MẸDATỌ mítọn doyẹyigona mí gbọn nunina daho de nina mí dali, enẹ wẹ mẹdekannujẹ nudide bibasi tọn. Humọ, e nọ kọ̀n dona susugege do mẹhe nọ yí mẹdekannujẹ enẹ zan po ahundopo po na nukọnyiyi sinsẹ̀n-bibasi nugbo lọ tọn lẹ ji, podọ do mẹhe nọ dovivẹnu nado klan yinkọ etọn do wiwe bo nọ nọgodona lẹndai daho etọn lẹ ji. Jehovah ma nọ kẹalọyi tonusise mọmọ tọn na mí yin hinhẹn po huhlọn po nado wàmọ wutu. Kakatimọ, e nọ yọ́n pinpẹn mẹdezejo sọn ojlo mẹ wá mítọn tọn, na mí yin whinwhàn gbọn owanyi ahundopo tọn po pinpẹn-nutọn-yinyọnẹn sisosiso po dali wutu.

Di apajlẹ, to whenue Islaelivi lẹ tin to zungbo Sinai tọn mẹ, Jehovah degbena yé nado gbá nọtẹn sinsẹ̀n-bibasi tọn de. E dọmọ: “Mì yí avọ́nunina de sọn mì ṣẹnṣẹn hlan OKLUNỌ lọ: [mẹdepope he tindo ojlo ni hẹn avọ́nunina OKLUNỌ lọ tọn wá].” (Eks. 35:5) Islaelivi dopodopo sọgan na nudepope he go e pé, podọ nunina sọn ojlo mẹ wá dopodopo, mahopọnna nudepope he e yin, vlavo e sù kavi whè, sọgan yin yiyizan to aliho he sọgbe mẹ nado hẹn lẹndai Jiwheyẹwhe tọn di. Nawẹ yé yinuwa gbọn?

‘Omẹ dopodopo he ayiha etọn whàn ẹn’ po ‘mẹdepope he gbigbọ etọn hẹn ẹn yin ojlonọ’ po basi nunina sọn ojlo mẹ wá. Sunnu po yọnnu po he tindo ojlo lẹ hẹn nunina lẹ wá na azọ́n Jehovah tọn: awukọ̀hẹnnu, tómẹnu, alọkẹ ohia tọn, sika, fataka, gànvẹẹ, avọ̀ ahó vẹẹ, avọ̀ gefunwunmẹ, avọ̀ vẹẹ ṣẹ́ṣẹ́, alavọ dagbedagbe, ayú gbọgbọẹ tọn, ayú agbò tọn he yè yí ayú vẹẹ do dà, ayú seali tọn, atin akasia tọn, zannu akuẹgegenu tọn, nuyọnwan, po amì po. To godo mẹ, “[azọ́nwanu he] yé ko tindo lọ pé na azọ́n lọ lẹpo nado basi i, bosọ [lán].”—Eks. 35:21-24, 27-29; 36:7.

E ma yin nunina he mẹhe nọ nọgodona sinsẹ̀n-bibasi wiwe ṣeke Jehovah tọn lẹ nọ basi wẹ nọ hẹn homẹhun etọn hùn gba, kakatimọ ojlo dagbe yetọn wẹ nọ hẹn homẹ etọn hùn hugan. Yé sọ nọ yin whinwhàn nado yí gànmẹ po huhlọn yetọn po zan. Kandai lọ dọmọ: “Yọnnu he yin ayiha nuyọnẹnnọ lẹpo yí alọ yetọn do gbẹ̀n sekan.” Podọ, “yọnnusi lẹpo ayiha mẹhe tọn fọ́n yé daga to nuyọnẹn mẹ lẹ gbẹ̀n ofún gbọgbọẹ lẹ tọn.” Humọ, Jehovah na Bezalẹli ‘nuyọnẹn, nukunnumọjẹnumẹ, po oyọnẹn po nado wà anazọ́n hunkọhunkọ lẹ.’ Na nugbo tọn, Jiwheyẹwhe na Bezalẹli po Oholiabi po huhlọn he yé tindo nuhudo etọn nado hẹn azọ́n he yin didena yé lẹpo di.—Eks. 35:25, 26, 30-35.

To whenue Jehovah biọ to Islaelivi lẹ si nado basi nunina, e deji mlẹnmlẹn dọ ‘mẹdepope he tindo ojlo’ na nọgodona sinsẹ̀n-bibasi nugbo. Enẹ zọ́n bọ e kọ̀n dona susugege do mẹhe yí ojlo do wàmọ lẹ ji gbọn anademẹ po ayajẹ susu po nina yé dali. Gbọnmọ dali, Jehovah to didohia dọ eyin emi dona ojlo dagbe devizọnwatọ emitọn lẹ tọn, emi sọgan hẹn ẹn diun dọ nudepope ma na whèdo yé nado hẹn ojlo emitọn di. (Ps. 34:9) Dile hiẹ to Jehovah sẹ̀n matin ṣejannabi, ayihaawe ma tin dọ ewọ na dona ojlo dagbe towe.