OTÀN GBẸZAN TỌN

 Tonusisena Jehovah Ko Hẹn Dona Susu Wá Na Mi

Dile e yin didọ gbọn Elisa Piccioli dali

Otọ́ ṣie dọmọ: “Nuplọnmẹ họakuẹ nankọ die mí plọn sọn Noa dè! Noa setonuna Jehovah bosọ yiwanna whẹndo etọn, podọ yemẹpo lùn Singigọ lọ tọ́n na whẹndo lọ blebu wẹ biọ aki lọ mẹ wutu.”

ENẸ wẹ yin dopo to nuhe n’flin gando otọ́ ṣie go lẹ mẹ, yèdọ dawe whiwhẹnọ podọ azọ́n sinsinyẹnwatọ de. Ewọ yiwanna whẹdida dodo taun, enẹwutu tlolo he e sè owẹ̀n Biblu tọn to 1953, e dọ́n ayidonugo etọn. Sọn whenẹnu, e wà nuhe go e pé lẹpo nado má nuhe e nọ plọn lẹ hẹ mí. Onọ̀ ṣie whleawu to tintan whenu nado jo aṣa Sinsẹ̀n Katoliki tọn etọn lẹ do. Ṣigba, dile ojlẹ to yìyì, ewọ lọsu jẹ nuplọnmẹ Biblu tọn lẹ yizan ji to gbẹzan etọn mẹ.

E ma nọ bọawuna mẹjitọ ṣie lẹ nado nọ plọnnu hẹ mí, na Mama ma yọ́n wehia sọmọ podọ Papa nọ wazọ́n sinsinyẹn na whenu dindẹn to ogle mẹ. To whedelẹnu, agbọ́ nọ pé e sọmọ bọ e nọ vẹawuna ẹn nado nọ nukle to oplọn lọ whenu. Ṣigba, vivẹnudido etọn lẹ ma yin to ovọ́ mẹ. Na yẹn wẹ yin ovi mẹho wutu, n’nọ gọalọ nado plọnnu hẹ nọviyọnnu ṣie po nọvisunnu ṣie awe lẹ po. Nuhe mí nọ plọn lẹ nọ bẹ nuhe Papa nọ saba dọ lẹ hẹn, enẹ wẹ owanyi he Noa tindo na whẹndo etọn po tonusise etọn na Jiwheyẹwhe po. Lehe n’yiwanna kandai Biblu tọn ehe do sọ! E ma dẹn bọ mímẹpo jẹ opli lẹ yì ji to Plitẹnhọ Ahọluduta tọn de mẹ to Roseto degli Abruzzi, yèdọ tòdaho de he to lẹdo huto Adriatique Italie tọn mẹ.

To whenue n’tindo owhe 11 to 1955, yẹn po onọ̀ ṣie po zingbejizọnlin gbọn lẹdo osó tọn lẹ mẹ yì whèyihọ-waji nado yì plidopọ agbegbe tọn mítọn tintan to Rome. Sọn whenẹnu, n’nọ pọ́n plidopọ ehelẹ hlan taidi dopo to nuwiwa vonọtaun lẹ mẹ to gbẹzan Klistiani tọn mẹ.

To owhe he bọdego mẹ, n’yí baptẹm, podọ to ojlẹ vude godo n’biọ sinsẹ̀nzọn whenu-gigọ́ tọn mẹ. To whenue n’tindo owhe 17, n’lẹzun gbehosọnalitọ titengbe to Latina to hùwaji Rome tọn he dẹn do owhé mítọn gbè na nudi kilomẹtlu 300. Tòdaho yọyọ de wẹ, enẹwutu mẹde ma nọ hanú dọ mẹdevo lẹ na lẹnnu agọ̀ gando emi go eyin emi dotoaina owẹ̀n he lá mí te. Yẹn po gbehosọnalitọ-gbẹ́ ṣie po nọ tin to jejeji nado má owe sinai do Biblu ji susu lẹ, ṣigba na n’gbẹ́ yin jọja wutu, ajlù whégbè tọn nọ wle mi. Etomọṣo, n’jlo na setonuna anademẹ he n’ko mọyi lẹ.

