Dike Nuflinmẹ Jehovah Tọn lẹ Ni Nọ Hẹn Ayajẹ Wá Na We
Dike Nuflinmẹ Jehovah Tọn lẹ Ni Nọ Hẹn Ayajẹ Wá Na We
“Yẹn nọ yí nuflinmẹ towe lẹ taidi nutindo tẹgbẹ tọn de.”—PS. 119:111, NW.
NAWẸ HIẸ NA NA GBLỌNDO GBỌN?
Whẹwhinwhẹ́n tẹwẹ mí tindo nado nọ jaya to nuflinmẹ Jehovah tọn lẹ mẹ?
Aliho tẹlẹ mẹ wẹ mí sọgan dejido Jehovah go te?
Naegbọn e do yin nujọnu nado hẹn alọnu ján to nuwiwa yẹwhehọluduta tọn lẹ mẹ?
1. (a) Aliho tẹlẹ mẹ wẹ gbẹtọvi lẹ nọ yinuwa te gando nuflinmẹ lẹ go, podọ etẹwutu? (b) Nawẹ goyiyi sọgan yinuwado nukun he mẹde do nọ pọ́n ayinamẹ ji gbọn?
ALIHO voovo mẹ wẹ gbẹtọvi lẹ nọ yinuwa te gando anademẹ he yé nọ mọyi go. Mẹde sọgan yí sisi do kẹalọyi nuflinmẹ he e mọyi sọn ogán de dè, to whenue mẹdevo sọgan gbẹ́ ayinamẹ de dai to afọdopolọji, eyin hagbẹ kavi mẹhe yìdo hú i de wẹ na ẹn. Podọ numọtolanmẹ voovo wẹ gbẹtọ lẹ nọ tindo gando mẹplọnlọ kavi nugbẹnamẹ lẹ go. Eyin mẹdelẹ mọ mẹplọnlọ yí, yé sọgan tindo numọtolanmẹ awubla, awufiẹsa, kavi winyan tọn, to whenue mẹdevo lẹ sọgan yin tulina, tindo nujikudo, bo magbe nado basi vọjlado. Naegbọn gbẹtọvi lẹ nọ yinuwa to aliho voovo enẹlẹ mẹ? Whẹwhinwhẹ́n dopo wẹ yin goyiyi. Na nugbo tọn, gbigbọ goyiyi tọn sọgan dekanpona huhlọn nulẹnpọn tọn mẹde tọn bo sisẹ́ ẹ nado gbẹ́ ayinamẹ lẹ dai, podọ gbọnmọ dali anademẹ họakuẹ lẹ nọ gbọ e go.—Howh. 16:18.
2. Naegbọn Klistiani nugbo lẹ do nọ kẹalọyi ayinamẹ sọn Ohó Jiwheyẹwhe tọn mẹ?
2 Ṣigba, Klistiani nugbo lẹ nọ kẹalọyi ayinamẹ dagbe lẹ, titengbe eyin yé sinai do Ohó Jiwheyẹwhe tọn ji. Nuflinmẹ Jehovah tọn lẹ nọ na mí zinzin, nọ plọn mí bosọ nọ gọalọna mí nado dapana omọ̀ delẹ taidi agbasanu lẹ bibẹpli, fẹnnuwiwa zanhẹmẹ tọn po amasin adinọ kavi ahàn sinsinyẹn ṣiṣizan po. (Howh. 20:1; 2 Kọl. 7:1; 1 Tẹs. 4:3-5; 1 Tim. 6:6-11) Humọ, mí nọ jaya na “homẹ vivi ayiha tọn” he mí nọ mọyi to whenue mí setonuna nuflinmẹ Jiwheyẹwhe tọn lẹ.—Isa. 65:14.
