Nọ Basi Nudide Towe lẹ po Nuyọnẹn Po
Nọ Basi Nudide Towe lẹ po Nuyọnẹn Po
“Yí ayiha towe do dotudo OKLUNỌ go; a dẹ́ hlan dewe tọn dali blo.”—HOWH. 3:5.
NAWẸ HIẸ NA NA GBLỌNDO GBỌN?
Etẹwẹ e zẹẹmẹdo nado nọ basi nudide lẹ po wunza po?
Nawẹ mí sọgan wleawuna nugopipe lọ nado nọ basi nudide nuyọnẹn tọn lẹ gbọn?
Etẹwẹ na gọalọna mí nado nọ yinuwa sọgbe hẹ nudide he mí basi lẹ?
1, 2. Be hiẹ yiwanna nado nọ basi nudide lẹ ya, podọ etẹwẹ hiẹ lẹn gando nudide he a ko basi delẹ go?
NUDIDE susu wẹ mí nọ basi egbesọegbesọ. Etẹwẹ nọ yin numọtolanmẹ towe gando nudide bibasi go? Mẹdelẹ nọ yiwanna nado basi nudide lẹpo na yede. Mẹdelẹ nọ tẹkudeji dọ emi tindo jlọjẹ nado basi nudide emitọn titi lẹ, bo tlẹ nọ jẹagọdo linlẹn lọ dọ mẹdevo ni basi nudide na yé. Ṣigba, mẹdevo lẹ nọ dibu nado basi nudide sinsinyẹn lẹ. Mẹdelẹ nọ dín anademẹ sọn owe lẹ mẹ kavi sọn ayinamẹtọ lẹ dè, bo sọgan zan akuẹ susu nado mọ ayinamẹ he yé lẹndọ emi tindo nuhudo etọn lẹ yí.
2 Nuyiwa mẹdelẹ tọn to mí mẹ nọ bẹ adà voovo he mí donù e go wayi enẹlẹ hẹn. Mí nọ mọdọ nudide delẹ tin he zẹ̀ huhlọn mítọn go, podọ nude ma tin he mí sọgan wà gando yé go, ṣigba mí yọ́n pinpẹn etọn dọ mí sọgan basi nudide lẹ to adà voovo gbẹzan mítọn tọn mẹ sọgbe hẹ nujlomẹ mítọn lẹ. (Gal. 6:5) Etomọṣo, mí sọgan yigbe dọ mí ma nọ basi nudide mítọn lẹpo po nuyọnẹn po, podọ e ma yin yemẹpo wẹ nọ hẹn ale wá na mí.
3. Anademẹ tẹlẹ wẹ mí tindo gando nudide lẹ bibasi go, ṣigba avùnnukundiọsọmẹnu tẹlẹ wẹ mí nọ pehẹ?
3 Taidi devizọnwatọ Jehovah tọn lẹ, homẹ mítọn hùn dọ ewọ na mí anademẹ he họnwun lẹ gando whẹho titengbe lẹ go to gbẹ̀mẹ. Mí yọnẹn dọ eyin mí hodo anademẹ enẹlẹ, mí sọgan basi nudide he na hẹn homẹ Jehovah tọn hùn bosọ hẹn ale wá na mí lẹ. Etomọṣo, mí sọgan pehẹ whẹho kavi ninọmẹ delẹ he ji Ohó Jiwheyẹwhe tọn ma dọhodo tlọlọ. To whelọnu lo, nawẹ mí sọgan yọ́n nudide he mí na basi gbọn? Di apajlẹ, mí yọnẹn dọ mí ma dona fìnnú. (Efe. 4:28) Ṣigba, etẹwẹ ajojijẹ zẹẹmẹdo taun? Be mẹwhinwhàn ajotọ lọ tọn, lehe nuhe yin finfin lọ họakuẹ sọ wẹ nọ do nuhe ajojijẹ yin hia ya kavi nudevo? Nawẹ mí sọgan basi nudide gbọn eyin mẹdevo lẹ dọ dọ anademẹ he họnwun de ma tin gando whẹho lọ go? Etẹwẹ sọgan gọalọna mí nado basi nudide dagbe?
