‘Agbọ́ Ni Ma Pé We Blo’
‘Agbọ́ Ni Ma Pé We Blo’
“Mì dike mí gbọjọ to nuhe yin dagbe wiwà mẹ blo.”—GAL. 6:9.
NAWẸ HIẸ NA NA GBLỌNDO GBỌN?
Awuwledainanu tẹlẹ wẹ nọ gọalọna mí nado hẹn zohunhun mítọn go to nugbo lọ mẹ?
Etẹwẹ nulinlẹnpọn do whẹwhinwhẹ́n titengbe he wutu mí nọ yì opli lẹ ji na whàn mí nado nọ wà?
Eyin mí na doakọnnanu to sinsẹ̀nzọn lọ mẹ bọ agbọ́ ma na pé mí, etẹwẹ mí dona nọ dovivẹnu nado wà?
1, 2. Nawẹ nulinlẹnpọn do titobasinanu Jehovah tọn blebu ji nọ yidogọna jidide mítọn gbọn?
ONÚ jiawu de wẹ e yin nado yọnẹn dọ mí yin apadewhe titobasinanu daho de tọn. Numimọ he yin kinkandai to Ezekiẹli weta 1 po Daniẹli weta 7 po mẹ tá hinhọ́n do lehe Jehovah to nuyiwa nado hẹn lẹndai etọn di do ji. Jesu to anadena nulẹ, na adà aigba ji tọn titobasinanu Jehovah tọn nido na ayidonugo mlẹnmlẹn azọ́n yẹwhehodidọ wẹndagbe lọ tọn, penukundo mẹhe to azọ́n lọ wà lẹ go to gbigbọ-liho bosọ hẹn sinsẹ̀n-bibasi nugbo Jehovah tọn gbayipe. Ehe lẹpo nọ whàn mí nado deji do titobasinanu Jehovah tọn go.—Mat. 24:45.
2 Be hiẹ to zọnlinzin afọsu-afọsi hẹ titobasinanu jiawu ehe ya? Be zohunhun he a tindo na nugbo lọ fọ́n bo to jijideji ya kavi e to didepo? Eyin a gbadopọnna kanbiọ enẹlẹ, hiẹ sọgan doayi e go dọ agbọ́ ko jẹ pipé we ji kavi dọ zohunhun towe ko depò. Enẹ sọgan jọ. Apọsteli Paulu do dotuhomẹna Klistiani hatọ lẹ to owhe kanweko tintan whenu nado nọ lẹnnupọndo apajlẹ zohunhun tọn he Jesu zedai ji. Paulu dọ dọ mọwiwà na gọalọna yé na “onú nikaa ṣikọna [yé] bọ agbọ́ na pé alindọn [yetọn].” (Heb. 12:3) Mọdopolọ, mí ko yí sọwhiwhe do gbadopọnna hosọ he wayi, ehe do nuhe titobasinanu Jehovah tọn to wiwadotana lẹ hia, podọ ehe dona ko whàn mí nado hẹn zohunhun mítọn go bo nọ doakọnnanu.
3. Etẹwẹ mí dona nọ wà na agbọ́ nikaa pé mí, podọ etẹwẹ mí na gbadopọnna to hosọ ehe mẹ?
3 Etomọṣo, Paulu dohia dọ eyin agbọ́ ma na pé mí, nudevo lẹ tin he mí dona wà. Ewọ dọ dọ mí dona nọ wà “nuhe yin dagbe.” (Gal. 6:9) Enẹwutu, mí dona yí adà mítọn wà. Mì gbọ mí ni gbadopọnna aliho nuyiwa tọn voovo atọ́n he sọgan gọalọna mí nado nọtegligli bo to zọnlinzin afọsu-afọsi hẹ titobasinanu Jehovah tọn. Enẹgodo, dopodopo mítọn na gbadopọnna ede kavi whẹndo etọn nado yọ́n ẹn eyin vlavo nuhudo tin nado basi vọjlado to adà delẹ mẹ dogọ.
