1-3. Naegbọn Paulu tindo nujikudo dọ emi sọgan dejido Jehovah go? (Pọ́n yẹdide he tin to bẹjẹeji hosọ ehe tọn.)

TO OWHE kanweko tintan whenu, owùnu taun wẹ e yin nado yin Klistiani to Lomu. Hodotọ Klisti tọn lẹ jiya homẹkẹn sinsinyẹn tọn, na gbẹtọ lẹ sawhẹdokọna yé to 64 W.M. dọ yé do miyọ́n tòdaho lọ bosọ dolalo dokọna yé dọ yé ma yiwanna gbẹtọ lẹ. Eyin ojlẹ enẹ mẹ wẹ hiẹ yin Klistiani te, e yọnbasi to azán lẹpo ji dọ yé ni wle we bo nọ hò we. Delẹ to mẹmẹsunnu po mẹmẹyọnnu towe lẹ po mẹ sọgan ko yin tintlẹ́n dù gbọn kanlin lẹ dali kavi yin whiwhè do núgo bo yin mimẹ̀ gbẹ̀te to zánmẹ bọ miyọ́n lọ nọ yin yiyizan taidi hinhọ́n de.

² E yọnbasi dọ ojlẹ owù tọn enẹ mẹ wẹ apọsteli Paulu yin wiwle do gànpamẹ whla awetọ to Lomu. Be Klistiani devo lẹ na wá gọalọna ẹn ya? Paulu sọgan ko hànu gando whẹho enẹ go to tintan whenu, na e kanwehlan Timoti dọmọ: “To avùnlọyiyi ṣie tintan mẹ, mẹdepope ma wá adà ṣie mẹ, ṣigba yemẹpo wẹ jẹ gbigbẹ́ mi dai ji—na e ni ma yin hihia dokọna yé blo.” Etomọṣo, Paulu yọnẹn dọ emi ma sọgan ba alọgọ pò mlẹnmlẹn. E wlan dọmọ: “Ṣigba Oklunọ ṣite to dè e bo na mi huhlọn.” Na nugbo tọn, Oklunọ Jesu na  huhlọn Paulu sọgbe hẹ nuhudo etọn. Ṣigba, be alọgọ he wá sọn Jiwheyẹwhe dè enẹ yọ́n-na-yizan na ẹn ya? Paulu dọmọ: “Yẹn yin whinwhlẹn sọn onù kinnikinni tọn mẹ.”—2 Tim. 4:16, 17. *

³ Nujijọ enẹ finflin sọgan ko hẹn Paulu lodo, bo gọalọna ẹn nado deji dọ Jehovah na na ẹn huhlọn nado doakọnna whlepọn he e to pipehẹ to alọnu lẹ po dehe e sọgan wá pehẹ to nukọn mẹ lẹ po. Na nugbo tọn, e zindonukọn dọmọ: “Oklunọ na whlẹn mi sọn azọ́n ylankan lẹpo mẹ.” (2 Tim. 4:18) Humọ, Paulu yọnẹn dọ alọgọ he gbẹtọvi lẹ sọgan na emi tindo dogbó, ṣigba Jehovah po Visunnu etọn po na na emi alọgọ nujọnu tọn!

4, 5. (a) Mẹnu wẹ sọgan na we alọgọ he a tindo nuhudo etọn to whepoponu? (b)  Nawẹ a sọgan hẹn haṣinṣan towe hẹ Jehovah lodo gbọn?

⁴ Be a ko mọ dewe to ṣokẹdẹ pọ́n to whenue a to pipehẹ ninọmẹ sinsinyẹn de ya? E sọgan ko yin ojlẹ he mẹ a ma tindo agbasazọ́n, to pipehẹ kọgbidinamẹ to wehọmẹ, to azọ̀njẹ, kavi tin to ninọmẹ ayimajai tọn devo lẹ mẹ. Vlavo a biọ alọgọ, ṣigba gbẹtọ lẹ hẹn we jẹflumẹ, na yé gboawupo nado na we alọgọ he sin nuhudo a tindo wutu. Na nugbo tọn, nuhahun delẹ tin he gbẹtọvi lẹ ma sọgan gọalọna mí nado didẹ. To ninọmẹ mọnkọtọn lẹ mẹ, be ayinamẹ he Biblu na mí nado “dotudo OKLUNỌ go” ma yọ́n-na-yizan wẹ ya? (Howh. 3:5, 6) Be ayinamẹ ovọ́ de poun wẹ e yin ya? E họnwun dọ e ma yinmọ! Dile kandai Biblu tọn susu lẹ dohia do, alọgọ nujọnu tọn wẹ Jiwheyẹwhe nọ namẹ.

