Naegbọn Gbigbọ Jiwheyẹwhe Tọn Dona Deanana Mí?
Naegbọn Gbigbọ Jiwheyẹwhe Tọn Dona Deanana Mí?
“Hiẹ wẹ Jiwheyẹwhe ṣie: yinyọ́n wẹ gbigbọ towe; gbọ ni deanana mi.”—PS. 143:10, NW.
1. Etẹ sin nuhudo wẹ mí tindo eyin mí to gbejizọnlin ji jei fihe mí ma jẹakọ hẹ de?
MÍ NI dọ dọ hiẹ to gbejizọnlin ji jei fihe a ma jẹakọ hẹ de. Mẹhe ko yì filọ pọ́n bọ a dejidego po hiẹ po wẹ zọ̀n. Eyin e jẹakọ hẹ ali he yì filọ ganji, e na deanana we. A ma na buali eyin a hodo anademẹ etọn.
2, 3. (a) Huhlọn jiawu tẹwẹ Jehovah yizan to owhe madosọha lẹ die? (b) Naegbọn mí dona donukun dọ huhlọn mayinukundomọ Jiwheyẹwhe tọn ni deanana gbẹzan mítọn to egbehe?
2 Mí tindo nuhudo anademẹ tọn to aliho ogbẹ̀ tọn ji. Wefọ tintan Biblu tọn lẹ donù nude go he sọgan deanana mí. Owe Gẹnẹsisi tọn dọho gando nuhe Jehovah wadotana to owhe madosọha lẹ die go dọmọ: “To whẹwhẹwhenu Jiwheyẹwhe dá olọn po aihọn po.” Dile ewọ to mọwà, e do huhlọn jiawu de hlan, na kandai nudida tọn yidogọ dọmọ: “Huhlọn-yido-wazọ́n Jiwheyẹwhe tọn sọ to yigọyigọ basi.” (Gẹn. 1:1, 2, NW) Huhlọn tẹwẹ to azọ́nwa? Gbigbọ wiwe wẹ—yèdọ huhlọn he yin yiyizan to nudida whenu. Gbigbọ enẹ he Jehovah yizan nado wà azọ́n etọn lẹpo wẹ zọ́n bọ mí do tin to ogbẹ̀.—Job 33:4; Ps. 104:30.
3 Gbọnvona dọ Jehovah yí gbigbọ wiwe etọn zan nado dá mí, e sọ nọ yí i zan nado deanana mí. Jesu, Visunnu Jiwheyẹwhe tọn dọna devi etọn lẹ dọmọ: ‘Gbigbọ lọ na deanana mì yì nugbo lọ lẹpo kọ̀n.’ (Joh. 16:13) Etẹwẹ gbigbọ ehe yin taun, podọ naegbọn mí dona tindo ojlo dọ ni deanana mí?
Nuhe Gbigbọ Wiwe Yin
4, 5. (a) Etẹwẹ mẹhe yise to Atọ̀n-to-Dopomẹ mẹ lẹ gbọn nuṣiwa dali lẹndọ gbigbọ wiwe yin? (b) Nawẹ a sọgan basi zẹẹmẹ nuhe gbigbọ wiwe yin taun tọn gbọn?
4 Vlavo, delẹ to mẹhe hiẹ nọ dọhona to lizọnyizọn lọ mẹ lẹ mẹ tindo linlẹn agọ̀ gando gbigbọ wiwe go. Mẹhe yise to Atọ̀n-to-Dopomẹ mẹ lẹ gbọn nuṣiwa dali lẹndọ gbẹtọ gbigbọnọ de he sọzẹn hẹ Otọ́ lọ, Jiwheyẹwhe wẹ e yin. (1 Kọl. 8:6) Ṣigba, e họnwun dọ sinsẹ̀n-nuplọnmẹ Atọ̀n-to-Dopomẹ tọn jẹagọdo Owe-wiwe lẹ.