3. Ayilinlẹn psalm-kantọ lọ tọn tẹwẹ mí dona wleawuna?
3 Nado basi hihọ́na haṣinṣan họakuẹ he mí tindo hẹ Otọ́ olọn mẹ tọn mítọn, mí dona nọ hodo anademẹ nuyọnẹn tọn he Jehovah nọ na mí lẹ zọnmii to gbẹzan mítọn mẹ. Onú dagbe wẹ e yin dọ mí ni tindo ayilinlẹn dopolọ hẹ psalm-kantọ lọ he wlan dọmọ: “Yẹn nọ yí nuflinmẹ towe lẹ taidi nutindo tẹgbẹ tọn de, na ayajẹ ahun mẹ tọn wẹ yé nọ hẹnwa na mi.” (Ps. 119:111, NW) Be mílọsu nọ mọ ayajẹ to gbedide Jehovah tọn lẹ mẹ ya, kavi mí nọ pọ́n yé hlan to whedelẹnu taidi agbànpẹnmẹnu? Eyin ayinamẹ he mí nọ mọyi tlẹ gblehomẹ na mí to whedelẹnu, mí ma dona gbọjọ. Mí sọgan wleawuna jidide mlẹnmlẹn gando nuyọnẹn madodogbó Jiwheyẹwhe tọn go. Mì gbọ mí ni gbadopọnna aliho atọ̀n delẹ he na gọalọna mí nado wleawuna jidide mọnkọtọn.
ODẸ̀ NỌ GỌALỌNA MÍ NADO WLEAWUNA JIDIDE
4. Etẹwẹ ma diọ to gbẹzan Davidi tọn mẹ?
4 Ahọlu Davidi jugbọn ojlẹ awubla tọn po ayajẹ tọn po mẹ to gbẹzan etọn mẹ, ṣigba jidide mlẹnmlẹn he e tindo to Mẹdatọ etọn mẹ ma diọ. E dọmọ: “Hiẹ, OKLUNỌ E, wẹ yẹn ze ayiha ṣie do aga hlan. Jiwheyẹwhe ṣie E, yẹn dotudo go we.” (Ps. 25:1, 2) Etẹwẹ gọalọna Davidi nado wleawuna jidide mọnkọtọn to Otọ́ olọn mẹ tọn etọn mẹ?
5, 6. Etẹwẹ Ohó Jiwheyẹwhe tọn dọna mí gando haṣinṣan he Davidi tindo hẹ Jehovah go?
5 To whenue mẹsusu tin to ninọmẹ sinsinyẹn mẹ kẹdẹ wẹ yé nọ hodẹ̀ hlan Jiwheyẹwhe. Mí ni dọ dọ to whenue họntọn kavi hẹnnumẹ towe de tindo nuhudo akuẹ tọn kavi nuhudo towe kẹdẹ wẹ e nọ wá dè we. To nukọn mẹ, hiẹ sọgan jẹ ayihaawe tindo ji gando mẹwhinwhàn he wutu e do nọ dín we go. Ṣigba, Davidi ma yin omẹ mọnkọtọn. Haṣinṣan he e tindo hẹ Jehovah do yise he e tindo to Jiwheyẹwhe mẹ po owanyi he e tindo na ẹn to gbẹzan etọn mẹ po hia, yèdọ to ojlẹ ayajẹ po awubla po tọn mẹ.—Ps. 40:8.
6 Doayi hogbe pipà po pẹdido po tọn he Davidi yizan na Jehovah lẹ go: “OKLUNỌ E, Oklunọ mítọn, na oyín towe gbọnvo to aihọn lẹpo mẹ dole! Hiẹ ko ze gigo towe dote yiaga hú olọn lẹ.” (Ps. 8:1) Lehe haṣinṣan he Davidi tindo hẹ Otọ́ olọn mẹ tọn etọn siso do sọ! Pinpẹn-nutọn he Davidi tindo na gigo daho po whanpẹ Jiwheyẹwhe tọn po whàn ẹn nado nọ pagigona Jehovah “to azán lẹpo gbè.”—Ps. 35:28.
