Be Dandan Wẹ Dọ Mẹde Ni Nọ Doayi Azọ́n He Wà A Te Go Ya?
AZỌ́N họ̀gbigbá tọn ma yin nuyọyọ na Bezalẹli po Oholiabi po. To whenue yé yin kanlinmọ to Egipti, yé na ko sún bliki susu sọmọ bọ yé ma nasọ jlo nado nọ flin azọ́n sinsinyẹn he yé wà enẹlẹ ba. Ṣigba, owhe enẹlẹ ko juwayi. Todin, yé na lẹzun anazọ́nwatọ lẹ na aṣẹpipa he yiaga hugan lọ, to whenue yé yin azọ́ndena nado yin nukọntọ to azọ́n gòhọtúntún gbigbá tọn lọ mẹ. (Eks. 31:1-11) Etomọṣo, omẹ vude poun wẹ na mọ delẹ to azọ́n dagbedagbe he yé wà lẹ mẹ. Be yé na gblehomẹ dọ mẹde ma na yọ́n pinpẹn azọ́n he yé wà lẹ tọn wẹ ya? Nado dọ hójọhó, be dandan wẹ dọ mẹde ni doayi azọ́n yetọn go ya? Be dandan wẹ dọ mẹde ni nọ doayi azọ́n he wà hiẹ lọsu te lẹ go ya?
AZỌ́N AYIDEGO TỌN LẸ HE YIN MIMỌ GBỌN OMẸ VUDE POUN DALI
Delẹ to núzinzan gòhọtúntún lọ tọn lẹ mẹ yin anazọ́n ayidego tọn lẹ. Di apajlẹ, lẹnnupọndo kelubimi sika tọn lẹ ji he tin to aki alẹnu tọn lọ ji. Apọsteli Paulu basi zẹẹmẹ yetọn taidi onú “gigonọ.” (Heb. 9:5) Yí nukun homẹ tọn do pọ́n lehe yẹdide he yè yí sika tùntùn do basi ehelẹ na ko yọnwhanpẹ do sọ!—Eks. 37:7-9.
Eyin yẹdide he Bezalẹli po Oholiabi po basi ehelẹ yin mimọ to egbehe wẹ, yé na yin titẹ́ do onú hoho-sẹdotẹn dahodaho lẹ taidi nuhọakuẹ, fihe mẹsusu sọgan mọ yé te bo yọ́n pinpẹn yetọn. Ṣigba, to ojlẹ he mẹ yé yin bibasi te, omẹ nẹmu wẹ mọ lehe yé yọnwhanpẹ sọ? Kelubimi lọ lẹ yin zizedo Fiwiwe Gbaugbau lọ mẹ; enẹwutu yẹwhenọ daho lọ kẹdẹ wẹ nọ mọ yé whladopo to owhe dopo mẹ, to Azán Ovẹsè tọn gbè. (Heb. 9:6, 7) Ehe dohia dọ, omẹ vude poun wẹ nọ mọ yẹdide lọ lẹ.
NỌ TINDO AYAJẸ EYIN GBẸTỌ LẸ MA TLẸ PÀ WE
Eyin hiẹ tin to otẹn Bezalẹli po Oholiabi po tọn mẹ bo ko jẹtukla nado basi anazọ́n whanpẹnọ mọnkọtọn lẹ, etẹwẹ na yin numọtolanmẹ towe to whenue a yọnẹn dọ omẹ vude poun wẹ nọ mọ yé? To egbehe, gbẹtọ lẹ nọ tindo numọtolanmẹ dọ nuhe emi wà yin nujọnu to whenue hagbẹ yetọn lẹ yọ́n pinpẹn nuhe yé wà tọn bo pà yé. Enẹ nọ gọalọna yé nado yọ́n obá he mẹ azọ́n yetọn yin nujọnu jẹ. Ṣigba, sinsẹ̀n-basitọ Jehovah tọn lẹ gbọnvo. Taidi Bezalẹli po Oholiabi po, mí nọ tindo ayajẹ to whenue mí to ojlo Jehovah tọn wà bo tindo nukundagbe etọn.
