Ninọmẹ ayimajai tọn lẹ sọgan yinuwado mí ji to aliho ylankan mẹ. Yé sọgan ṣinyọnyẹ nulẹnpọn mítọn lẹ ji, hẹn mí gbọjọ bo yinuwa do pọndohlan mítọn gando ogbẹ̀ go ji. Ahọlu Davidi Islaeli hohowhenu tọn jugbọn ninọmẹ sinsinyẹn susu lẹ mẹ. Nawẹ e pehẹ yé gbọn? To psalm he whànmẹ de mẹ, Davidi na gblọndo dọmọ: “Yẹn yí ogbè ṣie do dawhá hlan OKLUNỌ; ogbè ṣie hlan OKLUNỌ wẹ yẹn yí do vẹvẹ. Yẹn kọ̀n whẹgbè ṣie dai to nukọn etọn; yẹn do tukla ṣie hia to nukọn etọn. Whenuena gbigbọ ṣie kúṣiọ to ohò ṣie mẹ, whenẹnu wẹ hiẹ yọ́n omọ́ji ṣie.” Mọwẹ, Davidi yí whiwhẹ do hodẹ̀ hlan Jiwheyẹwhe nado mọ alọgọ etọn.—Ps. 142:1-3.

To psalm devo mẹ, Davidi jihàn dọmọ: “Onú dopo wẹ yẹn bibiọ OKLUNỌ si, enẹ lọ wẹ yẹn na to dindin; na yẹn nido nọ nọ̀ ohọ̀ OKLUNỌ tọn mẹ to gbẹzan ṣie lẹpo mẹ, nado nọ pọ́n whanpẹ OKLUNỌ tọn, nado nọ kannuse [po pinpẹn-nutọn-yinyọnẹn po] to tẹmpli etọn mẹ.” (Ps. 27:4) Davidi ma yin Levinu de, ṣigba yí nukun homẹ tọn do pọ́n ẹn dile e nọte to gbonu awánu wiwe lọ tọn sẹpọ gòhọtúntún lọ fihe sinsẹ̀n nugbo nọ yin bibasi te. Ahun Davidi tọn whàn ẹn sọmọ bọ e jlo nado zan pipotọ gbẹzan etọn tọn to finẹ nado sọgan ‘nọ pọ́n whanpẹ Jehovah tọn.’

Hogbe lọ “whanpẹ” tindo kanṣiṣa hẹ nuhe mẹde yiwanna kavi nuhe hẹn homẹ mẹde tọn hùn, numọtolanmẹ kavi linlẹn gbẹtọ tọn. Davidi nọ pọ́n tito sinsẹ̀n-bibasi tọn he Jiwheyẹwhe zedai po pinpẹn-nutọn-yinyọnẹn po. Mí dona kanse míde dọ, ‘Be n’nọ tindo numọtolanmẹ dopolọ taidi Davidi ya?’

To egbehe, tito he Jehovah zedai na mí nido sọgan nọ dọnsẹpọ ẹ ma yin ohọ̀ yinukundomọ de gba. Kakatimọ, tẹmpli gbigbọmẹ tọn daho Jiwheyẹwhe tọn wẹ, yèdọ tito wiwe de na sinsẹ̀n-bibasi nugbo. a Eyin mí ‘nọ do pinpẹn-nutọn-yinyọnẹn hia’ na tito he Jiwheyẹwhe zedai, mílọsu sọgan ‘nọ pọ́n whanpẹ Jehovah tọn.’

Lẹnnupọndo agbà gànvẹẹ tọn he ji avọ́nunina mimẹ̀ nọ yin bibasi te ji, ehe tin to họntonu gòhọtúntún lọ tọn. (Eks. 38:1, 2; 40:6) Agbà enẹ nọtena ojlo he Jiwheyẹwhe tindo nado kẹalọyi ogbẹ̀ gbẹtọvi tọn Jesu tọn taidi avọ́sinsan de. (Heb. 10:5-10) Lẹnnupọndo nuhe enẹ zẹẹmẹdo na mí ji! Apọsteli Paulu wlan dọmọ: “Mí lẹzun mẹhe gbọwhẹ hẹ Jiwheyẹwhe gbọn okú Visunnu etọn tọn gblamẹ to whenue mí gbẹ́ yin kẹntọ lẹ.” (Lom. 5:10) Gbọn yise didohia to hùnsọndai Jesu tọn mẹ dali, mí sọgan mọ nukundagbe po jide he nọ wá sọn họntọn Jiwheyẹwhe tọn yinyin mẹ po. Taidi kọdetọn de, mí na duvivi ‘họntọnjiji hẹ Jehovah’ tọn.—Ps. 25:14.

Na yè ko “súnsún ylando” mítọn lẹ sẹ̀ wutu, mí nọ duvivi ‘ojlẹ kọfanamẹ tọn sọn Jehovah dè.’ (Owalọ 3:19) Ninọmẹ mítọn taidi nudopolọ hẹ gàntọ de tọn he nuhe e wà wayi lẹ vẹna ẹn bọ e basi diọdo ayidego tọn dile e to tenọpọn azán he gbè e na yin hùhù. To whenue whẹdatọ homẹdagbenọ de mọ ehe, e yin whinwhàn nado zẹhudo kandai owhẹ̀ he yin didá na ẹn tọn ji, ehe dohia dọ e ma na yin hùhù ba. Lehe gàntọ ehe na mọ kọgbọ bo gọ́ na ayajẹ do sọ! Taidi whẹdatọ enẹ, Jehovah nọ do homẹdagbe hia mẹhe lẹnvọjọ bo nọ de whẹgbledomẹ okú tọn sọn yé ji.