7. Ale tẹwẹ mí nọ mọyi eyin mí dọnsẹpọ Jiwheyẹwhe to odẹ̀ mẹ?
7 Taidi Davidi, mí dona nọ dọho hẹ Jehovah whẹwhẹ nado sọgan dejido ewọ go mlẹnmlẹn. Biblu dọmọ: “Mì dọnsẹpọ Jiwheyẹwhe, podọ ewọ na dọnsẹpọ mì.” (Jak. 4:8) Aliho titengbe dopo he mẹ mí sọgan mọ gbigbọ wiwe yí te wẹ nado dọnsẹpọ Jiwheyẹwhe to odẹ̀ mẹ.—Hia 1 Johanu 3:22.
8. Naegbọn mí dona dapana dọvọdọ to odẹ̀ mítọn lẹ mẹ?
8 Be hiẹ nọ dọ dọvọdọ hogbe dopolọ lẹ tọn to odẹ̀ towe lẹ mẹ wẹ ya? Eyin mọ wẹ, whẹpo hiẹ nido hodẹ̀, nọ yí whenu vude zan nado lẹnnupọndo nuhe a jlo na dọ ji. Eyin mí nọ yí hogbe dopolọ lẹ zan to whedepopenu he mí to hodọna họntọn kavi hẹnnumẹ mítọn de, be enẹ na hẹn homẹ etọn hùn ya? Ewọ tlẹ sọgan jẹ tókúkú do nuhe mí nọ dọna ẹn lẹ mẹ ji. Nugbo wẹ dọ Jehovah ma na nọma kẹalọyi odẹ̀ ahundopo tọn he devizọnwatọ nugbonọ etọn de hò hlan ẹn. Ṣigba, mí dona dapana dọvọdọ to whenue mí to dẹ̀ho.
9, 10. (a) Etẹlẹ go wẹ mí sọgan hodẹ̀ gando? (b) Etẹwẹ sọgan gọalọna mí nado nọ hodẹ̀ he tindo zẹẹmẹ lẹ hlan Jehovah?
9 Na nugbo tọn, eyin mí jlo na dọnsẹpọ Jiwheyẹwhe, mí ma dona nọ hodẹ̀ to aliho mọmọ tọn mẹ gba. Lehe mí nọ dọ nuhe tin to ahun mítọn mẹ na Jehovah sọ, mọ wẹ mí na dọnsẹpọ ewọ bo nasọ dejido ewọ go do niyẹn. Ṣigba, etẹlẹ go wẹ mí sọgan hodẹ̀ gando? Ohó Jiwheyẹwhe tọn gblọn dọmọ: “To onú lẹpo mẹ, mì nọ yí odẹ̀, ovẹ̀, po pẹdido po do hẹn obiọ mìtọn lẹ zun yinyọnẹn na Jiwheyẹwhe.” (Flp. 4:6) Mí sọgan hodẹ̀ gando nudepope he sọgan yinuwado haṣinṣan he mí tindo hẹ Jiwheyẹwhe ji kavi do gbẹzan mítọn taidi dopo to devizọnwatọ etọn lẹ mẹ go ji.
10 Mí sọgan plọn nususu eyin mí gbadopọnna hogbe he sunnu po yọnnu nugbonọ lẹ po yizan to odẹ̀ yetọn he yin kinkandai to Biblu mẹ lẹ mẹ. (1 Sam. 1:10, 11; Owalọ 4:24-31) Mí sọgan mọ odẹ̀ ahundopo tọn po ohàn susu he yin jiji hlan Jehovah lẹ po to owe Psalm tọn mẹ. Numọtolanmẹ gbẹtọvi tọn voovo lẹ sọawuhia to odẹ̀ po ohàn enẹlẹ po mẹ, yèdọ sọn awufiẹsa sinsinyẹn ji kakajẹ ayajẹ mayọnjlẹ ji. Nulinlẹnpọn do hogbe nugbonọ enẹlẹ tọn ji sọgan gọalọna mí nado nọ hodẹ̀ he tindo zẹẹmẹ lẹ hlan Jehovah.