NỌ BASI NUDIDE TOWE LẸ PO WUNZA PO
4. Ayinamẹ tẹwẹ Klistiani de sọgan ko na mí to whenue mí jlo na basi nudide titengbe de?
4 Eyin mí dọna Klistiani hatọ de dọ mí jlo na basi nudide titengbe de, ewọ sọgan na mí ayinamẹ nado hẹn ẹn diun dọ mí basi nudide lọ po wunza po. Na nugbo tọn, ayinamẹ dagbe de wẹ enẹ yin. Biblu na mí avase ma nado nọ nọ̀ plaplaji do basi nudide dọmọ: “Dopodopo mẹhe yawu tọn, hlan matindo mẹ wẹ.” (Howh. 21:5) Ṣigba, etẹwẹ e zẹẹmẹdo nado yinuwa po wunza po? Be e zẹẹmẹdo dọ mí dona yí whenu zan, lẹnnupọndo whẹho lọ ji, yin lẹnpọn dagbenọ bo yí wuntuntun zan wẹ ya? Dile etlẹ yindọ ehe lẹpo sọgan gọalọna mí nado basi nudide dagbe, nuyiwa po wunza po nọ bẹ nususu hẹn hugan mọ.—Lom. 12:3; 1 Pita 4:7.
5. Naegbọn mí ma do tindo ayiha pipé de?
5 Mí dona yigbe dọ depope to mí mẹ ma yin jiji po ayiha pipé de po. Etẹwutu? Na mímẹpo wẹ yin jiji do ylando mẹ bo yin mapenọ wutu, e họnwun dọ mí ma sọgan yin mẹpipe to agbasa mẹ podọ to ayiha mẹ. (Ps. 51:5; Lom. 3:23) Humọ, to ojlẹ de mẹ wayi, susu mítọn wẹ tin to mẹhe Satani “tọ́nnukunna” ayiha yetọn lẹ mẹ, bosọ tin to wunvi mẹ gando Jehovah po nujinọtedo dodo tọn etọn lẹ po go. (2 Kọl. 4:4; Titu 3:3) Enẹwutu, eyin mí nọ ze nudide mítọn lẹ sinai do nuhe mí lẹndọ e yọ́n bosọ sọgbe lẹ kẹdẹ ji, mí sọgan basi nudide he ma sọgbe mahopọnna obá he mẹ mí lẹnnupọn jẹ whẹpo do basi nudide lọ.—Howh. 14:12.
6. Etẹwẹ sọgan gọalọna mí nado wleawuna wunza?
6 To vogbingbọn mẹ na gbẹtọvi lẹ he yin mapenọ to agbasa mẹ podọ to ayiha mẹ, Jehovah Otọ́ olọn mẹ tọn mítọn yin mẹpipe to adà lẹpo mẹ. (Deut. 32:4) Homẹhunnu wẹ e yin dọ ewọ nọ gọalọna mí nado diọ aliho nulẹnpọn tọn mítọn bo wleawuna wunza. (Hia 2 Timoti 1:7.) Taidi Klistiani lẹ, ojlo mítọn wẹ nado nọ lẹnnupọn ganji bo nọ yinuwa po nuyọnẹn po. Enẹwutu, mí dona nọ deanana linlẹn po numọtolanmẹ mítọn lẹ po nado hẹn yé sọgbe hẹ nuyiwa, numọtolanmẹ po linlẹn Jehovah tọn lẹ po.
7, 8. Na apajlẹ de he do lehe mẹde sọgan basi nudide nuyọnẹn tọn mahopọnna kọgbidinamẹ kavi nuhahun akuẹzinzan tọn do hia.
7 Lẹnnupọndo apajlẹ de ji. Aṣa he gbayipe to mẹhe tin to tògodo delẹ ṣẹnṣẹn wẹ yindọ eyin yé jivi, yé dona do ovi lọ hlan hẹnnumẹ yetọn lẹ to owhé na yé nido penukundego, gbọnmọ dali yelọsu nọ vò nado wazọ́n bo dín akuẹ. a Nawe de he tin to tògodo ji visunnu dagbedagbe de. To ojlẹ lọ mẹ, ewọ ko jẹ Biblu plọn ji bosọ to nukọnyi to gbigbọ-liho. Họntọn etọn po hẹnnumẹ etọn lẹ po jẹ kọgbidina ewọ po asu etọn po ji nado do ovi lọ hlan mẹjitọ yetọn lẹ to owhé. Ṣigba, nuhe yọnnu lọ to pinplọn lẹ gọalọna ẹn nado mọnukunnujẹemẹ dọ taidi mẹjitọ, ewọ wẹ Jiwheyẹwhe ze azọngban lọ do alọmẹ na nado pọ́n ovi etọn go whẹ́n. (Ps. 127:3; Efe. 6:4) Be ewọ na hodo aṣa enẹ he mẹsusu nọ pọnhlan taidi nuhe sọgbe wẹ ya? Kavi ewọ na yinuwa sọgbe hẹ nuhe plọn e te to Biblu mẹ, bo pehẹ nuhahun akuẹzinzan tọn bosọ doakọnna homọdọdomẹgo? Etẹwẹ hiẹ na ko wà eyin a tin to ninọmẹ etọn mẹ?
