“Dọna Mí, Whetẹnu Wẹ Onú Ehelẹ Na Jọ?”
“Dọna Mí, Whetẹnu Wẹ Onú Ehelẹ Na Jọ?”
“Etẹwẹ na yin ohia tintin tofi towe tọn po vivọnu titonu lọ tọn po?”—MAT. 24:3.
NAWẸ HIẸ NA NA GBLỌNDO GBỌN?
Aliho tẹlẹ mẹ wẹ hẹndi voovo awe dọdai Jesu tọn gando nukunbibia daho lọ go sọgbe hẹ yedelẹ te?
Nawẹ apajlẹ lẹngbọ lẹ po gbọgbọẹ lẹ po tọn yinuwado pọndohlan mítọn gando azọ́n yẹwhehodidọ tọn go ji gbọn?
To Matiu weta 24 po 25 po mẹ, ojlẹ tẹwẹ Jesu to alọdlẹndo to whenue e dọho gando wiwá etọn go?
1. Taidi apọsteli lẹ, etẹwẹ mílọsu tindo ojlo nado yọnẹn?
LIZỌNYIZỌN Jesu tọn to aigba ji to sisẹpọ vivọnu, podọ devi etọn lẹ tin to jejeji nado yọ́n nuhe na jọ to sọgodo lẹ. Enẹwutu, azán vude jẹnukọnna okú etọn, ẹnẹ to apọsteli etọn lẹ mẹ kanse e dọmọ: “Whetẹnu wẹ onú ehelẹ na jọ, podọ etẹwẹ na yin ohia tintin tofi towe tọn po vivọnu titonu lọ tọn po?” (Mat. 24:3; Malku 13:3) Jesu na yé gblọndo gbọn dọdai he gbloada de didọna yé dali, ehe yin kinkandai to Matiu weta 24 po 25 po mẹ. To dọdai enẹ mẹ, Jesu donù nujijọ ayidego tọn susu lẹ go. Gblọndo etọn lẹ yin nujọnu na mí, na mílọsu tindo ojlo vẹkuvẹku nado yọ́n nuhe na jọ to sọgodo lẹ wutu.
2. (a) To owhe lẹ gblamẹ, etẹ mẹ wẹ mí dovivẹnu nado mọnukunnujẹ dogọ? (b) Kanbiọ atọ̀n tẹlẹ wẹ mí na gbadopọnna?
2 To owhe lẹ gblamẹ, devizọnwatọ Jehovah tọn lẹ hodẹ̀ bosọ yí sọwhiwhe do gbadopọnna dọdai Jesu tọn he gando azán godo tọn lẹ go. Yé ko dovivẹnu nado mọnukunnujẹ ojlẹ he mẹ ohó Jesu tọn lẹ na mọ hẹndi te mẹ dogọ. Hosọ ehe na na gblọndo kanbiọ atọ̀n ehelẹ tọn. Whetẹnu wẹ “nukunbibia daho” lọ na bẹjẹeji? Whetẹnu wẹ Jesu na dawhẹna “lẹngbọ lẹ” po “gbọgbọẹ lẹ” po? Whetẹnu wẹ Jesu ja kavi na “wá”?—Mat. 24:21; 25:31-33.
WHETẸNU WẸ NUKUNBIBIA DAHO LỌ NA BẸJẸEJI?
