Ma Hẹn Todido Bu Gbede Blo!
Ma Hẹn Todido Bu Gbede Blo!
Be sọn owhe susu die wẹ hiẹ ko yin Kunnudetọ Jehovah tọn de bo to jijlo dọ alọwlemẹ towe ni wá kọnawudopọ hẹ we to sinsẹ̀n-bibasi Jehovah tọn mẹ ya?
Kavi be hiẹ ko gbọjọ na plọnmẹ Biblu towe de he do ojlo hia taun to tintan whenu masọ wá kẹalọyi nugbo lọ wutu wẹ ya?
Numimọ delẹ sọn Grande-Bretagne na gọalọna we nado mọ nuhewutu hiẹ ma dona hẹn todido bu gbede. Hiẹ nasọ mọ nuhe hiẹ sọgan wà nado “vúnvún núdùdù towe do osin nukunta,” enẹ wẹ ma nado gbọjọ bo gbọnmọ dali gọalọna mẹhe ma ko kẹalọyi nugbo lọ lẹ.—Yẹwh. 11:1.
LINSINSINYẸN YIN ONÚ TITENGBE DE
Onú titengbe de he sọgan gọalọna we wẹ nado sinyẹnlin. A dona hẹn nugbo lọ go gligli bosọ tẹdo Jehovah go. (Deut. 10:20) Nuhe Georgina wà niyẹn. To whenue e jẹ Biblu plọn hẹ Kunnudetọ Jehovah tọn lẹ ji to 1970, asu etọn Kyriacos gblehomẹ taun. E tẹnpọn nado doalọtena oplọn lọ, bo ma nọ dike Kunnudetọ lẹ ni wá owhé etọn gbè bosọ nọ ze owe Kunnudetọ Jehovah tọn lẹ tọn depope he e mọ dlan.
Homẹgble Kyriacos tọn tlẹ sọ wá sinyẹn dogọ to whenue Georgina jẹ opli agun tọn lẹ yì ji. To gbèdopo, e yì Plitẹnhọ Ahọluduta tọn lọ mẹ nado dú zingidi. To whenue mẹmẹyọnnu de doayi e go dọ Kyriacos nọ do Glẹkigbe hugan Glẹnsigbe, e ylọ mẹmẹsunnu Grèce-nu de sọn agun devo mẹ nado wá gọalọ. Homẹdagbe he mẹmẹsunnu lọ dohia zọ́n bọ Kyriacos gọ̀ biọ ede mẹ, podọ yé tlẹ plọn Biblu dopọ na osun delẹ. Ṣigba to godo mẹ, Kyriacos doalọtena oplọn lọ.
Na owhe atọ̀n dogọ, Georgina sọ pehẹ nukundiọsọmẹ. Kyriacos sìn-adán na ẹn dọ emi na gbẹ́ ẹ eyin e yí baptẹm. To azán he gbè Georgina na yí baptẹm, ewọ hodẹ̀ vẹkuvẹku hlan Jehovah dọ Kyriacos ni ma gbẹ́ emi blo. To whenue Kunnudetọ lẹ wá nado ze Georgina yì plidopọ lọ, Kyriacos dọna yé dọmọ: “Mì to yìyì. Mí na ze ohún mítọn bo hodo mì.” E todoaina adà afọnnu tọn lọ bo mọ whenue asi etọn yí baptẹm.
Enẹgodo, nukundiọsọmẹ Kyriacos tọn depò, podọ vudevude e jẹ diọdo ayidego tọn lẹ basi ji. Georgina ko dukosọ hẹ Kunnudetọ lẹ e ko diblayi owhe 40 whẹpo asu etọn wá yí baptẹm. Etẹwẹ gọalọna Kyriacos? E dọmọ: “Homẹ ṣie hùn taun nado mọ obá he mẹ Georgina magbe jẹ.” Georgina dọmọ: “Mahopọnna nukundiọsọmẹ asu ṣie tọn, n’magbe ma nado doalọtena Jiwheyẹwhe ṣie sinsẹ̀n. To ojlẹ enẹ lẹpo mẹ, n’nọ to dẹ̀ho hlan Jehovah, bo masọ hẹn todido bu.”