To 1963, n’yin azọ́ndena nado yì Milan bo gọalọ nado wleawuna Plidopọ Akọjọpli tọn he hosọ etọn yin “Wẹndagbe Madopodo.” To plidopọ lọ whenu, n’wazọ́n taidi mẹdezejotọ to pọmẹ hẹ mẹsusu devo lẹ, gọna Paolo Piccioli, yèdọ mẹmẹsunnu jọja de he wá sọn Florence. To azán awetọ plidopọ lọ tọn, ewọ  na hodidọ he whànmẹ de do tlẹnmẹninọ ji. N’flindọ, n’lẹn to whelọnu dọ, ‘Mẹmẹsunnu ehe ma sọgan wlealọ gbede.’ Etomọṣo, mí jẹ wekanhlan ode awetọ ji, podọ e wá họnwun dọ mí omẹ awe lẹ tindo nususu to kọndopọ mẹ, enẹ wẹ yanwle mítọn lẹ, owanyi mítọn na Jehovah podọ ojlo sinsinyẹn mítọn nado setonuna ẹn. Yẹn po Paolo po wlealọ to 1965.

HOYIJLẸDOHOGO HẸ SINSẸ̀NGÁN LẸ DO BIBLU JI

N’sẹ̀n taidi gbehosọnalitọ whepoponu tọn na owhe ao to Florence. Ayajẹnu wẹ e yin nado mọ jideji he wá aimẹ to agun lẹ mẹ, titengbe nado mọ lehe jọja lẹ to nukọnyi to gbigbọ-liho do. Yẹn po Paolo po nọ yí whenu zan nado dọhodopọ hẹ jọja lẹ do gbigbọnu lẹ ji podọ nado deayidai hẹ yé; Paolo nọ hò bọlu hẹ yé podọ mí nọ duvivi ojlẹ enẹlẹ tọn taun. Na nugbo tọn, n’nọ jlo dọ asu ṣie ni yí whenu zan dopọ hẹ mi, ṣigba n’nọ mọdọ jọja enẹlẹ po whẹndo he to agun lọ mẹ lẹ po tindo nuhudo whenu po ayidonugo etọn po tọn bosọ nọ mọaleyi sọn e mẹ.

Homẹ ṣie nọ hùn eyin n’flin plọnmẹ Biblu susu he mí nọ deanana to whenẹnu lẹ. Dopo to yé mẹ wẹ Adriana, mẹhe dọho hẹ whẹndo awe devo lẹ do nuhe e to pinplọn lẹ ji. Yé basi tito hẹ yẹwhenọ de nado dọhodopọ do sinsẹ̀n-nuplọnmẹ delẹ ji taidi Atọ̀n-to-Dopomẹ po jọmaku alindọn tọn po. Yẹwhenọ atọ̀n wẹ wá hodọdopọ lọ tẹnmẹ. Aliho he mẹ yé basi zẹẹmẹ nuplọnmẹ lọ lẹ tọn te ma họnwun paali, bọ plọnmẹ Biblu mítọn lẹ yawu mọnukunnujẹemẹ dọ nuplọnmẹ yetọn lẹ ma sọgbe hẹ nuhe Biblu dọ. Na nugbo tọn, hodọdopọ enẹ hẹn kọdetọn ayidego tọn de wá. To ojlẹ vude godo, gbẹtọ 15 to whẹndo ehelẹ mẹ wẹ lẹzun Kunnudetọ Jehovah tọn.

