Zinzọnlin to Kọndopọ mẹ hẹ Gbigbọ bo Mọ Ogbẹ̀ po Jijọho Po
Zinzọnlin to Kọndopọ mẹ hẹ Gbigbọ bo Mọ Ogbẹ̀ po Jijọho Po
‘Zinzọnlin, e ma yin to kọndopọ mẹ hẹ agbasalan, ṣigba to kọndopọ mẹ hẹ gbigbọ.’—LOM. 8:4.
1, 2. (a) Onú ylankan tẹwẹ nọ jọ eyin mẹhe to húnkun de yin ayihafẹsẹna? (b) Owù tẹwẹ sọgan dekọtọn eyin mẹde yin ayihafẹsẹna to gbigbọ-liho?
OGÁN he nọ penukundo húnkùnkùn go to États-Unis dọmọ: “Mẹsusu wẹ nọ yin ayihafẹsẹna to whenue yé to húnkun podọ e taidi dọ walọ enẹ fọ́n bo to agayi to whemẹwhemẹ.” Alokan apòmẹ tọn yin dopo to nuyizan lẹ mẹ he sọgan fẹayihasẹna húnkùntọ de bọ e ma na na ayidonugo etọn lẹpo nuhe wà e te. To dodinnanu de whenu, hugan mado-atọ̀n mẹhe yin hokanse lẹ tọn wẹ dọ dọ húnkùntọ he to alokan apòmẹ tọn yizan de ko sọ́ emi kavi ko dibla sọ́ emi pọ́n. Nudevo wiwà to whenue yè to húnkun sọgan taidi nuhe na gọalọ ma nado gú whenu, ṣigba walọ enẹ sọgan hẹn nugbajẹmẹji wá.
2 Nudopolọ sọgan jọ do gbigbọnọ-yinyin mítọn go. Kẹdẹdile húnkùntọ he yin ayihafẹsẹna de ma nọ saba doayi ohia owù tọn lẹ go do, mọ wẹ mẹhe yin ayihafẹsẹna to gbigbọ-liho lọsu sọgan ze ede do owù mẹ po awubibọ po do niyẹn. Eyin mí dike bo danbú sọn aliho Klistiani tọn ji podọ sọn nuwiwa yẹwhehọluduta tọn mítọn lẹ mẹ, yise mítọn sọgan siọ taidi tọjihun de. (1 Tim. 1:18, 19) Apọsteli Paulu na ayinamẹ gando owù ehe go to whenue e na avase Klistiani he tin Lomu lẹ dọmọ: “Ayiha zizedo agbasalan ji nọ dekọtọn do okú mẹ, ṣigba ayiha zizedo gbigbọ ji nọ dekọtọn do ogbẹ̀ po jijọho po mẹ.” (Lom. 8:6) Etẹ dọ wẹ Paulu te taun? Nawẹ mí sọgan dapana “ayiha zizedo agbasalan ji” bo doafọna “ayiha zizedo gbigbọ ji” gbọn?
Yé “Ma Tindo Whẹgbledomẹ Depope”
3, 4. (a) Ahididi mẹdetiti tọn tẹ go wẹ Paulu kanwe gando? (b) Naegbọn mí dona tindo ojlo to ninọmẹ Paulu tọn mẹ?
3 To wekanhlanmẹ Paulu tọn hlan Lomunu lẹ mẹ, e dọhodo ahididi he ewọ lọsu titi tindo numimọ etọn de ji, yèdọ ahididi de to agbasalan etọn po ayiha etọn po ṣẹnṣẹn. (Hia Lomunu lẹ 7:21-23.) Paulu ma to whẹsuna ede kavi dọ onú ede tọn nọ blawuna ẹn taidi dọ ylando tindo huhlọn do e ji sọmọ bọ e ma sọgan duto ede ji. To popolẹpo mẹ, Klistiani he whèwhín de wẹ ewọ yin bo yin amisisayidode bosọ yin dide nado yin “apọsteli de na akọta lẹ.” (Lom. 1:1; 11:13) To whelọnu lo, naegbọn Paulu do kanwe gando ahididi edetiti tọn go?
