“Do Yise Yise Ji Na Mí”
“Gọalọna mi to fie yẹn tindo nuhudo yise tọn dogọ te!”
1. Nawẹ yise yin nujọnu sọ? (Pọ́n yẹdide he tin to bẹjẹeji hosọ ehe tọn.)
BE A ko kanse dewe pọ́n dọ, ‘Be n’yin dopo to mẹhe Jehovah na jlo nado whlẹngán to nukunbibia daho lọ whenu bo na plan biọ aihọn yọyọ lọ mẹ lẹ mẹ ya?’ Na nugbo tọn, nususu wẹ mí dona wà nado luntọ́n, ṣigba apọsteli Paulu zinnudo nubiọtomẹsi titengbe dopo ji dọmọ: “Matin yise, e ma yọnbasi nado hẹn homẹ [Jiwheyẹwhe tọn] hùn ganji.” (Heb. 11:6) Ehe sọgan taidi nuhe ma vẹawu sọmọ, ṣigba nugbo lọ wẹ yindọ, “yise ma yin nutindo mẹlẹpo tọn.” (2 Tẹs. 3:2) Wefọ ehelẹ gọalọna mí nado mọnukunnujẹemẹ dọ awuwiwlena yise he lodo yin nujọnu taun.
2, 3. (a) Etẹwẹ Pita plọn mí gando nujọnu-yinyin yise tọn go? (b) Kanbiọ tẹlẹ wẹ mí na gbadopọnna todin?
2 Apọsteli Pita dọ̀n ayidonugo wá nujọnu-yinyin yise tọn ji, to whenue e dọhodo ‘nuhọakuẹ-yinyin yise he yin whiwhlepọn tọn’ ji, ehe “sọgan yin mimọ taidi dodonu de na pipà, gigo, po gbégbò po to osọhia Jesu Klisti tọn whenu.” (Hia 1 Pita 1:7.) Dile nukunbibia daho lọ ko sẹpọ pete, be e ma jlo mí nado tindo yise he na zọ́n bọ mí na yin dopo to mẹhe Ahọlu gigonọ mítọn na pà na yise yetọn wutu lẹ mẹ to whenue ewọ na sọawuhia ya? Ayihaawe ma tin dọ, mí na jlo nado yin “mẹhe tindo yise na hinhẹn do ogbẹ̀ alindọn tọn lẹ.” (Heb. 10:39) Po yanwle ehe po ayiha mẹ, mí sọgan vẹvẹ taidi dawe de he dọmọ: “Gọalọna mi to fie yẹn tindo nuhudo yise tọn dogọ te!” (Malku 9:24) Kavi mí sọgan yin whinwhàn nado dọ dile apọsteli Jesu tọn lẹ dọ do dọmọ: “Do yise yise ji na mí.”—Luku 17:5.
3 Awuwiwlena yise he lodo fọ́n kanbiọ delẹ dote. Nawẹ mí sọgan wleawuna jẹhẹnu ehe gbọn? Nawẹ mí sọgan dohia dọ mí tindo yise gbọn? Naegbọn mí sọgan deji dọ eyin mí biọ yise dogọ, Jiwheyẹwhe na na mí?
WLEAWUNA YISE HE NỌ HẸN HOMẸ JIWHEYẸWHE TỌN HÙN
4. Apajlẹ mẹnu lẹ tọn wẹ sọgan whàn mí nado hẹn yise mítọn lodo?
4 To whenuena e yindọ “nuhe ko yin kinkandai jẹnukọn lẹpo yin kinkandai na oplọn mítọn,” mí sọgan plọnnu sọn apajlẹ mẹsusu he do yise hia to Biblu mẹ lẹ tọn mẹ. (Lom. 15:4) Eyin mí hia otàn mẹdelẹ tọn taidi Ablaham, Sala, Isaki, Jakọbu, Mose, Lahabi, Gideoni, Balak, po mẹsusu devo lẹ po tọn, kandai enẹlẹ sọgan whàn mí nado gbeje yise mítọn pọ́n. (Heb. 11:32-35) Humọ, eyin mí hia otàn mẹmẹsunnu po mẹmẹyọnnu po he do yise ayidego tọn hia to azán mítọn gbè lẹ tọn, enẹ sọgan whàn mí nado dovivẹnu nado hẹn yise mítọn lodo. *