8 Na nawe lọ biọ bẹwlu mẹ bosọ jẹflumẹ wutu, e hodẹ̀ vẹkuvẹku hlan Jehovah nado dín anademẹ etọn. To whenue nawe lọ dọho hẹ mẹmẹyọnnu he nọ plọn Biblu hẹ ẹ podọ hẹ hagbẹ agun lọ tọn devo lẹ gando whẹho lọ go, e jẹ nukunnumọjẹ pọndohlan Jehovah tọn gando whẹho lọ go mẹ ji. Ewọ sọ doayi e go dọ ovi pẹvi lọ sọgan jiya to numọtolanmẹ-liho eyin ewọ yin didesọn mẹjitọ etọn lẹ dè. To whenue ewọ ko gbadopọnna whẹho lọ sọgbe hẹ nuhe Owe-wiwe lẹ dọ godo, ewọ wá tadona lọ kọ̀n dọ e ma sọgbe nado do viyẹyẹ lọ hlan whé. Asu etọn lọsu doayi lehe hagbẹ agun lọ tọn lẹ kọngbedopọ nado gọalọna yé do go, podọ lehe ovivu lọ to whinwhẹ́n bosọ yin ayajẹnọ do go. Enẹwutu, e kẹalọyi plọnmẹ Biblu bo jẹ opli lẹ yì ji to pọmẹ hẹ asi etọn.
9, 10. Etẹwẹ e zẹẹmẹdo nado tindo wunza, podọ nawẹ mí sọgan wleawuna ẹn gbọn?
9 Apajlẹ dopo poun wẹ enẹ yin, ṣigba apajlẹ lọ dohia dọ nado tindo wunza bẹ nususu hẹn hugan nado wà nuhe mílọsu kavi mẹdevo lẹ lẹndọ e sọgbe bo bọawu. Mí sọgan yí ayiha po ahun mapenọ mítọn lẹ po jlẹdo alọkọ-gàn he nọ họ̀nwezun zẹjlẹgo kavi he nọ zọ̀n dẹẹdẹ taun de go. Eyin mí ganjẹ alọkọ-gàn enẹ go, enẹ sọgan hẹn nuhahun sinsinyẹn wá na mí. (Jel. 17:9) Onú dagbe wẹ e yin dọ mí ni nọ yí nujinọtedo dejidego Jiwheyẹwhe tọn lẹ zan nado deanana ayiha po ahun mítọn po.—Hia Isaia 55:8, 9.
10 Abajọ Biblu na mí avase dọmọ: “Yí ayiha towe do dotudo OKLUNỌ go; a dẹ́ hlan dewe tọn dali blo. Yọ́n ẹn to aliho towe lẹpo ji, ewọ nasọ jlọ omọ́ towe.” (Howh. 3:5, 6) Doayi e go dọ wefọ lọ dọ dọ “a dẹ́ hlan dewe tọn dali blo.” Enẹgodo e dọmọ: “Yọ́n [Jehovah].” Ewọ wẹ mẹlọ he tindo wunza pipé. Enẹwutu, whedepopenu he mí jlo na basi nudide de, mí dona nọ yí Biblu zan nado yọ́n pọndohlan Jiwheyẹwhe tọn gando whẹho lọ go. Enẹgodo, mí sọgan ze nudide mítọn lẹ sinai do nuhe e dọ ji. Nuhe e zẹẹmẹdo nado tindo wunza niyẹn, yèdọ nado nọ yinuwa sọgbe hẹ pọndohlan Jehovah tọn.
