn.
11 To whenue mẹho agun tọn de to azọ́ndena mẹmẹsunnu he ko yí baptẹm de, mẹho lọ dona basi zẹẹmẹ aliho he mẹ azọ́n lọ nọ yin wiwà te tọn na ẹn bosọ na ẹn anademẹ he họnwun lẹ. Mẹmẹsunnu lọ dona mọnukunnujẹ nuhe yè to nukundo sọn e si mẹ. Eyin azọ́n lọ ma to pipà ẹ, mẹho owanyinọ de ma nọ wá tadona kọ̀n tlolo dọ e ma pegan gba. Kakatimọ, mẹho lọ nọ gbọn homẹdagbe dali dọ̀n ayiha etọn wá adà he biọ ayidonugo lọ ji bosọ nọ dọhodo nuhe yè to nukundo sọn e si po lehe azọ́n lọ nọ yin wiwà do po ji. Homẹ nọ hùn mẹho lẹ nado gọalọna mẹmẹsunnu de nado hẹn azọngban etọn lẹ di na yé yọnẹn dọ devizọnwiwa do mẹdevo lẹ tamẹ na hẹn ayajẹ wá na ẹn.—Owalọ 20:35.
‘Ewọ He Dotó Ayinamẹ Wẹ Nuyọnẹntọ’
12. Naegbọn ayinamẹ Jesu tọn lẹ nọ wazọ́n?
12 Jesu plọnazọ́n devi etọn lẹ gbọn ayinamẹ he jẹ lẹ nina yé dali. Di apajlẹ, e gbẹnuna Jakọbu po Johanu po na yé jlo na ylọ miyọ́n sọn olọn mẹ do Samalianu delẹ he ma kẹalọyi Jesu ji wutu. (Luku 9:52-55) To whenue onọ̀ Jakọbu po Johanu po tọn biọ to Jesu si nado ze visunnu etọn lẹ do otẹn vonọtaun de mẹ to Ahọluduta lọ mẹ, Jesu gblọnna nọvi-nọvi lọ lẹ tlọlọ dọmọ: “Nado sinai to adusilọ ṣie mẹ podọ to amiyọnlọ ṣie mẹ ma yin yẹn tọn nado namẹ gba, ṣigba otẹn ehelẹ tin na mẹhe Otọ́ ṣie ko wleawu etọn dai na lẹ.” (Mat. 20:20-23) Ayinamẹ Jesu tọn lẹ nọ họnwun, nọ yọ́n-na-yizan, bo nọ sinai gligli do nunọwhinnusẹ́n Owe-wiwe tọn lẹ ji to whepoponu. E plọn devi etọn lẹ nado nọ dike nunọwhinnusẹ́n ehelẹ ni deanana yé. (Mat. 17:24-27) Jesu sọ yọ́n dogbó hodotọ etọn lẹ tọn bo ma nọ donukun pipé-yinyin sọn yé si. Owanyi ahundopo tọn wẹ nọ whàn ẹn nado na yé ayinamẹ.—Joh. 13:1.
13, 14. (a) Mẹnu lẹ wẹ tindo nuhudo ayinamẹ tọn? (b) Ayinamẹ tẹlẹ wẹ mẹho lẹ sọgan na mẹmẹsunnu he ma to nukọnyi to gbigbọ-liho de?
13 To whedelẹnu, sunnu he to vivẹnudo nado mọ azọngban yí to agun mẹ lẹ nọ tindo nuhudo ayinamẹ sinai do Owe-wiwe ji tọn. ‘Ewọ he dotó ayinamẹ wẹ nuyọnẹntọ,’ wẹ Howhinwhẹn lẹ 12:15 dọ. Mẹmẹsunnu jọja de dọmọ: “Nuhe nọ vẹawuna mi hugan wẹ nado duto awugbopo ṣie lẹ ji. Ayinamẹ mẹho de tọn gọalọna mi nado tindo pọndohlan he sọgbe gando dee go.”
14 Eyin mẹho lẹ doayi e go dọ walọ he ma sọgbe de to aliglọnna mẹmẹsunnu de nado yinukọn to gbigbọ-liho, yé nọ ze afọdide tintan lọ nado gọ̀ ẹ do otẹn etọn mẹ to gbigbọ walọmimiọn tọn mẹ. (Gal. 6:1) To whedelẹnu, e nọ biọ dọ mẹho lẹ ni na ayinamẹ mẹde gando jijọ delẹ go. Di apajlẹ, eyin mẹmẹsunnu de ma nọ yí ede zan sọmọ to lizọnyizọn lọ mẹ, mẹho de sọgan dohia ẹ dọ Jesu he degbena hodotọ etọn lẹ nado hẹn gbẹtọ lẹ zun devi nọ lá Ahọluduta lọ po zohunhun po. (Mat. 28:19, 20; Luku 8:1) Eyin e taidi dọ mẹmẹsunnu de yiwanna otẹn nukundeji tọn, mẹho de sọgan dohia ẹ dọ Jesu plọn devi Etọn lẹ ma nado nọ dín otẹn he yiaga. (Luku 22:24-27) Eyin e nọ vẹawuna mẹmẹsunnu de nado jonamẹ lo? Apajlẹ afanumẹ he ma jlo na jo ahọ́ pẹvi de do na afanumẹ hatọ de mahopọnna dọ ahọ́ daho de ko yin jijona ewọ lọsu tọn sọgan gọalọna ẹn taun. (Mat. 18:21-35) Eyin mẹmẹsunnu de tindo nuhudo ayinamẹ tọn, mẹho lẹ dona na ẹn ayinamẹ lọ domẹwhenu.—Hia Howhinwhẹn lẹ 27:9.
