Mì Dike Mí “Yawu Hẹn Lẹnpọn Dagbe Mítọn Bu” Blo!
Mì Dike Mí “Yawu Hẹn Lẹnpọn Dagbe Mítọn Bu” Blo!
“Mẹmẹsunnu lẹ emi, . . . mí to bibiọ to mì si ma nado yawu hẹn lẹnpọn dagbe mìtọn bu.” —2 TẸS. 2:1, 2.
KANBIỌ DOGBAPỌN TỌN LẸ
Avase he wá do gànmẹ tẹlẹ wẹ wekanhlanmẹ Paulu tọn lẹ hlan Tẹsalonikanu lẹ bẹhẹn?
Etẹwẹ sọgan gọalọna mí ma nado yin yẹdoklọ?
Nawẹ mahẹ zohunhun tọn tintindo to wẹndagbe Ahọluduta lọ tọn lilá mẹ nọ basi hihọ́na mí gbọn?
1, 2. Naegbọn yẹdoklọmẹ do gbayipe sọmọ, podọ yẹdoklọmẹ wunmẹ tẹlẹ wẹ mí nọ mọ to egbehe? (Pọ́n yẹdide he tin to bẹjẹeji hosọ ehe tọn.)
LALO, mẹhodu po yẹdoklọmẹ po gbayipe taun to titonu ylankan ehe mẹ. Ehe ma dona paṣa mí. Biblu hẹn ẹn họnwun hezeheze dọ yẹdoklọmẹtọ wẹ Satani Lẹgba, podọ ewọ wẹ to gandu do titonu ehe ji. (1 Tim. 2:14; 1 Joh. 5:19) Dile mí to dindọnsẹpọ opodo titonu ylankan ehe tọn, homẹgble Satani tọn sinyẹn deji, na “whenu gli de” wẹ ewọ tindo wutu. (Osọ. 12:12) Enẹwutu, mí sọgan donukun dọ yẹdoklọmẹ mẹhe tin to nuyiwadomẹji Lẹgba tọn glọ lẹ tọn na jideji, podọ na taun tọn, mẹhe nọ basi sinsẹ̀n nugbo lẹ wẹ yé na tẹnpọn nado nọ doyẹklọ.
2 To whedelẹnu, linlinnamẹnu lẹ nọ ze tito-to-whinnu he nọ bẹ nudọnamẹ mẹhẹn buali tọn po lalo lẹ po hẹn gando devizọnwatọ Jehovah tọn lẹ po nuyise yetọn lẹ po go donukọnnamẹ. Linlinwe lẹ, tito-to-whinnu televiziọn ji tọn lẹ po Intẹnẹt po nọ yin yiyizan nado hẹn lalo lẹ gbayipe. Gbọnmọ dali, nudọnamẹ enẹlẹ nọ hẹn mẹdelẹ biọ bẹwlu mẹ bọ yé nọ yí lalo mọnkọtọn lẹ sè po awubibọ po.
3. Etẹwẹ sọgan gọalọna mí nado duto yẹdoklọmẹ ji?
3 Nado duto ayiha wintinwintin kẹntọ mítọn ehe tọn ji, mí dopẹ́ dọ mí tindo Ohó Jiwheyẹwhe tọn, ehe yin “alenu . . . na onú lẹ hinhẹn sọgbe.” (2 Tim. 3:16) E jẹna ayidego dọ owe he apọsteli Paulu kàn to owhe kanweko tintan whenu dohia dọ Klistiani Tẹsalonika tọn delẹ yin yẹdoklọ, bo kẹalọyi lalo. Ewọ dotuhomẹna yé “ma nado yawu hẹn lẹnpọn dagbe [yetọn] bu.” (2 Tẹs. 2:1, 2) Etẹlẹ wẹ mí sọgan plọn sọn tudohomẹna owanyinọ Paulu tọn mẹ, podọ nawẹ dopodopo mítọn sọgan yí yé zan gbọn?