To ohọ̀ Jehovah tọn mẹ, Davidi sọgan mọdọ Islaelivi hatọ etọn lẹ nọ pli dopọ, Osẹ́n lọ nọ yin hihia bo nọ yin zẹẹmẹ basina po gbèzeyiaga po, nuwhẹ́nwan lẹ nọ yin mimẹ̀, podọ yẹwhenọ lẹ po Levinu lẹ po  nọ wà sinsẹ̀nzọn wiwe. (Eks. 30:34-38; Sọh. 3:5-8; Deut. 31:9-12) Adà sinsẹ̀n-bibasi nugbo tọn ehelẹ to Islaeli hohowhenu tọn, tindo kanṣiṣa hẹ adà sinsẹ̀n-bibasi nugbo tọn delẹ to egbehe.

Dile e yin do to hohowhenu podọ to egbehe, “[onú dagbe wẹ e yin bosọ yọ́n] na mẹmẹsunnu lẹ nado nọ nọpọ́ to dopo mẹ!” (Ps. 133:1) “Pipli mẹmẹsunnu lẹ tọn” ko jideji lẹdo aihọn pé to aliho ayidego tọn de mẹ. (1 Pita 2:17) Ohó Jiwheyẹwhe tọn nọ yin hihia bo nọ yin zẹẹmẹ basina to opli mítọn lẹ ji. Jehovah nọ wleawu tito nuplọnmẹ tọn dagbe de na mí gbọn titobasinanu etọn gblamẹ. Núdùdù gbigbọmẹ tọn susugege sọ tin-to-aimẹ to owe mítọn lẹ mẹ, ehe mí nọ yizan na nupinplọn mẹdetiti tọn podọ to whẹndo mẹ. Mẹhe tin to Hagbẹ Anademẹtọ lọ mẹ dopo dọmọ: “Ayihamẹlinlẹnpọn do Ohó Jehovah tọn ji, nulinlẹnpọn do zẹẹmẹ etọn ji gọna dodinnanu bibasi nado tindo nukunnumọjẹnumẹ sisosiso do e ji ko hẹn dona gbigbọmẹ tọn susu po pekọ po wá na mi to gbẹzan ṣie blebu mẹ.” Mọwẹ, ‘oyọnẹn sọgan hẹn homẹhunhun wá na alindọn mítọn.’—Howh. 2:10.

To egbehe, odẹ̀ devizọnwatọ Jiwheyẹwhe tọn he yin alọkẹyi lẹ tọn nọ yì Jehovah dè egbesọegbesọ. To nukun Jehovah tọn mẹ, odẹ̀ mọnkọtọn lẹ taidi owán gblingblin nuwhẹ́nwan vivi lẹ tọn. (Ps. 141:2) Lehe mí gọ́ na ayajẹ nado yọnẹn dọ homẹ Jehovah Jiwheyẹwhe tọn nọ hùn taun to whenue mí dọnsẹpọ ẹ po whiwhẹ po to odẹ̀ mẹ do sọ!

Mose hodẹ̀ dọmọ: “Gbọ whanpẹ OKLUNỌ Jiwheyẹwhe mítọn tọn ni tin to mí ji: hiẹ ni bo hẹn azọ́n alọ mítọn tọn lodo to mí go.” (Ps. 90:17) Dile mí yí zohunhun do to lizọnyizọn mítọn hẹndi, Jehovah nọ dona azọ́n mítọn. (Howh. 10:22) Mí sọgan ko gọalọna mẹdelẹ nado plọn nugbo lọ. Vlavo mí ko doakọnnanu to lizọnyizọn lọ mẹ na owhe susu mahopọnna ojlo matindo gbẹtọ lẹ tọn, azọ̀n, awufiẹsa po homẹkẹn po. (1 Tẹs. 2:2) Etomọṣo, be mí ma mọ ‘whanpẹ Jehovah tọn’ bo doayi e go dọ homẹ Otọ́ mítọn olọn mẹ tọn nọ hùn do vivẹnu mítọn lẹ go ya?

Davidi jihàn dọmọ: “OKLUNỌ wẹ mimá ogú ṣie tọn, po kọfo ṣie tọn po: Hiẹ wẹ hẹn numánamẹ ṣie go gligli. Okàn yìnyìn ko jẹ dè e to ofi he yọ́n.” (Ps. 16:5, 6) Davidi dopẹ́ na “mimá” etọn, enẹ wẹ haṣinṣan họntọnjiji tọn he e tindo hẹ Jehovah po lẹblanulọkẹyi he e tindo nado sẹ̀n ewọ po. Taidi Davidi, mí sọgan pehẹ ninọmẹ sinsinyẹn lẹ, ṣigba mí tindo dona gbigbọmẹ tọn susugege! Enẹwutu, mì gbọ mí ni zindonukọn nado nọ mọ ayajẹ to sinsẹ̀n-bibasi nugbo mẹ bo nọ ‘do pinpẹn-nutọn-yinyọnẹn hia’ na tẹmpli gbigbọmẹ tọn Jehovah tọn.