4 Na nugbo tọn, Paulu yigbe dọ emi ma sọgan wà ojlo Jiwheyẹwhe tọn jẹ obá he mẹ emi jlo do po nugopipe emi lọsu titi tọn po gba. Etẹwutu? E dọmọ: “Na mẹlẹpo wẹ ko waylando bo whete do gigo Jiwheyẹwhe tọn go.” (Lom. 3:23) Taidi kúnkan Adam tọn, Paulu yin gbẹtọ mapenọ bo nọ tindo ojlo agọ̀ lẹ. Nudopolọ sọgan jọ do mí go na mímẹpo wẹ yin mapenọ bo dona pehẹ ahididi dopolọ lẹ egbesọegbesọ. Humọ, ayihafẹsẹnamẹnu susu wẹ tin he sọgan lẹ́ ayidonugo mítọn bo de mí sọn ‘aliho jinján he nọ planmẹ yì ogbẹ̀ mẹ’ lọ ji. (Mat. 7:14) Ṣigba, ehe ma hẹn Paulu nado hẹn todido bu, podọ mílọsu lẹ ma dona hẹn todido bu.
5. Fie wẹ Paulu mọ alọgọ po kọgbọ po yí sọn?
5 Paulu wlan dọmọ: “Mẹnu wẹ na whlẹn mi . . . ? Opẹ́ wẹ na Jiwheyẹwhe gbọn Jesu Klisti Oklunọ mítọn gblamẹ!” (Lom. 7:24, 25) Enẹgodo, e dọho gando mẹhe tin “to kọndopọ mẹ hẹ Klisti Jesu lẹ” go, yèdọ Klistiani yiamisisadode lẹ. (Hia Lomunu lẹ 8:1, 2.) Gbọn gbigbọ wiwe gblamẹ, Jehovah nọ yí yé sọdodovi bo nọ ylọ yé nado lẹzun “gudutọgbẹ́ lẹ hẹ Klisti.” (Lom. 8:14-17) Gbigbọ Jiwheyẹwhe tọn po yise he yé tindo to avọ́sinsan ofligọ Klisti tọn mẹ po nọ hẹn yé penugo nado duto ahididi he go Paulu donù lọ ji bọ yé nọ gbọnmọ dali tin ‘matin whẹgbledomẹ depope.’ Yé nọ yin tuntundote “sọn osẹ́n ylando tọn po okú tọn po mẹ.”
6. Naegbọn devizọnwatọ Jiwheyẹwhe tọn lẹpo dona na ayidonugo nuhe Paulu dọ lẹ?
6 Nugbo wẹ dọ Klistiani yiamisisadode lẹ wẹ Paulu kanwehlan, ṣigba devizọnwatọ Jehovah tọn lẹpo wẹ sọgan mọaleyi sọn nuhe e dọ gando gbigbọ Jiwheyẹwhe tọn po avọ́sinsan ofligọ Klisti tọn po go mẹ mahopọnna todido he yé tindo. Podọ, dile etlẹ yindọ Paulu yin gbigbọdo nado na ayinamẹ mọnkọtọn Klistiani yiamisisadode lẹ, onú titengbe wẹ e yin dọ devizọnwatọ Jiwheyẹwhe tọn lẹpo ni mọnukunnujẹ wekanhlanmẹ etọn mẹ bosọ dovivẹnu nado mọaleyi sọn e mẹ.
Lehe Jiwheyẹwhe “Gblewhẹdo Ylando to Agbasalan mẹ” Do
7, 8. (a) Linlẹn tẹ mẹ wẹ Osẹ́n lọ yin “madogánnọ gbọn agbasalan gblamẹ” te? (b) Etẹwẹ Jiwheyẹwhe ko wadotana gbọn gbigbọ etọn po ofligọ lọ po gblamẹ?
7 To weta 7tọ owe Lomunu lẹ tọn mẹ, Paulu yigbe dọ ylando tindo huhlọn do agbasa mape mítọn ji. Ṣigba to weta 8tọ mẹ, e dọhodo huhlọn gbigbọ wiwe tọn ji. Apọsteli lọ basi zẹẹmẹ gando lehe gbigbọ Jiwheyẹwhe tọn sọgan gọalọna Klistiani lẹ to ahididi yetọn sọta huhlọn ylando tọn mẹ go do, na yé nido sọgan nọgbẹ̀ to kọndopọ mẹ hẹ ojlo Jehovah tọn bo mọ nukundagbe etọn. Paulu zinnudeji dọ gbọn gbigbọ Jiwheyẹwhe tọn po avọ́sinsan ofligọ Visunnu etọn tọn po gblamẹ, Jiwheyẹwhe ko wà nude dotana he Osẹ́n Mose tọn ma sọgan wà.