AVASE HE WÁ DO GÀNMẸ LẸ
4. Nawẹ Klistiani he tin to Tẹsalonika lẹ mọ avase yí nado ze ayidonugo do “azán Jehovah tọn” ji gbọn, podọ nawẹ mílọsu nọ mọ avase yí gbọn?
4 To wekanhlanmẹ tintan Paulu tọn hlan agun Tẹsalonika tọn mẹ, e dọ̀n ayidonugo wá “azán Jehovah tọn” he ja lọ ji. Ewọ jlo dọ mẹmẹsunnu emitọn lẹ ni tọ́n sọn zinvlu mẹ bo wleawudai. Enẹwutu, e dotuhomẹna yé taidi “ovi hinhọ́n tọn lẹ” nado ‘nọ nukle bo gbọṣi lẹnpọn dagbenọ-yinyin yetọn mẹ.’ (Hia 1 Tẹsalonikanu lẹ 5:1-6.) To egbehe, mí to tenọpọn vasudo Babilọni Daho lọ, yèdọ sinsẹ̀n lalo lẹpo to pọmẹ tọn. Nujijọ ehe wẹ na yin bẹjẹeji azán daho Jehovah tọn. Mí dopẹ́ dọ mí mọnukunnujẹ lehe lẹndai Jehovah tọn na mọ hẹndi do mẹ ganji. Podọ, mí nọ mọ nuflinmẹ lẹ to gbesisọ mẹ gbọn agun lọ gblamẹ, ehe nọ gọalọna mí nado hẹn lẹnpọn dagbenọ-yinyin mítọn go. Eyin mí hẹn avase enẹlẹ do ayiha mẹ, enẹ sọgan gọalọna mí nado hẹn gbemima mítọn nado nọ ‘basi sinsẹ̀nzọn wiwe po huhlọn nulẹnpọn tọn mítọn po’ na Jiwheyẹwhe go gligli.—Lom. 12:1.
5, 6. (a) Etẹwẹ Paulu dọ to wekanhlanmẹ etọn awetọ mẹ hlan Tẹsalonikanu lẹ? (b) Etẹwẹ Jiwheyẹwhe na wà to madẹnmẹ gbọn Jesu gblamẹ, podọ etẹwẹ mí dona kanse míde?
5 Ojlẹ vude to whenue Paulu do wekanhlanmẹ etọn tintan hlan Klistiani Tẹsalonika tọn lẹ godo, ewọ sọ do wekanhlanmẹ awetọ hlan yé. To wekanhlanmẹ ehe mẹ, ewọ dọho gando nukunbibia he ja to whenue Oklunọ Jesu na hẹn whẹdida Jiwheyẹwhe tọn ṣẹ do “mẹhe ma yọ́n Jiwheyẹwhe podọ mẹhe ma setonuna wẹndagbe” lọ lẹ go ji. (2 Tẹs. 1:6-8) Weta awetọ wekanhlanmẹ lọ tọn dohia dọ mẹdelẹ to agun lọ mẹ “yin whinwhàn” gando azán Jehovah tọn go sọmọ bọ yé yise dọ azán lọ ko sẹpọ pete. (Hia 2 Tẹsalonikanu lẹ 2:1, 2.) Klistiani dowhenu tọn enẹlẹ ma tindo nukunnumọjẹnumẹ gigọ́ gando lehe lẹndai Jehovah tọn na mọ hẹndi do go, kẹdẹdile Paulu lọsu dọ gando dọdai go to nukọn mẹ do dọmọ: “Oyọnẹn agbòte wẹ mí tindo podọ dọdai agbòte dọ wẹ mí te; ṣigba to whenuena oyọnẹn he pé na wá, enẹ he yin agbòte na busẹ.” (1 Kọl. 13:9, 10) Ṣigba, avase gbọdo he Paulu, apọsteli Pita po mẹmẹsunnu yiamisisadode he nọgbẹ̀ to ojlẹ enẹ mẹ devo lẹ po kàn dai lẹ sọgan gọalọna yé nado hẹn yise yetọn go.