PLỌN HUHLỌN WUNTUNTUN TỌN TOWE
11. Etẹwẹ mẹde dona wà nado nọ basi nudide nuyọnẹn tọn lẹ?
11 E ma nọ bọawu nado basi nudide nuyọnẹn tọn bo yinuwa sọgbe hẹ ẹ. Enẹ sọgan yin avùnnukundiọsọmẹnu de titengbe na mẹhe yin mẹyọyọ to nugbo mẹ lẹ kavi mẹhe ṣẹṣẹ jẹ vivẹnudo ji nado whèwhín to gbigbọ-liho lẹ. Etomọṣo, mẹhe Biblu dlẹnalọdo taidi ovivu to gbigbọ-liho enẹlẹ sọgan basi nukọnyiyi nujọnu tọn. Lẹnnupọndo lehe ovi pẹvi de nọ plọn zọnlinzinzin do ji. To paa mẹ, nado penugo bo zinzọnlin ganji, ovi lọ dona jẹ afọ dopodopo de ji bosọ nọ wàmọ whẹwhẹ. Nudopolọ wẹ e yin na mẹhe yin ovivu to gbigbọ-liho lẹ, eyin e jẹ whẹho nudide nuyọnẹn tọn bibasi ji. Flindọ apọsteli Paulu basi zẹẹmẹ mẹhe whèwhín lẹ tọn taidi “mẹhe ko plọn huhlọn wuntuntun tọn yetọn gbọn yíyí i zan dali nado nọ yọ́n vogbingbọn to dagbe po oylan po ṣẹnṣẹn.” Hogbe lọ lẹ “plọn” po “gbọn yíyí i zan dali” po zẹẹmẹdo dọ mẹlọ dona to vivẹnudo zọnmii podọ nuhe mẹyọyọ lẹ dona wà niyẹn.—Hia Heblu lẹ 5:13, 14.
12. Nawẹ mí sọgan wleawuna nugopipe lọ nado nọ basi nudide nuyọnẹn tọn lẹ gbọn?
12 Dile mí ko dọ do wayi, nudide susu lẹ wẹ mí nọ basi egbesọegbesọ, yèdọ pẹvi po daho po. Sọgbe hẹ dodinnanu de, nudide he hugan 40 to kanweko ji wẹ mí nọ basi matin nulinlẹnpọn jẹnukọn. Di apajlẹ, hiẹ nọ basi nudide avọ̀ he hiẹ na do lẹ tọn to afọnnu lẹpo. Hiẹ sọgan nọ pọ́n enẹ taidi nutata, bo ma na nọ lẹnnupọn sọmọ whẹpo do basi nudide towe, titengbe eyin a to whlẹndo ji. Ṣigba, nujọnu wẹ e yin dọ mí ni nọ lẹnnupọndo nusisọ́ mítọn ji, bo hẹn ẹn diun dọ enẹ do mí hia taidi devizọnwatọ Jehovah tọn. (2 Kọl. 6:3, 4) To whenue hiẹ jlo na họ̀ avọ̀ de, a sọgan lẹnnupọndo aliho he mẹ e yin titọ̀ te ji, ṣigba be a nọ lẹnnupọndo jlẹkajininọ po akuẹ etọn po ji ya? Nudide he sọgbe bibasi to whẹho ehelẹ mẹ na gọalọna mí nado plọn huhlọn wuntuntun tọn mítọn, podọ enẹ na zọ́n bọ mí na nọ basi nudide he sọgbe to whẹho he sinyẹn hugan lẹ mẹ.—Luku 16:10; 1 Kọl. 10:31.
WLEAWUNA OJLO LỌ NADO WÀ NUHE SỌGBE
13. Etẹwẹ na gọalọna mí nado hẹn ẹn diun dọ mí nọ yinuwa sọgbe hẹ nudide he mí basi lẹ?
13 Mímẹpo wẹ yọnẹn dọ onú dopo wẹ nado basi nudide he sọgbe, ṣigba onú devo pete wẹ nado tẹdo nudide lọ go bo yinuwa sọgbe hẹ ẹ. Di apajlẹ, mẹhe nọ nù siga delẹ nọ jlo na doalọtena siga nùnù bo nọ gboawupo, na gbemima yetọn ma sinyẹn sọmọ wutu. Mí dona magbe sinsinyẹn nado ze afọdide he jẹ lẹ bo dovivẹnu nado yinuwa sọgbe hẹ nudide mítọn lẹ. To whelọnu lo, etẹwẹ sọgan gọalọna mí nado wàmọ? Mí dona nọ lẹhlan Jehovah dè.—Hia Filippinu lẹ 2:13.