3. To ojlẹ de mẹ wayi, nukunnumọjẹnumẹ tẹwẹ mí tindo gando nukunbibia daho lọ go?
3 Na owhe susu lẹ, mí lẹndọ nukunbibia daho lọ bẹjẹeji to 1914 to whenue Wẹkẹ-Whàn I bẹjẹeji, podọ “azán enẹlẹ . . . yin sinsán-dogli” gbọn Jehovah dali to 1918 to whenue awhàn lọ doalọte, na pipotọ mẹyiamisisadode lẹ tọn nido sọgan lá wẹndagbe lọ na akọta lẹpo. (Mat. 24:21, 22) To whenue azọ́n yẹwhehodidọ tọn enẹ na wá vivọnu godo, titonu Satani tọn na yin vivasudo. Enẹwutu, mí mọnukunnujẹemẹ wayi dọ nukunbibia daho lọ bẹ adà voovo atọ̀n hẹn: E na tindo bẹjẹeji de (sọn 1914 jẹ 1918), nukunbibia lọ na yin sinsán-dogli (bẹsọn 1918), podọ e na wá vivọnu to Amagẹdọni.
4. Etẹ go wẹ mí wá doayi gando dọdai Jesu tọn go?
4 Ṣigba, to whenue mí gbadopọnna dọdai Jesu tọn yinukọn dogọ, mí doayi e go dọ apadewhe dọdai Jesu tọn he gando azán godo tọn lẹ go na mọ hẹndi voovo awe. (Mat. 24:4-22) Hẹndi tintan lọ wá aimẹ to Jude to owhe kanweko tintan W.M., podọ hẹndi devo he na gbloada lẹdo aihọn pé de na wá aimẹ to azán mítọn gbè. Enẹwutu, mí dona basi vọjlado susu to nukunnumọjẹnumẹ mítọn mẹ. a
5. (a) Ojlẹ tẹwẹ bẹjẹeji to 1914? (b) Owhe tẹlẹ mẹ wẹ “awufiẹsa he taidi ajipanu tọn lẹ” jọ te to owhe kanweko tintan W.M.?
5 Mí sọ doayi e go dọ adà tintan nukunbibia daho lọ tọn ma bẹjẹeji to 1914. Etẹwutu? Na dọdai Biblu tọn lẹ dohia dọ nukunbibia daho lọ na bẹjẹeji gbọn mẹgbeyinyan sọta sinsẹ̀n lalo dali, e ma yin gbọn awhàn de to akọta lẹ ṣẹnṣẹn dali gba. Enẹwutu, nujijọ he bẹjẹeji to 1914 lẹ, ma yin bẹjẹeji nukunbibia daho lọ tọn, kakatimọ “bẹjẹeji awufiẹsa he taidi ajipanu tọn lẹ” wẹ. (Mat. 24:8) “Awufiẹsa he taidi ajipanu tọn” ehelẹ sọgbe hẹ nuhe jọ to Jelusalẹm po Jude po bẹsọn owhe 33 W.M. jẹ 66 W.M.
6. Nawẹ nukunbibia daho lọ na bẹjẹeji gbọn?
6 Nawẹ nukunbibia daho lọ na bẹjẹeji gbọn? Jesu dọ dọdai dọmọ: “To whenue mì mọ awuhiọnu he nọ hẹn vọjijẹ wá, he yẹwhegán Daniẹli ko dọho etọn lọ, to ote to ofi wiwe, (na wehiatọ ni yí wuntuntun zan,) to whenẹnu, mì gbọ mẹhe to Jude lẹ ni jẹ hinhọ̀n ji yì osó lẹ ji.” (Mat. 24:15, 16) To hẹndi tintan dọdai lọ tọn mẹ, ‘teninọ to ofi wiwe’ lọ wá aimẹ to 66 W.M. to whenue awhànpa Lomu tọn (he yin “awuhiọnu” lọ) yangbé Jelusalẹm po tẹmpli etọn po tọn (he yin fiwiwe de to nukun Ju lẹ tọn mẹ). To hẹndi awetọ he gbloada lọ mẹ, ‘teninọ to ofi wiwe’ lọ na wá aimẹ to whenue Plidopọ Akọta lẹ tọn (yèdọ “awuhiọnu” egbezangbe tọn lọ) na yangbé sinsẹ̀n Mẹylọhodotọklisti tọn (he yin wiwe to nukun mẹhe nọ ylọ yede dọ Klistiani lẹ tọn mẹ) po pipotọ Babilọni Daho lọ tọn po. Osọhia 17:16-18 dọho gando mẹgbeyinyan dopolọ go. Nujijọ enẹ wẹ na yin bẹjẹeji nukunbibia daho lọ tọn.
