Dọnsẹpọ Jiwheyẹwhe

Etẹwẹ Jehovah Biọ to Mí Si?

Deutelonomi 10:12, 13

TONUSISE kavi tolivivẹ—nado de dopo to onú awe ehelẹ mẹ ma nọ bọawu to whelẹponu. Eyin ogán de yin fifiẹtọ kavi hẹngogonọ, mẹjidugando etọn lẹ sọgan nọ setonuna ẹn po hùnhlún po. Ṣigba, sinsẹ̀n-basitọ Jehovah Jiwheyẹwhe tọn lẹ nọ setonuna ẹn sọn ahun mẹ wá. Etẹwutu? Nado na gblọndo na kanbiọ enẹ, mì gbọ mí ni gbadopọnna nuhe Mose dọ to Deutelonomi 10:12, 13 mẹ lẹ. a

To whenue Mose to nubiọtomẹsi Jiwheyẹwhe tọn lẹ bladopọ, e fọ́n kanbiọ mẹhẹnlẹnnupọn tọn de dote dọmọ: “Etẹwẹ OKLUNỌ lọ Jiwheyẹwhe towe jijlo sọn dè we?” (Wefọ 12) Jiwheyẹwhe tindo jlọjẹ nado biọ nudepope he jlo e to mí si. To popolẹpo mẹ, ewọ wẹ Oklunọ Nupojipetọ, Asisa ogbẹ̀ tọn podọ Mẹhe nọ hẹnmẹ dogbẹ̀. (Psalm 36:9; Isaia 33:22) Jehovah tindo jlọjẹ nado biọ dọ mí ni setonuna ẹn. Ṣigba, e ma nọ jlo dọ mí ni setonuna ẹn gánnugánnu gba. Etẹwẹ e nọ biọ to mí si? E biọ dọ mí ni yin “tonusetọ sọn ahun mẹ.”—Lomunu lẹ 6:17, NW.

Etẹwẹ sọgan whàn mí nado setonuna Jiwheyẹwhe sọn ahun mẹ? Mose donù onú dopo go dọmọ: “Dibusi OKLUNỌ lọ Jiwheyẹwhe towe.” b (Wefọ 12) Ehe ma zẹẹmẹdo nado to sijọsijọ ji na mí to budina kọdetọn ylankan lẹ wutu gba, kakatimọ e dlẹnalọdo osi sisosiso tintindo na Jiwheyẹwhe podọ nado yọ́n pinpẹn aliho etọn lẹ tọn. Eyin mí tindo sisi sisosiso na Jiwheyẹwhe, mí ma na jlo nado hẹn homẹgble e.

Ṣigba, etẹwẹ dona yin onú tintan he na whàn mí nado setonuna Jiwheyẹwhe? Mose dọmọ: “Yiwanna [Jehovah, bo] nọ sẹ̀n OKLUNỌ lọ Jiwheyẹwhe towe po ayiha towe lẹpo po, podọ po alindọn towe lẹpo po.” (Wefọ 12) Wanyina Jiwheyẹwhe bẹ nususu hẹn hugan numọtolanmẹ kẹdẹ. Owe alọdlẹndonu tọn de basi zẹẹmẹ dọmọ: “To whedelẹnu, hogbe he Heblugbe nọ yizan nado do numọtolanmẹ hia lẹ sọ nọ dlẹnalọdo nuyiwa he nọ dekọtọn sọn numọtolanmẹ mọnkọtọn lẹ mẹ.” Owe dopolọ sọ dohia dọ wanyina Jiwheyẹwhe zẹẹmẹdo nado nọ “yinuwa po owanyi po” hlan ẹn. To hogbe devo mẹ, eyin mí yiwanna Jiwheyẹwhe, mí na nọ yinuwa to aliho he mí yọnẹn dọ e na hẹn homẹ etọn hùn lẹ mẹ.—Howhinwhẹn lẹ 27:11.

Obá tẹ mẹ wẹ mí dona setonuna Jiwheyẹwhe jẹ? Mose dọmọ: “Nọ zinzọnlin to ali etọn [Jiwheyẹwhe tọn] lẹpo mẹ.” (Wefọ 12) Jehovah jlo dọ mí ni wà nuhe e biọ to mí si lẹpo. Be tonusise mlẹnmlẹn mọnkọtọn sọgan hẹn awugble wá na mí wẹ ya? Gbede pọ́n!

Eyin mí desọn ojlo mẹ bo setonu, enẹ na hẹn dona wá. Mose wlan dọmọ: “Nọ payi gbedide OKLUNỌ lọ tọn lẹpo go ... he yẹn degbena we to egbehe na dagbe towe.” (Wefọ 13) Mọwẹ, gbedide Jehovah tọn lẹpo—yèdọ nuhe e nọ biọ to mí si lẹpo—wẹ yin na dagbe mítọn. Enẹ ma paṣa mí, na Biblu dọ dọ “Jiwheyẹwhe wẹ owanyi.” (1 Johanu 4:8, NW) Enẹwutu, gbedide he na hẹn ale tẹgbẹ tọn wá na mí lẹ kẹdẹ wẹ e nọ na mí. (Isaia 48:17) Nuhe Jehovah biọ to mí si lẹpo wiwà na whlẹn mí sọn flumẹjijẹ susu mẹ todin, bo na dekọtọn do dona mavọmavọ lẹ mẹ na mí to sọgodo to gandudu Ahọluduta etọn tọn glọ. c

Tonusise kavi tolivivẹ—eyin e gando nuhe Jehovah biọ to mí si lẹ go, nudide nuyọnẹn tọn dopo gee wẹ tin. Tonusise mlẹnmlẹn sọn ahun mẹ nọ hẹn ale wá to whepoponu. Nuyiwa nugbonọ-yinyin tọn enẹ nọ dọ̀n mí sẹpọ Jehovah dogọ, yèdọ Jiwheyẹwhe owanyinọ lọ he nọ dín dagbe mítọn to whepoponu.

[Nudọnamẹ odò tọn lẹ]