1, 2. Naegbọn Jesu do na apajlẹ talẹnti lẹ tọn lọ?

TO APAJLẸ talẹnti lẹ tọn lọ mẹ, Jesu do azọngban he hodotọ yiamisisadode etọn lẹ dona hẹndi de hia to aliho he họnwun mẹ. Mí dona mọnukunnujẹ zẹẹmẹ apajlẹ lọ tọn mẹ, na e gando Klistiani nugbo lẹpo go, vlavo yé tindo todido olọn mẹ tọn kavi aigba ji tọn.

² Jesu na apajlẹ talẹnti lẹ tọn to whenue e to gblọndo na na kanbiọ he devi lẹ kanse e gando “ohia tintin tofi [etọn] tọn po vivọnu titonu lọ tọn po” go. (Mat. 24:3) Enẹwutu, apajlẹ lọ dona mọ hẹndi to ojlẹ mítọn mẹ podọ ehe yin dopo to ohia he dekunnu dọ Jesu ko tin tofi bo to gandu taidi Ahọlu lẹ mẹ.

3. Etẹlẹ wẹ apajlẹ he yin kinkandai to Matiu weta 24 po 25 po mẹ lẹ plọn mí?

³ Apajlẹ talẹnti lẹ tọn yin dopo to apajlẹ ẹnẹ he tindo kanṣiṣa hẹ yede bo yin kinkandai to Matiu 24:45 jẹ 25:46 mẹ lẹ mẹ. To whenue Jesu to gblọndo na na kanbiọ he yin kinkanse e gando ohia tintin tofi etọn tọn go wẹ e na apajlẹ atọ̀n he pò lẹ lọsu, enẹ wẹ dehe gando afanumẹ nugbonọ podọ nuyọnẹntọ lọ, awhli ao lẹ, gọna lẹngbọ lẹ po gbọgbọẹ lẹ po go. To apajlẹ ẹnẹ lọ lẹpo mẹ, Jesu zinnudo jẹhẹnu delẹ ji, ehe yè nado nọ yọ́n hodotọ nugbo etọn lẹ to azán godo tọn ehelẹ mẹ. Hodotọ yiamisisadode etọn lẹ hodọ wẹ e te to apajlẹ he e na gando afanumẹ lọ, awhli ao lẹ, po talẹnti lẹ po go mẹ. To apajlẹ he gando afanumẹ nugbonọ lọ go  mẹ, Jesu zinnudeji dọ pipli pẹvi mẹyiamisisadode lẹ tọn he yin azọ́ndena nado na núdùdù devizọnwatọ whégbè tọn lẹ to azán godo tọn lẹ mẹ dona yin nugbonọ podọ nuyọnẹntọ. To apajlẹ awhli ao lẹ tọn mẹ, Jesu dohia to aliho he họnwun mẹ dọ hodotọ yiamisisadode emitọn lẹpo wẹ dona wleawudai bo tin to aṣeji, na dile yé tlẹ yọnẹn dọ Jesu ja, yé ma yọ́n azán lọ kavi gànmẹ lọ. To apajlẹ talẹnti lẹ tọn lọ mẹ, Jesu dohia dọ mẹyiamisisadode lẹ dona yin azọ́n sinsinyẹnwatọ dile yé to azọngban Klistiani tọn yetọn lẹ hẹndi. Mẹhe tindo todido aigba ji tọn lẹ hodọ wẹ Jesu te to whenue e na apajlẹ he gbọngodo lọ, enẹ wẹ dehe gando lẹngbọ lẹ po gbọgbọẹ lẹ po go. E zinnudeji dọ yé dona yin nugbonọ bo nọgodona mẹmẹsunnu yiamisisadode Jesu tọn he tin to aigba ji lẹ to gigọ́ mẹ. * Todin, mì gbọ mí ni na ayidonugo apajlẹ talẹnti lẹ tọn lọ.

4, 5. Mẹnu wẹ oklunọ lọ nọtena, podọ nawẹ talẹnti de nọ họakuẹ sọ?