5 To whelọnu lo, etẹwẹ gbigbọ wiwe yin taun? Hogbe Heblu tọn lọ, ruʹach he yin yiyizan to Gẹnẹsisi 1:2 mẹ nọ saba yin lilẹdogbedevomẹ taidi ‘gbigbọ,’ ṣigba e sọgan sọ yin lilẹdo ‘jẹhọn’ kavi hogbe devo lẹ he do gbigbọ mayinukundomọ de hia. (Yijlẹdo Gẹnẹsisi 3:8; 8:1 go.) Kẹdẹdile jẹhọn yin mayinukundomọ ṣigba bo tindo huhlọn do, mọ wẹ gbigbọ wiwe yin mayinukundomọ, ṣigba bo nọ yinuwa do niyẹn. Gbigbọ ehe yin huhlọn de he nọ wá sọn Jiwheyẹwhe dè bo nọ yinuwado gbẹtọ lẹ kavi nulẹ ji nado hẹn lẹndai etọn di. Be e vẹawu nado yise dọ huhlọn jiawu mọnkọtọn wá sọn Asisa wiwe lọ, Jiwheyẹwhe Ganhunupotọ lọ dè wẹ ya? Paali!—Hia Isaia 40:12, 13.
6. Obiọ ayidego tọn tẹwẹ Davidi basi hlan Jehovah?
6 Be Jehovah sọgan gbẹ́ yí gbigbọ etọn zan nado deanana mí zọnmii ya? E dopagbe na Psalm-kantọ Davidi dọmọ: “Yẹn na plọn we, yẹn nasọ yí afọ towe do ali he ji hiẹ na gbọn.” (Ps. 32:8) Be enẹ jlo Davidi ya? Mọwẹ, na e biọ Jehovah dọmọ: “Plọn mi nado wà ojlo towe: na hiẹ wẹ Jiwheyẹwhe ṣie: yinyọ́n wẹ gbigbọ towe; gbọ ni deanana mi.” (Ps. 143:10, NW) Mílọsu dona tindo ojlo dopolọ nado yin anadena gbọn gbigbọ Jiwheyẹwhe tọn dali. Etẹwutu? Mì gbọ mí ni lẹnnupọndo whẹwhinwhẹ́n ẹnẹ ji.
Mí Ma Tindo Nugopipe Nado Deanana Míde
7, 8. (a) Naegbọn mí ma sọgan deanana míde matin alọgọ Jiwheyẹwhe tọn? (b) Basi zẹẹmẹ nuhewutu e do yin owùnu dọ mí ni tẹnpọn nado deanana míde to titonu ylankan ehe mẹ tọn.
7 Tintan, mí dona tindo ojlo nado yin anadena gbọn gbigbọ Jiwheyẹwhe tọn dali, na mí ma tindo nugopipe nado deanana míde wutu. “Nado deanana” zẹẹmẹdo “nado de mẹde do aliji kavi do aliho he ji e dona gbọn hia ẹ.” Ṣigba, Jehovah ma dá mí po nugopipe lọ po nado deanana míde, titengbe to ninọmẹ mapenọ-yinyin tọn mítọn mẹ. Yẹwhegán etọn Jelemia wlan dọmọ: “OKLUNỌ E, yẹn yọnẹn dọ aliho gbẹtọ tọn ma tin to ewọ lọsu mẹ gba: e ma tin to mẹhe to zọnlinzin mẹ nado do afọdide etọn lẹ gba.” (Jel. 10:23) Etẹwutu? Jiwheyẹwhe dọhona Jelemia gando nuhewutu mí ma sọgan deanana míde go. Jehovah dọho gando gbẹtọ he mí yin to homẹ go dọmọ: “Ayiha yin oklenọ hugan nulẹpo, podọ e sọ yin awutunọ tupinpẹnnọ: mẹnu wẹ sọgan yọnẹn?”—Jel. 17:9; Mat. 15:19.
