Ahọlu Davidi Islaeli hohowhenu tọn jihàn de nado pagigona Mẹdatọ lọ dọmọ: “Homẹ ṣie hùn nado wà ojlo towe, Jiwheyẹwhe ṣie E: nugbo, osẹ́n towe tin to yẹn homẹ dọ́n.” (Ps. 40:8) Mahopọnna awusinyẹnnamẹnu po kọgbidinamẹnu he Davidi pehẹ to gbẹzan etọn mẹ lẹ po, ojlo Jiwheyẹwhe tọn wiwà nọ hẹn ayajẹ nujọnu tọn wá na ẹn. Na nugbo tọn, e ma yin Davidi kẹdẹ wẹ yin devizọnwatọ Jehovah tọn he mọ ayajẹ to Jiwheyẹwhe nugbo lọ sinsẹ̀n mẹ gba.

Apọsteli Paulu yí hogbe Psalm 40:8 tọn lẹ zan na Mẹsia kavi Klisti lọ to whenue e wlan dọmọ: “To whenue [Jesu] wá aihọn mẹ, e dọmọ: ‘“Hiẹ ma jlo avọ́sinsan po avọ́nunina po gba, ṣigba hiẹ wleawu agbasa de tọn na mi. Hiẹ ma kẹalọyi avọ́nunina mimẹ̀ blebu po avọ́nunina ylando tọn lẹ po gba.” To whenẹnu wẹ yẹn dọmọ, “Pọ́n! Yẹn wá (to owe-hihá owe lọ tọn mẹ wẹ e yin kinkan do gando go e) nado wà ojlo towe, Jiwheyẹwhe E.”’”—Heb. 10:5-7.

To whenue Jesu tin to aigba ji, e nọ mọ ayajẹ to nudida lẹ pinpọn mẹ, nọ yí whenu zan hẹ họntọn etọn lẹ, bosọ nọ dùnú dopọ hẹ mẹdevo lẹ. (Mat. 6:26-29; Joh. 2:1, 2; 12:1, 2) Ṣigba, ahunmẹdunamẹnu tintan etọn po nuhe nọ hẹn homẹ hùn in hugan po wẹ nado wà ojlo Otọ́ etọn he tin to olọn mẹ tọn. Na nugbo tọn, Jesu dọmọ: “Núdùdù ṣie wẹ nado wà ojlo ewọ he do mi hlan tọn podọ nado dotana azọ́n etọn.” (Joh. 4:34; 6:38) Devi Jesu tọn lẹ plọn aṣli ayajẹ nujọnu tọn sọn Oklunọ yetọn dè. Po ayajẹ daho po, yé desọn ojlo mẹ bo yí zohunhun do lá owẹ̀n Ahọluduta lọ tọn na mẹdevo lẹ.—Luku 10:1, 8, 9, 17.

Jesu degbena devi etọn lẹ dọmọ: “Mì yì bo hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ, bo nọ plọn yé nado payi nuhe yẹn ko degbe etọn na mì lẹpo go. Podọ, mì pọ́n! yẹn tin po mì po to azán lẹpo gbè kakajẹ vivọnu titonu lọ tọn.” (Mat. 28:19, 20) Azọ́ndenamẹ ehe hinhẹndi nọ biọ dọ mí ni dọyẹwheho na gbẹtọ lẹ to fidepope he  yé sọgan yin mimọ te, bo dla mẹhe do ojlo hia lẹ pọ́n, bosọ plọn Biblu hẹ omẹ mọnkọtọn lẹ. Azọ́n ehe wiwà sọgan hẹn ayajẹ mayọnjlẹ wá.

Vlavo gbẹtọ lẹ do ojlo hia to owẹ̀n mítọn mẹ kavi lala, eyin mí na tindo ayajẹ to lizọnyizọn mítọn mẹ, pọndohlan mítọn nọ yí adà titengbe de wà. Naegbọn mí nọ zindonukọn nado to wẹndagbe lọ lá dile etlẹ yindọ mí sọgan dukosọ hẹ mẹhe ma tindo ojlo paali lẹ? Na mí yọnẹn dọ mahẹ tintindo to wẹndagbe Ahọluduta lọ tọn lilá po azọ́n mẹhẹnzun devi tọn po mẹ yin kunnudenu dọ mí yiwanna Jiwheyẹwhe po kọmẹnu mítọn lẹ po. Na nugbo tọn, ogbẹ̀ gbẹtọvi lẹ tọn tin to owù mẹ, yèdọ ogbẹ̀ mílọsu tọn po kọmẹnu mítọn lẹ tọn po. (Ezek. 3:17-21; 1 Tim. 4:16) Mì gbọ mí ni gbadopọnna onú delẹ he gọalọna susu to Klistiani hatọ mítọn lẹ mẹ nado hẹn zohunhun yetọn go kavi vọ́ awuwlena ẹn to aigba-denamẹ he kàn dẹpẹ biọ lẹ ji.