NỌ LẸNAYIHAMẸPỌN DO NUFLINMẸ JIWHEYẸWHE TỌN LẸ JI
11. Naegbọn mí dona nọ lẹnnupọndo ayinamẹ Jiwheyẹwhe tọn lẹ ji?
11 Davidi dọmọ: “Nuflinmẹ Jehovah tọn sọgan yin jidedego, bo nọ hẹn wunvinọ zun nuyọnẹntọ.” (Ps. 19:7, NW) Na nugbo tọn, eyin mí tlẹ yin wunvinọ, mí sọgan lẹzun nuyọnẹntọ gbọn tonusena gbedide Jiwheyẹwhe tọn lẹ dali. Ṣigba, nado mọaleyi to gigọ́ mẹ sọn ayinamẹ Owe-wiwe tọn delẹ mẹ, mí dona nọ lẹnayihamẹpọn do yé ji. Ayinamẹ Owe-wiwe tọn mọnkọtọn lẹ bẹ tenọgligo-hinhẹn to whenue mí tin to kọgbidinamẹ glọ to wehọmẹ kavi to azọ́nmẹ, titẹdo nujinọtedo Jiwheyẹwhe tọn gando hùndido go, kadaninọ Klistiani tọn, podọ nunọwhinnusẹ́n Biblu tọn lẹ gando nusisọ́ po aṣọ́dido po go yíyí do yizan mẹ hẹn. Eyin mí yọ́n linlẹn Jiwheyẹwhe tọn gando whẹho mọnkọtọn lẹ go, enẹ na gọalọna mí nado mọ nuhahun lẹ hlan nukọn. Enẹgodo mí sọgan magbe to ahun mítọn mẹ gando nuhe mí na wà go eyin ninọmẹ lọ wá fọndote. Eyin mí nọ lẹnnupọn bo nọ wleawudai jẹnukọn, ehe na gọalọna mí nado dapana nuhahun susu.—Howh. 15:28.
12. Ayihamẹlinlẹnpọn do kanbiọ tẹlẹ ji wẹ na gọalọna mí nado hẹn nuflinmẹ Jiwheyẹwhe tọn lẹ go?
12 Dile mí to tenọpọn hẹndi opagbe Jiwheyẹwhe tọn lẹ tọn, be gbẹzan mítọn nọ dohia dọ mí to nukle to gbigbọ-liho ya? Di apajlẹ, be mí yise nugbonugbo dọ Babilọni Daho lọ na yin vivasudo to madẹnmẹ ya? Be dona sọgodo tọn lẹ taidi ogbẹ̀ madopodo to paladisi aigba ji tọn mẹ gbẹ́ yin nujọnu na mí dile e yindo to whenue mí plọnnu gando yé go to tintan whenu ya? Be mí hẹn zohunhun mítọn go to lizọnyizọn lọ mẹ kakati nado dike whẹho mẹdetiti tọn lẹ ni yí otẹn tintan to gbẹzan mítọn mẹ ya? Be todido fọnsọnku tọn, klandowiwe yinkọ Jehovah tọn po whẹsuna nupojipetọ-yinyin etọn po gbẹ́ yin whẹho titengbe lẹ na mí ya? Dile psalm-kantọ lọ dọ do, ayihamẹlinlẹnpọn do kanbiọ mọnkọtọn lẹ ji sọgan gọalọna mí nado “yí nuflinmẹ [Jiwheyẹwhe tọn] lẹ taidi nutindo tẹgbẹ tọn de.”—Ps. 119:111, NW.