7. (a) Nawẹ mẹdelẹ yin whinwhlẹngán to owhe kanweko tintan whenu gbọn? (b) Etẹwẹ mí sọgan donukun dọ e na jọ to sọgodo?
7 Jesu sọ dọ dọdai dọmọ: “Azán enẹlẹ na yin sinsán-dogli.” Hẹndi tintan dọdai enẹ tọn wá aimẹ to 66 W.M. to whenue awhànpa Lomu tọn ‘sán’ mẹgbeyinyan etọn dogli. Enẹgodo, Klistiani yiamisisadode he tin to Jelusalẹm po Jude po lẹ họnyi, bo gbọnmọ dali “yin whinwhlẹngán.” (Hia Matiu 24:22; Mal. 3:17) Enẹwutu, etẹwẹ mí sọgan donukun dọ e na jọ to nukunbibia daho lọ whenu? Jehovah na ‘sán’ mẹgbeyinyan Plidopọ Akọta lẹ tọn sọta sinsẹ̀n lalo dogli bo ma na dike sinsẹ̀n nugbo ni yin vivasudo to pọmẹ hẹ sinsẹ̀n lalo. Ehe na zọ́n bọ omẹ Jiwheyẹwhe tọn lẹ na yin whinwhlẹngán.
8. (a) Nujijọ tẹlẹ wẹ na wá aimẹ to adà tintan nukunbibia daho lọ tọn godo? (b) Whetẹnu wẹ e taidi dọ omẹ godo tọn to gbẹtọ 144 000 lẹ mẹ na mọ ahọsumẹ olọn mẹ tọn etọn yí te? (Pọ́n ayidonugo.)
8 Etẹwẹ na jọ to adà tintan nukunbibia daho lọ tọn godo? Hodidọ Jesu tọn lẹ dohia dọ ojlẹ de na bọdego bo na zindonukọn kakajẹ bẹjẹeji Amagẹdọni tọn. Nujijọ tẹlẹ wẹ na wá aimẹ to gblagbla ojlẹ enẹ tọn mẹ? Gblọndo lọ yin kinkandai to Ezekiẹli 38:14-16 mẹ gọna Matiu 24:29-31. (Hia.) b Enẹgodo, Amagẹdọni na wá, yèdọ adà godo tọn nukunbibia daho lọ tọn, ehe sọgbe hẹ vasudo Jelusalẹm tọn to 70 W.M. (Mal. 4:1) Na awhàn Amagẹdọni tọn wẹ yin adà godo tọn nukunbibia daho lọ tọn wutu, nukunbibia daho he ja enẹ na yin nujijọ vonọtaun de, yèdọ nujijọ “ehe nkọ ma ko jọ pọ́n sọn bẹjẹeji aihọn tọn gbọ́n.” (Mat. 24:21) To Amagẹdọni godo, Gandudu Owhe Fọtọ́n Klisti tọn na bẹjẹeji.
9. Jide tẹwẹ dọdai Jesu tọn he gando nukunbibia daho lọ go nọ na omẹ Jehovah tọn lẹ?
9 Dọdai ehe gando nukunbibia daho lọ go nọ hẹn mí lodo taun. Etẹwutu? Na e nọ na mí jide dọ mahopọnna awusinyẹnnamẹnu depope he mí sọgan pehẹ, omẹ Jehovah tọn lẹ taidi pipli de na lùn nukunbibia daho lọ tọ́n. (Osọ. 7:9, 14) Hú popolẹpo, mí nọ jaya, na to Amagẹdọni, Jehovah na suwhẹna nupojipetọ-yinyin etọn bo klan yinkọ etọn do wiwe.—Ps. 83:18; Ezek. 38:23.