⁴ Hia Matiu 25:14-30. Sọn ojlẹ dindẹn die wẹ owe mítọn lẹ ko nọ dohia dọ Jesu wẹ yin dawe kavi oklunọ he yin nùdego to apajlẹ lọ mẹ, podọ e tọ́nwhẹ̀n yì tògodo to whenue e hẹji yì olọn mẹ to owhe 33 W.M. To apajlẹ he Jesu na jẹnukọn de mẹ, e do lẹndai he wutu e na tọ́nwhẹ̀n yì tògodo hia, enẹ wẹ “nado mọ aṣẹpipa ahọlu-yinyin tọn yí.” (Luku 19:12) Jesu ma mọ aṣẹpipa ahọlu-yinyin tọn lọ blebu yí tlolo he e lẹkọyi olọn mẹ. * Kakatimọ, ewọ “sinai to adusilọ Jiwheyẹwhe tọn mẹ, sọn ojlẹ enẹ mẹ sọyi, e to tenọpọn whenue kẹntọ etọn lẹ na yin yíyí do tokloafọligbe afọ etọn lẹ tọn.”—Heb. 10:12, 13.

⁵ Dawe he yin nùdego to apajlẹ lọ mẹ tindo talẹnti ṣinatọ̀n, yèdọ adọkun daho de to ojlẹ enẹ mẹ. * Whẹpo e do tọ́nwhẹ̀n yì tògodo, e má talẹnti lọ lẹ na afanumẹ etọn lẹ, po linlẹn po dọ yé na yí yé do wàjọ to yìyì etọn godo. Taidi dawe ehe, Jesu lọsu tindo nuhe họakuẹ taun de jẹnukọnna olọn mẹ yìyì etọn. Etẹwẹ yin nulọ? E gando azọ́n he e wà to whenue e to aigba ji go.

6, 7. Etẹwẹ talẹnti lọ lẹ nọtena?

⁶ Jesu nọ ylọ azọ́n yẹwhehodidọ po mẹpinplọn po tọn etọn dọ nujọnu. (Hia Luku 4:43.) Gbọn azọ́n ehe wiwà dali, e wleawuna ogle de he sọgan de sinsẹ́n susu tọ́n. E dọna devi etọn lẹ to ojlẹ de mẹ wayi dọmọ: “Mì ze nukun mìtọn lẹ daga bo pọ́n ogle lẹ hlan, mì na mọdọ yé ko bia na gbingbẹ̀n.” (Joh. 4:35-38) Linlẹn etọn wẹ nado bẹ ahunjijlọnọ susu devo lẹ pli he na wá lẹzun devi etọn lẹ. Taidi glesi dagbe de, Jesu ma na dovọ́na ogle etọn he mẹ jinukun lẹ ko bia na gbingbẹ̀n te. Enẹwutu, ojlẹ vude to fọnsọnku etọn godo, podọ jẹnukọnna olọn mẹ yìyì etọn, e ze azọ́ndenamẹ sinsinyẹn de do alọmẹ na devi etọn lẹ dọmọ: ‘Enẹwutu, mì yì bo hẹn gbẹtọ lẹ zun devi lẹ.’ (Mat. 28:18-20) Gbọnmọ dali, Jesu ze adọkunnu họakuẹ de, yèdọ lizọnyizọn Klistiani tọn lọ do alọmẹ na yé.—2 Kọl. 4:7.

⁷ To whelọnu lo, tadona tẹ kọ̀n wẹ mí sọgan wá? Na nugbo tọn, whenue Jesu to azọ́ndena hodotọ etọn lẹ nado hẹn gbẹtọ lẹ zun devi, “nutindo etọn lẹ,” enẹ wẹ talẹnti etọn lẹ wẹ e to zizedo alọmẹ na yé. (Mat.  25:14) Do glido, talẹnti lọ lẹ nọtena azọngban lọ nado dọyẹwheho bo hẹn gbẹtọ lẹ zun devi.

