Ayinamẹ lẹ Na Ayajẹ Whẹndo Tọn

Whenuena Alọwlemẹ de Tindo Nuhudo Vonọtaun

Sọn whenue gbọ́n doto lẹ mọ azọ̀n agbọ́pemẹ zẹjlẹgo tọn na mi, asu ṣie kẹdẹ wẹ nọ penukundo agbasazọ́n lẹpo go. Ṣigba e ma nọ dọ nudepope na mi gando akuẹzinzan mítọn lẹ go. Naegbọn e do to nulẹpo whlá do mi dole? Ninọmẹ akuẹzinzan tọn mítọn dona ko ylan sọmọ bọ e yọnẹn dọ eyin n’sè, ahun ṣie na gbàdo.—Nancy. a

ALỌWLE sọgan bẹ nuhahun hẹn, ṣigba eyin dopo to alọwlemẹ lọ lẹ mẹ nọ jẹazọ̀n sinsinyẹn mapote to whenuena omẹ awetọ to gángán, nuhahun lọ lẹ sọgan sudeji. b Be hiẹ to nukunpedo alọwlemẹ madogánnọ de go wẹ ya? Eyin mọ wẹ, be kanbiọ he bọdego ehelẹ nọ duahunmẹna we ya: ‘Nawẹ n’sọgan pehẹ ninọmẹ lọ do eyin agbasalilo alọwlemẹ ṣie tọn fọ́n bo to yinylan dogọ? Nawẹ e na dẹnsọ bọ n’na to nukunpedo alọwlemẹ ṣie go bo nasọ to nuhe pò lẹ wà taidi, núdùdù didà, whégbè jijlado po agbasazọ́n po? Naegbọn e do nọ vẹna mi dọ yẹn to gángán bọ awetọ ṣie to azọ̀njẹ?’

To alọ devo mẹ, eyin hiẹ wẹ yin alọwlemẹ he to azọ̀njẹ lọ, a sọgan to nuhà dọ: ‘Nawẹ n’sọgan hẹn sisi mẹdetiti tọn go to whenuena n’ma penugo nado hẹn azọngban ṣie lẹ di gbọn? Be e nọ vẹna alọwlemẹ ṣie dọ n’to awutujẹ wẹ? Be enẹ dohia dọ whẹndo mítọn ma sọgan tindo ayajẹ ba wẹ ya?’

E blawu dọ alọwle delẹ ko gbakija na nuhahun he azọ̀n sinsinyẹn mapote de nọ hẹnwa lẹ wutu. Ṣigba ehe ma dohia dọ alọwle towe ma sọgan tindo kọdetọn dagbe gba.

Alọwlemẹ susu gbẹ́ tin topọ bo tlẹ sọ tindo ayajẹ mahopọnna dọ dopo to yé mẹ to azọ̀n sinsinyẹn de jẹ mapote. Lẹnnupọndo apajlẹ Yoshiaki po Kazuko po tọn ji. Nẹgbé-hú nọ dotukla Yoshiaki sọmọ bọ mẹde janwẹ na gọalọna ẹn whẹpo e nado wà nudepope. Kazuko dọmọ: “Asu ṣie nọ tindo nuhudo alọgọ tọn to onú lẹpo mẹ. Na n’nọ penukundego to whelẹponu wutu, okọ̀, abọ́ po alọ ṣie lẹ po nọ vẹ́ mi sọmọ bọ afọ ṣie ma nọ hán to dotowhé sẹkunọ lẹ tọn. Nukunpedomẹgo lọ nọ saba wá hú agbọ́ mi.” Ṣigba mahopọnna nuhahun lọ lẹ, Kazuko dọmọ: “Kanṣiṣa mítọn taidi asu po asi po ko lodo dogọ.”

To whelọnu lo, etẹwẹ na gọalọna mẹhe tin to ninọmẹ mọnkọtọn mẹ lẹ nado tindo ayajẹ? Onú dopo wẹ yindọ, mẹhe nọ tindo pọndohlan dagbe po pekọ po to alọwle yetọn mẹ lẹ nọ pọ́n  awutu he jẹ alọwlemẹ yetọn te taidi nuhahun yé omẹ awe lẹpo tọn, e ma yin mẹdopo tọn gba. To popolẹpo mẹ, eyin alọwlemẹ dopo to azọ̀njẹ, e nọ yinuwado yé omẹ awe lẹpo ji, etlẹ yin to aliho voovo mẹ. Gẹnẹsisi 2:24 basi zẹẹmẹ kanṣiṣa pẹkipẹki he tin to asu po asi po ṣẹnṣẹn ehe tọn dọmọ: ‘Sunnu na jo otọ́ po onọ̀ po do, bo na sẹbọdo asi etọn go: yé nasọ lẹzun agbasalan dopo.’ Enẹwutu, eyin alọwlemẹ de to azọ̀n sinsinyẹn jẹ mapote, dandannu wẹ e yin dọ yé omẹ awe lẹ ni wazọ́n dopọ nado duto nuhahun lọ ji.

Humọ, dodinnanu lẹ dohia dọ asu po asi po he nọ hẹn haṣinṣan dagbe go to azọ̀n mapote nukọn lẹ nọ kẹalọyi ninọmẹ yetọn bosọ nọ plọn lehe yé sọgan diọada sọgbe hẹ ẹ do. Suhugan nuhe yé ko plọn lọ lẹ tọn wẹ sọgbe hẹ ayinamẹ he Biblu ko na hoho do whẹho mọnkọtọn ji lẹ. Lẹnnupọndo ayinamẹ atọ̀n he bọdego ehelẹ ji.