8 Be e ma yin nulunu wẹ e na yin na mẹhe ma tindo numimọ de nado dota zungbo he e ma jẹakọ hẹ de mẹ, matin anademẹtọ de ya? Na e ma yọ́n lehe yè nọ yinuwa to ninọmẹ sinsinyẹn lẹ mẹ to zungbo mẹ do bo ma tindo numimọ nado dín fie tindo hihọ́ he e na gbọn nado yì fihe e jei wutu, ogbẹ̀ etọn zedo owù mẹ wẹ e te. Mọdopolọ, mẹdepope he lẹndọ emi sọgan deanana emide to aihọn ylankan ehe mẹ bo ma dike Jiwheyẹwhe ni do ali he sọgbe lọ hia ẹ, to ogbẹ̀ ede tọn zedo owù daho mẹ. Yọnbasi dopo gee he mí tindo nado lùn titonu ehe tọ́n po kọdetọn dagbe po wẹ nado vẹ̀ Jehovah to odẹ̀ mẹ dile Davidi wà do dọmọ: “Dike afọdide ṣie ni hẹnai to ali towe lẹ ji, na yẹn nikaa dahli.” (Ps. 17:5, NW; 23:3) Nawẹ mí sọgan mọ anademẹ mọnkọtọn yí gbọn?
9. Dile e yin didohia to weda 17tọ ji do, nawẹ gbigbọ Jiwheyẹwhe tọn sọgan deanana mí gbọn?
9 Eyin mí whiwhẹ míde bo ganjẹ Jehovah go sọn ojlo mẹ wá, ewọ na na mí gbigbọ wiwe etọn he na deanana afọdide mítọn lẹ. Nawẹ huhlọn-yido-wazọ́n enẹ na gọalọna mí gbọn? Jesu dọna devi etọn lẹ dọmọ: “Alọgọtọ lọ, yèdọ gbigbọ wiwe, he Otọ́ lọ na dohlan to oyín ṣie mẹ, enẹ lọ wẹ na plọn mì onú lẹpo bo na hẹn onú lẹpo he yẹn ko dọna mì wá oflin mẹ na mì.” (Joh. 14:26) Eyin mí nọ plọn Ohó Jiwheyẹwhe tọn gọna nuhe Klisti dọ lẹpo bosọ nọ hodẹ̀ to gbesisọ mẹ, gbigbọ wiwe na hẹn nukunnumọjẹnumẹ mítọn gando nuyọnẹn Jehovah tọn go siso sọmọ bọ mí na penugo nado yinuwa sọgbe hẹ ojlo Jiwheyẹwhe tọn. (1 Kọl. 2:10) Humọ, eyin nujijọ madonukun de wá jọ to gbẹzan mítọn mẹ, gbigbọ lọ na gọalọna mí nado yọ́n nuhe mí na wà. E na flin mí nunọwhinnusẹ́n Biblu tọn he mí ko plọn lẹ bo na gọalọna mí nado yọ́n lehe mí na yí yé zan nado basi nudide lẹ do.
Jesu Yin Anadena Gbọn Gbigbọ Jiwheyẹwhe Tọn Dali
10, 11. Etẹwẹ Visunnu dopo akàn Jiwheyẹwhe tọn yọnẹn jẹnukọn gando gbigbọ wiwe go, podọ nawẹ gbigbọ lọ gọalọna ẹn gbọn?
10 Whẹwhinwhẹ́n awetọ he wutu mí dona tindo ojlo dọ gbigbọ wiwe ni deanana mí wẹ yindọ, Jiwheyẹwhe deanana Visunnu etọn gbọn gbigbọ ehe dali. Whẹpo Visunnu dopo akàn Jiwheyẹwhe tọn do wá aigba ji, e yọ́n dọdai lọ he dọmọ: “Gbigbọ OKLUNỌ tọn na jẹ do e ji, gbigbọ wuntunnugo po zinzin po tọn, gbigbọ lẹnpọn po huhlọn po tọn, gbigbọ nuyọnẹn po osi OKLUNỌ tọn po tọn.” (Isa. 11:2) Yí nukun homẹ tọn do pọ́n lehe Jesu nọ jejeji nado kẹalọyi alọgọ gbigbọ Jiwheyẹwhe tọn do to whenue e to pipehẹ ninọmẹ sinsinyẹn lẹ to aigba ji file!