8 Osẹ́n lọ gọna gbedide susu he e bẹhẹn lẹ gblewhẹdo ylandonọ lẹ. Humọ, to akọta Islaeli tọn mẹ, mẹhe nọ sẹ̀n taidi yẹwhenọ daho to Osẹ́n lọ glọ lẹ yin mapenọ bo ma sọgan basi avọ́sinsan pipé do ylandonọ lẹ tamẹ. Osẹ́n lọ yin “madogánnọ gbọn agbasalan gblamẹ.” Ṣigba, to whenue Jiwheyẹwhe “do Visunnu etọn titi hlan to awusọhia he taidi gbẹtọvi lẹ tọn mẹ” bo yí i do basi ofligọ de, ewọ “gblewhẹdo ylando to agbasalan mẹ,” bo gbọnmọ dali wà nuhe “Osẹ́n lọ ma penugo nado wà.” Taidi kọdetọn de, Klistiani yiamisisadode lẹ nọ yin pinpọnhlan taidi dodonọ to dodonu yise yetọn to avọ́sinsan ofligọ Jesu tọn mẹ ji. Yé yin tulina nado ‘zinzọnlin, e ma yin to kọndopọ mẹ hẹ agbasalan, ṣigba to kọndopọ mẹ hẹ gbigbọ.’ (Hia Lomunu lẹ 8:3, 4.) Na nugbo tọn, yé dona wà enẹ po nugbonọ-yinyin po kakajẹ whenue yé dotana gbẹzan aigba ji tọn yetọn, na yé nido mọ “jẹgbakun ogbẹ̀ tọn” yí.—Osọ. 2:10.
9. Etẹwẹ yin zẹẹmẹ hogbe lọ “osẹ́n” he yin yiyizan to Lomunu lẹ 8:2 mẹ tọn?
9 Gbọnvona “Osẹ́n lọ,” Paulu sọ donù “osẹ́n gbigbọ . . . lọ tọn” podọ “osẹ́n ylando tọn po okú tọn po” go. (Lom. 8:2) Etẹwẹ osẹ́n ehelẹ zẹẹmẹdo? Hogbe lọ “osẹ́n” tofi ma dlẹnalọdo nujinọtedo tangan lẹ taidi dehe Osẹ́n Mose tọn bẹhẹn lẹ gba. Wezẹhomẹ de dọmọ: ‘Hogbe Glẹki tọn lọ he yin yiyizan na osẹ́n to wefọ ehe mẹ zẹẹmẹdo onú dagbe kavi onú ylankan he gbẹtọ lẹ nọ wà bọ e nọ deanana yé taidi osẹ́n de. Humọ, e sọ zẹẹmẹdo nujinọtedo he gbẹtọ lẹ nọ basi dide nado hodo to gbẹzan yetọn mẹ lẹ.’