14. Naegbọn Paulu penugo bo wà nuhe ewọ yọnẹn dọ emi dona wà?
14 Numimọ Paulu tọn gọalọna ẹn nado yọnẹn dọ e ma nọ bọawu nado wà nuhe sọgbe. Ewọ wule to gbèdopo dọmọ: “Nugopipe nado jlo tin to yẹn mẹ, ṣigba nugopipe nado wà nuhe yin dagbe ma tin.” Ewọ yọ́n nuhe e jlo kavi dona wà, ṣigba to whedelẹnu, nude nọ glọnalina ẹn nado wà nulọ. E yigbe dọmọ: “Na taun tọn, yẹn nọ mọ awuvivi to osẹ́n Jiwheyẹwhe tọn mẹ sọgbe hẹ mẹhe yẹn yin to homẹ, ṣigba yẹn mọ osẹ́n devo to awutugonu ṣie lẹ mẹ he to awhànfun sọta osẹ́n ayiha ṣie mẹ tọn bo to hinhẹn mi zun kanlinmọ na osẹ́n ylando tọn he tin to awutugonu ṣie lẹ mẹ.” Be ewọ tindo todido depope ya? Gbau! Na e dọmọ: “Opẹ́ wẹ na Jiwheyẹwhe gbọn Jesu Klisti Oklunọ mítọn gblamẹ!” (Lom. 7:18, 22-25) E wlan to wefọ devo mẹ dọmọ: “To onú lẹpo mẹ, yẹn tindo huhlọn lọ gbọn ewọ he nọ na mi huhlọn dali.”—Flp. 4:13.
15. Nawẹ afọdide nujikudo tọn zize kavi awugbopo nado wàmọ sọgan yinuwado mẹhe go e gando lẹ ji gbọn?
15 E họnwun dọ e nọ biọ nuyiwa nujikudo tọn nado hẹn homẹ Jiwheyẹwhe tọn hùn. Flin hogbe he Elija yizan na Baali sẹ̀ntọ po Islaelivi atẹṣitọ lẹ po to Osó Kalmẹli kọ̀n dọmọ: “Nawẹ mìwlẹ gbẹ́zọ̀n linlẹn awe ṣẹnṣẹn dẹn sọle? Eyin OKLUNỌ yin Jiwheyẹwhe, mì hodo e: ṣigba e sọ yin Baali, be mì bo to hihodo e.” (1 Ahọ. 18:21) Islaelivi lẹ yọ́n nuhe yé dona ko wà, ṣigba yé “gbẹ́zọ̀n” to linlẹn awe ṣẹnṣẹn. To alọ devo mẹ, Jọṣua ze apajlẹ dagbe dai to owhe delẹ jẹnukọn to whenue e dọna Islaelivi lẹ dọmọ: “Eyin e sọawuhia di oylan na mì nado sẹ̀n OKLUNỌ, mì bo de to azán he gbè mẹhe mì na nọ sẹ̀n . . . Na yẹn tọn po owhé ṣie po, míwlẹ na OKLUNỌ lọ sẹ̀n.” (Jọṣ. 24:15) Etẹwẹ yin kọdetọn gbemima etọn tọn? Jọṣua po mẹhe kọngbedopọ hẹ ẹ lẹ po mọ dona lẹ yí to whenue yé biọ Aigba Pagbe tọn mẹ, yèdọ “aigba he yí yìnnọ po owín po do to sisà.”—Jọṣ. 5:6.
BASI NUDIDE NUYỌNẸN TỌN LẸ BO MỌ DONA YÍ
16, 17. Na apajlẹ de he do ale he nudide bibasi sọgbe hẹ ojlo Jiwheyẹwhe tọn nọ hẹnwa lẹ hia.