5. Nawẹ Elija dohia dọ emi tindo yise he lodo to Jehovah mẹ gbọn, podọ etẹwẹ apajlẹ etọn whàn mí nado wà?
5 Apajlẹ dopo sọn Biblu mẹ wẹ yẹwhegán Elija tọn. Yí nukun homẹ tọn do pọ́n lehe e do jide mlẹnmlẹn etọn to Jehovah mẹ hia to nujijọ he bọdego ehelẹ mẹ do. To whenue Elija to linlẹn Jehovah tọn nado hẹn akúdido de wá dọna Ahọlu Ahabi, e yí adọgbigbo do dọmọ: ‘Lehe OKLUNỌ to ogbẹ̀, ahun ma na tin kavi jikun, adavo kẹdẹdi ohó ṣie.’ (1 Ahọ. 17:1) Elija tindo yise dọ Jehovah na penukundo nuhudo emitọn po mẹdevo lẹ tọn po go to akúdido lọ whenu. (1 Ahọ. 17:4, 5, 13, 14) E deji dọ Jehovah sọgan fọ́n yọpọvu de sọnku. (1 Ahọ. 17:21) E kudeji dọ Jehovah sọgan do miyọ́n hlan nado fiọ avọ́nunina emitọn to Osó Kalmẹli ji. (1 Ahọ. 18:24, 37) To whenue ojlẹ sọ na Jehovah nado doalọtena akúdido lọ, Elija dọna Ahabi dile etlẹ yindọ ohia jikun tọn depope ma ko sọawuhia dọmọ: “Hẹji yì, dù bosọ nù; na gbèlili ogege jikun tọn tin to finẹ.” (1 Ahọ. 18:41) Be kandai mọnkọtọn lẹ ma nọ whàn mí nado gbeje míde pọ́n nado yọnẹn eyin yise mítọn lodo nugbonugbo ya?
NAWẸ MÍ SỌGAN WLEAWUNA YISE GBỌN?
6. Etẹwẹ mí dona biọ Jehovah nado wleawuna yise?
6 Mí ma sọgan wleawuna yise gbọn nugopipe mítọn titi dali. Yise yin adà sinsẹ́n gbigbọ wiwe Jiwheyẹwhe tọn. (Gal. 5:22) Enẹwutu, nuyọnẹnnu wẹ e yin dọ mí ni hodo ayinamẹ Jesu tọn nado nọ hodẹ̀ bo biọ yise do yise ji, na Jesu hẹn mí deji dọ Otọ́ lọ na “na gbigbọ wiwe mẹhe to bibiọ ẹ lẹ.”—Luku 11:13.
7. Basi zẹẹmẹ lehe mí sọgan hẹn yise mítọn lodo do tọn.
7 To whenue mí ko wleawuna yise godo, mí dona to hinhẹn ẹn lodo zọnmii. Yise mítọn sọgan yin yiyijlẹdo miyọ́n nake tọn de go. To whenue a flọ miyọ́n lọ, e nọ to jiji blẹblẹ. Ṣigba, eyin nudepope ma yin wiwà dogọ, e nọ wá ṣí bo nọ lẹzun akán miawu, podọ to godo mẹ e nọ wá lẹzun afín. Amọ́, eyin a nọ yí nake do miyọ́n lọ mẹ sọn ojlẹ de mẹ jẹ devo mẹ, e sọgan to jiji zọnmii. Mọdopolọ, yise mítọn sọgan gbọṣi ote, eyin mí nọ plọn Ohó Jiwheyẹwhe tọn to gbesisọ mẹ. Eyin mí zindonukọn nado nọ plọn Biblu, mí sọgan wleawuna owanyi he siso na ẹn podọ na Dowatọ etọn bọ enẹ na zọ́n bọ yise mítọn na lodo dogọ.
8. Etẹwẹ na gọalọna mí nado wleawuna yise bo hẹn e go zọnmii?
8 Nudevo tẹwẹ hiẹ sọgan wà nado wleawuna Heb. 6:1, 2) Nọ lẹnayihamẹpọn do dọdai Biblu tọn he ko mọ hẹndi lẹ ji, na yé sọgan na we whẹwhinwhẹ́n dagbe lẹ nado tindo yise. A sọgan sọ yí Ohó Jiwheyẹwhe tọn do gbeje dewe pọ́n nado yọnẹn eyin yise towe taidi mẹhe tindo yise he lodo lẹ tọn.—Hia Jakọbu 1:25; 2:24, 26.
yise he lodo bo hẹn e go zọnmii? Ma nọ ganjẹ nuhe a plọn whẹpo do yí baptẹm lẹ kẹdẹ go blo. (9, 10. Nawẹ onú ehelẹ nọ gọalọna mí nado wleawuna yise gbọn: (a) gbẹdido dagbe? (b) opli agun tọn lẹ? (c) lizọnyizọn kunnudegbe tọn?