WHETẸNU WẸ JESU NA DAWHẸNA LẸNGBỌ LẸ PO GBỌGBỌẸ LẸ PO?
10. To ojlẹ de mẹ wayi, etẹwẹ yin nukunnumọjẹnumẹ mítọn gando ojlẹ he mẹ lẹngbọ lẹ po gbọgbọẹ lẹ po na yin whẹdana te go?
10 Todin, mì gbọ mí ni gbadopọnna ojlẹ he mẹ adà dọdai Jesu tọn devo na mọ hẹndi te, yèdọ apajlẹ etọn gando whẹdidana lẹngbọ lẹ po gbọgbọẹ lẹ po go. (Mat. 25:31-46) To ojlẹ de mẹ wayi, mí nọ lẹndọ whẹdidana gbẹtọ he taidi lẹngbọ lẹ kavi gbọgbọẹ lẹ na wá aimẹ to azán godo tọn blebu mẹ bẹsọn 1914. Mí wá tadona lọ kọ̀n dọ mẹhe gbẹ́ owẹ̀n Ahọluduta lọ tọn dai bo kú jẹnukọnna bẹjẹeji nukunbibia daho lọ tọn lẹ ko yin whẹdana taidi gbọgbọẹ lẹ bo ma tindo todido nado yin finfọnsọnku.
11. Naegbọn whẹdidana gbẹtọ lẹ taidi lẹngbọ lẹ kavi gbọgbọẹ lẹ ma sọgan ko bẹjẹeji to 1914?
11 To 1995, Atọ̀họ̀-Nuhihọ́ lọ Tọn na zẹẹmẹ yọyọ do Matiu 25:31 ji, ehe dọmọ: “To whenuena Visunnu gbẹtọ tọn na wá to gigo etọn mẹ po angẹli lẹpo po, to whenẹnu wẹ e na sinai to ofìn gigonọ etọn ji.” Mí doayi e go dọ Jesu lẹzun Ahọlu Ahọluduta Jiwheyẹwhe tọn to 1914, ṣigba ewọ ma “sinai to ofìn gigonọ etọn ji” taidi Whẹdatọ “akọta lẹpo” tọn gba. (Mat. 25:32; yijlẹdo Daniẹli 7:13 go.) Ṣigba, apajlẹ lẹngbọ lẹ po gbọgbọẹ lẹ po tọn lọ do Jesu hia taidi Whẹdatọ. (Hia Matiu 25:31-34, 41, 46.) To whenuena e yindọ Jesu ma ko yinuwa di Whẹdatọ akọta lẹpo tọn to 1914, whẹdida etọn na gbẹtọ lẹ taidi lẹngbọ lẹ kavi gbọgbọẹ lẹ ma sọgan ko bẹjẹeji to owhe enẹ mẹ. c Eyin mọ wẹ, whetẹnu na taun tọn wẹ whẹdida Jesu tọn na bẹjẹeji?
12. (a) Whetẹnu wẹ Jesu na yinuwa whla tintan taidi Whẹdatọ akọta lẹpo tọn? (b) Nujijọ tẹlẹ wẹ yin zẹẹmẹ basina to Matiu 24:30, 31 po Matiu 25:31-33, 46 po mẹ?