8. Dile etlẹ yindọ afanumẹ lọ lẹ ma mọ talẹnti sọha dopolọ yí, etẹwẹ oklunọ lọ donukun sọn yé si?

⁸ Apajlẹ talẹnti lẹ tọn dohia dọ oklunọ lọ yí talẹnti atọ́n na afanumẹ tintan, awe na omẹ awetọ, podọ dopo poun na omẹ atọ̀ntọ. (Mat. 25:15) Dile etlẹ yindọ afanumẹ lọ lẹ ma mọ talẹnti sọha dopolọ yí, oklunọ lọ donukun dọ yemẹpo ni wazọ́n sinsinyẹn nado yí talẹnti lọ lẹ zan, enẹ wẹ nado wà nuhe go yé pé lẹpo to lizọnyizọn lọ mẹ. (Mat. 22:37; Kọl. 3:23) To owhe kanweko tintan whenu, bẹsọn Pẹntikọsti 33 W.M. wẹ hodotọ Klisti tọn lẹ jẹ talẹnti lọ lẹ yizan ji nado wàjọ. Lehe yé wazọ́n sinsinyẹn nado dọyẹwheho bo hẹn gbẹtọ lẹ zun devi do yin kinkandai to owe Owalọ lẹ tọn mẹ to Biblu mẹ. *—Owalọ 6:7; 12:24; 19:20.

9. (a) Etẹwẹ afanumẹ nugbonọ awe lẹ yí talẹnti lọ lẹ do wà, podọ etẹwẹ enẹ dohia? (b) Adà tẹwẹ “lẹngbọ devo lẹ” nọ yiwà?

⁹ To ojlẹ opodo tọn lọ mẹ, titengbe bẹsọn 1919, afanumẹ nugbonọ yiamisisadode Klisti tọn he tin to aigba ji lẹ ko yí talẹnti Oklunọ lọ tọn lẹ do to ajọwa. Taidi afanumẹ awe tintan lọ lẹ, mẹmẹsunnu po mẹmẹyọnnu  yiamisisadode lẹ po ko yí talẹnti he yé mọyi lọ lẹ do wà nuhe go yé pé lẹpo. E ma yin dandan nado dindona mẹhe mọ talẹnti atọ́n yí po mẹhe mọ awe yí po. To apajlẹ lọ mẹ, afanumẹ awe lọ lẹ mọ talẹnti sọha he oklunọ lọ na yé dopo dogọ, ehe dohia dọ yé omẹ awe lẹpo wẹ wazọ́n sinsinyẹn. Adà tẹwẹ mẹhe tindo todido aigba ji tọn lẹ nọ yiwà? Yé nọ yí adà titengbe de wà! Mí plọn to apajlẹ he Jesu na gando lẹngbọ lẹ po gbọgbọẹ lẹ po go mẹ dọ, mẹhe tindo todido aigba ji tọn lẹ tindo lẹblanulọkẹyi lọ nado yí nugbonọ-yinyin do nọgodona mẹmẹsunnu yiamisisadode Jesu tọn lẹ to azọ́n yẹwhehodidọ po mẹpinplọn po tọn lọ mẹ. To azán godo tọn he vẹawu ehelẹ mẹ, pipli awe ehelẹ to azọ́nwadopọ taidi “lẹngbọpa dopo” bo yí zohunhun do to azọ́n mẹhẹnzun devi tọn lọ wà.—Joh. 10:16.

10. Onú titengbe tẹwẹ dohia dọ Jesu ko tin tofi?

¹⁰ Owhẹ̀ Oklunọ lọ tọn whẹ́n nado donukun dọ yé ni duale. Dile mí ko dọ do jẹnukọn, e họnwun dọ devi nugbonọ etọn lẹ hẹn nutindo etọn lẹ jideji to owhe kanweko tintan whenu. Etẹwẹ dogbọn ojlẹ opodo tọn he mẹ apajlẹ talẹnti lẹ tọn lọ dona mọ hẹndi te dali? Devizọnwatọ nugbonọ Jesu tọn lẹ ko wazọ́n sinsinyẹn nado dọyẹwheho bo hẹn gbẹtọ lẹ zun devi, yèdọ azọ́n daho hugan he ma ko yin wiwà pọ́n to whenuho mẹ. Vivẹnudido pọmẹ tọn yetọn zọ́n bọ devi yọyọ livi susu lẹ nọ lẹzun wẹnlatọ Ahọluduta lọ tọn lẹ to whemẹwhemẹ, ehe dohia dọ azọ́n yẹwhehodidọ po mẹpinplọn po tọn lọ yin adà titengbe ohia he dekunnu dọ Jesu ko tin tofi bo to gandu taidi Ahọlu lẹ tọn. Ayihaawe matin dọ, Oklunọ yetọn sin homẹ na ko hùn taun!

