PITA viavi vivẹvivẹ to whenue e mọ́n dọ emi ma yọ́n Jesu godo. Dile etlẹ yindọ apọsteli lọ dona dovivẹnu nado gọ̀ jẹgangan to gbigbọ-liho, Jesu jlo na yí i zan nado gọalọna mẹdevo lẹ. Enẹwutu, Jesu dọna ẹn dọmọ: “Tlolo he hiẹ lẹkọ, hẹn mẹmẹsunnu towe lẹ lodo.” (Luku 22:32, 54-62) Pita zindonukọn bo wá yin dopo to dòtin agun Klistiani owhe kanweko tintan tọn lẹ tọn mẹ. (Gal. 2:9) Mọdopolọ, mẹhe sẹ̀n taidi mẹho agun tọn de wayi sọgan penugo nado kẹalọyi azọngban mọnkọtọn whladopo dogọ bo mọ ayajẹ to alọgigọna yisenọ hatọ lẹ nado lodo to gbigbọ-liho mẹ.

Azọngban ko yin yíyí sọn mẹhe sẹ̀n taidi nugopọntọ delẹ si, podọ enẹ sọgan ko hẹn yé tindo numọtolanmẹ dọ yé ko gboawupo to Jiwheyẹwhe sinsẹ̀n mẹ. Julio, * he sẹ̀n taidi mẹho to Bolivie na owhe 20 linlán dọmọ: “To gbẹzan ṣie mẹ, suhugan whenu ṣie tọn wẹ n’nọ yí do wleawuna hodidọ lẹ, nado dla mẹmẹsunnu lẹ pọ́n, podọ nado basi dlapọn lẹngbọhọtọ tọn na hagbẹ agun lọ tọn lẹ! Ṣigba, lẹblanulọkẹyi ehe lẹpo doalọte to gbèdopo. Nado dọ hójọhó, ojlẹ awufiẹsa tọn de wẹ e yin na mi.” To egbehe, Julio to sinsẹ̀n taidi mẹho whladopo dogọ.

Devi Jakọbu wlan dọmọ: “Mẹmẹsunnu ṣie lẹ emi, mì nọ pọ́n ẹn hlan di ayajẹ nugbonugbo, to whenuena mì pehẹ whlepọn voovo lẹ.” (Jak. 1:2) Whlepọn he mí nọ pehẹ na homẹkẹn po mapenọ-yinyin mítọn po wutu lẹ go wẹ Jakọbu to hodọ gando. E donù ojlo zogbe, nuyiwa mẹnukuntahihopọn tọn lẹ, po mọmọ po sọyi go. (Jak. 1:14; 2:1; 4:1, 2, 11) Eyin Jehovah domẹplọnlọ mí go, numimọ enẹ sọgan hẹn awubla wá na mí. (Heb. 12:11) Ṣigba, whlepọn mọnkọtọn ma dona hò ayajẹ mítọn yí.

Eyin azọngban tlẹ ko yin yíyí sọn mí si to agun mẹ, mí gbẹ́ tindo dotẹnmẹ hundote nado do obá he mẹ yise mítọn tindo huhlọn jẹ hia bo do owanyi mítọn na Jehovah hia. Mí sọgan sọ lẹnnupọndo nuhewutu mí  do to sinsẹ̀n taidi azọngbannọ ji. Be na mí nido mọaleyi wutu wẹ ya, kavi na mí yiwanna Jiwheyẹwhe bo tindo nujikudo dọ etọn wẹ agun lọ bo dona yin nukunpedego po owanyi po wutu wẹ mí do yin whinwhàn nado pegan na azọngban mọnkọtọn? (Owalọ 20:28-30) Mẹho he yí ayajẹ do zindonukọn nado to sinsẹ̀nzọn wiwe basi to whenue azọngban yin yíyí sọn yé si lẹ nọ dohia mẹlẹpo, kakajẹ Satani ji, dọ owanyi nujọnu tọn wẹ emi tindo na Jehovah.

Ahọlu Davidi mọ mẹplọnlọ yí to whenue e wà ylando sinsinyẹn lẹ godo, podọ e kẹalọyi wọhẹ bo yin jijona. Davidi jihàn dọmọ: “Donanọ wẹ ewọ [tasinsinyẹn] mẹhe tọn yin jijona, ylando mẹhe tọn yin nuṣinyọndo. Donanọ wẹ dawe lọ mẹhe OKLUNỌ ma hia ylanwiwa dokọna; ayiha mẹhe tọn mẹ oklọ depope ma te.” (Ps. 32:1, 2) Mẹplọnlọ klọ́ Davidi wé, podọ ayihaawe ma tin dọ enẹ hẹn ẹn pegan dogọ nado yin lẹngbọhọtọ na omẹ Jiwheyẹwhe tọn lẹ.

To paa mẹ, mẹmẹsunnu he lẹzun mẹho whladopo dogọ lẹ nọ yin lẹngbọhọtọ dagbe hugan lehe yé yin do to tintan whenu. Mẹho mọnkọtọn dopo dọmọ: “Todin, n’yọ́n lehe yè nọ penukundo mẹhe ṣinuwa lẹ go do ganji.” Mẹho devo dọmọ: “Todin, lẹblanulọkẹyi he n’tindo nado nọ yilizọn na mẹmẹsunnu ṣie lẹ yin nuhọakuẹ na mi taun.”