12 Dọdai Jesu tọn gando azán godo tọn lẹ go dohia dọ, ewọ na yinuwa whla tintan taidi Whẹdatọ akọta lẹpo tọn to whenue sinsẹ̀n lalo na yin vivasudo godo. Dile mí donù e go to hukan 8 mẹ do, delẹ to nujijọ he na wá aimẹ to ojlẹ enẹ mẹ lẹ mẹ yin kinkandai to Matiu 24:30, 31 mẹ. Eyin hiẹ gbadopọnna wefọ enẹlẹ, a na doayi e go dọ nujijọ he Jesu dọ dọdai yetọn to finẹ lẹ yin nudopolọ hẹ dehe go e donù to dọdai lẹngbọ lẹ po gbọgbọẹ lẹ po tọn lọ mẹ. Di apajlẹ, Visunnu gbẹtọ tọn na wá to gigo mẹ po angẹli lẹ po; hẹnnu po akọta lẹpo po na yin bibẹpli; mẹhe yin whẹdana taidi lẹngbọ lẹ “ze ota [yetọn] daga” na yé na “nọgbẹ̀ kakadoi” wutu. d Mẹhe yin whẹdana taidi gbọgbọẹ lẹ “doavigbè,” na yé mọdọ yé na “yin sinsánsẹ kakadoi” wutu.—Mat. 25:31-33, 46.
13. (a) Whetẹnu wẹ Jesu na dawhẹna gbẹtọ lẹ taidi lẹngbọ lẹ kavi gbọgbọẹ lẹ? (b) Nawẹ nukunnumọjẹnumẹ ehe dona yinuwa do pọndohlan mítọn gando lizọnyizọn mítọn go ji gbọn?
13 To whelọnu lo, tadona tẹ kọ̀n wẹ mí sọgan wá? Jesu na dawhẹna gbẹtọ akọta lẹpo tọn taidi lẹngbọ lẹ kavi gbọgbọẹ lẹ to whenue e na wá to nukunbibia daho lọ whenu. Enẹgodo, to Amagẹdọni, ehe yin adà godo tọn nukunbibia daho lọ tọn, gbẹtọ he taidi gbọgbọẹ lẹ na yin “sinsánsẹ” kakadoi. Nawẹ nukunnumọjẹnumẹ enẹ dona yinuwado pọndohlan mítọn gando lizọnyizọn mítọn go ji gbọn? E gọalọna mí nado mọ lehe azọ́n yẹwhehodidọ tọn mítọn yin nujọnu do. Kakajẹ whenue nukunbibia daho lọ na bẹjẹeji, gbẹtọ lẹ na gbẹ́ tindo whenu nado diọ nulẹnpọn yetọn bo jẹ zọnlinzin ji to aliho jinján “he nọ planmẹ yì ogbẹ̀ mẹ” lọ ji. (Mat. 7:13, 14) Nugbo wẹ dọ gbẹtọ lẹ sọgan yinuwa todin taidi lẹngbọ lẹ kavi gbọgbọẹ lẹ. Etomọṣo, mí dona flindọ whẹdida godo tọn gando mẹhe yin lẹngbọ lẹ po mẹhe yin gbọgbọẹ lẹ po go na wá aimẹ to nukunbibia daho lọ whenu. Enẹwutu, mí tindo whẹwhinwhẹ́n dagbe nado zindonukọn bo nọ ze dotẹnmẹ hundote lọ donukọnna mẹsusu dile e sọgan yọnbasi do, na yé nido dotoaina owẹ̀n Ahọluduta lọ tọn bo yinuwa sọgbe hẹ owẹ̀n lọ.
WHETẸNU WẸ JESU JA KAVI NA WÁ?
14, 15. Wefọ ẹnẹ tẹlẹ wẹ dohia dọ Klisti na wá to sọgodo taidi Whẹdatọ?
14 Be dogbigbapọnna dọdai Jesu tọn yinukọn dogọ dohia dọ nukunnumọjẹnumẹ mítọn gando ojlẹ he mẹ nujijọ ayidego tọn devo lẹ na mọ hẹndi te go dona yin vivọjlado wẹ ya? Dọdai lọ na gblọndo. Mì gbọ mí ni pọ́n.