AWUWIWLENA GBẸTỌ-YINYIN YỌYỌ LỌ YIN NUJỌNU
Nado gọalọna alọwlemẹ towe, nudevo he hiẹ dona wà wẹ nado wleawuna jẹhẹnu Klistiani tọn lẹ. Apọsteli Pita dotuhomẹna asi Klistiani lẹ dọmọ: “[Mì] nọ yin mẹmẹglọ hlan asu mìtọn titi lẹ, gbọnmọ dali, eyin mẹde ma setonuna ohó lọ, yé sọgan yin dindọn gbọn walọyizan asi yetọn lẹ tọn dali matin ohó depope didọ.” (1 Pita 3:1) Christine setonuna ayinamẹ enẹ dile etlẹ yindọ owhe susu godo wẹ asu etọn wá kẹalọyi nugbo lọ. To whenue Christine lẹzun Kunnudetọ to owhe 20 linlán die, asu etọn John ma tindo yise depope to Jiwheyẹwhe mẹ. John ma tindo ojlo depope to sinsẹ̀n mẹ, etomọṣo, e doayi lehe nuyise yọyọ Christine tọn lẹ yin nujọnu na ẹn do go. John dọmọ: “N’mọdọ nuyise etọn lẹ hẹn ayajẹ wá na ẹn. E wleawuna jẹhẹnu po nugopipe vonọtaun delẹ po, podọ enẹ gọalọna mi to ninọmẹ sinsinyẹn susu mẹ.”
Christine ma hẹn asu etọn gánnugánnu nado kẹalọyi nuyise etọn lẹ pọ́n gbede. Asu lọ dọmọ: “Sọn bẹjẹeji gbọ́n wẹ Christine ko mọnukunnujẹemẹ dọ nuyọnẹnnu wẹ e na yin ma nado nọ dọhona mi gando sinsẹ̀n etọn go, podọ e gbọn homẹfa dali jo mi do na yẹnlọsu ni wleawuna ojlo lọ na dee.” Eyin Christine mọ hosọ he John sọgan yiwanna lẹ, taidi dehe dọhodo lẹnunnuyọnẹn kavi nudida lẹ ji to Atọ̀họ̀-Nuhihọ́ lọ Tọn kavi Réveillez-vous! mẹ, e nọ yí yé na ẹn bo nọ dọmọ: “N’mọdọ a na duvivi etọn.”
To nukọn mẹ, John wá yí gbọjẹ whenu gaa tọn bo jẹ azọ́n kleun de wà ji, enẹ wẹ nado nọ penukundo vounvoun lẹ go. Na ayiha etọn vò todin nado lẹnnupọndo kanbiọ sisosiso gbẹ̀mẹ tọn lẹ ji wutu, e jẹ kinkanse ede ji dọ, ‘Be mí wá gbẹ̀mẹ gbọn kosọ dali wẹ ya, kavi mí yin didá na lẹndai de?’ To gbèdopo he John to hodọ hẹ mẹmẹsunnu de, mẹmẹsunnu lọ kanse e dọ, “Be e na jlo we nado plọn Biblu ya?” John dọmọ: “Na n’ko jẹ yise tindo to Jiwheyẹwhe mẹ ji wutu, n’kẹalọyi nuzedonukọnnamẹ etọn.”
