Be Hiẹ Tindo Haṣinṣan Nujọnu Tọn hẹ Jehovah Ya?
“Mì dọnsẹpọ Jiwheyẹwhe, podọ ewọ na dọnsẹpọ mì.”—JAK. 4:8.
1. Naegbọn mí dona hẹn haṣinṣan mítọn hẹ Jehovah lodo?
BE A ko klan gbẹzan towe do wiwe bo yí baptẹm taidi Kunnudetọ Jehovah tọn de ya? Eyin mọ wẹ, be a tindo onú họakuẹ de, enẹ wẹ haṣinṣan mẹdetiti tọn de hẹ Jiwheyẹwhe. Ṣigba, haṣinṣan enẹ tin to owù mẹ, na aihọn Satani tọn po mapenọ-yinyin mílọsu tọn po nọ dekanpona ẹn wutu. Klistiani lẹpo wẹ nọ pehẹ ninọmẹ sinsinyẹn ehe. Enẹwutu, mí dona wà nuhe go mí pé lẹpo nado hẹn haṣinṣan mítọn hẹ Jehovah lodo.
2. (a) Etẹwẹ hogbe lọ haṣinṣan zẹẹmẹdo? (Pọ́n nudọnamẹ odò tọn.) (b) Nawẹ mí sọgan hẹn haṣinṣan mítọn hẹ Jehovah lodo dogọ gbọn?
2 Be hiẹ tindo haṣinṣan nujọnu tọn hẹ Jehovah ya? Be a jlo na hẹn haṣinṣan towe hẹ ẹ lodo dogọ ya? Jakọbu 4:8 dọ lehe a sọgan wà enẹ gbọn na we dọmọ: ‘Dọnsẹpọ Jiwheyẹwhe, podọ ewọ na dọnsẹpọ we.’ Doayi e go dọ ehe bẹ nuyiwa omẹ awe tọn hẹn. * Eyin mí ze afọdide lẹ nado dọnsẹpọ Jiwheyẹwhe, ewọ lọsu nọ wà nudopolọ nado dọnsẹpọ mí. To whenue nuyiwa enẹ zindonukọn bo ma doalọte, haṣinṣan mítọn hẹ Jehovah nọ to sinsinyẹn deji vudevude. Taidi kọdetọn de, haṣinṣan enẹ nọ lẹzun haṣinṣan nujọnu tọn na mí. Mí nọ wá tindo jidide Jesu tọn nkọ, mẹhe dọmọ: “Omẹ nujọnu tọn de wẹ ewọ he do mi hlan, podọ . . . yẹn yọ́n ewọ.” (Joh. 7:28, 29) Ṣigba, afọdide tẹlẹ wẹ a sọgan ze na taun tọn nado dọnsẹpọ Jehovah?
Nawẹ hiẹ sọgan nọ dọhodopọ hẹ Jiwheyẹwhe gbọn? (Pọ́n hukan 3)
3. Nawẹ mí sọgan hodọdopọ hẹ Jehovah gbọn?
3 Afọdide titengbe dopo nado dọnsẹpọ Jehovah wẹ nado dọhodopọ hẹ ẹ to gbesisọ mẹ. Nawẹ a sọgan dọhodopọ hẹ Jiwheyẹwhe gbọn? Jẹnukọn whẹ́, nawẹ a nọ dọhodopọ hẹ họntọn he nọ nọ̀ fidindẹn de gbọn? E họnwun dọ mì nọ kanwehlan ode awetọ bo nọ dọho to alokan ji, etlẹ sọgan yin whẹwhẹ. Hiẹ lọsu nọ dọhona Jehovah gbọn dẹ̀hiho hlan ẹn whẹwhẹ dali. (Hia Psalm 142:2.) Podọ a nọ na dotẹnmẹ Jehovah nado dọhona we gbọn Ohó etọn hihia to gbesisọ mẹ po ayihamẹlinlẹnpọn deji po dali. (Hia Isaia 30:20, 21.) Todin, mì gbọ mí ni gbadopọnna lehe hodọdopọ hẹ Jehovah nọ hẹn haṣinṣan he mí tindo hẹ ẹ lodo, bo nọ zọ́n bọ haṣinṣan mítọn hẹ ewọ nọ yin nujọnu tọn dogọ do.
JEHOVAH NỌ DỌHONA WE TO WHENUE A TO BIBLU PLỌN
4, 5. Nawẹ Jehovah nọ dọhodopọ hẹ dopodopo mítọn gbọn Ohó etọn gblamẹ gbọn? Na apajlẹ.