15 To adà dọdai Jesu tọn he yin kinkandai to Matiu 24:29–25:46 de mẹ, ewọ zinnudo nuhe na jọ to azán godo tọn ehelẹ mẹ podọ to nukunbibia daho he ja lọ whenu ji. To finẹ, whla ṣinatọ̀n wẹ Jesu dọho gando ‘wiwá’ etọn go. e E dọ gando nukunbibia daho lọ go dọmọ: “Yé nasọ mọ Visunnu gbẹtọ tọn ja to aslọ . . . lẹ mẹ.” “Mì ma yọ́n azán he gbè Oklunọ mìtọn ja.” “Ogàn he mẹ mì ma lẹn do wẹ Visunnu gbẹtọ tọn ja.” Podọ to apajlẹ lẹngbọ lẹ po gbọgbọẹ lẹ po tọn lọ mẹ, Jesu dọmọ: “Visunnu gbẹtọ tọn na wá to gigo etọn mẹ.” (Mat. 24:30, 42, 44; 25:31) Dopodopo wefọ ẹnẹ ehelẹ tọn dohia dọ Klisti na wá to sọgodo taidi Whẹdatọ. Fitẹ wẹ mí na mọ alọdlẹndonu ẹnẹ he pò lẹ te to dọdai Jesu tọn mẹ?
16. Wefọ devo tẹlẹ wẹ dọho gando wiwá Jesu tọn go?
16 Gando afanumẹ nugbonọ podọ nuyọnẹntọ lọ go, Jesu dọmọ: “Ayajẹnọ wẹ afanumẹ enẹ eyin oklunọ etọn wá bo mọdọ e to mọwà.” To apajlẹ etọn gando awhli lẹ go mẹ, Jesu dọmọ: “Dile yé tọ́n jei jijẹ gbé, asisunọ yọyọ lọ wá.” To apajlẹ talẹnti tọn mẹ, Jesu dọmọ: “To ojlẹ dindẹn de godo, oklunọ afanumẹ lọ lẹ tọn wá.” To apajlẹ dopolọ mẹ, oklunọ lọ dọmọ: “Whenuena yẹn wá, yẹn na ko mọ onú ṣie yí.” (Mat. 24:46; 25:10, 19, 27) Ojlẹ tẹwẹ wiwá Jesu tọn ẹnẹ ehelẹ dlẹnalọdo?
17. Etẹwẹ mí dọ dai gando wiwá Jesu tọn he yin nùdego to Matiu 24:46 mẹ go?
17 To ojlẹ de mẹ wayi, mí dọ to zinjẹgbonu mítọn lẹ mẹ dọ wefọ ẹnẹ he ji mí dọhodo gbọngodo ehelẹ dohia dọ Jesu na wá kavi ja to 1918. Di apajlẹ, doayi hogbe Jesu tọn he gando “afanumẹ nugbonọ podọ nuyọnẹntọ lọ” go. (Hia Matiu 24:45-47.) Mí mọnukunnujẹemẹ dai dọ ‘wiwá’ he yin nùdego to wefọ 46 mẹ mọ hẹndi to whenue Jesu wá nado gbeje ninọmẹ gbigbọmẹ tọn mẹyiamisisadode lẹ tọn pọ́n to 1918 podọ afanumẹ lọ dide do nutindo Oklunọ lọ tọn lẹpo ji wá aimẹ to 1919. (Mal. 3:1) Ṣigba, dogbigbapọnna dọdai Jesu tọn yinukọn dogọ dohia dọ, nukunnumọjẹnumẹ mítọn gando ojlẹ he mẹ adà dọdai Jesu tọn delẹ na mọ hẹndi te go dona yin vivọjlado. Etẹwutu?