13. Naegbọn e do vẹawuna Klistiani owhe kanweko tintan tọn lẹ nado mọnukunnujẹ onú delẹ mẹ? Na apajlẹ.
13 Mí ma sọgan mọnukunnujẹ nuhe yin didọ to Biblu mẹ delẹ mẹ todin, na ojlẹ ma ko sọ na Jehovah nado hẹn yé họnwun wutu. Whlasusu wẹ Jesu dọna apọsteli etọn lẹ dọ emi dona jiya bo yin hùhù. (Hia Matiu 12:40; 16:21.) Ṣigba, apọsteli lẹ ma mọnukunnujẹ nuhe dọ e te mẹ. Yé wá mọnukunnujẹemẹ to okú po fọnsọnku etọn po godo, to whenue ewọ yí agbasa gbẹtọvi tọn do bo sọawuhia delẹ to devi lẹ mẹ, bosọ “hùn ayiha yetọn to gigọ́ mẹ nado mọnukunnujẹ zẹẹmẹ Owe-wiwe lẹ tọn mẹ.” (Luku 24:44-46; Owalọ 1:3) Humọ, hodotọ Klisti tọn lẹ ma mọnukunnujẹemẹ dọ olọn mẹ wẹ Ahọluduta Jiwheyẹwhe tọn na yin didoai te kakajẹ whenue gbigbọ wiwe kọ̀n jẹgbonu do yé ji to Pẹntikọsti 33 W.M.—Owalọ 1:6-8.
14. To bẹjẹeji owhe 1900 lẹ tọn, apajlẹ dagbe tẹwẹ mẹmẹsunnu susu zedai mahopọnna dọ yé tindo nukunnumọjẹnumẹ agọ̀ delẹ gando azán godo tọn lẹ go?
14 Mọdopolọ, to bẹjẹeji owhe 1900 lẹ tọn, Klistiani nugbo lẹ tindo nukundido he ma sọgbe delẹ gando “azán godo tọn lẹ” go. (2 Tim. 3:1) Di apajlẹ to 1914, mẹdelẹ lẹndọ yé na yin zize yì olọn mẹ to madẹnmẹ. To whenue nulẹ ma wá yì dile yé lẹn do, yé vọ́ dogbapọnna Owe-wiwe lẹ po sọwhiwhe po bo wá doayi e go dọ azọ́n yẹwhehodidọ tọn pligidi de na yin wiwà jẹnukọnna opodo. (Malku 13:10) Enẹwutu, to 1922, J. F. Rutherford he to nukunpedo azọ́n yẹwhehodidọ tọn go to whenẹnu dọna mẹhe wá plidopọ akọjọpli tọn lẹ to Cedar Point, Ohio, États-Unis d’Amérique dọmọ: “Mì doayi e go, Ahọlu lọ to gandu! Mìwlẹ wẹ lilátọ etọn lẹ. Enẹwutu mì lá, mì lá, mì lá Ahọlu lọ po ahọluduta etọn po.” Sọn whenẹnu, yẹwheho “wẹndagbe ahọluduta lọ tọn” didọ lẹzun ohia he yè do nọ yọ́n devizọnwatọ Jehovah tọn egbezangbe tọn lẹ.—Mat. 4:23; 24:14.
15. Nawẹ mí nọ mọaleyi sọn ayihamẹlinlẹnpọn do aliho he mẹ Jiwheyẹwhe yinuwa hẹ omẹ etọn lẹ te ji mẹ gbọn?
15 Eyin mí nọ lẹnayihamẹpọn do aliho jiawu he mẹ Jehovah yinuwa hẹ omẹ etọn lẹ to hohowhenu podọ to egbehe te ji, mí na tindo jidide dogọ dọ ewọ penugo nado hẹn ojlo etọn po lẹndai etọn na sọgodo po di. To ojlẹ dopolọ mẹ, nuflinmẹ Jiwheyẹwhe tọn lẹ nọ gọalọna mí nado hẹn dọdai etọn he ma ko mọ hẹndi lẹ do ayiha po ahun mítọn po mẹ. Mí sọgan deji dọ mọwiwà na gọalọna mí nado tindo jide mlẹnmlẹn gando opagbe etọn lẹ go.