4 Matin ayihaawe, a kọngbedopọ dọ Biblu bẹ owẹ̀n Jiwheyẹwhe tọn hẹn na gbẹtọvi lẹpo to paa mẹ. Ṣigba, be Biblu sọ do nuhe hiẹ sọgan wà nado dọnsẹpọ Jehovah hia ya? Na nugbo tọn, e dohia. Gbọnna? Dile hiẹ to Biblu hia bo to pinplọn ẹn to gbesisọ mẹ, nọ lẹnnupọndo numọtolanmẹ he a tindo gando nuhe a hia go ji bo nọ lẹnayihamẹpọn do lehe a sọgan yí i do yizan mẹ to gbẹzan towe mẹ do ji; gbọnmọ dali hiẹ to dotẹnmẹ na Jehovah nado dọhona we gbọn Ohó etọn gblamẹ. Ehe na zọ́n bọ hiẹ na tindo haṣinṣan pẹkipẹki de hẹ ẹ.—Heb. 4:12; Jak. 1:23-25.
5 Di apajlẹ, hia hogbe Jesu tọn lẹ he dọ dọ “mì sọ bẹ adọkunnu lẹ pli na mìde do aigba ji ba blo,” bo lẹnayihamẹpọn deji. Eyin a mọdọ a ko yí gbẹzan towe do to godonọna Ahọluduta lọ, a na tindo numọtolanmẹ lọ dọ homẹ Jehovah tọn hùn do gowe. To alọ devo mẹ, eyin a mọdọ a dona zan gbẹzan jlẹkaji tọn nado na ayidonugo Ahọluduta lọ dogọ, e dohia dọ Jehovah wẹ to avase na we gando adà he mẹ hiẹ sọgan dovivẹnu te de go nado dọnsẹpọ ewọ dogọ.—Mat. 6:19, 20.
6, 7. (a) Nawẹ Biblu pinplọn nọ yinuwado owanyi mítọn na Jehovah po owanyi he ewọ lọsu tindo na mí po ji gbọn? (b) Etẹwẹ dona yin yanwle mítọn to whenue mí to Biblu plọn?
6 Biblu pinplọn nọ gọalọna mí nado yọ́n adà he mẹ mí sọgan dovivẹnu te lẹ nado yinukọn to gbigbọ-liho. E sọ nọ zọ́n bọ mí nọ yọ́n pinpẹn aliho owanyinọ Jehovah tọn lẹ tọn dogọ, ehe nọ whàn mí nado yiwanna ẹn dogọ. Podọ to whenue owanyi mítọn na Jiwheyẹwhe jideji, owanyi he ewọ lọsu tindo na mí nọ sinyẹn deji, gbọnmọ dali haṣinṣan mítọn hẹ ẹ nọ lodo dogọ.—Hia 1 Kọlintinu lẹ 8:3.
7 Ṣigba nado dọnsẹpọ Jehovah, nujọnu wẹ e yin dọ mí ni nọ tindo yanwle he sọgbe de to whenue mí to nuplọn. Johanu 17:3 dọmọ: “Ehe wẹ ogbẹ̀ madopodo, dọ yé ni to vivẹnudo zọnmii nado yọ́n hiẹ Jiwheyẹwhe nugbo dopo kẹdẹ lọ, podọ mẹhe hiẹ dohlan, yèdọ Jesu Klisti.” Enẹwutu, yanwle mítọn ma dona yin nado yọ́n Jehovah poun gba, ṣigba nado dovivẹnu bo “yọ́n” Jehovah ganji taidi Omẹ nujọnu tọn de.—Hia Eksọdusi 33:13; Ps. 25:4.
8. (a) Numọtolanmẹ tẹwẹ mẹde sọgan tindo gando lehe Jehovah yinuwa hẹ Ahọlu Azalia to 2 Ahọlu lẹ 15:1-5 mẹ do go? (b) Eyin mí yọ́n Jehovah ganji, nawẹ enẹ nọ gọalọna mí ma nado tindo ayihaawe gando nuyiwa etọn lẹ go gbọn?
