Be a yí sọwhiwhe do hia zinjẹgbonu Atọ̀họ̀-Nuhihọ́ lọ Tọn agọe tọn lẹ ya? Eyọn, pọ́n eyin a sọgan na gblọndo na kanbiọ he bọdego helẹ:

Whetẹnu wẹ lẹngbọvu Juwayi tọn lọ nọ yin hùhù to azán 14tọ Nisan tọn?

Biblu delẹ dọ dọ e dona yin hùhù “to whèjai awe lẹ ṣẹnṣẹn,” ehe zẹẹmẹdo whèjai plẹplẹ, yèdọ to whenue owhè ko yihọ ṣigba bọ hinhọ́n gbẹ́ pò to agahomẹ. (Eks. 12:6)—15/12, weda 18-19.

Nunọwhinnusẹ́n Biblu tọn tẹlẹ wẹ jọja lẹ sọgan yizan nado nọ basi nudide nuyọnẹn tọn?

Atọ̀n to yé mẹ wẹ (1) Dín Ahọluduta Jiwheyẹwhe tọn po dodowiwa etọn po whẹ́. (Mat. 6:19-34) (2) Mọ ayajẹ to lizọnyiyi na mẹdevo lẹ mẹ. (Owalọ 20:35) (3) Duvivi Jehovah sinsẹ̀n tọn to jọja whenu towe. (Yẹwh. 12:1)—15/1, weda 19-20.

Whetẹnu wẹ “alọwle Lẹngbọvu lọ tọn” na wá aimẹ? (Osọ. 19:7)

“Alọwle Lẹngbọvu lọ tọn” na wá aimẹ to whenue Ahọlu lọ, Jesu Klisti na dotana awhàngbigba etọn godo, enẹ wẹ yindọ, to whenue Babilọni Daho lọ na ko yin vivasudo bọ awhàn Amagẹdọni na ko yin fùnfùn godo.—15/2, weda 10.

Naegbọn Ju lẹ to ojlẹ Jesu tọn mẹ tin “to nukundido mẹ” gando Mẹsia lọ go? (Luku 3:15)

Mí ma sọgan dọ po nujikudo po eyin Ju owhe kanweko tintan tọn lẹ mọnukunnujẹ dọdai Daniẹli tọn gando Mẹsia lọ go mẹ dile míwlẹ mọnukunnujẹemẹ do. (Dan. 9:24-27) Etomọṣo, yé sọgan ko sè nuhe angẹli lọ lá na lẹngbọhọtọ delẹ kavi nuhe yẹwhegán-yọnnu Anna dọ to whenue e mọ viyẹyẹ lọ, Jesu to tẹmpli mẹ. Podọ sunwhlẹvu-pọntọ lẹ wá bo to dindin “ewọ he yin jiji taidi ahọlu Ju lẹ tọn lọ.” (Mat. 2:1, 2) To nukọn mẹ, Johanu Baptizitọ lọ dohia dọ Klisti lọ na wá to madẹnmẹ.—15/2, weda 26-27.

Etẹwẹ mí sọgan wà na Mọwẹ mítọn nikaa yin Lala? (2 Kọl. 1:18)

Nado dọ hójọhó, to whedelẹnu, ninọmẹ he mí ma sọgan deanana de sọgan zọ́n bọ mí ma na penugo nado wà nuhe mí ko dọ. Ṣigba, eyin mí dopagbe kavi magbe nude tọn, mí dona wà nuhe go mí pé lẹpo nado hẹn ẹn di.—15/3, weda 32.

Eyin Klistiani de jo whẹndo etọn do nado yì dín akuẹ to otò devo mẹ, kọdetọn tẹlẹ wẹ ehe sọgan hẹnwa?

Eyin mẹjitọ lẹ de ma nado nọ nọpọ́ taidi whẹndo de, ovi lẹ sọgan jiya to numọtolanmẹ-liho podọ to walọyizan-liho. Yé sọgan wá gblehomẹ do mẹjitọ yetọn lẹ go. Podọ asu po asi po he nọ nọ̀ fidindẹn do ode awetọ yetọn lẹ sọgan pehẹ whlepọn fẹnnuwiwa tọn.—15/4, weda 19-20.

Kanbiọ ẹnẹ tẹlẹ wẹ mí dona hẹn do ayiha mẹ to whenue mí to hodọna gbẹtọ lẹ to lizọnyizọn mítọn mẹ?

Mẹnu wẹ yé yin? Fie wẹ n’to hodọna yé te? Whetẹnu wẹ ojlẹ dagbe hugan nado dọhona yé? Nawẹ n’dona dọhona yé gbọn?—15/5, weda 12-15.