11. Etẹwẹ gọalọna mí nado wá tadona lọ kọ̀n dọ nukunbibia daho lọ whenu wẹ Jesu na wá nado biọ lẹnjo?

¹¹ Jesu na wá nado biọ lẹnjo sọn afanumẹ etọn lẹ si sẹpọ vivọnu nukunbibia daho he ja lọ tọn. Etẹwẹ gọalọna mí nado wá tadona ehe kọ̀n? To dọdai Jesu tọn he yin kinkandai to Matiu weta 24 po 25 po mẹ, e donù wiwá etọn go whlasusu. To whenue e to hodọ gando whẹdida he na wá aimẹ to nukunbibia daho lọ whenu go, e dọ dọ gbẹtọ lẹ “nasọ mọ Visunnu gbẹtọ tọn ja to aslọ olọn tọn lẹ mẹ.” E na tuli hodotọ etọn he na nọgbẹ̀ to azán godo tọn lẹ mẹ lẹ nado tin to aṣeji, to whenue e dọmọ: “Mì ma yọ́n azán he gbè  Oklunọ mìtọn ja” podọ “ogàn he mẹ mì ma lẹn do wẹ Visunnu gbẹtọ tọn ja.” (Mat. 24:30, 42, 44) Enẹwutu, to whenue Jesu dọ dọ “oklunọ afanumẹ lọ lẹ tọn wá bo biọ to yé si nado basi lẹnjo na ẹn,” e họnwun dọ ewọ to alọdlẹndo whenue e na wá nado hẹn whẹdida ṣẹ to opodo titonu ehe tọn. *—Mat. 25:19.

12, 13. (a) Nawẹ oklunọ lọ yinuwa hẹ afanumẹ awe tintan lọ lẹ gbọn, podọ etẹwutu? (b) Whetẹnu wẹ mẹyiamisisadode lẹ nọ mọ hiadogonamẹ godo tọn yí? (Pọ́n apotin lọ “ Lẹnjo Bibasi to Okú Whenu.”) (c) Ahọsumẹ tẹwẹ mẹhe na yin whẹdana taidi lẹngbọ lẹ na mọyi?

¹² Sọgbe hẹ apajlẹ lọ, to whenue oklunọ lọ wá, e mọdọ afanumẹ awe tintan lọ lẹ, enẹ wẹ mẹhe e yí talẹnti atọ́n na po mẹhe e yí awe na po wẹ yin nugbonọ, na dopodopo yetọn dovivẹnu nado mọ talẹnti sọha he e na yé dopo dogọ. Hogbe mẹpipa tọn dopolọ wẹ oklunọ lọ yizan na afanumẹ awe lọ lẹ dọmọ: “A basi do ganji, hiẹ afanumẹ dagbe podọ nugbonọ! Hiẹ ko yin nugbonọ do onú pẹvi de ji. Yẹn na de we do onú susu ji.” (Mat. 25:21, 23) Eyin mọ wẹ, etẹwẹ mí sọgan donukun to whenue Oklunọ lọ, yèdọ Jesu he yin gigopana lọ na wá to sọgodo nado hẹn whẹdida ṣẹ?

¹³ Mẹhe afanumẹ awe tintan lọ lẹ nọtena, yèdọ devi yiamisisadode he yin azọ́n sinsinyẹnwatọ lẹ na ko mọ hiadogonamẹ godo tọn yetọn yí whẹpo nukunbibia daho lọ na do bẹjẹeji. (Osọ. 7:1-3) Jẹnukọnna Amagẹdọni, Jesu na na yé ahọsumẹ olọn mẹ tọn yetọn, ehe e ko dopà etọn na yé lọ. Mẹhe tindo todido aigba ji tọn bo nọgodona mẹmẹsunnu Klisti tọn lẹ to azọ́n yẹwhehodidọ tọn lọ mẹ lẹ na ko yin whẹdana taidi lẹngbọ, bo na mọ lẹblanulọkẹyi lọ nado nọgbẹ̀ to Ahọluduta lọ glọ to aigba ji.—Mat. 25:34.

14, 15. Be didọ wẹ Jesu te dọ susu mẹmẹsunnu yiamisisadode etọn lẹ tọn na lẹzun afanumẹ ylankan podọ adidọnọ ya? Basi zẹẹmẹ.