8 To whenue mí dovivẹnu nado yọ́n Jehovah ganji, mí ma na nọ to nuhà zẹjlẹgo eyin mí hia kandai Biblu tọn de he fọ́n ayihaawe awe dote gando aliho he mẹ e yinuwa te go. Di apajlẹ, numọtolanmẹ tẹwẹ a nọ tindo gando aliho he mẹ Jehovah yinuwa hẹ Azalia Ahọlu Juda tọn te go? (2 Ahọ. 15:1-5) Doayi e go dọ Azalia zindonukọn nado “wà enẹ he yin jijlọ to nukun OKLUNỌ tọn lẹ mẹ” to whenue “gbẹtọ lẹ gbẹ́ sọ to avọ́san bosọ to nuyọnwan mẹ̀ to otẹn yiaga lẹ mẹ.” Ṣogan “OKLUNỌ sọ hò ahọlu lọ, mọ wẹ e yin pòtọnọ de jẹ azán okú etọn tọn gbè.” Etẹwutu Jehovah do wàmọ? Kandai lọ ma dọ. Be ehe dona hẹn mí nado hànu kavi tindo ayihaawe dọ vlavo Jehovah sayana Azalia matin whẹwhinwhẹ́n tangan de wẹ ya? Mí ma na tindo numọtolanmẹ mọnkọtọn eyin mí yọ́n aliho he mẹ Jehovah nọ yinuwa te ganji. Enẹ na zọ́n bọ mí na yọnẹn dọ Jehovah nọ domẹplọnlọmẹgo to whepoponu po “whẹdida” dodo po, yèdọ jẹ obá he sọgbe mẹ. (Jel. 30:11) Oyọnẹn mọnkọtọn hẹn mí kudeji dọ eyin mí ma tlẹ yọ́n nuhewutu Jehovah do yinuwa hẹ Azalia to aliho enẹ mẹ, mí sọgan deji dọ whẹdida Etọn yin dodo.
9. Kunnudenu tẹlẹ wẹ dohia dọ Jehovah tindo whẹwhinwhẹ́n nado yí pòzọ̀n do hò Azalia?
9 Ṣigba, mí sọgan mọ nudọnamẹ susu dogọ gando whẹho ehe go to kandai Biblu tọn devo lẹ mẹ. Ahọlu Azalia sọ nọ yin yiylọdọ Ahọlu Uzia. (2 Ahọ. 15:7, 32) To kandai he dọhodo nujijọ dopolọ ji mẹ to 2 Otannugbo lẹ 26:3-5, 16-21 mẹ, mí hia dọ dile etlẹ yindọ Uzia wà nuhe sọgbe to nukun Jehovah tọn lẹ mẹ na ojlẹ de, to nukọn mẹ, “yè ze ayiha etọn daga [sọmọ] bọ ewọ yí gbigble do wà.” Na goyiyi wutu, e tẹnpọn nado hẹn azọngban yẹwhenọ lẹ tọn di, yèdọ nuhe e ma tindo jlọjẹ nado wà. Yẹwhenọ kanwe-nukundopo wẹ yì e dè nado gblewhẹdo e. Nawẹ Uzia yinuwa gbọn? Nuyiwa etọn do obá he mẹ e ko lẹzun goyitọ jẹ hia. E ‘gblehomẹ’ do yẹwhenọ lọ lẹ go. Abajọ Jehovah do yí pòzọ̀n do hò e!
10. Naegbọn mí ma tindo nuhudo zẹẹmẹ lẹ tọn gando nuyiwa Jehovah tọn lẹ go, podọ nawẹ mí sọgan yidogọna jidide mítọn dọ Jehovah nọ yinuwa po dodowiwa po gbọn?
10 Hẹn nuagokun lọ do ayiha mẹ. Etẹwẹ na ko yin numọtolanmẹ towe eyin nudọnamẹ gigọ́ ma tin to Ohó Jiwheyẹwhe tọn mẹ gando whẹho Ahọlu Azalia tọn go taidi kandai Biblu tọn devo lẹ he nọ bẹ nudọnamẹ agbòte hẹn? Be hiẹ na tindo ayihaawe gando dodowiwa Jiwheyẹwhe tọn go wẹ ya? Kavi hiẹ na lẹndọ nudọnamẹ he Biblu bẹhẹn lẹ ko pé nado hẹn mí kudeji dọ Jehovah nọ wà nuhe sọgbe to whelẹponu, podọ ewọ wẹ ze nujinọtedo nuhe yin dagbe po nuhe yin oylan po tọn dai? (Deut. 32:4) Dile mí to vivẹnudo nado yọ́n Jehovah ganji taidi Omẹ nujọnu tọn de, owanyi po pinpẹn-nutọn-yinyọnẹn he mí tindo na aliho nuyiwa tọn etọn lẹ po na jideji sọmọ bọ mí ma nasọ nọ tindo nuhudo zẹẹmẹ tọn gando nuhe e nọ wà lẹpo go. Deji dọ lehe a to vivẹnudo nado plọnnu bo lẹnayihamẹpọn do nuhe Jiwheyẹwhe dọ to Ohó etọn mẹ lẹ ji sọ, mọ wẹ pinpẹn-nutọn-yinyọnẹn towe na jideji do niyẹn. (Ps. 77:12, 13) Gbọnmọ dali, haṣinṣan towe hẹ Jehovah na lodo dogọ bo na yin nujọnu tọn.
