Plọn Ovi Towe Lẹ

Josia De Nado Wà Nuhe Sọgbe

BE A lẹndọ e vẹawu nado wà nuhe sọgbe wẹ ya? a— Eyin hiẹ dọ mọwẹ, mẹsusu na yigbe hẹ nuhe a dọ. Etlẹ nọ vẹawuna mẹho lẹ lọsu nado wà nuhe yé yọnẹn dọ e sọgbe. Gbọ mí ni pọ́n nuhewutu e vẹawuna Josia nado basi nudide he sọgbe lẹ. Be a yọ́n mẹhe ewọ yin ya?—

Visunnu Amọni, ahọlu Juda tọn de tọn wẹ Josia yin, mẹhe tindo owhe 16 whenue e jì Josia. Amọni ylan taun, dile otọ́ etọn Ahọlu Manassẹ ylan do. Na nugbo tọn, Manassẹ ko do ede hia nado yin ahọlu ylankan de na owhe susu. Ṣigba e wá jọ bọ Assilianu lẹ wle e sọyi ganpamẹ to Babilọni, fie dẹn tlala do otò etọn. Whenue Manassẹ tin to ganpamẹ, e vẹvẹna Jehovah nado jona ẹn, podọ Jehovah wàmọ.

Whenuena Manassẹ yin didesọn ganpamẹ, e lẹkọyi Jelusalẹm bosọ jẹ gandu ji taidi ahọlu whladopo dogọ. To afọdopolọji, e basi vọjlado gando nuylankan he e ko wà wayi lẹ go bo gọalọna akọta lọ nado sẹ̀n Jehovah. E na ko vẹna ẹn taun dọ visunnu etọn Amọni ma hodo apajlẹ dagbe etọn. To gblagbla ojlẹ enẹ tọn mẹ wẹ Josia yin jiji te. Biblu ma dọ lehe ojlẹ he Manassẹ yizan hẹ ovivi etọn Josia dẹnsọ gba. Ṣigba be a ma lẹndọ Manassẹ na ko tẹnpọn nado gọalọna ẹn nado sẹ̀n Jehovah wẹ ya?—

Manassẹ kú to whenuena Josia tindo owhe ṣidopo, bọ otọ́ etọn Amọni lẹzun ahọlu. Owhe awe poun wẹ Amọni yí do dugán bọ devi etọn titi lẹ hù i. Enẹwutu, Josia lẹzun ahọlu Juda tọn to whenuena e tindo owhe ṣinatọ̀n. (2 Otannugbo lẹ, weta 33) Etẹwẹ a lẹndọ e ko jọ to whenẹnu? Be Josia de nado hodo apajlẹ ylankan otọ́ etọn Amọni tọn wẹ, kavi apajlẹ dagbe Manassẹ, baba-daho etọn he lẹnvọjọ tọn?—

Dile etlẹ yindọ Josia gbẹ́ pò to ovu, e magbe nado sẹ̀n Jehovah. Enẹwutu, e nọ dotoaina mẹhe yiwanna Jehovah lẹ kakati nido yin họntọn otọ́ etọn tọn lẹ. Owhe ṣinatọ̀n mẹvi poun wẹ Josia, ṣigba e yọnẹn dọ nuhe sọgbe wẹ e yin  nado nọ dotoaina mẹhe yiwanna Jiwheyẹwhe lẹ. (2 Otannugbo lẹ 34:1, 2) Be hiẹ jlo na yọ́n mẹhe na ayinamẹ Josia bo ze apajlẹ dagbe dai na ẹn lẹ ya?—

Yẹwhegán Zẹfania yinuwado Josia ji taun. Hẹnnumẹ Josia tọn de wẹ e yin, na e taidi dọ kúnkan Ahọlu dagbe Hẹzekia he yin otọ́ Manassẹ tọn mẹ wẹ e wá sọn. To bẹjẹeji gandudu Josia tọn, Zẹfania wlan owe Biblu tọn he nọ yin yiylọdọ Zẹfania. E na avase gando nuylankan he na jọ do mẹhe de nado wà nuhe ma sọgbe lẹ go, podọ matin ayihaawe, Josia dona ko dotoaina avase enẹlẹ.

Mẹdevo he sọ yinuwado Josia ji wẹ Jẹlemia, mẹhe hiẹ sọgan ko sè otàn etọn pọ́n. Jẹlemia lọsu yin jọja taidi Josia, podọ fie yé whẹ́n te ma dẹn do yedelẹ. Jehovah gbọdo Jẹlemia nado wlan owe Biblu tọn he nọ yin yiylọdọ Jẹlemia. To whenuena Josia kú to awhàngbenu, Jẹlemia pà ohàn vonọtaun de, he nọ yin yiylọdọ avigbè, bo wlan ẹn dai. (2 Otannugbo lẹ 35:25) Mí sọgan yí nukun homẹ tọn do mọ lehe yé na ko nọ na tuli ode awetọ nado yin nugbonọ na Jehovah do sọ!

Etẹwẹ a lẹndọ emi sọgan plọn sọn apajlẹ Josia tọn mẹ?— Eyin otọ́ towe ma nọ sẹ̀n Jehovah dile otọ́ Josia tọn ma wà do, be mẹdevo tin he sọgan gọalọna we nado plọnnu dogbọn Jiwheyẹwhe dali ya? Vlavo onọ̀ towe, mẹjitọ daho towe, kavi hẹnnumẹ de. E sọgan nọma yin hẹnnumẹ towe de, ṣigba bo yin mẹhe nọ sẹ̀n Jehovah bọ onọ̀ towe yigbe dọ ni nọ plọn Biblu hẹ we.

Mahopọnna mẹhe e sọgan yin, flindọ yọpọvu de poun wẹ Josia lọsu yin, ṣogan e yọnẹn dọ emi dona jihọntọn hẹ mẹhe nọ sẹ̀n Jehovah lẹ. Na hiẹ lọsu ni wà nudopolọ bo de nado wà nuhe sọgbe!

[Nudọnamẹ odò tọn]

Kanbiọ Lẹ:

○ Mẹnu wẹ otọ́ po baba-daho Josia tọn po, podọ omẹ nankọtọn wẹ yé yin?

○ Diọdo tẹwẹ baba-daho Josia tọn basi to gbẹzan etọn mẹ?

○ Dọ yinkọ yẹwhegán awe he sọgan ko yinuwado Josia ji to aliho dagbe mẹ lẹ tọn, podọ etẹwutu hiẹ do lẹndọ nujọnu wẹ e yin nado tindo họntọn mọnkọtọn lẹ?

[Yẹdide to weda 25]

Aliho tẹlẹ mẹ wẹ Zẹfania po Jẹlemia po sọgan ko gọalọna Josia te nado wà nuhe sọgbe?