“Nọ to Dewe Plọn”
15. Nawẹ whẹndo mẹmẹsunnu de tọn sọgan gọalọna ẹn nado wadevizọn do mẹdevo lẹ tamẹ gbọn?
15 Dile etlẹ yindọ mẹho lẹ wẹ nọ yin tọ́ntlọ́ngbọ́n to azọ́npinplọn mẹmẹsunnu lẹ nado pegan mẹ, mẹdevo lẹ sọgan nọgodona vivẹnudido yetọn. Di apajlẹ, whẹndo mẹmẹsunnu de tọn sọgan gọalọna ẹn nado pegan podọ nuhe sọgbe wẹ e yin dọ yé ni wàmọ. Ṣigba, eyin mẹmẹsunnu lọ ko yin mẹho agun tọn, asi etọn po ovi etọn lẹ po sọgan gbọn owanyi po ṣejannabi matindo po dali nọgodona ẹn dile e to azọ́nwa to agun lọ mẹ. Eyin e na hẹn azọngban etọn di ganji, yé dona na ẹn dotẹnmẹ nado nọ yí whenu etọn zan na mẹdevo lẹ to agun lọ mẹ. Gbigbọ mẹde-yido-sanvọ́ tọn yetọn nọ hẹn ayajẹ wá na mẹho lọ podọ mẹdevo lẹ nọ yọ́n pinpẹn enẹ tọn taun.—Howh. 15:20; 31:10, 23.
16. (a) Eyin mẹmẹsunnu de na pegan na lẹblanulọkẹyi lẹ, mẹnu ji wẹ azọngban lọ sinai do hugan? (b) Nawẹ mẹmẹsunnu de sọgan dovivẹnu bo pegan na lẹblanulọkẹyi lẹ to agun mẹ gbọn?
16 Dile etlẹ yindọ mẹdevo lẹ sọgan gọalọna mẹmẹsunnu de bo nọgodona ẹn, ewọ lọsu wẹ dona dovivẹnu nado pegan. (Hia Galatianu lẹ 6:5.) E ma yin dandan nado yin devizọnwatọ kavi mẹho whẹpo do sọgan gọalọna mẹdevo lẹ bo tindo mahẹ gigọ́ to lizọnyizọn lọ mẹ. Ṣigba, eyin mẹmẹsunnu de na pegan na azọngban mẹho kavi devizọnwatọ tọn, e dona tẹnpọn bo jẹ nubiọtomẹsi Owe-wiwe tọn lẹ kọ̀n whẹ́. (1 Tim. 3:1-13; Titu 1:5-9; 1 Pita 5:1-3) Enẹwutu, eyin mẹmẹsunnu de jlo na sẹ̀n taidi devizọnwatọ kavi mẹho ṣigba bo ma ko yin pipà, e dona na ayidonugo adà gbẹzan etọn tọn he biọ vọjlado lẹ. Etẹwẹ na gọalọna ẹn? E dona nọ hia Biblu to gbesisọ mẹ, nọ basi oplọn mẹdetiti tọn, nọ lẹnayihamẹpọn sisosiso, nọ hodẹ̀ sọn ahun mẹ wá bo nọ tindo mahẹ zohunhun tọn to lizọnyizọn lọ mẹ. Gbọnmọ dali, e na to ayinamẹ he Paulu na Timoti yí do yizan mẹ, enẹ wẹ: “Nọ to dewe plọn po yanwle lọ po nado tindo mẹdezejo na Jiwheyẹwhe.”—1 Tim. 4:7.
17, 18. Etẹwẹ mẹmẹsunnu de sọgan wà eyin obu, numọtolanmẹ nugomape tọn, kavi ojlo matindo to aliglọnna ẹn nado pegan?