11 Hogbe Jehovah tọn lẹ mọ hẹndi. Kandai Wẹndagbe tọn lọ dọ nuhe jọ tlolo he Jesu yí baptẹm godo dọmọ: “Todin, Jesu, he gọ́ na gbigbọ wiwe, lẹkọ sọn Jọdani, bọ gbigbọ plan ẹn dánpe gbọn danfafa ji.” (Luku 4:1) To finẹ, dile Jesu to nùbla, to dẹ̀ho, bo to ayihamẹlẹnpọn, Jehovah sọgan ko na nudọnamẹ Visunnu etọn bo na ẹn nukunnumọjẹnumẹ gando nuhe e na pehẹ lẹ go. Huhlọn-yido-wazọ́n Jiwheyẹwhe tọn yinuwado ayiha po ahun Jesu tọn po ji bo deanana linlẹn po nudide etọn lẹ po. Taidi kọdetọn de, Jesu yọ́n nuhe e na wà to ninọmẹ dopodopo mẹ, podọ e wà nuhe Otọ́ etọn jlo dọ ni wà pẹpẹ.
12. Naegbọn e do yin dandan nado nọ biọ dọ gbigbọ Jiwheyẹwhe tọn ni deanana mí?
12 Na Jesu yọ́n pinpẹn nuyiwa gbigbọ Jiwheyẹwhe tọn to gbẹzan etọn mẹ tọn wutu, e hẹn ẹn họnwun na devi etọn lẹ dọ nujọnu wẹ e yin dọ yé ni nọ biọ gbigbọ wiwe bo dike ni nọ deanana yé. (Hia Luku 11:9-13.) Naegbọn mọwiwà do yin dandan na mílọsu? Na e sọgan diọlinlẹn mítọn sọmọ bọ e na taidi ayiha Klisti tọn nkọ. (Lom. 12:2; 1 Kọl. 2:16) Eyin mí nọ dike gbigbọ wiwe ni deanana gbẹzan mítọn, enẹ sọgan gọalọna mí nado nọ lẹnnupọn dile Klisti wà do bo hodo apajlẹ etọn.—1 Pita 2:21.
Gbigbọ Aihọn Tọn Na Hẹn Mí Buali
13. Etẹwẹ gbigbọ aihọn tọn yin, podọ kọdetọn tẹwẹ e nọ hẹnwa?
13 Whẹwhinwhẹ́n atọ̀ntọ he wutu mí dona tindo ojlo nado yin anadena gbọn gbigbọ Jiwheyẹwhe tọn dali wẹ yindọ, matin anademẹ etọn mí sọgan yin hinhẹn buali gbọn gbigbọ mawé he to nuyiwa to gbẹzan gbẹtọ susu tọn mẹ to egbehe dali. Aihọn lọ tindo huhlọn mẹwhinwhàn tọn etọn titi he nọ deanana gbẹtọ lẹ to aliho he jẹagọdo gbigbọ wiwe tọn mẹ. Kakati nado gọalọna gbẹtọ lẹ nado tindo ayiha Klisti tọn, gbigbọ aihọn tọn nọ deanana yé nado lẹnnupọn bo yinuwa taidi ogán aihọn tọn, yèdọ Satani. (Hia Efesunu lẹ 2:1-3; Titu 3:3.) Eyin mẹde joawuna gbigbọ aihọn tọn bo yí azọ́n agbasalan tọn lẹ do dó aṣa, kọdetọn he e nọ hẹnwa nọ ylan taun, podọ mẹlọ ma na dugu Ahọluduta Jiwheyẹwhe tọn.—Gal. 5:19-21.
14, 15. Nawẹ mí sọgan nọavùnte sọta gbigbọ aihọn tọn gbọn?
14 Jehovah ko hẹn mí penugo nado nọavùnte sọta gbigbọ aihọn tọn. Apọsteli Paulu dọ dọ, “mì nọ to huhlọn mọyi sọn Oklunọ dè podọ sọn hlọnhlọn huhlọn etọn tọn mẹ . . . na mì nido penugo nado nọavùnte to azán ylankan gbè.” (Efe. 6:10, 13) Gbọn gbigbọ wiwe etọn gblamẹ, Jehovah nọ na mí huhlọn nado nọavùnte sọta vivẹnudido Satani tọn nado hẹn mí buali. (Osọ. 12:9) Gbigbọ aihọn tọn tindo huhlọn, podọ mí ma sọgan dapana ẹn pete. Ṣigba, mí ma dona dike ni hẹn mí flu. Huhlọn gbigbọ wiwe tọn wẹ yiaga hugan, podọ e na gọalọna mí!