18. To whenue mí gbadopọnna dọdai Jesu tọn to blebu mẹ, tadona tẹ kọ̀n wẹ mí wá gando wiwá Jesu tọn go?
18 To wefọ he jẹnukọnna Matiu 24:46 lẹ mẹ, hogbe lọ “wá” dlẹnalọdo ojlẹ he mẹ Jesu na wá nado dawhẹ bo hẹn whẹdida ṣẹ to nukunbibia daho lọ whenu. (Mat. 24:30, 42, 44) Podọ, dile mí gbadopọnna to hukan 12 mẹ do, ‘wiwá’ Jesu tọn he yin nùdego to Matiu 25:31 mẹ dlẹnalọdo ojlẹ whẹdida tọn to sọgodo enẹ dopolọ. Enẹwutu, e sọgbe hẹ lẹnpọn dagbe nado wá tadona kọ̀n dọ wiwá Jesu tọn nado de afanumẹ nugbonọ lọ do nutindo etọn lẹpo ji, ehe yin nùdego to Matiu 24:46, 47 mẹ, sọ dlẹnalọdo wiwá etọn to sọgodo, yèdọ to nukunbibia daho lọ whenu. f Na nugbo tọn, dogbigbapọnna dọdai Jesu tọn to blebu mẹ dohia dọ wefọ voovo ṣinatọ̀n ehelẹ he dọho gando wiwá etọn go dlẹnalọdo ojlẹ whẹdida tọn to sọgodo to nukunbibia daho lọ whenu.
19. Vọjlado tẹlẹ wẹ mí gbadopọnna gando nukunnumọjẹnumẹ mítọn go, podọ kanbiọ tẹlẹ wẹ mí na gbadopọnna to hosọ he bọdego mẹ?
19 To bladopọ mẹ, etẹwẹ mí plọn? To bẹjẹeji hosọ ehe tọn, mí fọ́n kanbiọ atọ̀n delẹ dote. To tintan whenu, mí mọnukunnujẹemẹ dọ nukunbibia daho lọ ma bẹjẹeji to 1914, ṣigba dọ e na bẹjẹeji to whenue Plidopọ Akọta lẹ tọn na yangbé Babilọni Daho lọ tọn. Enẹgodo, mí gbadopọnna nuhewutu whẹdida Jesu tọn na lẹngbọ lẹ po gbọgbọẹ lẹ po ma do bẹjẹeji to 1914, ṣigba bo na wá aimẹ to nukunbibia daho lọ whenu. To tadona mẹ, mí gbadopọnna nuhewutu e ma do yin 1919 wẹ Jesu wá nado de afanumẹ nugbonọ lọ do nutindo etọn lẹpo ji, ṣigba dọ nukunbibia daho lọ whenu wẹ ewọ na wàmọ te. Enẹwutu, kanbiọ atọ̀n lọ lẹpo dlẹnalọdo ojlẹ dopolọ, yèdọ nukunbibia daho lọ. Nawẹ vọjlado ehe yinuwado nukunnumọjẹnumẹ mítọn ji na nuhe dù apajlẹ he Jesu na gando afanumẹ nugbonọ lọ go gbọn? Podọ, nawẹ e yinuwado nukunnumọjẹnumẹ mítọn gando apajlẹ Jesu tọn devo lẹ he to hẹndi mọyi to ojlẹ opodo tọn ehe mẹ go gbọn? Kanbiọ titengbe ehelẹ na yin dogbapọnna to hosọ he bọdego mẹ.
AYIDONUGO: (Na yin hihia taidi nudọnamẹ odò tọn to hukan he yé sọgbe hẹ lẹ hihia whenu.)
[Nudọnamẹ odò tọn]
a Hukan 4: Na nudọnamẹ dogọ, pọ́n Atọ̀họ̀-Nuhihọ́ lọ Tọn 1er mai 1994, weda 6-19 po 1er mai 1999, weda 8-20 po.