Aliho he mẹ mí nọ dọyẹwheho te to ojlẹ enẹ mẹ gbọnvona lehe mí nọ wà do to egbehe. To ojlẹ enẹ mẹ, Paolo wá bikan to hoyijlẹdohogo do Biblu ji hẹ yẹwhenọ lẹ mẹ, podọ e nọ wàmọ whẹwhẹ. N’flindọ e wàmọ to gbèdopo to mẹplidopọ he ma yin Kunnudetọ lẹ nukọn. E wá họnwun dọ nukundiọsọmẹtọ enẹlẹ ko basi tito hẹ mẹdelẹ to mẹplidopọ lẹ mẹ nado kàn kanbiọ he yé lẹndọ e na vẹawuna ẹn nado na gblọndo etọn lẹ sè e. Ṣigba, nulẹ ma yì domọ. Mẹde kanse eyin e sọgbe dọ sinsẹ̀n ni donù tonudidọ mẹ dile e ko wà do na owhe kanweko susu lẹ. Kanbiọ enẹ hẹn yẹwhenọ lẹ biọ bẹwlu mẹ. To ajiji mẹ, miyọ́n lẹtliki tọn lọ ṣí bọ opli lọ doalọte. To owhe lẹ godo, mí wá sè dọ yẹwhenọ lẹ wẹ basi tito dọ mẹde ni ṣí miyọ́n lọ, eyin hodọdopọ lọ ma yì dile yé jlo do.

LẸBLANULỌKẸYI SINSẸ̀NZỌN TỌN DEVO LẸ

To whenue alọwle yẹn po Paolo po tọn pé owhe ao, mí yin oylọ-basina nado sẹ̀n taidi nugopọntọ lẹdo tọn. To ojlẹ enẹ mẹ, Paolo tindo agbasazọ́n dagbe de, enẹwutu e ma bọawu nado basi nudide lọ. Ṣigba, to whenue mí ko hodẹ̀ gando whẹho lọ go godo, mí kẹalọyi  azọ́ndenamẹ yọyọ enẹ. Mí nọ duvivi whenu he mí nọ yizan hẹ whẹndo he nọ yí mí do whégbè lẹ tọn. To whèjai lẹ, mí nọ saba plọn Biblu to pọmẹ hẹ whẹndo enẹlẹ, podọ enẹgodo Paolo nọ gọalọna ovi lẹ nado basi azọ́ndenamẹ he mẹplọntọ wehọmẹ tọn yetọn dena yé nado basi to whégbè lẹ, titengbe dehe gando nulinlẹn go lẹ. Humọ, Paolo yiwanna wehihia taun bosọ nọ yí zohunhun do má nuhe e hia bọ e fọnjlodotena ẹn lẹ hẹ mẹdevo lẹ. To lundi lẹ, mí nọ saba tọ́n nado yì dọyẹwheho to tòpẹvi he mẹ Kunnudetọ depope ma tin te lẹ mẹ bo nọ basi oylọna gbẹtọ lẹ nado wá sè hodidọ he na yin nina to whèjai lọ.

Owhe awe poun wẹ mí basi to azọ́n nugopọntọ lẹdo tọn mẹ bo yin oylọ-basina nado yì sẹ̀n to Bẹtẹli to Rome. Paolo yin azọ́ndena nado nọ penukundo whẹho osẹ́n tọn lẹ go, bọ yẹn yin azọ́ndena nado nọ wazọ́n to Azọ́nwatẹn Linlinnamẹwe tọn. E ma bọawuna mí nado diọada sọgbe hẹ azọ́ndenamẹ yọyọ ehe, ṣigba mí magbe nado setonu. Homẹhunnu wẹ e yin nado mọ aliho he mẹ alahọ lọ yin hinhẹn gblodeji te vudevude gọna jideji ayidego tọn he wá aimẹ to sọha mẹmẹsunnu lẹ tọn mẹ to Italie. To ojlẹ enẹ mẹ, Kunnudetọ Jehovah tọn lẹ yin alọkẹyi sọgbe hẹ osẹ́n to Italie. Sinsẹ̀nzọn wunmẹ ehe hẹn ayajẹ wá na mí taun.