15 Apọsteli Pita dọ gando mẹhe jo sinsẹ̀n Klistiani tọn do to owhe kanweko tintan whenu lẹ go dọmọ: “Gbọn ali jijlọ lọ gbigbẹdai dali, yé ko yin hinhẹn buali.” (2 Pita 2:15) Lehe mí dopẹ́ do sọ dọ “e ma yin gbigbọ aihọn tọn wẹ mí mọyi gba, ṣigba gbigbọ he wá sọn Jiwheyẹwhe dè”! (1 Kọl. 2:12) Eyin nuyiwadomẹji etọn gọalọna mí bọ mí nọ yí nuhe Jehovah wleawuna nado hẹn mí gbọṣi ali jijlọ ji to gbigbọ-liho lẹpo zan to gigọ́ mẹ, mí sọgan tindo kọdetọn dagbe to avùnteninọ sọta gbigbọ aihọn ylankan ehe tọn mẹ.—Gal. 5:16.
Gbigbọ Wiwe Nọ De Sinsẹ́n Dagbe Tọ́n
16. Sinsẹ́n tẹwẹ gbigbọ wiwe sọgan gọalọna mí nado wleawuna?
16 Whẹwhinwhẹ́n ẹnẹtọ he wutu mí dona tindo ojlo dọ gbigbọ Jiwheyẹwhe tọn ni deanana mí wẹ yindọ, e nọ gọalọna mẹhe e nọ deanana lẹ nado de sinsẹ́n dagbe tọ́n to gbẹzan yetọn mẹ. (Hia Galatianu lẹ 5:22, 23.) Mẹnu to mí mẹ wẹ ma na jlo nado do owanyi, ayajẹ, po jijọho po hia dogọ? Mẹnu to mí mẹ wẹ ma na jlo nado sudeji to linsinsinyẹn, homẹdagbe, po dagbewà po mẹ? Mẹnu to mí mẹ wẹ awuwiwlena yise, walọmimiọn, po mawazẹjlẹgo po dogọ ma na hẹn ale wá na? Gbigbọ Jiwheyẹwhe tọn nọ gọalọna mí nado wleawuna jẹhẹnu dagbe lẹ he nọ hẹn ale wá na mí po mẹhe mí nọ nọpọ́ hẹ bosọ nọ basi sinsẹ̀n hẹ lẹ po. Awuwiwlena sinsẹ́n ehe nọ biọ vivẹnudido madoalọte, na dogbó de ma tin gando obá he mẹ mí tindo nuhudo sinsẹ́n gbigbọ tọn jẹ po jlọjẹ he mí tindo nado wleawuna ẹn po go.
17. Nawẹ mí sọgan wleawuna adà sinsẹ́n gbigbọ tọn de to obá he yiaga mẹ gbọn?
17 Nuyọnẹnnu wẹ e yin dọ mí ni nọ gbeje míde pọ́n nado sọgan hẹn ẹn diun dọ ohó po nuyiwa mítọn lẹ po do kunnudenu hia dọ gbigbọ wiwe nọ deanana mí bo to alọgọna mí nado wleawuna sinsẹ́n etọn. (2 Kọl. 13:5a; Gal. 5:25) Eyin mí mọdọ mí dona wleawuna delẹ to adà sinsẹ́n gbigbọ tọn lẹ mẹ, mí sọgan dovivẹnu dogọ nado dike gbigbọ wiwe ni gọalọna mí nado wleawuna jẹhẹnu enẹlẹ. Nado wà ehe, mí na nọ plọnnu gando adà etọn dopodopo go dile e yin didehia to Biblu mẹ bo yin hodọdeji to owe mítọn lẹ mẹ do. Gbọnmọ dali, mí sọgan mọnukunnujẹ lehe mí dona do sinsẹ́n gbigbọ tọn hia to gbẹzan egbesọegbesọ tọn mítọn mẹ do mẹ, podọ to enẹgodo mí na dovivẹnu nado wleawuna ẹn to obá he yiaga mẹ. a Eyin mí mọ kọdetọn he nuyiwa gbigbọ Jiwheyẹwhe tọn nọ hẹnwa to gbẹzan mítọn titi mẹ lẹ podọ to gbẹzan Klistiani hatọ mítọn lẹ tọn mẹ, nuhewutu e dona deanana mí nọ họnwun na mí hezeheze.