A NỌ DỌHONA JEHOVAH TO WHENUE A TO DẸ̀HO
11-13. Nawẹ mí wagbọn do yọnẹn dọ Jehovah nọ sè odẹ̀ mítọn lẹ? (Pọ́n yẹdide he tin to bẹjẹeji hosọ ehe tọn.)
11 Mí nọ dọnsẹpọ Jehovah to whenue mí to dẹ̀ho. Mí nọ pà ẹ bo nọ dopẹna ẹn bosọ nọ dín anademẹ etọn. (Ps. 32:8) Ṣigba, nado tindo haṣinṣan nujọnu tọn hẹ Jehovah, mí dona tindo jide mlẹnmlẹn dọ ewọ nọ sè odẹ̀ mítọn lẹ.
12 Mẹdelẹ yise dọ mí nọ hodẹ̀ nado vò sọn ayiha mẹ poun wẹ. Yé nọ dọ dọ eyin mẹde lẹndọ odẹ̀ emitọn mọ gblọndo, enẹ dohia dọ mẹlọ dọ nuhe to ahun etọn mẹ tọ́n, bo tẹnpọn nado yọ́n nuhahun etọn, bosọ lẹnayihamẹpọn do nuhe na didẹ nuhahun lọ ji poun wẹ. Nugbo wẹ dọ odẹ̀ sọgan gọalọna we to aliho ehelẹ mẹ, ṣigba etẹwẹ sọgan gọalọna we nado yọnẹn dọ Jehovah nọ sè odẹ̀ ahundopo tọn towe lẹ nugbonugbo?
13 Lẹnnupọndo ehe ji: Whẹpo Jesu do wá aigba ji taidi gbẹtọvi de, e nọ mọ bọ Jehovah nọ na gblọndo odẹ̀ devizọnwatọ Etọn he tin to aigba ji lẹ tọn. Enẹgodo, to lizọnyizọn aigba ji tọn Jesu tọn whenu, ewọ nọ hodẹ̀ nado dọ numọtolanmẹ etọn lẹ na Otọ́ olọn mẹ tọn etọn. Eyin ewọ lẹndọ Jehovah ma nọ sè odẹ̀ lẹ nugbonugbo wẹ, be ewọ na ko hodẹ̀ bo tlẹ yí ozán dopo blebu do wàmọ ya? (Luku 6:12; 22:40-46) Be ewọ na ko plọn devi etọn lẹ nado nọ hodẹ̀ eyin e lẹndọ dẹ̀hiho nọ gọalọnamẹ nado vò sọn ayiha mẹ poun wẹ ya? E họnwun dọ, Jesu yọnẹn dọ odẹ̀ yin hodọdopọ nujọnu tọn de hẹ Jehovah. To nujijọ de whenu, Jesu dọmọ: “Otọ́, yẹn dopẹna we dọ hiẹ ko sè ṣie. Nugbo, yẹn yọnẹn dọ hiẹ nọ sè ṣie to whepoponu.” Mílọsu sọgan tindo jidide dọ Jehovah wẹ Mẹhe “nọ sè odẹ̀.”—Joh. 11:41, 42; Ps. 65:2.
14, 15. (a) Eyin mí nọ dọ nuagokun lẹ tlọlọ to odẹ̀ mítọn mẹ, nawẹ enẹ nọ hẹn ale wá na mí gbọn? (b) Nawẹ dẹ̀hiho gọalọna mẹmẹyọnnu de nado hẹn haṣinṣan etọn hẹ Jehovah lodo dogọ gbọn?
14 Eyin a nọ dọ nuagokun lẹ tlọlọ to odẹ̀ towe mẹ, a na nọ yawu doayi gblọndo Jehovah tọn go, eyin gblọndo lọ ma tlẹ yin nina to aliho tlọlọ mẹ. To whenue a mọ gblọndo na odẹ̀ towe lẹ, a na mọdọ Jehovah yin omẹ nujọnu tọn de na we. Humọ, lehe a nọ dọ ahunmẹdunamẹnu towe lẹ na Jehovah do, mọ wẹ hiẹ na to dindọnsẹpọ ewọ do niyẹn.