MÍ NỌ PLI NADO NA TULI ODE AWETỌ PODỌ NADO SẸ̀N JEHOVAH
4. Naegbọn mí sọgan dọ dọ opli lẹ yin adà titengbe sinsẹ̀n-bibasi nugbo tọn?
4 Opli lẹ nọ saba yin adà titengbe sinsẹ̀n-bibasi tọn na devizọnwatọ Jehovah tọn lẹ. To olọn mẹ, nudida gbigbọnọ lẹ nọ yin oylọ-basina nado nọ pli to Jehovah nukọn to ojlẹ tangan delẹ mẹ. (1 Ahọ. 22:19; Job 1:6; 2:1; Dan. 7:10) To hohowhenu, akọta Islaeli tọn dona nọ pli “na yé nido sè, podọ na yé nido plọnnu.” (Deut. 31:10-12) To owhe kanweko tintan whenu, Ju lẹ tindo aṣa lọ nado nọ yì sinagọgu lẹ mẹ nado hia Owe-wiwe lẹ. (Luku 4:16; Owalọ 15:21) To whenue agun Klistiani tọn yin didoai, opli lẹ gbẹ́ nọ yin bibasi, podọ yé gbẹ́ sọ yin nujọnu taun to sinsẹ̀n-bibasi mítọn mẹ to egbehe. Klistiani nugbo lẹ “nọ lẹn ode awetọ tọn pọ́n nado nọ whàn [yedelẹ] hlan owanyi po azọ́n dagbe lẹ po kọ̀n.” Mí tindo nuhudo lọ nado zindonukọn bo “nọ na tuli ode awetọ, podọ humọ dile [mí] mọdọ azán [Jehovah tọn] to dindọnsẹpọ.”—Heb. 10:24, 25.
5. Nawẹ mí sọgan nọ na tuli ode awetọ to opli lẹ ji gbọn?
5 Aliho titengbe dopo nado nọ na tuli ode awetọ wẹ nado nọ tindo mahẹ to opli mítọn lẹ mẹ. Mí sọgan do yise mítọn hia, eyin mí nọ na gblọndo kanbiọ lẹ tọn, nọ basi zẹẹmẹ do wefọ de ji, nọ dọ numimọ kleun de he dohia dọ nuyọnẹnnu wẹ e yin nado nọ hodo nunọwhinnusẹ́n Biblu tọn lẹ kavi wàmọ to aliho devo lẹ mẹ. (Ps. 22:22; 40:9) Na nugbo tọn, mahopọnna whenue gbọ́n mí ko to opli lẹ yì, tulinamẹnu wẹ e gbẹ́ nọ yin nado dotoaina gblọndo mẹmẹsunnu po mẹmẹyọnnu mítọn lẹ po tọn—yèdọ mẹho po jọja po.
6. Nawẹ opli lẹ nọ gọalọna mí nado hẹn zohunhun mítọn go to gbigbọ-liho gbọn?
6 Whẹwhinwhẹ́n devo tẹlẹ wutu wẹ Jiwheyẹwhe mítọn do nọ pọ́n opli lẹ yìyì to gbesisọ mẹ taidi nujọnu? Opli po plidopọ mítọn lẹ po nọ gọalọna mí nado yí adọgbigbo do dọho podọ nado pehẹ nukundiọsọmẹ kavi ojlo matindo to aigba-denamẹ mítọn lẹ ji. (Owalọ 4:23, 31) Hodọdopọ he sinai do Owe-wiwe ji lẹ nọ na mí huhlọn bo nọ hẹn mí lodo to yise mẹ. (Owalọ 15:32; Lom. 1:11, 12) Nuplọnmẹ po tuli he mí nọ mọyi sọn ode awetọ dè to opli sinsẹ̀n-bibasi tọn mítọn lẹ ji po nọ gọalọna mí nado duvivi ayajẹ nujọnu tọn bo nọ na ‘mí gbọjẹ sọn azán mẹglatọ tọn lẹ mẹ.’ (Ps. 94:12, 13) Wedegbẹ́ Mẹpinplọn tọn he Hagbẹ Anademẹtọ lọ zedai wẹ nọ wleawuna tito-to-whinnu gbigbọmẹ tọn lẹpo he omẹ Jehovah tọn lẹ nọ yizan lẹdo aihọn pé nado plọnnu. Lehe mí dopẹ́ dọ mí nọ duvivi nuplọnmẹ dagbe lẹ tọn to opli lẹ ji to osẹ lẹpo mẹ do sọ!
7, 8. (a) Etẹwẹ yin lẹndai tintan opli mítọn lẹ tọn? (b) Nawẹ opli lẹ nọ gọalọna we to gbigbọ-liho gbọn?