⁵ Enẹwutu, kakati nado nọ hẹn gbẹtọ lẹ do homẹ to whenue yé gboawupo nado gọalọna we, nọ pọ́n ninọmẹ mọnkọtọn lẹ hlan dile apọsteli lọ wà do, yèdọ taidi dotẹnmẹ hundote lẹ nado nọ dejido Jehovah go mlẹnmlẹn bo duvivi hihọ́-basinamẹ owanyinọ etọn tọn. Mọwiwà na zọ́n bọ jidide towe to ewọ mẹ na jideji podọ haṣinṣan he a tindo hẹ ẹ na yin nujọnu tọn dogọ.

6. Etẹwutu e sọgan nọma bọawu nado dejido Jehovah go to whenue mí tin to nuhahun lẹ mẹ?

⁶ Be a sọgan dọ nuhahun sinsinyẹn de na Jehovah to odẹ̀ mẹ bo gọyivò to enẹgodo, na a yọnẹn dọ a ko wà nuhe go a pé gando ninọmẹ lọ go bo jo nuhe pò lẹ do alọ etọn mẹ ya? Gbau, a sọgan wàmọ! (Hia Psalm 62:8; 1 Pita 5:7.) A dona plọn nado nọ wàmọ eyin a jlo na wleawuna haṣinṣan de hẹ Jehovah. Ṣigba, e sọgan nọma bọawu nado deji dọ Jehovah na wleawu nuhe sin nuhudo mí tindo lẹ tọn na mí. Etẹwutu? Whẹwhinwhẹ́n dopo wẹ yindọ, e ma yin whelẹponu wẹ Jehovah nọ na gblọndo na odẹ̀ mítọn lẹ to afọdopolọji.—Ps. 13:1, 2; 74:10; 89:46; 90:13; Hab. 1:2.

7. Naegbọn e ma yin whelẹponu wẹ Jehovah nọ na gblọndo odẹ̀ mítọn lẹ tọn to afọdopolọji?

⁷ Naegbọn Jehovah ma do nọ na gblọndo na odẹ̀ mítọn lẹpo to afọdopolọji? Flindọ ewọ yí haṣinṣan he mí tindo hẹ ẹ jlẹdo haṣinṣan he ovi de nọ tindo hẹ otọ́ etọn go. (Ps. 103:13) Ovi de ma sọgan nọ donukun dọ mẹjitọ etọn ni kẹalọyi obiọ etọn lẹpo kavi kẹalọyi yé to afọdopolọji. Delẹ to obiọ ovi lọ tọn lẹ mẹ sọgan yin nujlomẹ poun. E sọgan biọ dọ mẹjitọ lọ ni nọte kakajẹ ojlẹ he sọgbe mẹ whẹpo do na gblọndo obiọ delẹ tọn. Mọdopolọ, mẹjitọ lọ sọgan mọdọ obiọ ovi lọ tọn delẹ ma na wà dagbe na ẹn kavi na mẹdevo he go e gando lẹ. Humọ, eyin otọ́ de nọ kẹalọyi obiọ ovi de tọn lẹpo to afọdopolọji, enẹ na zọ́n bọ haṣinṣan yetọn na lẹzun haṣinṣan he nọ tin to ogán de po afanumẹ de po ṣẹnṣẹn, bọ ovi lọ na yin ogán. Mọdopolọ, na dagbe mítọn wutu, Jehovah sọgan dike ojlẹ de ni juwayi whẹpo nuhe yin gblọndo etọn na odẹ̀ mítọn nido họnwun. E tindo jlọjẹ nado wàmọ, na  ewọ wẹ Mẹdatọ nuyọnẹntọ, Ogán owanyinọ, podọ Otọ́ olọn mẹ tọn mítọn. Eyin e nọ kẹalọyi obiọ mítọn lẹpo to afọdopolọji, enẹ na hẹn haṣinṣan dagbe he mí tindo hẹ ẹ gble.—Yijlẹdo Isaia 29:16; 45:9 go.

