Be Hiẹ Flin Ya?

Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo kanbiọ he bọdego ehelẹ tọn:

Whetẹnu wẹ Jesu “dọyẹwheho na gbigbọ he to gànpamẹ lẹ”? (1 Pita 3:19)

E taidi dọ to ojlẹ vude to fọnsọnku Jesu tọn godo, ewọ basi nulila na angẹli ylankan lẹ dọ yé na mọ yasanamẹ he yé jẹna yí.—15/6, weda 23.

Whetẹnu wẹ Jesu na dawhẹna gbẹtọ lẹ taidi lẹngbọ lẹ kavi gbọgbọẹ lẹ? (Mat. 25:32)

Jesu na dawhẹna gbẹtọ lẹ to nukunbibia daho lọ whenu, to whenue sinsẹ̀n lalo na yin vivasudo godo.—15/7, weda 6.

Whetẹnu wẹ mẹhe nọ to sẹ́nhẹngba lẹpo he yin nùdego to apajlẹ likun po ogbé ylankan lẹ po tọn lọ mẹ na dù adúkúnkún? (Mat. 13:36, 41, 42)

Yé na wà ehe to nukunbibia daho lọ whenu, to whenue yé na mọdọ emi ma sọgan dapana vasudo lọ.—15/7, weda 13.

Whetẹnu wẹ hogbe Jesu tọn lẹ gando afanumẹ nugbonọ podọ nuyọnẹntọ lọ go na mọ hẹndi? (Mat. 24:45-47)

Yé jẹ hẹndi mọyi ji to 1914 godo, e ma yin to Pẹntikọsti 33 W.M. gba. To 1919, afanumẹ lọ yin dide do devizọnwatọ whégbè tọn etọn lẹ ji, ehe bẹ Klistiani he nọ mọ núdùdù yí to gbigbọ-liho lẹpo hẹn.—15/7, weda 21-23.

Whetẹnu wẹ Jesu de afanumẹ nugbonọ lọ do nutindo etọn lẹpo ji?

Ewọ na wàmọ to sọgodo to nukunbibia daho lọ whenu, to whenue afanumẹ nugbonọ lọ na mọ ahọsumẹ olọn mẹ tọn yí.—15/7, weda 25.

To yidogọ mẹ na huhlọn Jiwheyẹwhe tọn, etẹwẹ gọalọna Kunnudetọ 230 nado lùn zọnlinzinzin gaa lọ sọn osla yasanamẹ tọn Sachsenhausen tọn mẹ tọ́n?

Dile etlẹ yindọ yé vọgán na huvẹ po azọ̀n po wutu, yé nọ na tuli ode awetọ nado zindonukọn.—15/8, weda 18.

Nawẹ hiẹ sọgan mọaleyi sọn vogbingbọn he yin didohia lẹ mẹ gbọn?

Dile hiẹ to nuhọakuẹ-yinyin vogbingbọn didohia tọn yọnẹn dogọ, hiẹ sọgan nọ yawu doayi yé go to Biblu mẹ, podọ hiẹ na mọdọ yé na gọalọna we taun to lizọnyizọn lọ mẹ.—15/9, weda 6.

Naegbọn kandai he do lehe Islaelivi lẹ dasá Tọ̀sisa Jọdani biọ Aigba Pagbe tọn ji do hia yin tulinamẹnu na mí?

Dile etlẹ yindọ tọ̀sisa lọ ko gọfla, Jehovah hẹn osin lọ nado nọte guun na omẹ etọn lẹ nido sọgan gbọn finẹ. Enẹ na ko hẹn yise po jidide yetọn po lodo to ewọ mẹ, podọ kandai lọ sọgan wà nudopolọ na mílọsu.—15/9, weda 16.

Naegbọn Jesu do viavi whẹpo do fọ́n Lazalọsi sọnku?

Dile etlẹ yindọ Jesu yiwanna Lazalọsi, e ma yin okú etọn wẹ zọ́n bọ e viavi. Ewọ viavi na awuvẹmẹ he e tindo na mẹhe tin to aluẹmẹ lẹ.—15/9, weda 32.

Nawẹ dọdai he tin to Mika 5:5 mẹ gando ahọvi lẹ po lẹngbọhọtọ lẹ po go to hẹndi mọ to egbehe gbọn?

Mí mọnukunnujẹemẹ dọ ‘lẹngbọhọtọ ṣinawe po ahọvi ṣinatọ̀n po’ he yin nùdego to Mika 5:5 mẹ nọtena mẹho agun tọn lẹ he to omẹ Jiwheyẹwhe tọn lẹ hẹn lodo nado pehẹ mẹgbeyinyan he yin didọdai dọ e na wá yé ji lọ.—15/11, weda 20.