10. Nawẹ osẹ́n ylando tọn po okú tọn po nọ yinuwado mí ji gbọn?
10 Apọsteli Paulu wlan dọmọ: “Ylando gbọn omẹ dopo gblamẹ biọ aihọn mẹ podọ okú gbọn ylando gblamẹ wá, gbọnmọ dali, okú dlẹnkan jẹ mẹlẹpo dè, na yemẹpo wẹ ko waylando wutu.” (Lom. 5:12) Taidi kúnkan Adam tọn lẹ, mímẹpo ji wẹ osẹ́n ylando tọn po okú tọn po nọ yinuwado. Agbasa mape mítọn nọ sisẹ́ mí to whepoponu nado wà nuhe Jiwheyẹwhe gbẹwanna lẹ, yèdọ nuhe nọ dekọtọn do okú mẹ lẹ. To wekanhlanmẹ Paulu tọn hlan Galatianu lẹ mẹ, e ylọ walọ po nuyiwa enẹlẹ po dọ “azọ́n agbasalan tọn lẹ.” E sọ yidogọ dọmọ: “Mẹhe nọ wà onú mọnkọtọn lẹ ma na dugu ahọluduta Jiwheyẹwhe tọn.” (Gal. 5:19-21) Mẹhe tindo walọ enẹlẹ yin nudopolọ po mẹhe nọ zinzọnlin to kọndopọ mẹ hẹ agbasalan lẹ po. (Lom. 8:4) Nuhe “nọ deanana yé” podọ ‘nujinọtedo yetọn to gbẹ̀mẹ’ nọ sinai do agbasalan kẹdẹ ji. Ṣigba be mẹhe nọ lọga, nọ doalọ to boṣiọ-sinsẹ̀n, afinyọnnuwiwa kavi to ylando sinsinyẹn devo lẹ mẹ lẹ kẹdẹ janwẹ to zọnlinzin to kọndopọ mẹ hẹ agbasalan ya? Paali, na azọ́n agbasalan tọn lẹ sọ bẹ nuhe mẹdelẹ sọgan pọnhlan taidi awugbopo gbẹtọ-yinyin tọn poun lẹ hẹn ga, enẹ wẹ awuwhàn, adánjijẹ whẹwhẹ, wiwọ́ po nuvẹun po. Mẹnu wẹ sọgan dọ dọ emi ko vò pete sọn zọnlinzinzin to kọndopọ mẹ hẹ agbasalan si?
11, 12. Awuwledainanu Jehovah tọn tẹwẹ sọgan gọalọna mí nado duto osẹ́n ylando po okú po tọn ji, podọ etẹwẹ mí dona wà nado duvivi nukundagbe Jiwheyẹwhe tọn?
11 Lehe mí sọgan gọ́ na ayajẹ do sọ dọ Jehovah hẹn ẹn yọnbasi na mí nado duto osẹ́n ylando po okú po tọn ji! Jesu dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” Gbọn alọkikẹyi owanyi Jiwheyẹwhe tọn po yise didohia to avọ́sinsan ofligọ Jesu Klisti tọn po mẹ dali, mí sọgan vò sọn whẹgbledomẹ he ylando he mí dugu etọn nọ hẹnwa mí ji lọ mẹ. (Joh. 3:16-18) Enẹwutu, taidi Paulu, mí sọgan yin whinwhàn nado dọmọ: “Opẹ́ wẹ na Jiwheyẹwhe gbọn Jesu Klisti Oklunọ mítọn gblamẹ!”
12 Ninọmẹ mítọn taidi mẹhe mọ pọngbọ sọn azọ̀n sinsinyẹn de mẹ tọn nkọ. Eyin mí na jẹgangan pete, mí dona wà nuhe doto biọ to mí si nado wà. Dile etlẹ yindọ yise didohia to ofligọ lọ mẹ sọgan tún mí dote sọn osẹ́n ylando po okú po tọn si, mí gbẹ́ to mapenọ po ylandonọ po yin. E nọ biọ nususu nado tindo ninọmẹ dagbe to gbigbọ-liho bo duvivi nukundagbe po dona Jiwheyẹwhe tọn po. Na nuhe gando “nubiọtomẹsi dodo tọn Osẹ́n lọ tọn” hinhẹndi go, Paulu sọ dọhodo whẹho zọnlinzinzin to kọndopọ mẹ hẹ gbigbọ tọn ji.
Nawẹ Mí Sọgan Zinzọnlin to Kọndopọ mẹ hẹ Gbigbọ Gbọn?
13. Etẹwẹ e zẹẹmẹdo nado zinzọnlin to kọndopọ mẹ hẹ gbigbọ?
13 Eyin mí to zọnlinzin, mí nọ to tẹnsẹ jei ofi tangan de. Gbọnmọ dali, zọnlinzinzin to kọndopọ mẹ hẹ gbigbọ nọ biọ dọ mí ni to vivẹnudo nado yinukọn to gbigbọ-liho, ṣigba ehe ma zẹẹmẹdo pipé-yinyin to gbigbọ-liho. (1 Tim. 4:15) Egbesọegbesọ podọ po nugopipe mítọn lẹpo po wẹ mí dona nọ dovivẹnu nado zinzọnlin, kavi zan gbẹzan mítọn, to kọndopọ mẹ hẹ anademẹ gbigbọ tọn. ‘Zọnlinzinzin gbọn gbigbọ dali’ nọ dekọtọn do nukundagbe Jiwheyẹwhe tọn mimọyi mẹ.—Gal. 5:16.
