OWE-WIWE lẹ donù ninọmẹ susu lẹ go, ehe mẹ mẹdelẹ tlẹ́n avọ̀ dokọna yede te. To egbehe, nuyiwa mọnkọtọn sọgan paṣa Biblu hiatọ de, ṣigba na Ju lẹ, nuyiwa de wẹ e yin nado do numọtolanmẹ awubla, todido matindo, winyan, homẹgble kavi aluẹmẹninọ tọn hia.

Di apajlẹ, Lẹubeni “hẹn avọ̀ etọn tlẹ́n” to whenue e doayi e go dọ emi ma sọgan sọ whlẹn nọvisunnu etọn Josẹfu gán ba, na Josẹfu ko yin sisà do kanlinmọgbenu wutu. Jakọbu otọ́ yetọn “hẹn avọ̀ etọn tlẹ́n” to whenue e lẹndọ kanlin ylankan de ko tlẹ́n Josẹfu dù. (Gẹn. 37:18-35) Job “tlẹ́n awugbó etọn” to whenue yè dọna ẹn dọ ovi etọn lẹpo ko kú. (Job 1:18-20) Wẹnsagun de wá Yẹwhenọ Daho Eli dè “po avọ̀ etọn lẹ po tintlẹ́n,” bo dọna ẹn dọ Islaelivi lẹ ṣíawhàn, visunnu Eli tọn awe lẹ yin hùhù bọ aki alẹnu tọn lọ yin yíyí sọyi. (1 Sam. 4:12-17) To whenue Osẹ́n lọ to yinyin hihia na Josia bọ e doayi nuṣiwa omẹ etọn lẹ tọn go, “e tlẹ́n avọ̀ etọn lẹ.”—2 Ahọ. 22:8-13.

To whenue Jesu tin to owhẹ̀ nukọn, Yẹwhenọ Daho Kaifa “tlẹ́n awugbó etọn lẹ” to whenue e sè nuhe e gbọn nuṣiwa dali ylọ dọ nùzinzan. (Mat. 26:59-66) Sọgbe hẹ osẹ́n he Labi lẹ zedai de, mẹdepope he sè bọ yè zánnu do yinkọ Jiwheyẹwhe tọn go dona tlẹ́n avọ̀ dokọna ede. Ṣigba, osẹ́n Labi lẹ tọn devo he wá aimẹ to whenue tẹmpli Jelusalẹm tọn yin vivasudo godo dọ dọ “eyin mẹde sè bọ yè zánnu do Yinkọ Jiwheyẹwhe tọn go to egbehe, ewọ ma to dandannu glọ nado tlẹ́n avọ̀ dokọna ede, na eyin e ma yinmọ avọ̀ etọn lẹ na lẹzun nukija.”

Na nugbo tọn, avọ̀ mẹdetiti tọn lẹ tintlẹ́n ma nọ yin nujọnu to nukun Jiwheyẹwhe tọn mẹ eyin awubla mẹlọ tọn ma wá sọn ahun mẹ. Enẹwutu wẹ Jehovah do dọna omẹ etọn lẹ nado ‘tlẹ́n ayiha yetọn, e ma yin awugbó yetọn lẹ gba, bo lẹ́ do emi dè.’—Joẹ. 2:13.