To whenue mí to sinsẹ̀n to Bẹtẹli, teninọ mítọn gando whẹho ohùn tọn go wá họnwun hezeheze to Italie. To bẹjẹeji owhe 1980 lẹ tọn, whẹho mọnkọtọn de fọndote bo hẹn nuhahun susu wá. Asu po asi po he yin Kunnudetọ de yin whẹsadokọna dọ yelọsu wẹ hù viyọnnu yetọn, dile etlẹ yindọ ovi lọ kú na azọ̀n sinsinyẹn de he mẹsusu nọ dugu etọn sọn mẹjitọ yetọn lẹ dè to lẹdo Méditerranée tọn mẹ. Mẹmẹsunnu gọna mẹmẹyọnnu he tin to whẹndo Bẹtẹli tọn mẹ lẹ gọalọna whẹ̀yidọtọ he yiavùnlọna mẹjitọ Klistiani lọ lẹ. Alọnuwe pẹvi de po zinjẹgbonu vonọtaun Réveillez-vous! tọn de po yin didetọn he gọalọna gbẹtọ lẹ nado mọnukunnujẹ nuhe Ohó Jiwheyẹwhe tọn dọ gando ohùn go mẹ to gigọ́ mẹ. To osun enẹlẹ gblamẹ, Paolo nọ saba wazọ́n na gànhiho 16 to gbèdopo madoalọte. N’wà nuhe go n’pé lẹpo nado nọgodona ẹn to vivẹnudido titengbe etọn lẹ mẹ.

DIỌDO DEVO TO GBẸZAN MÍTỌN MẸ

To whenue alọwle mítọn pé owhe 20 godo wẹ nujijọ madonukun de wá aimẹ. N’tindo owhe 41 bọ Paolo tindo 49 to whenue n’dọna ẹn dọ, e taidi dọ n’mọhò. N’wá hia odẹ̀ he e hò to azán enẹ gbè to owe kandai mẹdetiti tọn etọn mẹ dọmọ: “Eyin nuhe asi ṣie dọ yin nugbo, gọalọna mí nado gbọṣi sinsẹ̀nzọn whenu-gigọ́ tọn mẹ bo ma gbọjọ to gbigbọ-liho, podọ sọ gọalọna mí nado yin mẹjitọ dagbe gbọn apajlẹ mítọn lẹ dali. Hú popolẹpo, gọalọna mi nado yí etlẹ yin vude to nuhe n’plọnmẹ sọn oplò ji na owhe 30 he wayi lẹ do yizan mẹ.” Eyin n’lẹnnupọndo kọdetọn he mí tindo lẹ ji, n’nọ mọdọ, Jehovah na gblọndo odẹ̀ yẹn po Paolo po tọn.

Gbẹzan mítọn diọ taun to whenue mí ji Ilaria. Nado dọ hójọhó, mí tlẹ gbọjọ to ojlẹ delẹ mẹ, dile  Howhinwhẹn lẹ 24:10 dọ do dọmọ: “Eyin nuṣikọna we to azán nukunbibia tọn gbè, huhlọn towe ma sọtẹ́n gba.” Ṣigba, mí nọgodona ode awetọ, na mí ma wọn dọ nujọnu wẹ e yin nado nọ na tuli míde.

Ilaria nọ saba dọ dọ homẹ emitọn hùn nado tindo mẹjitọ Kunnudetọ he hẹn alọnu yetọn ján to sinsẹ̀nzọn whenu-gigọ́ tọn mẹ lẹ. E ma ko tindo numọtolanmẹ lọ pọ́n dọ mẹjitọ emitọn lẹ gbẹkọ emi go; na e whẹ́n to whẹndo dagbe de mẹ wutu. To okle lẹ, yẹn wẹ nọ penukundego. Dile etlẹ yindọ, Paolo nọ saba tindo azọ́n susu nado wà eyin e lẹkọwa whégbè to whèjai lẹ, ewọ nọ yí whenu zan dopọ hẹ Ilaria, bo nọ daihun hẹ ẹ bosọ nọ gọalọna ẹn nado basi azọ́ndenamẹ he mẹplọntọ wehọmẹ tọn etọn dena ẹn lẹ. E nọ wàmọ eyin etlẹ biọ dọ e na gbọṣi nukle kakajẹ ogàn awe kavi ogàn atọ̀n mẹ to zánmẹ nado dotana azọ́n etọn titi lẹ. Ilaria nọ saba dọ dọ, “Papa wẹ họntọn vivẹ́ ṣie hugan.”