16 Lẹnnupọndo apajlẹ egbezangbe tọn de ji. Mẹmẹsunnu he ṣẹṣẹ yí baptẹm de tindo asi po ovi flinflin atọ̀n po. To gbèdopo, azọ́nwatọgbẹ́ etọn de na ẹn ayinamẹ dọ yé omẹ awe lẹ ni yì wazọ́n to azọ́nwhé devo he nọ sú azọ́nkuẹ he yiaga bosọ nọ namẹ ale devo lẹ dogọ. Mẹmẹsunnu mítọn lẹnnupọndo whẹho lọ ji bosọ hodẹ̀ gandego. Sunmẹ-kuẹ he e nọ dù to alọnu dín ma sù, ṣigba e basi dide nado wazọ́n enẹ na e nido sọgan mọ dotẹnmẹ to sẹfifo lẹ nado nọ yì opli lẹ bosọ nọ tọ́n na lizọnyizọn lọ po whẹndo etọn po. E mọdọ emi ma na tindo whenu mọnkọtọn to azọ́n yọyọ lọ mẹ, e whè gbau na ojlẹ de. Etẹwẹ hiẹ na ko wà eyin a tin to otẹn etọn mẹ?
17 To whenue mẹmẹsunnu lọ ko ze azọ́nkuẹ he e na dù to azọ́n yọyọ lọ mẹ jlẹdo ale he e sọgan mọyi to gbigbọ-liho lẹ go godo, e gbẹ́ nuzedonukọnnamẹ lọ dai. Be nudide he e basi lọ wá vẹna ẹn wẹ ya? Paali. E mọdọ dona he emi mọyi to gbigbọ-liho lẹ hẹn ale susu wá na emi po whẹndo emitọn po hugan ale he azọ́nkuẹ he yiaga de dùdù na hẹnwa. E vivi na ewọ po asi etọn po taun to whenue viyọnnu yetọn mẹho he tindo owhe ao dọna yé dọ emi yiwanna mẹjitọ emitọn lẹ, mẹmẹsunnu lẹ po mẹmẹyọnnu lẹ po, bosọ yiwanna Jehovah taun. Viyọnnu lọ dọ dọ emi jlo na klan gbẹzan emitọn do wiwe na Jehovah bo yí baptẹm. Lehe e yọ́n pinpẹn apajlẹ dagbe he otọ́ etọn zedai gbọn sinsẹ̀n-bibasi Jehovah tọn zizedo otẹn tintan mẹ to gbẹzan etọn mẹ dali tọn do sọ!
18. Naegbọn e do yin nujọnu nado nọ basi nudide mítọn lẹ po nuyọnẹn po egbesọegbesọ?
18 Jesu Klisti he yin Mose Daho lọ ko to anadena sinsẹ̀n-basitọ nugbo Jehovah tọn lẹ gbọn danfafa aihọn Satani tọn ehe mẹ sọn owhe susu lẹ die. Taidi Jọṣua Daho lọ, Jesu ko wleawufo nado hẹn titonu ylankan ehe wá opodo bo plan hodotọ etọn lẹ biọ aihọn yọyọ dodowiwa tọn lọ mẹ. (2 Pita 3:13) Enẹwutu, e ma yin ojlẹ lọ die nado lẹkọ do aliho nulẹnpọn tọn mítọn hoho lẹ ji, podọ do walọ, nujinọtedo po nujlomẹ mítọn hoho lẹ po kọ̀n gba. Kakatimọ, ojlẹ lọ die nado mọnukunnujẹ nuhe ojlo Jiwheyẹwhe tọn zẹẹmẹdo na mí mẹ ganji. (Lom. 12:2; 2 Kọl. 13:5) Mì gbọ nudide he mí nọ basi egbesọegbesọ lẹ ni dohia dọ mí yin omẹ he jẹna dona madopodo Jiwheyẹwhe tọn lẹ.—Hia Heblu lẹ 10:38, 39.
[Nudọnamẹ odò tọn]
a Whẹwhinwhẹ́n devo he wutu mẹdelẹ nọ hodo aṣa enẹ wẹ yindọ mẹjitọ yetọn he tin to owhé lẹ nido sọgan do ovivu lọ hia họntọn po hẹnnumẹ yetọn lẹ po.
[Kanbiọ hukan lẹ tọn]
[Yẹdide to weda 24]
Eyin mí nọ basi nudide nuyọnẹn tọn to whẹho egbesọegbesọ tọn lẹ mẹ, mí to huhlọn wuntuntun tọn mítọn plọn niyẹn (Pọ́n hukan 11)
[Yẹdide to weda 26]
Nọ basi nudide nuyọnẹn tọn lẹ bo mọ ayajẹ to omẹ Jiwheyẹwhe tọn lẹ ṣẹnṣẹn (Pọ́n hukan 18)