To azán Jesu tọn gbè, nukọntọ sinsẹ̀n tọn lẹ tindo aṣa lọ nado nọ hodẹ̀ to aliho he na dọ̀n ayidonugo mẹdevo lẹ tọn mẹ. Ṣigba, Jesu namẹ ayinamẹ nado nọ hodẹ̀ to aliho he gbọnvo mẹ, enẹ wẹ nado nọ hodẹ̀ sọn ahun mẹ wá, bo ma nọ jlo nado mọ pipà yí sọn mẹhe to mimọ mí lẹ dè blo. Etẹwẹ na yin kọdetọn lọ? “Otọ́ towe he nọ mọnú to nuglọ na suahọ etọn we.” (Mat. 6:5, 6) E họnwun dọ nuhe Jehovah nọ lẹn gando odẹ̀ mítọn lẹ go wẹ yin nujọnu, e ma yin nuhe mẹdevo lẹ lẹn gba. Nukun he ewọ nọ yí do pọ́n odẹ̀ mítọn lẹ wẹ nọ zọ́n bọ yé nọ yin nuhọakuẹ. Nudopolọ wẹ gando nudepope he mí wadotana to sinsẹ̀nzọn wiwe mítọn mẹ go. E ma yin pipà he mẹdevo lẹ na mí wẹ nọ zọ́n bọ azọ́n mítọn nọ yin nujọnu gba, kakatimọ eyin e hẹn homẹ Jehovah tọn hùn, yèdọ mẹlọ “he nọ mọnú to nuglọ.”
To whenue gòhọtúntún lọ yin gbigbá fó, aslọ “ṣinyọ́n gòhọ opli tọn lọ ji, gigo OKLUNỌ lọ tọn sọ gọ́ gòhọtúntún lọ mẹ.” (Eks. 40:34) Lehe ohia enẹ yin kunnudenu he họnwun dọ Jehovah kẹalọyi gòhọtúntún lọ do sọ! Numọtolanmẹ tẹwẹ a lẹndọ Bezalẹli po Oholiabi po na ko tindo to ojlẹ enẹ mẹ? Dile etlẹ yindọ yinkọ yetọn ma yin kinkando azọ́n he yé wà lẹ go, yé na ko gọ́ na ayajẹ, na yé yọnẹn dọ Jiwheyẹwhe dona vivẹnudido yetọn lẹpo. (Howh. 10:22) To owhe he bọdego lẹ mẹ, homẹ yetọn na ko hùn taun nado mọdọ azọ́n he yé wà lẹ gbẹ́ to yinyin yiyizan na sinsẹ̀n-bibasi Jehovah tọn. Matin ayihaawe, to whenue Bezalẹli po Oholiabi po na gọwá ogbẹ̀ to aihọn yọyọ lọ mẹ, lehe e na yin homẹhunnu daho na yé do sọ nado sè dọ gòhọtúntún lọ yin yiyizan na sinsẹ̀n-bibasi Jehovah tọn na nudi owhe 500!
Eyin gbẹtọ ma tlẹ doayi whiwhẹ po mẹdezejo towe to sinsẹ̀nzọn lọ mẹ po go, Jehovah nọ wàmọ!
To titobasinanu Jehovah tọn mẹ to egbehe, mẹhe nọ wleawuna video ṣiṣavi tọn lẹ, anazọ́nwatọ lẹ, hànjitọ lẹ, fọtodetọ lẹ, lẹdogbedevomẹ-basitọ lẹ po wekantọ lẹ po ma nọ dohiagona azọ́n yetọn lẹ na mẹdevo lẹ nido yọnẹn dọ yewlẹ wẹ wà ẹ. To linlẹn ehe mẹ, mẹde ma nọ “mọ” nuhe wà yé te. Nudopolọ sọgan yin didọ gando suhugan azọ́n he to yinyin wiwà lẹdo aihọn pé lẹ tọn go to agun he hugan 110 000 lẹ mẹ. Mẹnu wẹ nọ mọ mẹhe nọ penukundo akuẹ agun tọn go to whenue ewọ to wekan gọ́ wema he nọ do akuẹzinzan agun tọn hia lẹ mẹ to sùnfifo lẹ? Mẹnu wẹ nọ mọ wekantọ agun tọn to whenue ewọ to awuwlena lẹndopọ linlin sinsẹ̀nzọn kunnudegbe tọn lẹ? Mẹnu wẹ nọ to pinpọn mẹmẹsunnu kavi mẹmẹyọnnu he nọ wazọ́n nado vọ́ nuhe yin dandan tọn lẹ jlado to Plitẹnhọ Ahọluduta tọn mẹ lẹ?
To yọnhowhe yetọn mẹ, Bezalẹli po Oholiabi po ma tindo ajọ̀, nunina, kavi onú mọnkọtọn de he yé na nọ dohia nado doawagun na anazọ́n dagbedagbe lẹ po gòhọtúntún whanpẹnọ he yé basi po. Ṣigba, yé mọ nude yí he họakuẹ hugan onú ehe lẹpo, enẹ wẹ nukundagbe Jehovah tọn. Mí sọgan deji dọ Jehovah doayi azọ́n he yé wà go. Mì gbọ mí ni hodo apajlẹ whiwhẹ po mẹdezejo he yé dohia to sinsẹ̀nzọn yetọn mẹ po tọn.