¹⁴ To apajlẹ lọ mẹ, afanumẹ atọ̀ntọ lọ whlá talẹnti etọn do okọ́ glọ, kakati nado yí i do wàjọ kavi ze e do azọ́nwatọ akuẹsẹdotẹn tọn lẹ dè. Afanumẹ ehe do gbigbọ ylankan hia, na e desọn ojlo mẹ nado yinuwa jẹagọdo nuhe na hẹn ale wá na oklunọ lọ. Abajọ oklunọ lọ do ylọ ẹ dọ afanumẹ “ylankan podọ adidọnọ.” Oklunọ lọ yí talẹnti lọ sọn e si bo ze e na mẹhe tindo talẹnti ao lọ. Enẹgodo, afanumẹ ylankan lọ yin dindlan “do zinvlu mẹ to gbonu.” “Finẹ wẹ e na viavi bo dù adúkúnkún te.”—Mat. 25:24-30; Luku 19:22, 23.

¹⁵ To whenuena e yindọ dopo to afanumẹ atọ̀n oklunọ lọ tọn lẹ mẹ whlá talẹnti etọn, be nuhe dohia Jesu te wẹ yindọ mado-atọ̀n hodotọ yiamisisadode etọn lẹ tọn na lẹzun afanumẹ ylankan podọ adidọnọ ya? Lala. Lẹnnupọndo lẹdo hodidọ lọ tọn ji. To apajlẹ he Jesu na gando afanumẹ nugbonọ podọ  nuyọnẹntọ lọ go mẹ, e dọhodo afanumẹ ylankan de ji he na hò afanumẹ hatọ etọn lẹ. Jesu ma to dọdai dọ dọ pipli afanumẹ ylankan lẹ tọn de na wá aimẹ gba. Kakatimọ, avase wẹ e to nina afanumẹ nugbonọ lọ ma nado yinuwa taidi afanumẹ ylankan de. Mọdopolọ, to apajlẹ awhli ao lọ lẹ tọn mẹ, Jesu ma to didohia dọ mado-awe hodotọ yiamisisadode lẹ tọn na wá taidi awhli nulunọ atọ́n lọ lẹ gba. Kakatimọ, avase wẹ e to nina mẹmẹsunnu gbigbọmẹ tọn etọn lẹ gando nuhe na yin kọdetọn lọ go eyin yé gboawupo nado hẹn aṣejininọ yetọn go bo ma wleawudai. * To lẹdo hodidọ ehe tọn mẹ, e taidi nuhe sọgbe hẹ lẹnpọn dagbe nado wá tadona kọ̀n dọ, to apajlẹ talẹnti lẹ tọn lọ mẹ, Jesu ma to didọ dọ susu mẹmẹsunnu yiamisisadode etọn lẹ tọn na lẹzun afanumẹ ylankan podọ adidọnọ to azán godo tọn lẹ mẹ. Kakatimọ, Jesu to avase na hodotọ yiamisisadode etọn lẹ dọ yé dona zindonukọn nado to azọ́n sinsinyẹn wà, yèdọ nado yí talẹnti yetọn lẹ “do wàjọ,” bo dapana pọndohlan po nuyiwa afanumẹ ylankan lọ tọn po.—Mat. 25:16.

16. (a) Etẹlẹ wẹ mí plọn sọn apajlẹ talẹnti lẹ tọn lọ mẹ? (b) Nawẹ hosọ ehe vọ́ nukunnumọjẹnumẹ mítọn gando apajlẹ talẹnti lẹ tọn go jlado gbọn? (Pọ́n apotin lọ “ Nukunnumimọjẹ Apajlẹ Talẹnti lẹ Tọn Mẹ.”)

¹⁶ Onú awe tẹlẹ wẹ mí plọn sọn apajlẹ talẹnti lẹ tọn lọ mẹ? Tintan, Oklunọ lọ, yèdọ Klisti ko ze nuhọakuẹ etọn de do alọmẹ na afanumẹ yiamisisadode etọn lẹ, enẹ wẹ azọ́ndenamẹ lọ nado dọyẹwheho bo hẹn gbẹtọ lẹ zun devi. Awetọ, Klisti nọ donukun dọ mímẹpo ni yin azọ́n sinsinyẹnwatọ to lizọnyizọn lọ mẹ. Eyin mí wàmọ, mí sọgan deji dọ Oklunọ lọ na dona mí, na yise, aṣejininọ po nugbonọ-yinyin mítọn po.—Mat. 25:21, 23, 34.