6 Nado jla pọndohlan yetọn do, Paulu basi zẹẹmẹ to gbọdo glọ dọ atẹṣiṣi daho de na wá aimẹ bọ “dawe sẹ́nhẹngbatọ lọ” na sọawuhia whẹpo azán Jehovah tọn nado wá. a Enẹgodo to ojlẹ sisọ mẹ, Oklunọ Jesu na hẹn mẹhe ko yin yẹdoklọ lẹpo “zun ovọ́.” Apọsteli lọ do whẹwhinwhẹ́n he wutu whẹdida ehe nado wá yé ji hia dọ “yé ma kẹalọyi owanyi nugbo lọ tọn.” (2 Tẹs. 2:3, 8-10) Mí dona kanse míde dọ: ‘Obá tẹ mẹ wẹ yẹn yiwanna nugbo lọ jẹ? Be nukunnumọjẹnumẹ ṣie sọgbe hẹ nukunnumọjẹnumẹ agọe tọn he yin zinzinjẹgbonu to linlinnamẹwe ehe po owe sinai do Biblu ji devo lẹ po mẹ na agun omẹ Jiwheyẹwhe tọn lẹ tọn lẹdo aihọn pé ya?’
NỌ DE GBẸDOHẸMẸTỌ TOWE LẸ PO NUYỌNẸN PO
7, 8. (a) Owù tẹlẹ wẹ Klistiani dowhenu tọn lẹ dona dapana? (b) Owù vonọtaun tẹwẹ Klistiani nugbo lẹ dona dapana to egbehe?
7 Na nugbo tọn, gbọnvona atẹṣitọ lẹ po nuplọnmẹ yetọn lẹ po, Klistiani lẹ na pehẹ owù devo lẹ. Paulu kanwehlan Timoti dọ “wanyina akuẹ wẹ yin adọ̀ onú ylankan wunmẹ lẹpo tọn.” Apọsteli lọ zinnudeji dọ “gbọn afọdidona owanyi ehe dali, mẹdelẹ ko yin hinhẹn buali sọn yise lọ mẹ bo ko yí awufiẹsa susu do sọwhán yede gbọn filẹpo.” (1 Tim. 6:10) “Azọ́n agbasalan tọn lẹ” sọ yin dopo to owù he na gbọṣi aimẹ lẹ mẹ.—Gal. 5:19-21.
8 Ṣigba, hiẹ sọgan mọnukunnujẹ nuhewutu Paulu do na avase sinsinyẹn Tẹsalonikanu lẹ gando owù he sunnu enẹlẹ yin go mẹ, mẹhe ewọ ylọ to fidevo dọ “apọsteli lalo lẹ.” Sunnu ehelẹ nọ “slokọna nuplọnmẹ lẹ nado dọ̀n devi lẹ do godo yede tọn.” (2 Kọl. 11:4, 13; Owalọ 20:30) To nukọn mẹ, Jesu wá pà agun Efesu tọn na yé ma “kẹalọyi gbẹtọ ylankan lẹ” wutu. Efesunu enẹlẹ “tẹ́n” mẹhe nọ ylọ yede dọ apọsteli ṣigba bo ma yinmọ lẹ pọ́n, enẹ wẹ lalonọ lẹ. (Osọ. 2:2) Ojlofọndotenamẹnu wẹ e yin dọ to wekanhlanmẹ awetọ lọ mẹ, Paulu namẹ tuli dọmọ: “Todin, mẹmẹsunnu lẹ emi, mí to gbedena mì to oyín Oklunọ Jesu Klisti tọn mẹ, nado nọ nọla na mẹmẹsunnu depope he to nuyiwa to aliho bẹwlu tọn mẹ.” Enẹgodo, e donù Klistiani he “ma jlo nado wazọ́n” lẹ go tlọlọ. (2 Tẹs. 3:6, 10) Enẹwutu, eyin yé dona dapana mẹdepope he yin adidọnọ bo ma jlo na wazọ́n, nẹmunẹmu wẹ yé ma na wàmọ na mẹhe jẹ nuyiwa ji taidi atẹṣitọ lẹ! Na nugbo tọn, owùnu daho wẹ e yin nado dogbẹ́ pẹkipẹki hẹ omẹ mọnkọtọn lẹ to hohowhenu, enẹwutu yè dona dapana yé, podọ enẹ sọ yin nugbo to egbehe.—Howh. 13:20.