8. Opagbe tẹwẹ Jehovah do na mí gando nugomape mítọn lẹ go?

⁸ Onú devo wẹ yindọ, Jehovah yọ́n nugomape mítọn ganji. (Ps. 103:14) Enẹwutu, e ma nọ donukun dọ mí ni doakọnnanu po huhlọn mítọn titi po, ṣigba e nọ gọalọna mí taidi otọ́ de. Na nugbo tọn to whedelẹnu, mí sọgan nọ mọdọ mí ko doakọnnanu jẹ obá godo tọn mẹ. Ṣigba, Jehovah na mí jide dọ emi ma na dike gbede na devizọnwatọ emitọn lẹ ni jiya zẹ̀ nuhe yé sọgan doakọnna go. Na nugbo tọn, ewọ na “deali” de na mí. (Hia 1 Kọlintinu lẹ 10:13.) Enẹwutu, mí tindo whẹwhinwhẹ́n dagbe nado deji dọ eyin Jehovah kẹalọyi dọ mí sọgan doakọnna nude, be linlẹn etọn sọgbe.

9. Etẹwẹ mí dona wà to whenue mí hodẹ̀ nado biọ alọgọ bo ma mọ gblọndo to afọdopolọji?

⁹ To whenue mí hodẹ̀ nado biọ alọgọ bo ma mọ gblọndo to afọdopolọji, mì gbọ mí ni nọtepọn Mẹlọ he yọ́n ojlẹ he sọgbe nado yinuwa do ota mítọn mẹ. Flindọ homẹfa wẹ ewọ lọsu te, na e tindo ojlo nujọnu tọn nado gọalọna mí. “OKLUNỌ na nọte, na e nido wà dagbe na mì, podọ enẹwutu wẹ e nado yin zizedo aga, na e nido wàlẹblanuna mì: Na OKLUNỌ wẹ Jiwheyẹwhe whẹdida tọn; donanọ wẹ yé omẹ pó he nọtepọn ẹn lẹ.”—Isa. 30:18.

10-12. (a) Etẹlẹ wẹ sọgan hẹn ẹn vẹawuna Klistiani de nado penukundo hagbẹ whẹndo tọn he to azọ̀njẹ de go? (b) Nawẹ jidide do Jehovah go to ojlẹ nuhahun tọn lẹ whenu sọgan yinuwado haṣinṣan he mí tindo hẹ ẹ ji gbọn? Na apajlẹ.

¹⁰ To whenue a tin to nuhahun sinsinyẹn mẹ, a sọgan tindo numọtolanmẹ lọ dọ a ko dibla tin to “onù kinnikinni tọn” mẹ kavi tlẹ ko to onù etọn mẹ, taidi Paulu. To ojlẹ enẹlẹ mẹ, e nọ vẹawu taun nado dejido Jehovah go, amọ́ nujọnu wẹ e yin nado wàmọ. Di apajlẹ, mí ni dọ dọ a to nukunpedo hagbẹ whẹndo tọn vivẹ́ de go he to azọ̀n de jẹ, ehe ma to pinpọnte. Vlavo a ko hodẹ̀ nado biọ nuyọnẹn po huhlọn po. * To whenue a ko wà nuhe go a pé lẹpo to ninọmẹ ehe mẹ, be a ma na vò sọn ahun mẹ jẹ obá de mẹ eyin a yọnẹn dọ nukun Jehovah tọn tin to jiwe podọ ewọ na na we nuhe sin nuhudo a tindo nado doakọnnanu po nugbonọ-yinyin po ya?—Ps. 32:8.

¹¹ Ninọmẹ lẹ sọgan zọ́n bọ a na lẹndọ Jehovah ma to alọgọna we. Doto lẹ sọgan na we ayinamẹ agọ̀ lẹ. Kavi a sọgan tindo numọtolanmẹ dọ hẹnnumẹ he a lẹndọ yé na miọnhomẹna we lẹ to ninọmẹ lọ hẹn vẹawuna we dogọ. Nọ lẹhlan Jehovah dè nado mọ huhlọn yí. Nọ to dindọnsẹpọ ẹ zọnmii. (Hia 1 Samuẹli 30:3, 6.) To whenue a mọ alọgọ etọn yí, haṣinṣan he a tindo hẹ ẹ na lodo dogọ.