Kanbiọ he sọgbe lẹ yiyizan to lizọnyizọn mítọn mẹ nọ saba tindo kọdetọn dagbe. To afọnnu dopo, Amalia mọ dawe de to linlinwe hia to ayidedaitẹn de. E dọnsẹpọ ẹ bo kanse e eyin e mọ linlin dagbe de hia. To whenue dawe lọ gblọn dọ lala, Amalia dọmọ: “N’hẹn wẹndagbe de wá na we gando Ahọluduta Jiwheyẹwhe tọn go.” Ehe fọnjlodotena dawe lọ, bọ e yigbe nado plọn Biblu. Na nugbo tọn, Amalia penugo nado bẹ plọnmẹ Biblu atọ̀n jẹeji to ayidedaitẹn lọ.

Janice nọ pọ́n azọ́nwatẹn etọn hlan taidi aigba-denamẹ etọn. To whenue nuhọ́tọ de po azọ́nwatọgbẹ́ etọn de po tindo ojlo to hosọ de he sọawuhia to Atọ̀họ̀-Nuhihọ́ lọ Tọn de mẹ, Janice dopà nado nọ hẹn linlinnamẹwe lọ lẹ wá na yé to gbesisọ mẹ. E sọ wà nudopolọ na azọ́nwatọgbẹ́ etọn devo, mẹhe hosọ voovo he nọ sọawuhia to Atọ̀họ̀-Nuhihọ́ lọ Tọn po Réveillez-vous! po mẹ lẹ fọnjlodotena. Enẹwutu, azọ́nwatọgbẹ́ etọn devo biọ to e si nado nọ hẹn linlinnamẹwe lẹ wá na ewọ lọsu. Janice dọmọ: “Dona nankọ die sọn Jehovah dè!” To nukọn mẹ, omẹ 11 wẹ e nọ hẹn linlinnamẹwe lẹ wá na to azọ́n etọn mẹ.

Nugopọntọ tomẹyitọ de na ayinamẹ dọ to lizọnyizọn whédegbè jẹ whédegbè tọn mẹ, wẹnlatọ lẹ ma dona nọ dotana hodọdopọ yetọn gbọn didọ poun dọ yé na lẹkọwa to whedevonu dali. Kakatimọ, yé sọgan kanse mẹlọ dọmọ: “Be e na jlo mì dọ ma do lehe mí nọ deanana plọnmẹ Biblu do hia mì ya?” kavi, “Azán tẹ ji podọ ogàn tẹ mẹ wẹ e na jlo mì dọ ma lẹkọwa na mí nido zindonukọn to hodọdopọ mítọn mẹ?” Nugopọntọ tomẹyitọ lọ na linlin dọ to whenue mẹmẹsunnu po mẹmẹyọnnu agun he e dlapọn de po tọn lẹ hodo ayinamẹ enẹ, yé bẹ plọnmẹ Biblu 44 jẹeji to osẹ dopo mẹ.

Gọyìpọn lẹ bibasi to niyaniya mẹ, yèdọ azán kleun de to dlapọn tintan godo, sọgan tindo kọdetọn dagbe. Etẹwutu? Na mọwiwà nọ dohia dọ mí tindo ojlo nujọnu tọn nado gọalọna ahunjijlọnọ lẹ nado mọnukunnujẹ Biblu mẹ. To whenue yè kanse nawe de nuhewutu e do yigbe dọ Kunnudetọ Jehovah  tọn lẹ ni plọn Biblu hẹ emi, e dọmọ: “N’jẹ Biblu plọn ji, na yé do ojlo po owanyi nujọnu tọn po hia mi wutu.”

Ojlẹ vude to whenue Madaí yì Wehọmẹ Sinsẹ̀nzọn Gbehosọnalitọ tọn godo, e jẹ anadena plọnmẹ Biblu 15 ji bosọ ze omẹ 5 devo lẹ na wẹnlatọ devo lẹ nado plọn Biblu hẹ yé. Plọnmẹ Biblu etọn susu jẹ opli mítọn lẹ wá ji to gbesisọ mẹ. Etẹwẹ gọalọna Madaí nado bẹ plọnmẹ Biblu enẹlẹ jẹeji? To wehọmẹ lọ, e plọn dọ emi dona to mẹhe do ojlo hia to tintan whenu lẹ dlapọn kakajẹ whenue emi bẹ plọnmẹ Biblu de jẹeji hẹ yé. Kunnudetọ devo he ko gọalọna mẹsusu nado plọn nugbo Biblu tọn lẹ dọ dọ, “N’ko plọn dọ aliho titengbe lọ nado gọalọna mẹhe jlo na yọ́n Jehovah lẹ wẹ nado yí linsinsinyẹn do to gọyìpọn basina mẹhe do ojlo hia lẹ.”

E nọ biọ vivẹnudido vẹkuvẹku nado basi gọyìpọn lẹ bo deanana plọnmẹ Biblu lẹ. Etomọṣo, vivẹnudido enẹlẹ ma sọ̀ ahọsumẹ he mí nọ mọyi lẹ. Gbọn mídelẹ zizejo pete na wẹndagbe Ahọluduta lọ tọn lilá dali, mí sọgan gọalọna mẹdevo lẹ nado “wá oyọnẹn he pegan nugbo tọn kọ̀n,” podọ enẹ sọgan dekọtọn do whlẹngán mẹ na yé. (1 Tim. 2:3, 4) Ehe sọgan dekọtọn do pekọ po ayajẹ mayọnjlẹ po mẹ na mí.