9. Naegbọn mí dona tin to aṣeji eyin mẹde jẹ nuhe yin pọndohlan mẹdetiti tọn lẹ dọ ji kavi jẹ homọdọdomẹgo ji?
9 Na mí to sisẹpọ bẹjẹeji nukunbibia daho lọ tọn po opodo titonu ylankan ehe tọn po wutu, avase gbọdo he yin ninamẹ to owhe kanweko tintan whenu enẹlẹ yin nujọnu na mí taun. Na taun tọn, mí ma jlo na “gbọ lẹndai” nukundagbe majẹhẹ Jehovah tọn go, na opagbe ogbẹ̀ madopodo tọn nikaa gbọ mí go, vlavo olọn mẹ tọn kavi aigba ji tọn. (2 Kọl. 6:1) Mí dona tin to aṣeji taun eyin e wá jọ gbede bọ mẹhe nọ wá opli agun tọn mítọn de tẹnpọn nado doyẹklọ mí nado dọhodo nuhe yin pọndohlan mẹdetiti tọn lẹ ji kavi nado mọhodọdo mẹdevo lẹ go.—2 Tẹs. 3:13-15.
MÌ “TẸDO AṢA” MÌTỌN LẸ GO
10. Aṣa tẹlẹ go wẹ Klistiani he tin to Tẹsalonika lẹ yin tudohomẹna nado tẹdo?
10 Paulu dotuhomẹna mẹmẹsunnu etọn he tin to Tẹsalonika lẹ nado “nọtegli” bo tẹdo nuhe yé ko plọn lẹ go. (Hia 2 Tẹsalonikanu lẹ 2:15.) Etẹlẹ wẹ yin “aṣa” he yin pinplọn yé lẹ? E họnwun dọ e ma yin dehe sinsẹ̀n lalo nọ hodo bosọ hẹn gbayipe taidi dọ yé họakuẹ sọ nuhe yin mimọ to Owe-wiwe lẹ mẹ wẹ nkọ. Kakatimọ, Paulu to alọdlẹndo nuplọnmẹ he ewọ po mẹdevo lẹ po mọyi sọn Jesu dè gọna nuhe Jiwheyẹwhe whàn apọsteli lẹ nado kàn, ehe suhugan yetọn wá lẹzun apadewhe Owe-wiwe gbọdo lẹ tọn. Paulu pà mẹmẹsunnu etọn he tin to agun Kọlinti tọn mẹ lẹ, na ewọ wlan dọ, “mì hẹn mi do ayiha mẹ to onú lẹpo mẹ podọ mì nọ tẹdo aṣa lẹ go gligli kẹdẹdile yẹn ze yé do alọmẹ na mì do.” (1 Kọl. 11:2) Nuplọnmẹ mọnkọtọn lẹ wá sọn asisa he go yè sọgan dejido de mẹ podọ yé sọgan yin jidedego.
11. Aliho tẹlẹ mẹ wẹ mẹdelẹ ko yin yẹdoklọ te?
11 To whenue Paulu to wekanhlan Heblu lẹ, e dọ̀n ayidonugo yetọn wá aliho awe he mẹ Klistiani de sọgan hẹn yise etọn bu bo gboawupo nado nọtegli te ji. (Hia Heblu lẹ 2:1; 3:12.) E dọho gando ‘dindanbu’ po “agọjijoyigodo” po go. Tọjihun he danbú kavi sí sọn agé de sọgan jẹ mọwà ji to aliho de mẹ bọ mẹde ma na doayi e go to tintan whenu. Ṣigba, e nọ to sisẹ̀ vudevude kaka bo nọ yì pete. To alọ devo mẹ, mẹde sọgan desọn ojlo mẹ nado sisẹ́ ohún etọn sọn agé go. Apajlẹ awe enẹlẹ do nuhe nọ jọ to whenue mẹde yin yẹdoklọ bo hẹn jidide etọn to nugbo lọ mẹ bu hia.