¹² Linda * wá mọdọ ehe yin nugbo to whenue e ko yí owhe susu do gọalọna mẹjitọ etọn he to azọ̀njẹ lẹ to owhe godo tọn yetọn lẹ mẹ. “To ninọmẹ ehe mẹ, e nọ saba vẹawuna yẹn po asu ṣie po, gọna nọvisunnu ṣie nado yọ́n nuhe mí na wà. To whedelẹnu, mí nọ mọdọ mí ma tindo alọgọtọ. Ṣigba eyin mí flin nuhe jọ wayi lẹ, e nọ họnwun na mí dọ Jehovah ma jo mí do. E na mí huhlọn po nuhe sin nuhudo mí tindo lẹ po, etlẹ yin to whenue mí ma yọ́n nuhe mí na wà.”

13. Nawẹ jidide do Jehovah go gọalọna mẹmẹyọnnu de nado doakọnna nugbajẹmẹji debọdo-dego lẹ gbọn?

¹³ Jidide mlẹnmlẹn tintindo to Jehovah mẹ sọgan gọalọna mí nado pehẹ nugbajẹmẹji lẹ. To ojlẹ he mẹ asu Rhonda tọn he ma yin Kunnudetọ de to tito basi nado gbẹ́ ẹ dai wẹ doto lẹ mọdọ nọvisunnu mẹmẹyọnnu lọ tọn  tindo azọ̀n lupus tọn, yèdọ azọ̀n de he nọ ze ogbẹ̀ mẹtọn do owù mẹ. To osun vude godo, asi nọvisunnu etọn tọn sọ kú. To whenue Rhonda mọdọ awufiẹsa he ninọmẹ sinsinyẹn enẹlẹ hẹnwa na emi jẹ pinpọnte ji, e bẹ azọ́n gbehosọnalitọ whepoponu tọn jẹeji. To ojlẹ kleun de godo onọ̀ etọn sọ kú. Etẹwẹ gọalọna Rhonda nado doakọnnanu? E basi zẹẹmẹ dọmọ: “N’nọ dọhodopọ hẹ Jehovah egbesọegbesọ, etlẹ yin to whenue n’jlo na basi nudide pẹvipẹvi lẹ. Mọwiwà zọ́n bọ Jehovah lẹzun omẹ nujọnu tọn de na mi. Ehe plọn mi nado nọ dejido ewọ go kakati nido yin do dee kavi mẹdevo lẹ go. Podọ e na mi alọgọ nujọnu tọn, bo penukundo nuhudo ṣie lẹpo go. Taidi kọdetọn de, n’duvivi azọ́nwiwa dopọ hẹ Jehovah tọn.”

14. Jide tẹwẹ Klistiani nugbonọ de he hẹnnumẹ etọn yin didesẹ sọn agun mẹ sọgan tindo?

¹⁴ Lẹnnupọndo ninọmẹ devo ji. Mí ni dọ dọ hẹnnumẹ towe vivẹ́ de yin didesẹ sọn agun mẹ. Sọgbe hẹ nuhe a plọn to Biblu mẹ, a yọ́n lehe yè nọ yinuwa hẹ mẹdesẹ sọn agun mẹ lẹ do. (1 Kọl. 5:11; 2 Joh. 10) Ṣogan, e sọgan vẹawuna we to whedelẹnu nado tẹdo anademẹ Biblu tọn gando mẹdesẹ sọn agun mẹ lẹ go kavi tlẹ mọdọ e ma yọnbasi nado wàmọ. * Be a sọgan deji dọ Otọ́ olọn mẹ tọn towe na na we adọgbigbo he a tindo nuhudo etọn nado hẹn gbemima towe go bo setonuna anademẹ Biblu tọn gando mẹdesẹ sọn agun mẹ lẹ go ya? Be a ma mọdọ dotẹnmẹ hundote de wẹ enẹ yin na we nado hẹn haṣinṣan towe hẹ Jehovah lodo dogọ gbọn awuwiwlena kanṣiṣa pẹkipẹki de hẹ ẹ dali ya?