9 Apọsteli Paulu dọna Klistiani hatọ etọn lẹ dọ yé sọgan ‘na tuli ode awetọ, gbọn yise mẹdopodopo tọn dali.’ (Lom. 1:12) Dile mí to gbẹdo hẹ yisenọ hatọ lẹ, mí sọgan hẹn yise ode awetọ tọn lodo, titengbe eyin mí tin topọ hẹ mẹhe ko do ‘nuhọakuẹ-yinyin yise yetọn he yin whiwhlepọn tọn’ hia lẹ. (Jak. 1:3) Gbẹdido ylankan lẹ nọ hù yise mítọn, ṣigba gbẹdido dagbe lẹ nọ zọ́n bọ mí nọ wleawuna yise. (1 Kọl. 15:33) Ehe yin whẹwhinwhẹ́n dopo he wutu mí do yin tulina ma nado nọ gbẹkọ “pipli dopọ mítọn lẹ” go, ṣigba nado “nọ na tuli ode awetọ” zọnmii. (Hia Heblu lẹ 10:24, 25.) Whẹwhinwhẹ́n devo wẹ yindọ nudọnamẹ he mí nọ mọyi to opli lẹ ji nọ gọalọna mí nado hẹn yise mítọn lodo. Abajọ Paulu do dọmọ: “Yise nọ bọdo nuhe yin sisè lọ go.” (Lom. 10:17) Be mí nọ dogbẹ́ hẹ mẹdevo lẹ to opli Klistiani tọn lẹ ji to gbesisọ mẹ ya?
10 To whenue mí tindo mahẹ to lizọnyizọn kunnudegbe tọn mẹ, mí nọ gọalọna mẹdevo lẹ nado wleawuna yise, podọ yise mílọsu tọn sọ nọ lodo dogọ. Mí nọ plọn nado tindo yise mlẹnmlẹn to Jehovah mẹ bo nọ yí adọgbigbo do dọho to ninọmẹ depope mẹ taidi Klistiani dowhenu tọn lẹ.—Owalọ 4:17-20; 13:46.
11. Naegbọn Kalẹbu po Jọṣua po do tindo yise he lodo, podọ nawẹ mí sọgan hodo apajlẹ yetọn gbọn?
11 Eyin mí mọ lehe Jehovah nọ gọalọna mí to gbẹzan mítọn mẹ do, po lehe e nọ na gblọndo odẹ̀ mítọn lẹ do po, yise mítọn nọ lodo dogọ. Nuhe jọ to whẹho Kalẹbu po Jọṣua po tọn mẹ niyẹn. Yé do yise hia to Jehovah mẹ to whenue yé bẹ̀ Aigba Pagbe tọn lọ pọ́n. Ṣigba to enẹgodo, dile yé mọ bọ Jehovah to anadena yé to adà gbẹzan yetọn tọn lẹpo mẹ, yise yetọn lodo dogọ. Abajọ Jọṣua do dọho po adọgbigbo po na Islaelivi lẹ dọmọ: “Onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ.” To nukọn mẹ, e dọmọ: “Enẹwutu dinvie dibusi OKLUNỌ, bo nọ sẹ̀n ẹn to dodo mẹ podọ to nugbo mẹ . . . Ṣigba na yẹn tọn po owhé ṣie po, míwlẹ na OKLUNỌ lọ sẹ̀n.” (Jọṣ. 23:14; 24:14, 15) Dile mí to vivi dagbewà Jehovah tọn dù, mílọsu sọgan wleawuna nujikudo mọnkọtọn.—Ps. 34:8.
LEHE MÍ SỌGAN DO YISE MÍTỌN HIA DO
12. Nawẹ mí nọ dohia dọ mí tindo yise gbọn?
12 Nawẹ mí sọgan dohia dọ mí tindo yise nujọnu tọn gbọn? Devi Jakọbu na gblọndo kanbiọ enẹ tọn to whenue e dọmọ: “Yẹn na do yise ṣie hia we gbọn azọ́n ṣie lẹ dali.” (Jak. 2:18) Nuyiwa mítọn wẹ nọ dohia dọ mí tindo yise nujọnu tọn. Mì gbọ mí ni gbadopọnna apajlẹ delẹ.