Lehe e yin nujọnu do sọ dọ Christine ma hẹn todido bu! John wá yí baptẹm to whenue asi etọn ko yí owhe 20 do hodẹ̀ do ota etọn mẹ godo. Todin, yé to Jehovah sẹ̀n to pọmẹ po zohunhun po. John dọmọ: “Onú titengbe awe wẹ whàn mi, enẹ wẹ homẹdagbe po họntọnjihẹmẹ Kunnudetọ lẹ tọn po. Humọ, eyin a tindo alọwlemẹ he yin Kunnudetọ de, alọwlemẹ nugbonọ, he go a sọgan dejido podọ he ma yin ṣejannabinọ wẹ a tindo.” Mọwẹ, Christine yí ayinamẹ he tin to 1 Pita 3:1 mẹ do yizan mẹ, podọ ayinamẹ lọ wazọ́n!
OKÚN DE SỌGAN WÁ DE SINSẸ́N TỌ́N TO OWHE LẸ GODO
Etẹwẹ lo, eyin plọnmẹ Biblu de tindo ojlo to bẹjẹeji, ṣigba bo wá doalọtena oplọn lọ to godo mẹ na whẹwhinwhẹ́n de kavi devo wutu? Ahọlu Sọlomọni wlan dọmọ: “Donú towe to afọnnu fuu, podọ to whèjai a hẹn alọ towe dote blo: na hiẹ ma yọ́n ehe na wà dagbe, ehe kavi dọ́n tọn, kavi eyin yé omẹ awe lẹ na yọ́n do zẹnzẹn.” (Yẹwh. 11:6) To whedelẹnu, e nọ biọ whenu susu whẹpo okún nugbo lọ tọn nido whẹ́n. Etomọṣo, e nọ wá họnwun na mẹdelẹ to nukọn mẹ dọ nujọnu wẹ e yin nado dọnsẹpọ Jiwheyẹwhe. (Jak. 4:8) Na nugbo tọn, okún de sọgan wá whẹ́n to whenue a ma donukun.
Lẹnnupọndo apajlẹ Alice he sẹtẹn sọn Inde yì Angleterre tọn ji. To 1974, mẹmẹyọnnu de jẹ Biblu plọn hẹ ẹ ji. Alice nọ do Hindi-gbè, ṣigba bo jlo na hẹn Glẹnsigbe etọn pọnte dogọ. Oplọn lọ zindonukọn na owhe delẹ, podọ Alice tlẹ yì opli lẹ na ojlẹ de to agun Glẹnsigbe tọn de mẹ. E yọnẹn dọ nugbo lọ plọn wẹ emi te, ṣigba e ma ylọ nuhe plọn e te lẹ dọ nujọnu. Gbọnvona enẹ, e yiwanna akuẹ po agọ́dudu po zẹjlẹgo. To godo mẹ, Alice wá jo nupinplọn lọ do.
To nudi owhe 30 godo, Stella he deanana oplọn Alice tọn wá mọ wekanhlanmẹ de yí sọn e dè. Nuhe wekanhlanmẹ lọ dọ die: “N’yọnẹn dọ homẹhunnu de wẹ e na yin na we nado sè dọ mẹhe a deanana oplọn etọn to 1974 ko yí baptẹm to plidopọ agbegbe tọn he wayi lọ ji. A ko yí adà titengbe de wà to gbẹzan ṣie mẹ. A do okún nugbo lọ tọn do ahun ṣie mẹ, podọ dile etlẹ yindọ n’ma ko wleawufo to whelọnu nado klan gbẹzan ṣie do wiwe na Jiwheyẹwhe, okún nugbo lọ tọn enẹ gbẹ́ gbọṣi ayiha po ahun ṣie po mẹ.”