7 Ṣigba, nudevo tlẹ sọ yin nujọnu hugan ale mẹdetiti tọn he mí nọ mọyi sọn opli mítọn lẹ mẹ. Lẹndai tintan he wutu mí nọ pli wẹ nado basi sinsẹ̀n hlan Jehovah. (Hia Psalm 95:6.) Lẹblanulọkẹyi nankọ die mí tindo nado nọ pà Jiwheyẹwhe jiawu mítọn! (Kọl. 3:16) Jehovah jẹna sinsẹ̀n-bibasi gbesisọ tọn he mí nọ basi gbọn opli yẹwhehọluduta tọn lẹ yìyì po mahẹ tintindo to yé mẹ po dali. (Osọ. 4:11) Abajọ mí yin tudohomẹna ‘ma nado nọ gbẹkọ pipli dopọ mítọn lẹ go, dile mẹdelẹ tindo aṣa lọ do.’—Heb. 10:25.
8 Be mí nọ mọdọ opli Klistiani tọn mítọn lẹ yin awuwledainanu de he na gọalọna mí nado doakọnnanu kakajẹ whenue Jehovah na yinuwa sọta aihọn ylankan ehe ya? Eyin mọwẹ, be opli lẹ tin to “nujọnu hugan lẹ” he mí na dín whenu na to aihọn he mẹ alọnu mítọn nọ ján taun te ehe mẹ. (Flp. 1:10) Enẹwutu, mí ma dona dike nudepope ni hò dotẹnmẹ hundote he mí tindo nado nọ sẹ̀n Jehovah to pọmẹ hẹ mẹmẹsunnu mítọn lẹ yí sọn mí si, adavo mí tindo whẹwhinwhẹ́n titengbe de nado wàmọ.
NỌ DÍN AHUNJIJLỌNỌ LẸ MỌ
9. Nawẹ mí wagbọn do yọnẹn dọ azọ́n yẹwhehodidọ tọn lọ yin nujọnu?
9 Nudevo he nọ gọalọna mí nado to zọnlinzin afọsu-afọsi hẹ titobasinanu Jehovah tọn wẹ mahẹ gigọ́ tintindo to azọ́n yẹwhehodidọ tọn mẹ. Jesu wẹ bẹ azọ́n ehe jẹeji to whenue e tin to aigba ji. (Mat. 28:19, 20) Sọn whenẹnu gbọ́n wẹ titobasinanu Jehovah tọn blebu ko na ayidonugo azọ́n yẹwhehodidọ Ahọluduta lọ tọn po mẹhẹnzun devi tọn po. Numimọ egbezangbe tọn susu dohia dọ angẹli lẹ to godonọna azọ́n mítọn bo nọ deanana mí yì mẹhe “jẹna ogbẹ̀ madopodo lẹ” dè. (Owalọ 13:48; Osọ. 14:6, 7) Adà aigba ji tọn titobasinanu Jehovah tọn to nuyiwa to egbehe bo yin tito-basina nado nọgodona azọ́n titengbe ehe. Be lizọnyizọn lọ tin to otẹn tintan mẹ to gbẹzan mítọn mẹ ya?
10. (a) Na apajlẹ he do lehe mí sọgan hẹn zohunhun mítọn na nugbo lọ go do hia. (b) Nawẹ lizọnyizọn lọ ko gọalọna we ma nado gbọjọ gbọn?
10 Zohunhunnọ-yinyin to lizọnyizọn lọ mẹ nọ gọalọna mí nado hẹn zohunhun mítọn go to nugbo lọ mẹ. Lẹnnupọndo nuhe Mitchel he yin mẹho agun tọn podọ gbehosọnalitọ whepoponu tọn sọn ojlẹ dindẹn die dọ ji. E dọmọ: “N’yiwanna hodidọ na mẹdevo lẹ gando nugbo lọ go. Eyin n’lẹnnupọndo hosọ yọyọ he nọ tọ́n to Atọ̀họ̀-Nuhihọ́ lọ Tọn po Réveillez-vous! po mẹ lẹ ji, nuyọnẹn, nukunnumọjẹnumẹ po lẹnpọn dagbe he nudọnamẹ lọ lẹ nọ dohia po nọ hẹn awú ji mi taun. N’nọ jlo nado tọ́n na lizọnyizọn lọ bo pọ́n lehe gbẹtọ lẹ na yinuwa do kavi lehe n’sọgan fọnjlodotena yé do. Lizọnyizọn lọ gọalọna mi nado nọtegligli. N’ma nọ dike na nudevo depope ni hò whenu he n’de dovo na lizọnyizọn lọ yí sọn asi e. N’nọ tẹnpọn nado wà onú enẹlẹ jẹnukọn kavi to lizọnyizọn lọ godo.” Mọdopolọ, eyin mí hẹn alọnu mítọn ján to sinsẹ̀nzọn wiwe lọ mẹ, enẹ na gọalọna mí nado nọtegligli to azán godo tọn ehelẹ mẹ.—Hia 1 Kọlintinu lẹ 15:58.
