Omẹ Vude Na Dugán, Ṣigba Mẹsusu Na Mọaleyi

SỌN azán apọsteli lẹ tọn gbè gbọ́n wẹ Jiwheyẹwhe ko to Klistiani nugbonọ sọha kleun delẹ de sọn gbẹtọvi lẹ mẹ, taidi sọdodovi etọn lẹ. Diọdo he sọdodovi ehelẹ nọ tindo numimọ etọn yin ayidego tọn sọmọ bọ Ohó Jiwheyẹwhe tọn ylọ ẹ dọ vọji de. Lẹndai vọji lọ tọn wẹ nado wleawuna devizọnwatọ nugbonọ Jiwheyẹwhe tọn he yin vivọji enẹlẹ nado dugán to olọn mẹ. (2 Timoti 2:12) Yé nọ yin finfọnsọnku do ogbẹ̀ olọn mẹ tọn mẹ nado dugán hẹ Klisti. (Lomunu lẹ 6:3-5) To olọn mẹ, ‘yé na duahọlu do aigba ji’ to pọmẹ hẹ Klisti.—Osọhia 5:10; 11:15.

Ṣigba, Ohó Jiwheyẹwhe tọn sọ dohia dọ gbọnvona mẹhe yin vivọji lẹ, mẹdevo lẹ nasọ mọ whlẹngán madopodo yí. Biblu (Owe Wiwe Heblu tọn lẹ po Owe Wiwe Glẹki tọn lẹ po) dohia dọ lẹndai Jiwheyẹwhe tọn wẹ  yindọ pipli voovo awe ni yin whinwhlẹngán—yèdọ pipli pẹvi mẹhe na dugán to olọn mẹ lẹ tọn po pipli daho mẹjidugando he na nọgbẹ̀ to aigba ji lẹ tọn po. Di apajlẹ, doayi nuhe apọsteli Johanu wlan hlan yisenọ hatọ he yin vivọji lẹ go. E dọ gando Jesu go dọmọ: “Ewọ sọ wẹ oyẹsu na ylando mítọn [pipli pẹvi lọ tọn]: e ma yin mítọn kẹdẹ, ṣigba na ylando aihọn lẹpo [pipli daho lọ] tọn ga.”—1 Johanu 2:2.

To aliho dopolọ mẹ, apọsteli Paulu wlan dọmọ: “Nukundido nudida [pipli daho lọ] tọn nọtepọn osọhia ovi Jiwheyẹwhe tọn lẹ [pipli pẹvi lọ] tọn.” (Lomunu lẹ 8:19-21) Nawẹ mí dona mọnukunnujẹ hogbe apọsteli Johanu po Paulu po tọn ehelẹ mẹ gbọn? Lehe mí dona mọnukunnujẹ yé mẹ do die: Mẹhe yin vivọji lẹ na lẹzun apadewhe gandudu olọn mẹ tọn. Na lẹndai tẹ wutu? Nado hẹn ale mavọmavọ wá na livi madosọha gbẹtọvi lẹ tọn, yèdọ mẹjidugando gandudu Jiwheyẹwhe tọn lẹ tọn to aigba ji. Enẹwutu, Jesu plọn devi etọn lẹ nado nọ hodẹ̀ dọmọ: ‘Ahọludu towe ni wá. Ojlo towe ni yin wiwà to aigba go, dile e te to olọn mẹ.’—Matiu 6:10.

Nugbo ehe dopolọ he gando whlẹngán pipli awe lẹ tọn go, sọ yin mimọ to Owe Wiwe Heblu tọn lẹ mẹ. Di dohia, flin nuhe Jehovah dọna tọgbo Jesu tọn, Ablaham. E dọmọ: “To okún towe [pipli pẹvi lọ] mẹ wẹ yè na dona akọta aigba ji [pipli daho lọ] tọn lẹpo.” (Gẹnẹsisi 22:18) Mọwẹ, akọta lẹpo na mọ dona yí gbọn “okún” Ablaham tọn gblamẹ.

Mẹnu wẹ “okún” enẹ? Jesu Klisti po sọdodovi Jiwheyẹwhe tọn he yin vivọji lẹ po wẹ. Apọsteli Paulu basi zẹẹmẹ dọmọ: “Eyin mìwlẹ yin Klisti tọn, be mì wẹ okún Ablaham tọn.” (Galatianu lẹ 3:16, 29) Podọ dona tẹlẹ wẹ gbẹtọ akọta lẹpo tọn na mọyi gbọn “okún” lọ gblamẹ? Lẹblanulọkẹyi lọ nado mọ nukundagbe Jiwheyẹwhe tọn bo duvivi ogbẹ̀ madopodo tọn to paladisi aigba ji tọn de mẹ wẹ. Psalm-kàntọ Davidi dọ dọdai dọmọ: “Dodonọ wẹ na dugu aigba tọn, bo nasọ nọ nọ̀ e mẹ kakadoi.”—Psalm 37:29; Isaia 45:18; Osọhia 21:1-5.

Na nugbo tọn, omẹ vude wẹ na dugán to olọn mẹ, ṣigba mẹsusu wẹ na duale he gandudu olọn mẹ tọn na hẹnwa lẹ tọn—yèdọ ogbẹ̀ madopodo to aigba ji gọna dona he e na bẹhẹn lẹpo. Na hiẹ po whẹndo towe po ni tin to mẹhe na duale madopodo he Ahọluduta Jiwheyẹwhe tọn na hẹnwa lẹ mẹ.

[Yẹdide to weda 12]

Gbẹtọvi livi madosọha lẹ na dugu ogbẹ̀ madopodo tọn to aigba ji. Be hiẹ na tin to yé mẹ ya?