15 Lẹnnupọndo apajlẹ mẹmẹyọnnu Kathy tọn ji. * Dile etlẹ yindọ e ma nọ mọ ayajẹ to lizọnyizọn lọ mẹ, e nọ yì kunnudegbe to gbesisọ mẹ. E dọmọ: “N’ma nọ tindo ojlo to sinsẹ̀nzọn kunnudegbe tọn mẹ. Nado dọ hójọhó, e ma tlẹ nọ jlo mi paali. To whenue n’yí gbọjẹ whenu gaa tọn to agbasazọ́n ṣie mẹ, mẹho de na mi tuli nado lẹzun gbehosọnalitọ whepoponu tọn; ewọ tlẹ ze alọdowemẹwe lọ na mi. N’basi nudide nado yin gbehosọnalitọ, ṣigba n’sọ jẹ dẹ̀ho ji egbesọegbesọ dọ Jehovah ni gọalọna mi nado yiwanna sinsẹ̀nzọn kunnudegbe tọn.” Be Jehovah sè odẹ̀ etọn ya? E dọmọ: “E ko yì owhe atọ̀n todin he n’yin gbehosọnalitọ. Dile n’nọ yí whenu susu zan to lizọnyizọn lọ mẹ bosọ nọ plọnnu sọn mẹmẹyọnnu devo lẹ dè, n’hẹn aliho he mẹ n’nọ dekunnu te pọnte dogọ vudevude. To egbehe, e ma yindọ n’tindo ojlo to lizọnyizọn lọ mẹ kẹdẹ wẹ gba, ṣigba n’yiwanna ẹn wẹ. Humọ n’tindo haṣinṣan pẹkipẹki de hẹ Jehovah hugan dai.” Na nugbo tọn, dẹ̀hiho gọalọna Kathy nado hẹn haṣinṣan etọn hẹ Jehovah zun haṣinṣan nujọnu tọn de.
MÍ DONA YÍ ADÀ MÍTỌN WÀ
16, 17. (a) Etẹwẹ mí sọgan wà na haṣinṣan mítọn hẹ Jehovah nido zindonukọn bo lodo dogọ? (b) Avùnnukundiọsọmẹnu vonọtaun tẹwẹ mí na gbadopọnna to hosọ he bọdego mẹ?
16 Haṣinṣan pẹkipẹki de tintindo hẹ Jehovah nọ zindonukọn dile mí to ogbẹ̀ dẹnsọ. Mí dona nọ ze afọdide lẹ nado dọnsẹpọ Jiwheyẹwhe eyin mí jlo dọ ewọ lọsu ni dọnsẹpọ mí. Enẹwutu, mì gbọ mí ni wà nuhe go mí pé lẹpo nado nọ dọhodopọ hẹ Jiwheyẹwhe to gbesisọ mẹ gbọn Biblu pinplọn po dẹ̀hiho po dali. Taidi kọdetọn de, haṣinṣan mítọn hẹ Jehovah na lodo dogọ, ehe na zọ́n bọ mí na nọ duto whlepọn mítọn lẹ ji po kọdetọn dagbe po.
Haṣinṣan pẹkipẹki de tintindo hẹ Jehovah nọ zindonukọn dile mí to ogbẹ̀ dẹnsọ (Pọ́n hukan 16, 17)
17 Ṣigba, mí sọgan pehẹ avùnnukundiọsọmẹnu vonọtaun de, to whenue nuhahun mítọn lẹ zindonukọn mahopọnna odẹ̀ ahundopo tọn he mí hò lẹ. To ojlẹ mọnkọtọn lẹ mẹ, jidide mítọn to Jehovah mẹ sọgan depò. Mí sọgan jẹ ayihaawe tindo ji dọ Jehovah ma nọ sè odẹ̀ mítọn lẹ nugbonugbo kavi dọ ewọ ma tlẹ nọ mọdọ emi tindo haṣinṣan nujọnu tọn de hẹ mí. Nawẹ mí sọgan pehẹ ninọmẹ mọnkọtọn lẹ bo kudeji dọ haṣinṣan mítọn hẹ Jiwheyẹwhe yin nujọnu tọn gbọn? Hosọ he bọdego na dọhodo whẹho enẹ ji.