WLEAWUNA JIDIDE DILE HIẸ TO JIWHEYẸWHE SẸ̀N
16. Dona tẹlẹ wẹ mí nọ mọyi eyin mí hẹn alọnu ján to lizọnyizọn lọ mẹ?
16 Jehovah Jiwheyẹwhe mítọn yin Jiwheyẹwhe huhlọnnọ he nọ yinuwa. Psalm-kantọ lọ kanse dọmọ: ‘Mẹnu wẹ dohuhlọn di hiẹ, Jah E?’ E yidogọ dọmọ: “Sinsinyẹn wẹ alọ towe, adusilọ towe wẹ yiaga.” (Ps. 89:8, 13) Enẹwutu, Jehovah nọ yọ́n pinpẹn vivẹnu he mí nọ do nado nọgodona Ahọluduta lọ lẹ tọn bosọ nọ dona mí. E nọ mọdọ devizọnwatọ emitọn lẹ ma nọ blá alọ dogo bo nọ dù “núdùdù adidọ tọn,” vlavo yé yin sunnu kavi yọnnu, mẹho kavi yọpọ. (Howh. 31:27) Nado hodo apajlẹ Mẹdatọ mítọn tọn, mí nọ hẹn alọnu mítọn ján to nuwiwa yẹwhehọluduta tọn lẹ mẹ. Jiwheyẹwhe sinsẹ̀n po ahun lẹpo po nọ hẹn ale wá na mí, podọ e sọ nọ hẹn homẹhun Jiwheyẹwhe, mẹhe nọ dona lizọnyizọn mítọn.—Hia Psalm 62:12.
17, 18. Naegbọn mí sọgan dọ dọ nuyiwa yise tọn lẹ nọ gọalọna mí nado wleawuna jidide to ayinamẹ Jehovah tọn lẹ mẹ? Na apajlẹ.
17 Aliho tẹlẹ mẹ wẹ nuyiwa yise tọn lẹ sọgan gọalọna mí nado wleawuna jidide do Jehovah go te? Lẹnnupọndo kandai Owe-wiwe lẹ tọn he dọho gando lehe Islaelivi lẹ biọ Aigba Pagbe tọn mẹ do go ji. Jehovah degbena yẹwhenọ he hẹn aki alẹnu tọn lọ lẹ nado zinzọnlin tlọlọ biọ Tọ̀sisa Jọdani mẹ. Ṣigba, dile akọta lọ sẹpọ tọ̀sisa lọ, yé doayi e go dọ e ko gọfla, na jikun amakikọ-whenu tọn wutu. Etẹwẹ Islaelivi lẹ na wà? Be yé na whèsla do tọ̀sisa lọ tó bo nọtena osẹ susu lẹ na otọ̀ lọ nido depò wẹ ya? Lala, yé dejido Jehovah go mlẹnmlẹn, bo hodo anademẹ etọn. Etẹwẹ yin kọdetọn lọ? Kandai lọ dọmọ: ‘Whenuena yẹwhenọ he hẹn aki lọ lẹ ze afọ yetọn do osin mẹ to tọ̀sisa lọ tó, osin he to sisà sọn aga lẹ nọte guun, gbẹtọ lọ lẹ sọ dasá to fie pannukọn Jẹliko. Yẹwhenọ he hẹn aki alẹnu Jehovah tọn lọ nọtegli to aigba húhú ji to ṣẹnṣẹn Jọdani tọn, Islaeli lẹpo sọ juwayi to aigba húhú ji.’ (Jọṣ. 3:12-17) Lehe enẹ na ko whàn yé do sọ to whenue osin he to adán ji enẹ nọte guun! Na nugbo tọn, yise Islaelivi lẹ tọn yin hinhẹn lodo, na yé dejido anademẹ Jehovah tọn lẹ go wutu.
18 Nugbo wẹ dọ, Jehovah ma nọ wà azọ́njiawu mọnkọtọn lẹ do omẹ etọn lẹ tamẹ to egbehe, ṣigba e nọ dona nuyiwa yise tọn yetọn lẹ. Huhlọn-yido-wazọ́n Jiwheyẹwhe tọn nọ na yé huhlọn nado wà azọ́n yẹwhehodidọ wẹndagbe Ahọluduta lọ tọn lẹdo aihọn pé. Podọ Kunnudetọ tintan Jehovah tọn, yèdọ Jesu Klisti he yin finfọnsọnku lọ, na jide devi etọn lẹ dọ emi na nọgodona yé to azọ́n titengbe enẹ mẹ to whenue e dọmọ: “Enẹwutu, mì yì bo hẹn gbẹtọ lẹ sọn akọta lẹpo mẹ zun devi lẹ . . . Yẹn tin po mì po to azán lẹpo gbè kakajẹ vivọnu titonu lọ tọn.” (Mat. 28:19, 20) Susu Kunnudetọ he nọ kuwinyan kavi nọ dibu lẹ tọn sọgan dọ po nujikudo po dọ gbigbọ wiwe Jiwheyẹwhe tọn ko na yé adọgbigbo nado sọgan dọhona mẹhe yé ma yọnẹn lẹ to lizọnyizọn lọ mẹ.—Hia Psalm 119:46; 2 Kọlintinu lẹ 4:7.