12. Nuwiwa egbezangbe tọn tẹlẹ wẹ sọgan hẹn gbigbọnọ-yinyin mítọn gble?
12 Nuhe na ko jọ do delẹ to Tẹsalonikanu lẹ mẹ go niyẹn. Be enẹ sọgan jọ do mí go ya? Nuwiwa he nọ hẹn whenu mítọn gú lẹ sù taun to egbehe. Lẹnnupọndo gànhiho nẹmu he nọ yin yiyizan to Intẹnẹt ji nado hia wekanhlanmẹ lẹ bo na gblọndo yetọn, nado daihun ayidedai tọn lẹ kavi nado yọ́n linlin agọe tọn lẹ gando aihundida lanmẹyiya tọn go. Depope to nuwiwa ehelẹ mẹ sọgan fẹayihasẹna Klistiani de kavi dekanpona zohunhun etọn. Etẹwẹ sọgan yin kọdetọn lọ? Ewọ sọgan doalọtena dẹ̀hiho ahundopo tọn, Ohó Jiwheyẹwhe tọn pinplọn, opli lẹ yìyì po yẹwhehodidọ po. Etẹwẹ mí sọgan wà ma nado yawu hẹn lẹnpọn dagbe mítọn bu?
BASI HIHỌ́NA LẸNPỌN DAGBE TOWE
13. Dile e yin didọdai do, nawẹ mẹsusu nọ yinuwa gbọn, podọ etẹ wiwà wẹ na gọalọna mí nado basi hihọ́na yise mítọn?
13 Dopo to onú titengbe he mí dona wà lẹ mẹ wẹ nado hẹn ojlẹ he mẹ mí to gbẹnọ te do ayiha mẹ gọna owù he gbẹdido hẹ mẹhe ma kẹalọyi dọ mí to gbẹnọ to “azán godo tọn lẹ” mẹ sọgan hẹnwa. Apọsteli Pita wlan gando ojlẹ ehe go dọmọ: “Mẹṣankotọ lẹ na wá po mẹṣanko yetọn po, bo na to zọnlinzin sọgbe hẹ ojlo yetọn titi lẹ bo na to didọmọ: ‘Fie wẹ tintin tofi etọn he yin opagbe etọn dó lọ te? Yèdọ, sọn azán he gbè tọgbo mítọn lẹ ko damlọn to okú mẹ, mọ wẹ onú lẹpo gbẹ́ te kẹdẹdile e te do pẹpẹ sọn bẹjẹeji nudida tọn gbọ́n.’” (2 Pita 3:3, 4) Ohó Jiwheyẹwhe tọn hihia egbesọegbesọ po pinplọn ẹn po to gbesisọ mẹ na gọalọna mí nado ze ayidonugo do ojlẹ he mẹ mí tin te ji, enẹ wẹ nado hẹn do ayiha mẹ dọ mí tin to “azán godo tọn lẹ” mẹ. Atẹṣiṣi he dọdai etọn yin didọ lọ ko sọawuhia sọn ojlẹ dindẹn die bo gbọṣi aimẹ kakajẹ egbehe. “Dawe sẹ́nhẹngbatọ lọ” gbẹ́ tin to egbehe bo to nukundiọsọ devizọnwatọ Jiwheyẹwhe tọn lẹ. Enẹwutu, mí dona gbọṣi nukle bo hẹn do ayiha mẹ dọ azán Jehovah tọn ko sẹpọ pete.—Zẹf. 1:7.