NỌ DÙ NÚDÙDÙ GBIGBỌMẸ TỌN LẸ
11. Naegbọn mí dona nọ dù núdùdù gbigbọmẹ tọn he mí nọ mọyi sọn Jehovah dè lẹpo?
11 Jehovah ko wleawuna núdùdù gbigbọmẹ tọn susugege do zinjẹgbonu mítọn lẹ mẹ nado na mí huhlọn. Matin ayihaawe, hiẹ sọgan ko flin whenue a hia owe mítọn de bo tindo numọtolanmẹ lọ dọ, ‘Nuhe n’tindo nuhudo etọn pẹpẹ die! E taidi dọ yẹn wẹ Jehovah dọ dọ yé ni kàn ẹn hlan!’ Enẹ ma yin kosọ de poun gba. Awuwledainanu enẹlẹ wẹ Jehovah nọ yizan nado plọn mí bosọ nọ deanana mí. Ewọ ko dọmọ: “Yẹn na plọn we, yẹn nasọ yí afọ towe do ali he ji hiẹ na gbọn.” (Ps. 32:8) Be mí nọ dovivẹnu nado dù núdùdù gbigbọmẹ tọn he mí nọ mọyi lẹpo bo nọ lẹnayihamẹpọn deji ya? Mọwiwà na gọalọna mí nado to sinsẹ́n detọ́n bo ma na gbọjọ to gbigbọ-liho to azán godo tọn he vẹawu ehelẹ mẹ.—Hia Psalm 1:1-3; 35:28; 119:97.
12. Etẹwẹ sọgan gọalọna mí nado nọ yí nukun nujọnu tọn do pọ́n núdùdù gbigbọmẹ tọn mítọn lẹ?
12 Onú dagbe wẹ e yin dọ mí ni nọ lẹnnupọndo azọ́n he nọ yin wiwà nado hẹn ẹn diun dọ mí tindo núdùdù dojó gbigbọmẹ tọn lẹ to gbesisọ mẹ ji. Whẹpo owe mítọn lẹ nọ yin zinzinjẹgbonu bo yin zizedo nọtẹn Intẹnẹt tọn mítọn ji, Wedegbẹ́ Wekinkan tọn he Hagbẹ Anademẹtọ lọ zedai nọ penukundo azọ́n nudọnamẹ lẹ dindin tọn, wekinkan tọn, dodindinna gbesisọ nukinkan lẹ tọn, po yẹdide he na sọawuhia to owe mítọn mẹ lẹ po tọn gọna lẹdogbedevomẹ yetọn bibasi go. Alahọ he nọ zín owe lẹ jẹgbonu lẹ nọ bẹ owe lọ lẹ hlan agun lẹ, vlavo yé to yakẹ kavi to fidindẹn. Naegbọn azọ́n ehe lẹpo nọ yin wiwà? Na omẹ Jehovah tọn lẹ nido nọ dùnú gọ́ho to gbigbọ-liho wutu wẹ. (Isa. 65:13) Enẹwutu, mì gbọ mí ni nọ yí sọwhiwhe do dù núdùdù gbigbọmẹ tọn he mí nọ mọyi gbọn titobasinanu Jehovah tọn gblamẹ lẹpo.—Ps. 119:27.
NỌ NỌGODONA TITO JEHOVAH TỌN LẸ
13, 14. Mẹnu lẹ wẹ nọ nọgodona tito Jehovah tọn lẹ to olọn mẹ, podọ nawẹ mí sọgan dohia dọ mí nọ nọgodona tito etọn lẹ to aigba ji gbọn?