19. Mahopọnna madogán mítọn lẹ, jidenamẹ tẹwẹ mí tindo?
19 Azọ̀n kavi yọnhowhe ko zọ́n bọ mẹmẹsunnu po mẹmẹyọnnu mítọn delẹ po ko lẹzun madogánnọ. Etomọṣo, yé sọgan deji dọ “Otọ́ Oklunọ mítọn Jesu Klisti tọn, Otọ́ lẹblanu sisosiso lẹ tọn podọ Jiwheyẹwhe homẹmimiọn lẹpo tọn” mọnukunnujẹ ninọmẹ Klistiani nugbo dopodopo tọn mẹ. (2 Kọl. 1:3) Ewọ nọ yọ́n pinpẹn nuhe mí nọ wà nado nọgodona Ahọluduta lọ lẹ tọn. Mímẹpo dona hẹn do ayiha mẹ dọ yise he mí tindo to ofligọ Klisti tọn mẹ wẹ onú titengbe he hẹn alindọn mítọn dogbẹ̀ dile mí to nuhe go mí pé lẹpo wà.—Heb. 10:39.
20, 21. Aliho tẹlẹ mẹ wẹ mí sọgan dohia dọ mí dejido Jehovah go te?
20 E nọ biọ dọ mí ni yí whenu, huhlọn po nutindo mítọn lẹ po zan to gigọ́ mẹ to sinsẹ̀n-bibasi mítọn mẹ dile e sọgan yọnbasi do. Na nugbo tọn, ojlo mítọn wẹ nado “wà azọ́n wẹndagbe-jlatọ tọn” po ahun lẹpo po. (2 Tim. 4:5) Nugbo lọ wẹ yindọ, mí nọ wàmọ po ayajẹ po, na ehe nọ gọalọna mẹdevo lẹ nado “wá oyọnẹn he pegan nugbo tọn kọ̀n.” (1 Tim. 2:4) E họnwun dọ, gbégbigbò po gigopipana Jehovah po nọ hẹn mí wàdọkun to gbigbọ-liho. (Howh. 10:22) Humọ, e nọ gọalọna mí nado wleawuna jidide mlẹnmlẹn to Mẹdatọ mítọn mẹ.—Lom. 8:35-39.
21 Dile mí ko dọ do, nado ganjẹ Jehovah go nado mọ anademẹ nuyọnẹn tọn yí, mí ma dona blá alọ dogo, ṣigba mí dona yí nude wà. Enẹwutu, nọ wà nuhe go a pé lẹpo nado nọ ganjẹ Jehovah go to odẹ̀ mẹ. Nọ lẹnayihamẹpọn do lehe Jehovah hẹn ojlo etọn lẹ di to hohowhenu do po lehe e na wàmọ to sọgodo do po ji. Podọ zindonukọn nado to awuwlena jidide do Jehovah go dile hiẹ to sinsẹ̀n-basi hlan ẹn. Na nugbo tọn, nuflinmẹ Jehovah tọn lẹ na gbọṣi aimẹ kakadoi, podọ hiẹ lọsu sọgan nọgbẹ̀ kakadoi!
[Kanbiọ hukan lẹ tọn]
[Yẹdide to weda 15]
Be hiẹ na do yise hia taidi omẹ Jehovah tọn he nọgbẹ̀ to azán Jọṣua tọn gbè lẹ ya? (Pọ́n hukan 17, 18)
