María Isabel yin wẹnlatọ zohunhunnọ he yin jọja de to tòdaho San Bernardo tọn mẹ to otò Chili tọn mẹ to Amérique du Sud. Ewọ po whẹndo etọn po wá sọn akọ̀ Mapuche tọn mẹ. Whẹndo lọ blebu yí zohunhun do nọgodona vivẹnu he to yinyin dido nado do agun yọyọ de ai to Mapuche-gbè mẹ, ehe sọ nọ yin yiylọdọ Mapudungun.

To whenue e yin lilá dọ Oflin okú Klisti tọn na yin bibasi to agun Mapudungun tọn mẹ ga bọ oylọ-basinamẹwe Oflin tọn 2 000 ko yin zinzinjẹgbonu to ogbè enẹ mẹ bo na yin mimá, enẹ hẹn María Isabel lẹnnupọn. Etẹwẹ ewọ sọgan wà nado gọalọ? E flin numimọ Kunnudetọ jọja devo lẹ he tindo kọdetọn dagbe to whenue yé to yẹwhehodọ na klasigbẹ́ po mẹplọntọ yetọn lẹ po tọn. E dọho hẹ mẹjitọ etọn lẹ gandego, bọ to pọmẹ yé basi dide dọ María Isabel na tẹnpọn nado lẹnnupọndo aliho de ji nado má oylọ-basinamẹwe lọ lẹ to wehọmẹ. Aliho tẹ ji wẹ ewọ lẹnnupọndo?

Tintan whẹ́, María Isabel biọgbè ogán wehọmẹ lọ tọn lẹ nado tlẹ́ oylọ-basinamẹwe dopo do họngbo daho wehọmẹ lọ tọn ji. Yé kẹalọyi obiọ etọn bo pà ẹ na afọdide he e ze lọ. Ogán wehọmẹ lọ tọn tlẹ yí zomọ gbèzeyiaga tọn do basi nulila de gando oylọ-basinamẹwe lọ go to afọnnu gbèdopo he yè to yinkọ wehọmẹvi lẹ tọn ylọ!

Enẹgodo, María Isabel biọgbè nado gbọn klasi lẹpo. Eyin mẹplọntọ lẹ na ẹn gbè, e nọ kanse mẹhe tin to klasi dopodopo lẹ eyin depope to yé mẹ wá sọn akọ̀ Mapuche tọn mẹ. E dọmọ: “N’lẹndọ wehọmẹvi he wá sọn akọ̀ Mapuche tọn mẹ 10 kavi 15 de poun wẹ na tin to wehọ lọ blebu mẹ, ṣigba yé sù taun—bọ n’má oylọ-basinamẹwe 150!”

Nawe de he mọ oylọ-basinamẹwe lọ to họngbo daho wehọmẹ lọ tọn ji kanse dọ mẹnu wẹ emi sọgan dọho hẹ gando nujijọ lọ go. E paṣa nawe lọ taun to whenue ewọ yin anadena yì viyọnnu owhe 10 mẹvi de dè! María Isabel dọ po ayajẹ po dọmọ: “E lẹndọ mẹho de wẹ yin mẹlọ.” To whenue María Isabel ko yí oylọ-basinamẹwe de na nawe lọ bo basi zẹẹmẹ kleun de do e ji godo, e yí adlẹsi nawe lọ tọn, na ewọ po mẹjitọ etọn lẹ po nido sọgan dla ẹ pọ́n bo dọhodo Ahọluduta Jiwheyẹwhe tọn ji na ẹn dogọ. Lehe homẹ wẹnlatọ 20 he to sinsẹ̀n to aigba-denamẹ ogbè Mapudungun tọn ji lẹ tọn hùn do sọ nado mọdọ nawe lọ po jlodotọ 26 devo lẹ po sọn akọ̀ Mapuche tọn mẹ lẹ wá Oflin lọ tẹnmẹ. Todin, kándo enẹ ko lẹzun agun de he to jideji tindo!

Mahopọnna owhe he a tindo, be a sọgan ze afọdide mọnkọtọn nado basi oylọna wehọmẹvigbẹ́ kavi azọ́nwatọgbẹ́ towe lẹ nado wá Oflin, plidopọ agbegbe tọn, kavi togunmẹho de tẹnmẹ ya? Naegbọn hiẹ ma na basi dodinnanu to owe mítọn lẹ mẹ nado hia numimọ mẹdevo lẹ tọn he sọgan gọalọna we nado wàmọ po kọdetọn dagbe po? Humọ, biọ Jehovah to odẹ̀ mẹ dọ gbigbọ wiwe etọn ni gọalọna we nado tindo adọgbigbo nado dọho gando ewọ go. (Luku 11:13) Eyin a wàmọ, kọdetọn he vivẹnudido towe na hẹnwa lẹ na hẹn homẹ towe hùn bo na we tuli.