Nado sọgan gọalọna Ilaria nado gbọṣi nugbo lọ mẹ, e biọ dọ ogbè yẹn po Paolo po tọn ni nọpọ́ podọ mí nisọ yin nujikudonọ. N’flindọ to gbèdopo, e to aihunda hẹ họntọn etọn de bo yinuwa hẹ ẹ to aliho agọ̀ mẹ. Mí yí Biblu zan nado dohia ẹ dọ e ma jẹ dọ ni yinuwa to aliho enẹ mẹ. Mí sọ biọ to e si dọ e ni vẹvẹna họntọn lọ to nukun mítọn mẹ.

Ilaria nọ saba dọ dọ owanyi he mẹjitọ emitọn lẹ tindo na sinsẹ̀nzọn lọ wẹ whàn emi lọsu nado yiwanna sinsẹ̀nzọn lọ. Todin he ewọ lọsu ko wlealọ, e mọnukunnujẹ nuhewutu e do yin nujọnu nado nọ setonuna Jehovah bo hodo anademẹ etọn lẹ mẹ to gigọ́ mẹ.

TONUSISE ETLẸ YIN TO OJLẸ AWUBLA TỌN MẸ

To 2008, doto lẹ dọna Paolo dọ e to azọ̀n kansẹẹ tọn jẹ. To tintan whenu, e taidi dọ azọ̀n lọ na wá gbọ na Paolo, podọ ewọ sọ nọ na mi tuli taun. Gbọnvona dọ mí dín nukunpedomẹgo dotowhé tọn dagbe hugan he tin-to-aimẹ lẹ, yẹn po Ilaria po nọ yí whenu susu zan nado hodẹ̀ vivẹvivẹ bo nọ biọ to Jehovah si dọ ni gọalọna mí nado doakọnna ninọmẹ lọ. Etomọṣo, dawe he dohuhlọn bo bikan taun wayi enẹ wá jẹ gánvọ̀ ji vudevude. To whenue e kú to 2010, awufiẹsa sinsinyẹn wẹ enẹ hẹnwa mí ji. Ṣigba, nuhe mí ko wà dopọ to owhe 45 he mí yizan lẹ mẹ nọ miọnhomẹna mi taun. Mí wà nuhe go mí pé lẹpo na Jehovah. N’yọnẹn dọ Jehovah ma na wọn azọ́n he mí wà lẹ pọ́n gbede. Podọ n’yí jejejininọ do to tenọpọn ojlẹ he mẹ Paolo na yin finfọnsọnku sọgbe hẹ hogbe Jesu tọn he tin to Johanu 5:28, 29 mẹ lẹ.

To ahun ṣie mẹ dọ́n, n’gbẹ́ taidi viyọnnu pẹvi de he yiwanna otàn Noa tọn taun. Gbemima ṣie ma ko diọ. N’jlo na nọ setonuna Jehovah, mahopọnna nudepope he enẹ na biọ to asi e. N’tindo jide dọ aliglọnnamẹnu lẹ, avọ́sinsan lẹ kavi mẹyiwanna lẹ hinhẹnbu to okú mẹ ma yin nude eyin mí yí yé jlẹdo dona jiawu he Jiwheyẹwhe owanyinọ mítọn wleawu etọn dai na mí lẹ go. N’tindo numimọ ehe tọn, podọ n’sọgan dọ po nujikudo po dọ vivẹnu depope he mí do nado mọ dona enẹlẹ yí ma yin ovọ́.

[Yẹdide to weda 4]

Alọwle-zan mítọn gbè

[Yẹdide to weda 4]

Mí nọ duvivi whenu he mí nọ yizan hẹ jọja lẹ tọn, Paolo nọ hò bọlu hẹ yé

[Yẹdide to weda 5]

Paolo yiwanna azọ́n he e nọ wà to Bẹtẹli

[Yẹdide to weda 5]

Ilaria nọ saba dọ dọ, “Papa wẹ họntọn vivẹ́ ṣie hugan”

[Nudọnamẹ tangan lẹ to weda 6]

“To ahun ṣie mẹ dọ́n, n’gbẹ́ taidi viyọnnu pẹvi de he yiwanna otàn Noa tọn taun. Gbemima ṣie ma ko diọ”