Mẹhe nọ tindo mahẹ gigọ́ to lizọnyizọn lọ mẹ lẹ nọ dohia dọ yé tindo yise he lodo (Pọ́n hukan 13)
13. Nawẹ mahẹ tintindo to azọ́n yẹwhehodidọ tọn mẹ nọ dohia dọ mí tindo yise gbọn?
13 Mahẹ tintindo to azọ́n yẹwhehodidọ tọn mẹ yin aliho dagbe dopo nado do yise mítọn hia. Naegbọn mí do dọ mọ? Na azọ́n ehe nọ biọ dọ mí ni tindo yise dọ opodo lọ na wá to madẹnmẹ dile Jiwheyẹwhe dopagbe etọn do, bo kudeji dọ “e ma na gọ̀n gba.” (Hab. 2:3) Aliho dopo nado gbeje yise mítọn pọ́n wẹ nado dindona obá he mẹ mí nọ jlo na tindo mahẹ to lizọnyizọn lọ mẹ jẹ. Be mí nọ wà nuhe go mí pé lẹpo, vlavo bo nọ dín aliho lẹ nado wà susu dogọ to azọ́n ehe mẹ ya? (2 Kọl. 13:5) Na nugbo tọn, “gbeyiyi gbangba tọn [bibasi] na whlẹngán” yin aliho dagbe de nado dohia dọ mí tindo yise.—Hia Lomunu lẹ 10:10.
14, 15. (a) Nawẹ mí sọgan nọ do yise hia to nuwiwa egbesọ tọn mítọn lẹ mẹ gbọn? (b) Na apajlẹ de nado do lehe yise he lodo sọgan whàn mẹde nado yinuwa do hia.
14 Mí sọgan sọ do yise hia dile mí to pipehẹ nuhahun egbesọ tọn lẹ. Vlavo mí pehẹ azọ̀n, gbigbọjọ, flumẹjijẹ, ohẹ́n kavi nuhahun sinsinyẹn devo lẹ, mí nọ deji dọ Jehovah po Visunnu etọn po na ‘gọalọna mí to ojlẹ sisọ mẹ.’ (Heb. 4:16) Mí nọ do jidide mọnkọtọn hia gbọn dẹ̀hiho nado biọ alọgọ gando nuhudo gbigbọmẹ tọn po nudevo lẹ po go dali. Jesu dọ dọ mí sọgan nọ hodẹ̀ nado biọ onú agbasa tọn lẹ, taidi ‘núdùdù he sọgbe hẹ nuhudo azán dopodopo tọn.’ (Luku 11:3) Kandai Biblu tọn lẹ na mí nujikudo dọ Jehovah sọgan penukundo mí go. To akúdido sinsinyẹn de whenu to Islaeli, Jehovah wleawu núdùdù po osin po tọn na Elija. To anademẹ Jehovah tọn glọ, “ohọ́n lẹ sọ to akla po olàn po hẹnwana ẹn to afọnnu, podọ akla po olàn po to whèjai; ewọ sọ to tọ̀pẹṣẹ lọ nù.” (1 Ahọ. 17:3-6) Mí tindo yise dọ Jehovah sọgan deanana nulẹ na mílọsu nido mọ nuhe mí tindo nuhudo etọn lẹ.
Mí nọ do yise hia to whenue mí to pipehẹ nuhahun egbesọ tọn lẹ (Pọ́n hukan 14)
15 Mí tindo jide dọ nunọwhinnusẹ́n Biblu tọn lẹ yíyí-do-yizan mẹ sọgan gọalọna mí nado mọ dùdù po nùnù po. Mẹmẹyọnnu Rebecca he yin alọwlemẹ de to Asie mọ nugbo-yinyin ehe tọn to whẹndo etọn mẹ. Yé yí Matiu 6:33 po Howhinwhẹn lẹ 10:4 po do yizan mẹ to gbẹzan yetọn mẹ gbọn Ahọluduta lọ zizedo otẹn tintan mẹ dali, podọ yé yin azọ́n sinsinyẹnwatọ. Rebecca dọ dọ to ojlẹ de mẹ, asu emitọn jo agbasazọ́n etọn do, na e mọdọ azọ́n lọ po nuhe e bẹhẹn lẹ po sọgan ze gbigbọnọ-yinyin yetọn do owù mẹ. Ṣigba, ovi ẹnẹ wẹ yé tindo. Rebecca dọ lehe nulẹ yì do dọmọ: “Mí jẹ núdùdù sà ji. To owhe he mẹ mí wàjọ ehe nado penukundo whẹndo mítọn go te lẹ mẹ, mí mọdọ Jehovah ma gbẹ́ mí dai gbede. Mí ma bà núdùdù pò pọ́n.” Be hiẹ lọsu ko dohia pọ́n dọ a tindo yise dọ Biblu bẹ anademẹ dagbe hugan lẹ hẹn na gbẹtọvi lẹ to egbehe ya?