17 Ṣigba etẹwẹ mẹmẹsunnu de sọgan wà eyin obu kavi numọtolanmẹ nugomape tọn to aliglọnna ẹn nado pegan? E na wà dagbe nado lẹnnupọndo nuhe Jehovah Jiwheyẹwhe po Jesu Klisti po nọ wà na mí lẹ ji. Na nugbo tọn, Jehovah “to agbàn hẹn na mí egbesọegbesọ.” (Ps. 68:19) Enẹwutu, Otọ́ mítọn olọn mẹ tọn sọgan gọalọna mẹmẹsunnu de nado hẹn azọngban lẹ di to agun mẹ. Mẹmẹsunnu he ma ko lẹzun devizọnwatọ kavi mẹho sọ dona flindọ nuhudo mẹmẹsunnu gbigbọnọ he na kẹalọyi lẹblanulọkẹyi sinsẹ̀nzọn tọn lẹ to titobasinanu Jiwheyẹwhe tọn mẹ lẹ tọn gbẹ́ tin taun. Nulinlẹnpọn do adà ehelẹ ji sọgan whàn mẹmẹsunnu de nado dovivẹnu bo duto numọtolanmẹ agọ̀ lẹ ji. E sọgan hodẹ̀ bo biọ alọgọ gbigbọ wiwe tọn, na sinsẹ́n etọn he bẹ jijọho po mawazẹjlẹgo po hẹn sọgan gọalọna ẹn nado duto obu po numọtolanmẹ nugomape tọn po ji. (Luku 11:13; Gal. 5:22, 23) Podọ mí sọgan deji mlẹnmlẹn dọ Jehovah nọ dona mẹhe yí mẹwhinwhàn dagbe do to vivẹnudo nado pegan lẹpo.
18 Mí ni dọ dọ mẹmẹsunnu de ma tindo ojlo nado dovivẹnu bo pegan na azọngban. Etẹwẹ sọgan gọalọna ẹn? Apọsteli Paulu wlan dọmọ: “Jiwheyẹwhe wẹ . . . to nuyiwa to mì mẹ sọgbe hẹ nuhe nọ hẹn homẹhun in, na mìwlẹ nido sọgan jlo bo yinuwa.” (Flp. 2:13) Jiwheyẹwhe wẹ nọ gọalọna mẹmẹsunnu de nado tindo ojlo lọ nado wadevizọn, podọ gbigbọ wiwe Jehovah tọn sọgan na ẹn huhlọn nado wà sinsẹ̀nzọn wiwe hlan ẹn. (Flp. 4:13) Humọ, Klistiani de sọgan hodẹ̀, na Jiwheyẹwhe nido gọalọna ẹn nado wà nuhe sọgbe.—Ps. 25:4, 5.
19. Nawẹ Owe-wiwe lẹ hẹn mí deji dọ mí na tindo sunnu nugopetọ he na deanananu to omẹ Jiwheyẹwhe tọn lẹ ṣẹnṣẹn gbọn?
19 Jehovah nọ dona mẹho agun tọn he to vivẹnudo nado plọnazọ́n mẹdevo lẹ. E sọ nọ dona mẹhe nọ kẹalọyi azọ́nplọnmẹ lọ bo nọ dovivẹnu nado pegan na lẹblanulọkẹyi lẹ to agun mẹ lẹ. Owe-wiwe lẹ na mí jide dọ to omẹ Jiwheyẹwhe tọn lẹ ṣẹnṣẹn, “lẹngbọhọtọ ṣinawe . . . po ahọvi ṣinatọ̀n po”—enẹ wẹ sọha sunnu nugopetọ he nuhudo etọn tin lẹ tọn—na fọ́n nado deanananu to titobasinanu Jehovah tọn mẹ. (Mika 5:5) To egbehe, mẹmẹsunnu whiwhẹnọ susu wẹ to azọ́nplọnmẹ mọyi bo to vivẹnudo nado pegan na lẹblanulọkẹyi sinsẹ̀nzọn tọn lẹ. Lehe enẹ nọ hẹn pipà wá na Jehovah bosọ nọ hẹn dona susu wá na mí do sọ!
Nawẹ Hiẹ Na Na Gblọndo Gbọn?
• Nawẹ Jesu gọalọna devi etọn lẹ nado pegan na azọngban susu dogọ gbọn?
• Nawẹ mẹho lẹ sọgan hodo apajlẹ Jesu tọn dile yé to alọgọna mẹmẹsunnu lẹ nado pegan to agun lọ mẹ gbọn?
• Nawẹ whẹndo mẹmẹsunnu de tọn sọgan gọalọna ẹn nado pegan gbọn?
• Etẹwẹ mẹmẹsunnu de dona wà nado pegan na lẹblanulọkẹyi lẹ?
[Kanbiọ Oplọn tọn lẹ]
[Yẹdide to weda 31]
Nawẹ hiẹ sọgan plọnazọ́n plọnmẹ Biblu towe dile e to vivẹnudo nado yinukọn gbọn?
[Yẹdide to weda 32]
Nawẹ mẹmẹsunnu de sọgan dohia dọ emi to vivẹnudo nado pegan gbọn?