14. Nawẹ alọnu mítọn hinhẹn ján to sinsẹ̀nzọn Jiwheyẹwhe tọn mẹ nọ basi hihọ́na mí gbọn?
14 Numimọ ko dohia dọ aliho dagbe hugan nado gbọṣi nukle bo ma na yawu hẹn lẹnpọn dagbe mítọn bu wẹ nado nọ tindo mahẹ gbesisọ tọn to wẹndagbe Ahọluduta lọ tọn lilá mẹ. Enẹwutu, to whenue Jesu Klisti, Ota agun lọ tọn degbena hodotọ etọn lẹ nado hẹn gbẹtọ lẹ sọn akọta lẹpo mẹ zun devi lẹ, bo nọ plọn yé nado payi nuhe ewọ ko degbe etọn na yé lẹpo go, ayinamẹ he na basi hihọ́na hodotọ etọn lẹ na yé wẹ e te. (Mat. 28:19, 20) Nado hodo anademẹ etọn, mí dona yin zohunhunnọ to azọ́n yẹwhehodidọ tọn mẹ. Be hiẹ lẹndọ mẹmẹsunnu Tẹsalonika tọn lẹ dọyẹwheho bo plọnmẹ to aliho mọmọ tọn mẹ, taidi dọ azọ́n he ma yin nujọnu de wà wẹ yé te ya? Flin nuhe Paulu dọna yé dọmọ: “Mì ṣí miyọ́n gbigbọ tọn blo. Mì nọ yinuwa hẹ dọdai didọ lẹ po vlẹko po blo.” (1 Tẹs. 5:19, 20) Mọdopolọ, dọdai ojlofọndotenamẹ tọn lẹ wẹ mí nọ plọn bo nọ lá na mẹdevo lẹ!
15. Etẹlẹ wẹ mí sọgan gbadopọnna to sinsẹ̀n-bibasi whẹndo tọn whenu?
15 Na nugbo tọn, mí jlo na gọalọna whẹndo mítọn nado wleawuna nugopipe voovo lẹ to sinsẹ̀nzọn kunnudegbe tọn mẹ. Mẹmẹsunnu po mẹmẹyọnnu susu po ko mọdọ aliho dopo nado jẹ yanwle enẹ kọ̀n wẹ nado nọ ze adà sinsẹ̀n-bibasi whẹndo tọn yetọn de sinai do lizọnyizọn lọ ji. Vlavo mì sọgan dọhodo lehe hagbẹ whẹndo lọ tọn lẹ na nọ basi gọyìpọn lẹ do ji. Etẹ ji wẹ yé na dọhodo to gọyìpọn he na bọdego whenu? Hosọ tẹwẹ na whàn whétọ lẹ hugan nado to ojlo dohia zọnmii? Ojlẹ tẹwẹ na yọ́n hugan nado nọ basi gọyìpọn lẹ? Mẹsusu sọ nọ yí adà sinsẹ̀n-bibasi whẹndo tọn yetọn de zan nado wleawuna opli agun tọn lẹ nado sọgan yọ́n nuhe na yin hodọdeji to opli lẹ whenu. Be hiẹ sọgan wà nususu dogọ nado nọ wleawu nado tindo mahẹ to opli lẹ mẹ ya? Eyin hiẹ nọ wàmọ, enẹ na gọalọna we ma nado yawu hẹn lẹnpọn dagbe towe bu. (Ps. 35:18) Mọwẹ, sinsẹ̀n-bibasi whẹndo tọn na basi hihọ́na mí sọta pọndohlan mẹdetiti tọn tintindo gando nuhe tin to Biblu mẹ lẹ go po ayihaawe tintindo gando nuhe Jehovah dọ gbọn titobasinanu etọn gblamẹ lẹ po go.
