SỌN 1992 gbọ́n, Hagbẹ Anademẹtọ lọ ko de mẹho agun tọn numimọnọ he whèwhín delẹ do wedegbẹ́ etọn lẹ mẹ, nado gọalọna wedegbẹ́ lọ lẹ nado wà azọ́n yetọn to gigọ́ mẹ. * Alọgọtọ ehelẹ he yin apadewhe “lẹngbọ devo lẹ” tọn, nọ nọgodona Hagbẹ Anademẹtọ lọ. (Joh. 10:16) Yé nọ yì opli wedegbẹ́ he mẹ yé yin dide do lẹ tọn to sẹmẹsẹmẹ, bo nọ na nudọnamẹ gigọ́ lẹ bosọ nọ na ayinamẹ lẹ. Hagbẹ Anademẹtọ lọ wẹ nọ wá gbèta godo tọn kọ̀n, ṣigba alọgọtọ ehelẹ nọ yí anademẹ wedegbẹ́ lọ tọn lẹ do yizan mẹ, bo nọ penukundo azọ́n depope he yin didena yé go. Alọgọtọ lọ lẹ nọ hodo mẹmẹsunnu he tin to Hagbẹ Anademẹtọ lọ mẹ lẹ yì plidopọ vonọtaun po akọjọpli tọn lẹ po. Yé sọgan sọ yin azọ́ndena nado dla wekantẹn alahọ tọn lẹ pọ́n taidi afọzedaitọ tatọ́-tẹnnọ tọn.

Dopo to alọgọtọ lọ lẹ mẹ he ko to sinsẹ̀n sọn whenue gbọ́n tito lọ bẹjẹeji dọmọ: “Eyin n’penukundo azọ́n he yin didena mi lẹ go, enẹ nọ gọalọna Hagbẹ Anademẹtọ lọ nado penukundo azọngban etọn go to gigọ́ mẹ.” To whenue dopo to alọgọtọ enẹlẹ mẹ lẹnnupọndo nudi owhe 20 he e yizan to sinsẹ̀nzọn ehe mẹ ji, e dọmọ: “Lẹblanulọkẹyi he zẹ̀ nuhe n’sọgan donukun go wẹ ehe yin.”

Hagbẹ Anademẹtọ lọ ze azọ́n susu do alọmẹ na alọgọtọ etọn lẹ, bosọ nọ yọ́n pinpẹn azọ́n dagbe he mẹmẹsunnu nugbonọ podọ azọ́n sinsinyẹnwatọ ehelẹ to wiwà tọn. Mì gbọ mímẹpo ni “nọ pọ́n omẹ mọnkọtọn lẹ hlan di mẹvivẹ.”—Flp. 2:29.