13 To numimọ de mẹ, apọsteli Johanu mọ bọ Jesu to osọ́ wewe de kùn nado gbawhàn mẹhe ṣiatẹ sọta Jehovah lẹ tọn. (Osọ. 19:11-15) Na mí yọnẹn dọ angẹli nugbonọ lẹ po mẹyiamisisadode he ko gbawhàn to aigba ji bo mọ ahọsumẹ olọn mẹ tọn yetọn yí lẹ po to osọ́ kùn to godona Jesu wutu, yise mítọn nọ yin hinhẹn lodo. (Osọ. 2:26, 27) Lehe nuyiwa yetọn dohia dọ yé nọ nọgodona tito Jehovah tọn lẹ do sọ!
14 To aliho dopolọ mẹ, gbẹtọ susugege lọ nọ yí ahun lẹpo do nọgodona mẹmẹsunnu yiamisisadode Klisti tọn he gbẹ́ pò to aigba ji bo to anadenanu to titobasinanu lọ mẹ to egbehe lẹ. (Hia Zekalia 8:23.) Nawẹ dopodopo mítọn sọgan dohia dọ mí nọ nọgodona tito Jehovah tọn lẹ gbọn? Aliho dopo wẹ nado nọ litaina mẹhe to anadena mí lẹ. (Heb. 13:7, 17) Mí dona bẹ ehe jẹeji sọn agun mítọn lẹ mẹ. Be nuhe mí nọ dọ gando mẹho agun tọn lẹ go nọ do sisi hia yelọsu po azọngban nugopọntọ tọn yetọn po ya? Be mí nọ na tuli ovi mítọn lẹ nado nọ na sisi sunnu nugbonọ enẹlẹ, bo nọ dín ayinamẹ Owe-wiwe tọn lẹ sọn yé dè ya? Humọ, be whẹndo mítọn nọ dọhodopọ gando lehe mí sọgan nọgodona azọ́n lẹdo aihọn pé tọn lọ to akuẹzinzan-liho gbọn nunina bibasi dali go ya? (Howh. 3:9; 1 Kọl. 16:2; 2 Kọl. 8:12) Be mí nọ yí nukun nujọnu tọn do pọ́n lẹblanulọkẹyi he mí tindo nado nọ doalọ to Plitẹnhọ Ahọluduta tọn mítọn hinhẹn do wiwe ji mẹ ya? Gbigbọ Jehovah tọn nọ yinuwa po awuvivo po to fie sisi didohia po pọninọ mọnkọtọn po tin te. Podọ gbigbọ etọn nọ to alọgọna mí madoalọte to azán godo tọn ehelẹ mẹ, na mí nikaa gbọjọ.—Isa. 40:29-31.
MÍ DONA NỌGBẸ̀ SỌGBE HẸ OWẸ̀N HE MÍ NỌ LÁ
15. Naegbọn mí dona to avùnho to whelẹponu nado sọgan nọgbẹ̀ sọgbe hẹ lẹndai jiawu Jehovah tọn?
15 Onú godo tọn he na gọalọna mí nado nọ doakọnnanu bo zinzọnlin afọsu-afọsi hẹ titobasinanu Jehovah tọn wẹ yindọ, dopodopo mítọn dona nọ nọgbẹ̀ sọgbe hẹ owẹ̀n he mí nọ lá lọ. Mí na wà ehe eyin mí nọ “[dindona] nuhe Oklunọ kẹalọyi lẹ.” (Efe. 5:10, 11) Agbasa mape mítọn, vivẹnudido Satani tọn lẹ po aihọn ylankan ehe po zọ́n bọ mí nọ to ahidi hẹ nuyiwadomẹji ylankan lẹ to whelẹponu. Mẹmẹsunnu po mẹmẹyọnnu vivẹ́ lẹ po emi, delẹ to mì mẹ to avùn sinsinyẹn hò egbesọegbesọ nado hẹn haṣinṣan dagbe de go hẹ Jehovah. Ehe zọ́n bọ homẹ Jehovah tọn nọ hùn do mì go. Mì ma gbọjọ gbede blo! Gbẹninọ sọgbe hẹ lẹndai Jehovah tọn na hẹn pekọ daho wá na mí bo hẹn mí deji dọ sinsẹ̀n-bibasi mítọn ma yin to ovọ́ mẹ.—1 Kọl. 9:24-27.
16, 17. (a) Etẹwẹ mí dona wà eyin mí wà ylando sinsinyẹn de? (b) Nawẹ apajlẹ Anne tọn sọgan gọalọna mí gbọn?