Etẹwẹ jọ? Alice basi zẹẹmẹ dọ emi wá jẹflumẹ sinsinyẹn to okú asu emitọn tọn godo to 1997. E hodẹ̀ hlan Jiwheyẹwhe podọ to nukunwhiwhe ao gblamẹ, Kunnudetọ awe he nọ do Punjabi-gbè wá owhé etọn gbè bo ze alọnuwe pẹvi lọ Todido Tẹwẹ Tin na Mẹyiwanna He Kú Lẹ? donukọnna ẹn. Alice mọdọ Jiwheyẹwhe na gblọndo na odẹ̀ emitọn, podọ e basi dide dọ emi dona kọnawudopọ hẹ Kunnudetọ Jehovah tọn lẹ. Ṣigba, fie wẹ e sọgan mọ yé te? E wá mọ owe kandai tọn etọn hoho de he mẹ adlẹsi agun Punjabi tọn he Stella ko na ẹn tin te. Alice yì Plitẹnhọ Ahọluduta tọn lọ mẹ bọ mẹmẹsunnu po mẹmẹyọnnu he nọ do Punjabi-gbè lẹ po dokuavọ zohunhun tọn na ẹn. Alice dọmọ: “Owanyi he yé dohia mi lọ yinuwado ji e taun bosọ gọalọna mi nado mọ kọgbọ sọn flumẹjijẹ sinsinyẹn ṣie mẹ.”
E jẹ opli lẹ yì ji to gbesisọ mẹ, bo gọ̀ Biblu pinplọn etọn bẹ, podọ e sọ plọn nado nọ do Punjabi-gbè bosọ nọ hia ẹ ganji. E yí baptẹm to 2003. E dotana wekanhlanmẹ he e dohlan Stella dole: “A wanu taun na okún nugbo lọ tọn enẹlẹ he a do to owhe 29 die wayi, podọ na apajlẹ dagbe he a zedai na mi.”
Etẹwẹ a sọgan plọn sọn numimọ ehelẹ mẹ? Eyin mẹde jlo na yọ́n Jiwheyẹwhe, bo yin ahundoponọ bosọ tindo whiwhẹ, Jehovah na gọalọ bọ okún nugbo lọ tọn na whẹ́n to ahun mẹlọ tọn mẹ eyin etlẹ yí whenu susu hugan lehe a lẹn do. Flindọ Jesu dọ to oló etọn mẹ dọmọ: “Okún lọ tọ́nkun bo whẹ́n yiaga, ṣigba e ma yọ́n lehe enẹ jọ gbọn. Aigba lọ na ede nọ de sinsẹ́n tọ́n vudevude, tintan amà, enẹgodo sinsẹ́n, to godo mẹ, sinsẹ́n lọ nọ whẹ́n pete.” (Malku 4:27, 28) Whinwhẹ́n mọnkọtọn nọ wá aimẹ vudevude podọ “na ede.” Na nugbo tọn, wẹnlatọ Ahọluduta lọ tọn depope ma sọgan dọ lehe whinwhẹ́n enẹ nọ wá aimẹ do. Enẹwutu, zindonukọn nado to okún nugbo lọ tọn lẹ vúnvún pé. Hiẹ sọgan wá gbẹ̀n susugege.
Humọ, ma wọnji nujọnu-yinyin odẹ̀ tọn go blo. Georgina po Christine po ma doalọtena dẹ̀hiho hlan Jehovah gbede. Eyin hiẹ “sinyẹnlin to odẹ̀ mẹ” bo ma hẹn todido bu gbede, e yọnbasi dọ hiẹ na wá mọ “núdùdù” he hiẹ vúnvún do osin nukunta lọ “to azán susu godo.”—Lom. 12:12; Yẹwh. 11:1.
[Yẹdide to weda 30]
Georgina ko dukosọ hẹ Kunnudetọ lẹ e ko diblayi owhe 40 whẹpo asu etọn wá yí baptẹm
[Yẹdide to weda 30]
Nuhe wekanhlanmẹ he Alice dohlan Stella dọ die: “N’yọnẹn dọ homẹhunnu de wẹ e na yin na we nado sè dọ mẹhe a deanana oplọn etọn to 1974 ko yí baptẹm to plidopọ agbegbe tọn he wayi lọ ji”
[Nudọnamẹ tangan lẹ to weda 32]
“A wanu taun na okún nugbo lọ tọn enẹlẹ he a do to owhe 29 die wayi, podọ na apajlẹ dagbe he a zedai na mi.”—Alice