14. Nawẹ mẹhe nọ “ze ayiha yetọn do onú agbasalan tọn lẹ ji” lẹ nọ yinuwa gbọn?
14 To wekanhlanmẹ Paulu tọn hlan Lomunu lẹ mẹ, e donù gbẹtọ wunmẹ awe he ayiha kavi pọndohlan yetọn nọ sọta yede go. (Hia Lomunu lẹ 8:5.) Tofi, hogbe lọ agbasalan ma zẹẹmẹdo agbasa jọnun gbẹtọ tọn dandan gba. To Biblu mẹ, hogbe lọ “agbasalan” nọ yin yiyizan to whedelẹnu nado dlẹnalọdo ninọmẹ ylandonọ-yinyin po mapenọ-yinyin agbasa gbẹtọ tọn po tọn. Ninọmẹ ehe wẹ nọ hẹn ahididi he go Paulu donù wayi to agbasalan po ayiha po ṣẹnṣẹn lọ wá. Ṣigba, gbọnvona Paulu, mẹhe “tin to kọndopọ mẹ hẹ agbasalan” lẹ ma tlẹ nọ tẹnpọn nado diahi paali. Kakati nado lẹnnupọndo nuhe Jiwheyẹwhe biọ to yé si lẹ ji bo kẹalọyi alọgọ he e ko wleawuna, yé nọ yin whinwhàn nado “ze ayiha yetọn do onú agbasalan tọn lẹ ji.” Yé nọ saba ze ayidonugo do gbẹzan fẹẹmẹninọ tọn zinzan po pekọ hinhẹnwa na ojlo agbasalan tọn yetọn lẹ po ji. To vogbingbọn mẹ, ayilinlẹn mẹhe “tin to kọndopọ mẹ hẹ gbigbọ” lẹ tọn wẹ nado nọ ze ayiha yetọn do “onú gbigbọ tọn lẹ” ji, yèdọ awuwledainanu gbigbọmẹ tọn lẹ po nuwiwa gbigbọmẹ tọn lẹ po.
15, 16. (a) Nawẹ ayiha zizedo nude ji nọ yinuwado pọndohlan mẹtọn ji gbọn? (b) Etẹ ji wẹ suhugan gbẹtọ lẹ tọn nọ ze ayiha yetọn do to egbehe?
15 Hia Lomunu lẹ 8:6. Nado wà nudepope, vlavo dagbe kavi ylankan, yè dona ze ayiha mẹtọn do nulọ ji whẹ́. Mẹhe nọ ze ayiha yetọn do onú agbasa tọn lẹ ji to whepoponu lẹ nọ yawu wleawuna pọndohlan kavi ayilinlẹn he nọ gando onú agbasalan tọn lẹ kẹdẹ go. Numọtolanmẹ yetọn lẹ, ojlo yetọn lẹ po nuhe yé yiwanna lẹ po nọ saba sinai do onú mọnkọtọn lẹ kẹdẹ ji.