16 Ṣigba, etẹwẹ mí dona wà eyin mí wà ylando sinsinyẹn de? Mí dona dín alọgọ to niyaniya mẹ! Ylando lọ zizewhla na hẹn onú lẹ ylan dogọ poun wẹ. Ma wọn ehe blo, Davidi dọ dọ to whenue emi tẹnpọn nado whlá ylando emitọn lẹ, ‘ohú emitọn dohó na hunwinwẹn to azán popo mẹ.’ (Ps. 32:3) Na nugbo tọn, ylando lẹ zizewhla na zọ́n bọ mí na gbọjọ to numọtolanmẹ-liho podọ to gbigbọ-liho, ṣigba “mẹdepope he yigbe bosọ jo [ylando etọn] dai na mọ lẹblanu.”—Howh. 28:13.
17 Lẹnnupọndo apajlẹ Anne a tọn ji. Anne ko yin gbehosọnalitọ whepoponu tọn whẹpo do tọ́n sọn owhe aflanmẹ tọn lẹ mẹ. Ṣigba, e wá jẹ gbẹzan awe zan ji. Ehe yinuwadeji taun. E dọmọ: “Ayihadawhẹnamẹnu ṣie hoapa. N’hẹn ayajẹ ṣie bu bo nọ tindo numọtolanmẹ apọṣimẹ tọn to whepoponu.” Etẹwẹ e wà to nukọn mẹ? E dọ dọ to gbèdopo, Jakọbu 5:14, 15 yin hodọdeji to opli ji. Anne wá mọdọ emi tindo nuhudo alọgọ tọn bo yì mọ mẹho lẹ. E wá dọ to godo mẹ dọ: “Wefọ enẹlẹ taidi amasin he Jehovah kandai na azọ̀nhẹngbọ gbigbọmẹ tọn. Amasin lọ nùnù ma bọawu, ṣigba e nọ hẹn azọ̀n gbọ. N’yí ayinamẹ he tin to wefọ enẹlẹ mẹ do yizan mẹ, podọ e wazọ́n.” Owhe delẹ ko juwayi todin, podọ Anne sọ jẹ Jehovah sẹ̀n ji po zohunhun po, bosọ tindo ayihadawhẹnamẹnu wiwe de.
18. Etẹwẹ dona yin gbemima mítọn?
18 Lẹblanulọkẹyi nankọ die mí tindo nado to gbẹnọ to azán godo tọn ehelẹ mẹ, podọ nado tin to titobasinanu jiawu Jehovah tọn mẹ! Mì gbọ mí ni magbe ma nado yí nukunpẹvi do pọ́n lẹblanulọkẹyi enẹ gbede. Kakatimọ, mí ni nọ wazọ́n dopọ taidi whẹndo de nado nọ yì opli agun tọn mítọn lẹpo, nado nọ yí sọwhiwhe do dín ahunjijlọnọ lẹ to aigba denamẹ mítọn ji, podọ nado nọ dù núdùdù gbigbọmẹ tọn he mí nọ mọyi to gbesisọ mẹ lẹ. Mì dike mí ni sọ nọ nọgodona mẹhe to anadenanu to ṣẹnṣẹn mítọn lẹ bo nọ nọgbẹ̀ sọgbe hẹ owẹ̀n he mí nọ lá. Eyin mí wàmọ, e ma yindọ mí na to zọnlinzin afọsu-afọsi hẹ titobasinanu Jehovah tọn kẹdẹ wẹ gba, ṣigba agbọ́ ma na pé mí to nuhe yin dagbe wiwà mẹ!
[Nudọnamẹ odò tọn]
a Yinkọ lọ ko yin didiọ.
[Kanbiọ Oplọn tọn lẹ]
[Apotin to weda 29]
MẸHE ADÀ AIGBA JI TỌN TITOBASINANU JEHOVAH TỌN BẸHẸN LẸ:
1. Hagbẹ Anademẹtọ lọ
2. Wedegbẹ́ Alahọ tọn lẹ
3. Nugopọntọ tomẹyitọ lẹ
4. Pipli mẹho agun tọn lẹ tọn
5. Agun lẹ
6. Wẹnlatọ dopodopo
[Yẹdide to weda 31]
Yí sọwhiwhe do gọalọna mẹdevo lẹ nado mọnukunnujẹemẹ dọ yelọsu sọgan yin apadewhe titobasinanu daho Jehovah tọn