15. Naegbọn Adam vẹtolina gbedide Jehovah tọn to Edẹni mẹ?

¹⁵ Gando whẹho ehe go, lẹnnupọn vude do sunnu tintan lọ Adam ji. Be e yise  nugbonugbo dọ emi sọgan vẹtolina Jehovah ṣogan bo gbẹ́ to gbẹnọ zọnmii ya? Lala, na Owe-wiwe lẹ dọna mí dọ “e ma yin Adam wẹ yin kiklọ gba.” (1 Tim. 2:14) Eyin mọ wẹ, naegbọn e do vẹtoli? Owanyi he Adam tindo na asi etọn wẹ dona ko zọ́n bọ e do dù atin-sinsẹ́n he Evi na ẹn lọ. Ewọ dotoaina ogbè asi etọn tọn kakati nido yin Jehovah Jiwheyẹwhe tọn.—Gẹn. 3:6, 17.

16. Mẹnu wẹ mí dona yiwanna hugan, podọ etẹwutu?

¹⁶ Be ehe to didohia dọ mí ma dona yiwanna hẹnnumẹ mítọn lẹ wẹ ya? Paali! Ṣigba, Jehovah wẹ mí dona yiwanna hugan. (Hia Matiu 22:37, 38.) Na taun tọn, ehe na hẹn ale wá na hẹnnumẹ mítọn lẹ, vlavo yé to Jehovah sẹ̀n todin kavi lala. Enẹwutu, nọ to owanyi towe na Jehovah po jidide he a tindo to ewọ mẹ po hẹn lodo zọnmii. Podọ eyin nuyiwa hẹnnumẹ towe he yin didesẹ sọn agun mẹ de tọn to ahunmẹduna we, dọ numọtolanmẹ towe tọ́n na Jehovah to odẹ̀ mẹ. * (Lom. 12:12; Flp. 4:6, 7) Yí ninọmẹ awubla tọn ehe zan nado hẹn haṣinṣan towe hẹ Jehovah yin nujọnu tọn dogọ. Mọwiwà na gọalọna we nado lẹhlan Jehovah dè nado mọ kọdetọn dagbe hugan lọ.

17. To whenue mí hẹn alọnu mítọn ján to wẹndagbe Ahọluduta lọ tọn lilá mẹ, etẹwẹ mí sọgan deji dọ Jehovah na wà?

¹⁷ Lẹndai tẹ wutu wẹ Paulu do yin “whinwhlẹn sọn onù kinnikinni tọn mẹ”? E dọmọ: “Na yẹn nido sọgan dọyẹwheho lọ mlẹnmlẹn, na akọta lẹpo nido sọgan sè e.” (2 Tim. 4:17) Dile mí hẹn alọnu mítọn ján to azọ́n yẹwhehodidọ tọn mẹ dile Paulu wà do, mí nọ deji dọ Jehovah na hẹn ẹn diun dọ onú devo lẹpo he mí tindo nuhudo etọn “na yin yiyidogọ” na mí. (Mat. 6:33) Taidi wẹnlatọ Ahọluduta lọ tọn lẹ, Jehovah “ze wẹndagbe lọ do alọmẹ na” mí, bo nọ pọ́n mí hlan taidi “azọ́nwatọ hatọ” etọn lẹ. (1 Tẹs. 2:4; 1 Kọl. 3:9) Eyin mí hẹn alọnu mítọn ján to azọ́n Jiwheyẹwhe tọn mẹ, e na bọawuna mí nado nọtepọn alọgọ etọn.

18. Aliho tẹlẹ mẹ wẹ mí sọgan wleawuna jidide to Jehovah mẹ bosọ hẹn haṣinṣan mítọn hẹ ẹ lodo te?

¹⁸ Enẹwutu, mì gbọ mí ni yí ojlẹ he mẹ mí tin te todin zan nado hẹn haṣinṣan mítọn hẹ Jiwheyẹwhe lodo. Eyin ninọmẹ de do magbọjẹ na mí, mì gbọ mí ni nọ yí i zan nado dọnsẹpọ Jehovah dogọ. Na nugbo tọn, dile mí to Ohó Jiwheyẹwhe tọn plọn po sọwhiwhe po, bo zindonukọn to dẹ̀hiho mẹ, bosọ to mahẹ gigọ́ tindo to nuwiwa gbigbọmẹ tọn lẹ mẹ, mì gbọ mí ni deji dọ Jehovah na gọalọna mí nado pehẹ ninọmẹ he mẹ mí te todin, po dehe mí na pehẹ to nukọn mẹ lẹpo po.