16. Etẹwẹ nọ whàn Klistiani yiamisisadode lẹ nado hẹn huhlọn nulẹnpọn tọn yetọn go?
16 Eyin mí lẹnnupọndo aliho he mẹ Jehovah ko dona omẹ etọn lẹ sọn owhe susu die te gbọn nukunnumọjẹnumẹ tintindo gando dọdai Biblu tọn lẹ go ji, mí na yọ́n pinpẹn ahọsumẹ jiawu he mí na mọyi to sọgodo lẹ tọn. Mẹyiamisisadode lẹ tindo todido nado kọnawudopọ hẹ Klisti to olọn mẹ. Lehe todido ehe nọ whàn yé nado hẹn huhlọn nulẹnpọn tọn yetọn go do sọ! Mí sọgan yí nuhe Paulu wlan hlan Tẹsalonikanu lẹ ehe zan na yé dọmọ: “Mì mẹmẹsunnu he Jehovah yiwanna lẹ emi, dandannu wẹ e yin na mí nado nọ dopẹna Jiwheyẹwhe do ota mìtọn mẹ to whepoponu, na Jiwheyẹwhe ko de mì . . . gbọn gbigbọ yíyí do hẹn mì zun wiwe dali podọ gbọn yise mìtọn to nugbo lọ mẹ dali.”—2 Tẹs. 2:13.
17. Tudohomẹnamẹ tẹwẹ hiẹ mọyi to 2 Tẹsalonikanu lẹ 3:1-5 mẹ?
17 Podọ mẹhe to nukọnpọnhlan nado nọgbẹ̀ kakadoi to aigba ji lẹ lọsu dona dovivẹnu ma nado yawu hẹn lẹnpọn dagbe yetọn bu. Eyin hiẹ tindo todido aigba ji tọn, hẹn ayinamẹ owanyinọ he Paulu wlan hlan mẹyiamisisadode hatọ etọn lẹ to Tẹsalonika do ayiha mẹ. (Hia 2 Tẹsalonikanu lẹ 3:1-5.) Dopodopo mítọn dona yọ́n pinpẹn ayinamẹ owanyinọ enẹlẹ tọn. Na nugbo tọn, wekanhlanmẹ lẹ hlan Tẹsalonikanu lẹ bẹ ayinamẹ dagbe lẹ hẹn gando pọndohlan mẹdetiti tọn go titẹdo kavi ayihaawe tintindo go. To egbehe, dile mí to dindọnsẹpọ opodo lọ hugan gbede pọ́n, Klistiani lẹ nọ yọ́n pinpẹn avase enẹlẹ tọn taun.
[Nudọnamẹ odò tọn]
a Dile mí hia do to Owalọ lẹ 20:29, 30 mẹ, Paulu dohia dọ “sunnu lẹ na fọ́n” sọn agun Klistiani tọn mẹ “bo na slokọna nuplọnmẹ lẹ nado dọ̀n devi lẹ do godo yede tọn.” Whenuho dohia dọ dile ojlẹ to yìyì, mẹhe nọ deanananu to agun lọ mẹ lẹ jẹ didohia ji dọ emi gbọnvona hagbẹ agun lọ tọn he pò lẹ. To nudi owhe kanweko atọ̀ntọ W.M., “dawe sẹ́nhẹngbatọ lọ” sọawuhia, bo wá lẹzun pipli nukọntọ sinsẹ̀n Mẹylọhodotọklisti tọn lẹ tọn.—Pọ́n Atọ̀họ̀-Nuhihọ́ lọ Tọn 1er septembre 1990, weda 8-12.
[Kanbiọ hukan lẹ tọn]
[Yẹdide to weda 7]
Owe he Paulu kàn lẹ bẹ avase he wá do gànmẹ lẹ hẹn na Klistiani lẹ (Pọ́n hukan 4, 5)
[Yẹdide to weda 10]
Awuwiwle ganji po mahẹ tintindo to lizọnyizọn lọ mẹ po sọgan gọalọna mí ma nado yawu hẹn lẹnpọn dagbe mítọn bu (Pọ́n hukan 14, 15)