Psalm-kantọ wlan dọmọ: “[Jehovah] ma na yí whepoponu do wọhẹmẹ.” (Ps. 103:9) Enẹwutu, mí ma dona nọ lẹndọ Jiwheyẹwhe ma sọgan dejido mẹhe ṣinuwa sinsinyẹn de go gbede ba. Ricardo, he hẹn azọngban etọn taidi mẹho bu to whenue e ko sẹ̀n na owhe susu godo dọmọ: “Nuṣiwa ṣie hẹn mi jẹflumẹ sinsinyẹn. Na ojlẹ dindẹn, numọtolanmẹ nugomape tọn glọnalina mi ma nado gọ̀ azọngban nugopọntọ tọn yí bo yilizọn na mẹmẹsunnu lẹ. N’ma dejido dee go bo lẹndọ n’sọgan ṣinuwa whladopo dogọ. Ṣigba, n’yiwanna alọgigọna mẹdevo lẹ, enẹwutu n’nọ deanana plọnmẹ Biblu lẹ, na tuli mẹmẹsunnu lẹ to Plitẹnhọ Ahọluduta tọn mẹ, bosọ nọ wazọ́n hẹ yé to lizọnyizọn kunnudegbe tọn mẹ. Enẹ gọalọna mi nado gọ̀ jidide mọyi, podọ todin n’to sinsẹ̀n taidi mẹho whladopo dogọ.”

Mẹhẹndohomẹ sọgan glọnalina mẹmẹsunnu de ma nado gọ̀ azọngban mẹho tọn yí. E na yọ́n hugan nado yinuwa taidi Davidi, devizọnwatọ Jehovah tọn,  mẹhe dona họ̀nna Ahọlu Sauli he to awuwhàn ẹn! Davidi gbẹ́ nado víhlọ̀n to Sauli go, etlẹ yin to whenue dotẹnmẹ lọ hundote na ẹn. (1 Sam. 24:4-7; 26:8-12) To whenue Sauli kú to awhàngbenu, Davidi nọ aluẹmẹ na ẹn, bo dọho gando ewọ po visunnu etọn Jonatani po go taidi “mẹvivẹ podọ [mẹyiwanna].” (2 Sam. 1:21-23) Davidi ma hẹnmẹdohomẹ.

Eyin hiẹ tindo numọtolanmẹ dọ azọngban yin yíyí sọn asi we, na mẹdevo lẹ ma mọnukunnujẹ gowe kavi na whẹdida mawadodo wutu, ma dike mẹhẹndohomẹ ni duto jiwe blo. Di apajlẹ, azọngban yin yíyí sọn William si to whenue e ko sẹ̀n taidi mẹho na nudi owhe 30 to Grande-Bretagne godo, podọ e hẹn delẹ to mẹho agun tọn lẹ mẹ do homẹ. Etẹwẹ gọalọna William nado gọ̀ jẹgangan to gbigbọ-liho? E dọmọ: “Owe Job tọn hihia miọnhomẹna mi. Eyin Jehovah gọalọna Job nado tindo jijọho hẹ họntọn etọn atọ̀n lẹ, nẹmunẹmu wẹ Ewọ ma na gọalọna mi nado tindo jijọho hẹ mẹho Klistiani lẹ!”—Job 42:7-9.

Eyin hiẹ lọsu wẹ ze azọngban jo bo ma yin lẹngbọhọtọ na apó Jiwheyẹwhe tọn ba, e na yọ́n dọ a ni lẹnnupọndo nuhewutu a do wàmọ ji. Be nuhahun mẹdetiti tọn lẹ wẹ hẹn we jẹflumẹ ya? Be a wá ze nudevo lẹ do otẹn tintan mẹ wutu wẹ ya? Be mape mẹdevo lẹ tọn wẹ hẹn we gbọjọ ya? Depope he whẹho lọ yin, flindọ a tin to otẹn dagbe mẹ nado gọalọna mẹdevo lẹ to aliho susu mẹ to whenue a yin mẹho agun tọn. Togunmẹho towe lẹ nọ hẹn yé lodo, apajlẹ towe nọ na yé tuli, podọ dlapọn lẹngbọhọtọ tọn towe nọ gọalọna yé nado doakọnna whlepọn lẹ. Azọ́n he hiẹ wà to whenue a yin mẹho agun tọn nugbonọ de nọ hẹn homẹ Jehovah tọn hùn, dile e nọ hẹn towe lọsu hùn do.—Howh. 27:11.

Jehovah ko gọalọna mẹhe hẹn azọngban bu lẹ nado gọ̀ ayajẹ mọyi bosọ hẹn yé pegan nado nọ deanananu to agun mẹ whladopo dogọ. Eyin azọngban mẹho tọn yin yíyí sọn asi we kavi hiẹ lọsu wẹ ze azọngban jo, hiẹ sọgan ‘dovivẹnu na azọ́ntẹn nugopọntọ tọn’ whladopo dogọ. (1 Tim. 3:1) Paulu “ma . . . doalọtena dẹ̀hiho” do Klistiani Kọlọsi tọn lẹ tamẹ, na yé nido gọ́ na oyọnẹn he pegan ojlo Jiwheyẹwhe tọn “nado sọgan zinzọnlin dile e jẹ do to Jehovah nukọn nado hẹn homẹ etọn hùn to gigọ́ mẹ.” (Kọl. 1:9, 10) Eyin hiẹ wá tindo lẹblanulọkẹyi whladopo dogọ nado sẹ̀n taidi mẹho agun tọn, lẹhlan Jehovah nado mọ huhlọn, homẹfa, po ayajẹ po yí. To azán godo tọn ehelẹ mẹ, omẹ Jiwheyẹwhe tọn lẹ tindo nuhudo alọgọ lẹngbọhọtọ owanyinọ lẹ tọn. Be hiẹ tindo ojlo nado nọ hẹn mẹmẹsunnu towe lẹ lodo ya?