Be Hiẹ Nọ Joawuna Anademẹ Gbigbọ Wiwe Tọn Ya?
18. Nawẹ Jesu yin apajlẹ de na mí gando alọkikẹyi anademẹ gbigbọ Jiwheyẹwhe tọn go gbọn?
18 Biblu dohia mí dọ taidi gbẹtọvi de, Jesu tindo numimọ nuyiwa gbigbọ wiwe Jiwheyẹwhe tọn tọn to gbẹzan etọn mẹ. E dike gbigbọ wiwe ni yinuwado e ji, podọ eyin gbigbọ lọ deanana ẹn nado wà nude, e nọ kẹalọyi anademẹ etọn. (Malku 1:12, 13; Luku 4:14) Be hiẹ lọsu nọ wàmọ ya?
19. Etẹwẹ mí dona wà na gbigbọ wiwe nido nọ deanana mí to gbẹzan mítọn mẹ?
19 Huhlọn-yido-wazọ́n Jiwheyẹwhe tọn gbẹ́ nọ yinuwado mẹhe tindo ayiha po ahun ojlonọ lẹ po ji nado whàn yé bo deanana yé. Nawẹ hiẹ sọgan dike ni yinuwado jiwe bo deanana we do ali jijlọ ji gbọn? Nọ hodẹ̀ magbọjẹ hlan Jehovah dọ ni na we gbigbọ etọn bosọ gọalọna we nado joawuna nuyiwadomẹji etọn. (Hia Efesunu lẹ 3:14-16.) Nọ yinuwa to kọndopọ mẹ hẹ odẹ̀ towe lẹ gbọn ayinamẹ dindin sọn Ohó Jiwheyẹwhe tọn, yèdọ Biblu he yin kinkan to anademẹ gbigbọ wiwe tọn glọ mẹ dali. (2 Tim. 3:16, 17) Nọ setonuna anademẹ nuyọnẹn tọn etọn lẹ bosọ nọ kẹalọyi anademẹ gbigbọ wiwe tọn po jejejininọ po. Do yise hia to nugopipe Jehovah tọn mẹ dọ ewọ sọgan deanana we ganji to aihọn ylankan ehe mẹ.
[Nudọnamẹ odò tọn]
a Na nudọnamẹ dogọ do adà etọn dopodopo ji, pọ́n w07 15/7 24-25; w03 15/1 11; w02 15/1 17; w95 1/2 14; w01 1/11 14-15; w03 1/7 6; w01 1/1 22; w03 1/4 15, 19-20; po w03 15/10 14 po.
Be A Mọ Nuagokun lọ lẹ Ya?
• Nawẹ gbigbọ wiwe sọgan yinuwado gbẹzan mítọn ji gbọn?
• Whẹwhinwhẹ́n ẹnẹ tẹlẹ wutu wẹ mí dona tindo ojlo dọ gbigbọ Jiwheyẹwhe tọn ni deanana mí?
• Etẹwẹ mí sọgan wà nado mọ ale gigọ́ yí sọn anademẹ gbigbọ wiwe tọn mẹ?
[Kanbiọ Oplọn tọn lẹ]
[Yẹdide to weda 15]
Gbigbọ Jiwheyẹwhe tọn whàn Jesu to whenue e tin to aigba ji
[Yẹdide to weda 17]
Gbigbọ Jiwheyẹwhe tọn nọ yinuwado ayiha po ahun gbẹtọ lẹ tọn po ji nado whàn yé bo deanana yé
