Jiwheyẹwhe Nọ Hò Mítọn Pọ́n​—Lehe Mí Wagbọn do Yọnẹn

SỌN owhe fọtọ́n susu lẹ die wẹ gbẹtọ lẹ ko to kanbiọ titengbe ehe kanse yede dọ: Eyin Jiwheyẹwhe yiwanna mí, naegbọn yajiji do sù sọmọ? Matin ayihaawe, hiẹ na yigbe dọ eyin a yiwanna mẹde, a ma na jlo dọ omẹ mọnkọtọn ni jiya, podọ eyin mẹlọ biọ nuhahun mẹ, a na tẹnpọn nado gọalọna ẹn. To aliho dopolọ mẹ, mẹsusu nọ lẹndọ yajiji he sù to aihọn mẹ dohia dọ Jiwheyẹwhe ma nọ hò mítọn pọ́n. Enẹwutu jẹnukọn whẹ́, nujọnu wẹ e yin dọ mí ni gbadopọnna kunnudenu he dohia dọ Jiwheyẹwhe yiwanna mí nugbonugbo bosọ nọ hò mítọn pọ́n.

Nudida lẹ Do Owanyi Jiwheyẹwhe Tọn Hia

Jehovah Jiwheyẹwhe wẹ “Omẹ lọ he dá olọn po aigba po gọna ohù po nuhe tin to yé mẹ lẹpo po.” (Owalọ lẹ 4:24, NW) Matin ayihaawe, eyin mí lẹnnupọndo nuhe Jehovah dá lẹ ji, mí dona wá tadona lọ kọ̀n dọ ewọ nọ hò mítọn pọ́n. Di apajlẹ, lẹnnupọndo nuhe nọ hẹn ayajẹ po awuvivi po wá na we lẹ ji. Be a nọ yiwanna núdùdù vivi lẹ ya? Jehovah sọgan ko wleawuna núdùdù wunmẹ dopo gee nado hẹn ogbẹ̀ mítọn dote. Kakatimọ e dá núdùdù wunmẹ voovo madosọha lẹ he nọ vivi to onù mítọn mẹ. Mọdopolọ, Jehovah yí atin, vounvoun, po lẹdo whanpẹnọ lẹ po do doaṣọ́na aigba, na mí nido sọgan mọ awuvivi to gbẹ̀mẹ.

Sọ lẹnnupọndo aliho he mẹ mí yin didá te ji. E ma yin dandan dọ mí ni tindo nugopipe lọ nado yìn aslan bo duvivi nuhiho dagbe lẹ tọn bosọ pà whanpẹ nudida lẹ tọn whẹpo do nọgbẹ̀. Ṣigba Jiwheyẹwhe na nunina ehe lẹpo mí na mí nido duvivi gbẹninọ tọn. Humọ, lẹnnupọndo haṣinṣan towe hẹ mẹdevo lẹ ji. Mẹnu wẹ ma nọ yiwanna nado dogbẹ́ hẹ họntọn vivẹ lẹ kavi nado gbò mẹhe e yiwanna taun de fán? Nado dọ hójọhó, nugopipe lọ nado do owanyi hia yin nunina de sọn Jiwheyẹwhe owanyinọ mítọn dè! Na Jiwheyẹwhe dá gbẹtọvi lẹ po nugopipe lọ po nado do owanyi hia wutu, mí sọgan dọ dọ owanyi yin dopo to jẹhẹnu Jiwheyẹwhe tọn lẹ mẹ.

 Biblu Na Mí Jide Dọ Jiwheyẹwhe Yiwanna Mí

Biblu dọna mí dọ Jiwheyẹwhe wẹ owanyi. (1 Johanu 4:8) Gbọnvona dọ owanyi etọn sọawuhia to nudida lẹ mẹ, Ohó etọn Biblu sọ do e hia ga. Di apajlẹ, Biblu na anademẹ he nọ yidogọna agbasalilo, bo namẹ tuli nado nọ jlẹkaji to nulẹpo mẹ, bosọ na avase sọta ahànnumu po adọwhẹ́n po.—1 Kọlintinu lẹ 6:9, 10.

Biblu sọ na ayinamẹ nuyọnẹn tọn lẹ gando lehe mí na dogbẹ́ hẹ mẹdevo lẹ do go, bo dotuhomẹna mí nado yiwanna ode awetọ bosọ nọ yí sisi, yẹyi po homẹdagbe po do yinuwa hẹ mẹdevo lẹ. (Matiu 7:12) E gblewhẹdo nuyiwa po jijọ he nọ hẹn yajiji wá lẹ po—taidi nukunkẹn, mẹnudidọ, nuvẹun, ayọdide po mẹhùhù po. Eyin mẹlẹpo nọ dovivẹnu nado hodo ayinamẹ dagbe he tin to Owe-wiwe mẹ lẹ, ayihaawe ma tin dọ yajiji na depò taun lẹdo aihọn pé.

Ṣigba, aliho titengbe hugan he mẹ Jiwheyẹwhe do owanyi etọn hia te wẹ Ovi etọn Jesu zizejo nado fli gbẹtọvi lẹ gọ̀. Johanu 3:16 dọmọ: “Jiwheyẹwhe yiwanna aihọn lọ sọmọ bọ e namẹ Visunnu detọ́n dopo akàn etọn, na mẹdepope he do yise hia to ewọ mẹ ma nado yin vivasudo adavo nado tindo ogbẹ̀ madopodo.” (NW) Enẹ dohia dọ Jehovah ko basi tito nado hẹn okú po yajiji wunmẹ lẹpo po wá opodo kakadoi.—1 Johanu 3:8.

E họnwun dọ kunnudenu susu tin dọ Jehovah yiwanna mí. To whelọnu lo, e sọgbe hẹ lẹnpọn dagbe nado dọ dọ yajiji mítọn ma nọ hẹn homẹhun in. Jiwheyẹwhe na yinuwa nado hẹn yajiji wá opodo. E ma biọ dọ mí ni pàhodọ do lehe e na wàmọ gbọn ji—Biblu dọ lehe Jiwheyẹwhe na de yajiji lẹpo sẹ̀ do na mí hezeheze.

[Yẹdide to weda 4]

Nugopipe lọ nado do owanyi hia yin nunina de sọn Jiwheyẹwhe owanyinọ mítọn dè