16 Onú tẹlẹ wẹ nọ hẹn alọnu suhugan gbẹtọ lẹ tọn ján to egbehe? Apọsteli Johanu wlan dọmọ: “Nuhe tin to aihọn mẹ lẹpo—yèdọ ojlo agbasalan tọn, ojlo nukun tọn, po nutindo gbẹ̀mẹ tọn mẹtọn lẹ jijlá po—ma wá sọn Otọ́ dè gba, ṣigba wá sọn aihọn dè.” (1 Joh. 2:16) Ojlo ehelẹ bẹ fẹnnuwiwa, yindidi po nutindo lẹ po hẹn. Owe lẹ, linlinwe lẹ, sinima voovo lẹ, tito-to-whinnu televiziọn ji tọn lẹ po Internet po wẹ ko gọ́ na onú mọnkọtọn lẹ, na onú enẹlẹ ji wẹ suhugan gbẹtọ lẹ tọn nọ ze ayiha yetọn do bosọ nọ yiwanna. Ṣigba, “ayiha zizedo agbasalan ji nọ dekọtọn do okú mẹ” to gbigbọ-liho todin podọ okú to agbasa-liho to sọgodo. Naegbọn e do yinmọ? “Na ayiha zizedo agbasalan ji nọ dekọtọn do okẹ̀n mẹ hẹ Jiwheyẹwhe, na e ma nọ yin mẹmẹglọ na osẹ́n Jiwheyẹwhe tọn, mọdopolọ e masọ sọgan wàmọ. Enẹwutu, mẹhe tin to kọndopọ mẹ hẹ agbasalan ma sọgan hẹn homẹ Jiwheyẹwhe tọn hùn.”—Lom. 8:7, 8.
17, 18. Nawẹ mí sọgan doafọna ayiha zizedo onú gbigbọ tọn lẹ ji gbọn, podọ etẹwẹ na yin kọdetọn lọ eyin mí wàmọ?
17 To alọ devo mẹ, “ayiha zizedo gbigbọ ji nọ dekọtọn do ogbẹ̀ po jijọho po mẹ,” yèdọ ogbẹ̀ madopodo to sọgodo podọ jijọho ahun mẹ tọn po jijọho mẹ ninọ hẹ Jiwheyẹwhe po todin. Nawẹ mí sọgan doafọna “ayiha zizedo gbigbọ ji” gbọn? Gbọn ayiha mítọn zizedo onú gbigbọ tọn lẹ ji to whepoponu dali podọ gbọn hinhẹn linlẹn mítọn lẹ tin to kọndopọ mẹ hẹ linlẹn Jiwheyẹwhe tọn lẹ dali. Mọwiwà nọ dohia dọ nulẹnpọn mítọn “yin mẹmẹglọ na osẹ́n Jiwheyẹwhe tọn” bosọ tin “to kọndopọ mẹ hẹ” linlẹn etọn lẹ. To whlepọn lẹ nukọn, mí ma na biọ bẹwlu mẹ gando nuhe mí dona wà go. Mí na yin whinwhàn nado basi dide he sọgbe, yèdọ dehe tin to kọndopọ mẹ hẹ gbigbọ.
18 Enẹwutu, nujọnu wẹ e yin nado nọ ze ayiha mítọn do onú gbigbọ tọn lẹ ji. Mí nọ wà ehe gbọn ‘awuwiwlena ayiha mítọn lẹ na nuwiwa’ dali, yèdọ tito dagbe de hihodo na onú gbigbọ mẹ tọn lẹ he bẹ dẹ̀hiho to gbesisọ mẹ, Biblu hihia po pinplọn ẹn po, opli lẹ yìyì po sinsẹ̀nzọn kunnudegbe tọn po hẹn. (1 Pita 1:13) Kakati nado dike onú agbasa tọn lẹ ni fẹayihasẹna mí, mì gbọ mí ni nọ ze ayiha mítọn do onú gbigbọ tọn lẹ ji. Gbọnmọ dali, mí na to zọnlinzin to kọndopọ mẹ hẹ gbigbọ zọnmii. Mọwiwà na hẹn dona lẹ wá na mí, na ayiha zizedo gbigbọ ji nọ zẹẹmẹdo ogbẹ̀ po jijọho po.—Gal. 6:7, 8.
Be Hiẹ Sọgan Na Gblọndo Ya?
• Etẹwẹ “Osẹ́n lọ ma penugo nado wà,” podọ nawẹ Jiwheyẹwhe didẹ whẹho ehe gbọn?
• Etẹwẹ “osẹ́n ylando tọn po okú tọn po” lọ zẹẹmẹdo, podọ nawẹ mí sọgan yin tuntundote gbọn?
• Etẹwẹ mí dona wà nado wleawuna “ayiha zizedo gbigbọ ji”?
[Kanbiọ Oplọn tọn lẹ]
[Yẹdide to weda 12]
Be hiẹ nọ zinzọnlin to kọndopọ mẹ hẹ agbasalan wẹ kavi to kọndopọ mẹ hẹ gbigbọ?