16. Etẹwẹ na yin kọdetọn lọ eyin mí nọ dejido Jiwheyẹwhe go?
16 Mí dona tindo nujikudo dọ, eyin mí Gal. 3:11; Hab. 2:4) Enẹwutu, onú titengbe wẹ e yin dọ mí ni tindo yise to Mẹlọ he sọgan gọalọna mí nugbonugbo mẹ. Paulu flinnu mí dọ ‘huhlọn Jiwheyẹwhe tọn wẹ to nuyiwa to mí mẹ, na ewọ wẹ omẹ lọ he sọgan wà susu tlala hú nuhe mí biọ kavi lẹn lẹpo.’ (Efe. 3:20) Devizọnwatọ Jehovah tọn lẹ nọ wà nuhe go yé pé lẹpo nado wà ojlo Jiwheyẹwhe tọn, ṣigba na yé yọnẹn dọ nugopipe emitọn tindo dogbó wutu, yé nọ dejido Jehovah go dọ e na dona vivẹnudido emitọn. Be homẹ mítọn ma hùn dọ Jiwheyẹwhe mítọn tin hẹ mí ya?
hodo anademẹ Jiwheyẹwhe tọn, nulẹ na yì na mí ganji. Paulu yihodọ sọn ohó gbọdo Habbakuk tọn mẹ dọmọ: “Dodonọ na nọgbẹ̀ gbọn yise etọn dali.” (OBIỌ YETỌN NADO TINDO YISE MỌ GBLỌNDO
17. (a) Nawẹ obiọ apọsteli lẹ tọn nado tindo yise dogọ mọ gblọndo yí gbọn? (b) Naegbọn mí sọgan donukun dọ obiọ mítọn nado tindo yise dogọ na mọ gblọndo?
17 To dogbigbapọnna nuhe ji mí dọhodo wayi lẹ godo, mí sọgan tindo numọtolanmẹ apọsteli lẹ tọn nkọ to whenue yé dọna Oklunọ dọmọ: “Do yise yise ji na mí.” (Luku 17:5) Odẹ̀ yetọn mọ gblọndo yí titengbe to Pẹntikọsti 33 W.M. to whenue gbigbọ wiwe yin kinkọ̀n do yé ji bọ yé mọnukunnujẹ lẹndai Jiwheyẹwhe tọn mẹ to gigọ́ mẹ. Ehe hẹn yise yetọn lodo. Taidi kọdetọn de, yé bẹ azọ́n yẹwhehodidọ tọn daho de jẹeji to ojlẹ enẹ mẹ. (Kọl. 1:23) Be mílọsu sọgan donukun dọ Jiwheyẹwhe na na mí yise dogọ eyin mí biọ ẹ ya? Biblu hẹn mí deji dọ mí sọgan wàmọ, eyin “mí biọ sọgbe hẹ ojlo [Jiwheyẹwhe tọn].”—1 Joh. 5:14.
18. Nawẹ Jehovah nọ dona mẹhe wleawuna yise lẹ gbọn?
18 Na nugbo tọn, homẹ Jehovah tọn nọ hùn do mẹhe nọ dejido ewọ go mlẹnmlẹn lẹ go. Jehovah na na gblọndo obiọ he mí nọ basi nado tindo yise dogọ tọn, bọ yise mítọn na lodo dogọ, podọ ehe na zọ́n bọ mí na “yin pinpọnhlan di mẹhe jẹ nado mọ ahọluduta Jiwheyẹwhe tọn yí.”—2 Tẹs. 1:3, 5.
^ huk. 4 Nado mọ apajlẹ delẹ, hia otàn gbẹzan tọn Henryk Dornik tọn (Atọ̀họ̀-Nuhihọ́ lọ Tọn 1er septembre 2007) po Trophim R. Nsomba tọn po (Atọ̀họ̀-Nuhihọ́ lọ Tọn 15 avril 2015).