b Hukan 8: Dopo to nujijọ he yin nùdego to wefọ ehelẹ mẹ wẹ yindọ ‘mẹdide lẹ yin bibẹpli.’ (Mat. 24:31) Enẹwutu, e taidi dọ to adà tintan nukunbibia daho lọ tọn godo, mẹyiamisisadode he gbẹ́ pò to aigba ji lẹpo na yin zize yì olọn mẹ whẹpo awhàn Amagẹdọni tọn nado gbajẹgbonu. Ehe yin vọjlado na nuhe yin didọ do hosọ ehe ji to “Kanbiọ lẹ sọn Wehiatọ lẹ Dè” mẹ, to Atọ̀họ̀-Nuhihọ́ lọ Tọn [flansegbe] 15 août 1990, weda 30 mẹ.
c Hukan 11: Pọ́n Atọ̀họ̀-Nuhihọ́ lọ Tọn 1er novembre 1995, weda 8-18.
d Hukan 12: Pọ́n kandai he dọhodo whẹho dopolọ ji to Luku 21:28.
e Hukan 15: Hogbe Glẹkigbe tọn he yin lilẹdo “wá” kavi “ja” wẹ erʹkho·mai.
f Hukan 18: Dile mí doayi e go do, hogbe Glẹki tọn he yin lilẹdo “wá” to Matiu 24:46 mẹ sin wunmẹ devo wẹ yin lilẹdo “ja” to Matiu 24:30, 42, 44 mẹ.
[Kanbiọ hukan lẹ tọn]
[Apotin nudọnamẹ tọn to weda 4 5]
NUKUNBIBIA DAHO LỌ PODỌ TO GODO ETỌN
HẸNDI EGBEZANGBE TỌN
AZÁN GODO TỌN LẸ
NUJIJỌ HE SỌGBE HẸ NUJIJỌ OWHE KANWEKO TINTAN WHENU TỌN LẸ
Plidopọ Akọta lẹ tọn (“awuhiọnu”) na yangbé sinsẹ̀n Mẹylọhodotọklisti tọn (“ofi wiwe”) po sinsẹ̀n lalo he pò lẹ po (Osọ. 17:16-18)
VASUDO SINSẸ̀N LALO TỌN
Awhànpa Lomu tọn (“awuhiọnu”) yangbé Jelusalẹm po tẹmpli etọn po tọn (“ofi wiwe”)
“Awuhiọnu . . . to ote to ofi wiwe” (Mat. 24:15, 16)
(Pọ́n hukan 6)
Jehovah na ‘sán’ mẹgbeyinyan sinsẹ̀n lalo tọn ‘dogli’;
Omẹ Jiwheyẹwhe tọn lẹ na yin whinwhlẹngán
Awhànpa Lomu tọn sán mẹgbeyinyan etọn dogli; Klistiani he tin to Jelusalẹm po Jude po lẹ họnyi
“Na mẹdide lẹ tọn wutu azán enẹlẹ na yin sinsán-dogli” (Mat. 24:22)
(Pọ́n hukan 7)
OJLẸ HE VIVỌNU ETỌN
MA YIN YINYỌNẸN
Jesu na dawhẹna gbẹtọ akọta lẹpo tọn he taidi lẹngbọ lẹ kavi gbọgbọẹ lẹ (Mat. 25:31-46)
(Pọ́n hukan 12, 13)
TO OJLẸ ENẸ GBLAMẸ
“To nukunbibia azán enẹlẹ gbè tọn godo tlolo . . .” (Mat. 24:29-31)
(Pọ́n hukan 8)
Jesu na de afanumẹ nugbonọ lọ do “nutindo etọn lẹpo” ji (Mat. 24:46, 47)
(Pọ́n hukan 18)
Vasudo Akọta lẹ tọn (Osọ. 16:16)
AMAGẸDỌNI
Vasudo Jelusalẹm tọn
BẸJẸEJI GANDUDU OWHE FỌTỌ́N KLISTI TỌN
[Yẹdide to weda 7]
Kakajẹ whenue nukunbibia daho lọ na bẹjẹeji, gbẹtọ lẹ na gbẹ́ tindo whenu nado diọ nulẹnpọn yetọn
(Pọ́n hukan 13)