Mì Nọ Hò Ode Awetọ Tọn Pọ́n

“Omẹ awe pọnte hú omẹ dopo,” wẹ Yẹwhehodọtọ 4:9 dọ. Etẹwutu? Wefọ 10tọ na gblọndo dọmọ: “Na eyin [dopo to yé mẹ] jai, mẹde na ze ogbẹ́ etọn dote.” Be hiẹ nọ yí hogbe mẹpipa tọn lẹ do ‘ze kavi jlọ ogbẹ́ towe dote’ ya?

Be mì nọ dín aliho yọ́n-na-yizan lẹ nado gọalọna ode awetọ ya? Yong, he asi etọn to awukuzọ̀n jẹ dọmọ: “N’nọ tẹnpọn nado vẹawu asi ṣie to ninọmẹ lẹpo mẹ. Whedepopenu he nugbla hù mi, n’nọ mọdọ nugbla na ko to ewọ lọsu hù. Eyin n’jlo na disa tọ́n nado na núdùdù nukun, n’nọ kanse e eyin e jlo na hodo mi. Mí nọ mọ awuvẹ dopọ bosọ nọ doakọnna ninọmẹ lọ dopọ.”

To alọ devo mẹ, eyin hiẹ go wẹ alọwlemẹ towe to nukunpedo, be onú delẹ tin he a sọgan wà na dewe bọ e ma na hẹn awugble wá na we ya? Eyin mọ wẹ, ehe sọgan yidogọna sisi mẹdetiti tọn towe bo hẹn alọwlemẹ towe penugo dogọ nado to nukunpedo gowe zọnmii.

Kakati nado lẹndọ hiẹ yọ́n aliho dagbe hugan he mẹ a na do mẹtọnhopọn hia alọwlemẹ towe te, naegbọn hiẹ ma na kàn nuhe ewọ na jlo hugan dọ a ni wà na ẹn sè e? Nancy, he go mí donù to bẹjẹeji, wá dọ obá he mẹ ninọmẹ akuẹzinzan whẹndo lọ tọn he e ma yọnẹn nọ yinuwadeji jẹ na asu etọn. Todin, asu etọn nọ tẹnpọn nado dọho hẹ ẹ dogọ do whẹho ehe ji.

TẸ́N EHE PỌ́N: Basi todohukanji nuhe a lẹndọ alọwlemẹ towe sọgan wà nado hẹn ninọmẹ towe pọnte pẹẹde lẹ tọn, bo dike ewọ lọsu ni wà nudopolọ. Enẹgodo, ze todohukanji towe na ẹn bo yí etọn. Dopodopo mìtọn dona yí lẹnpọn dagbe do de ayinamẹ dopo kavi awe he mì sọgan yizan.

Tito Mìtọn Ni Nọ Jlẹkaji

“Onú dopodopo wẹ ojlẹ de tin na,” wẹ Ahọlu Sọlọmọni nuyọnẹntọ wlan. (Yẹwhehodọtọ 3:1) Ṣigba, e sọgan taidi nuhe ma yọnbasi nado hẹn tito jlẹkaji tọn de go, na aliho he mẹ azọ̀n sinsinyẹn mapote de nọ bẹpla aṣa whẹndo de tọn lẹ te wutu. Etẹwẹ mì sọgan wà nado hẹn jlẹkajininọ mìtọn go, e whè gbau jẹ obá de mẹ?

To pọmẹ, mì sọgan magbe sọn ojlẹ de mẹ jẹ devo mẹ nado de ayiha sọn awutu lọ ji. Be mì gbẹ́ sọgan duvivi nuhe mì ko nọ wà whẹpo awutu lọ do bẹ delẹ tọn ya? Eyin enẹ ma yọnbasi, onú devo tẹlẹ wẹ mì sọgan tẹnpọn nado wà? E sọgan yin nuhe bọawu de taidi wehihia na ode awetọ, kavi nuhe vẹawu de taidi ogbè yọyọ de pinplọn. Vivẹnudido nado wà nuhe azọ̀n lọ ma glọnalina mì nado wà to pọmẹ lẹ na hẹn kanṣiṣa mìtọn lodo taidi ‘agbasalan dopo’—bo yidogọna ayajẹ mìtọn.

Nudevo he nọ gọalọ nado hẹn jlẹkajininọ go wẹ gbẹdido hẹ mẹdevo lẹ. Biblu dọ to Howhinwhẹn lẹ 18:1 mẹ dọmọ: “Ewọ he klan ede dovo na dómọna ojlo ede tọn, bosọ diọavunnukunsọ nudepope he yin zinzin tọn.” Be a doayi e go to wefọ enẹ mẹ dọ mẹdetiti kinklandovo sọgan yinuwado ayiha mẹtọn ji to aliho agọ̀ mẹ ya? To vogbingbọn mẹ, gbẹdido hẹ mẹdevo lẹ whẹwhẹ sọgan na we kọgbọ bo jla pọndohlan towe do. Enẹwutu, naegbọn hiẹ ma na biọ to mẹdevo lẹ si nado wá dla we pọ́n?

To whedelẹnu, e nọ vẹawuna alọwlemẹ he to nukunpedo awetọ yetọn go lẹ nado hẹn jlẹkajininọ go. Delẹ to yé mẹ nọ doagbànna yede zẹjlẹgo, bọ onú nọ wá ṣikọna yé, podọ yelọsu sọgan bẹ azọ̀n. To godo mẹ, yé tlẹ sọgan zan yede vún sọmọ bọ yé ma nasọ penugo nado penukundo  alọwlemẹ vivẹ yetọn go ba. Enẹwutu, eyin hiẹ to nukunpedo alọwlemẹ he to azọ̀n sinsinyẹn jẹ mapote de go, ma wọnji nuhudo towe titi lẹ go blo. Nọ de whenu dovo whẹwhẹ nado yí agbọ́. c Mẹdelẹ ko mọdọ e nọ wà dagbe nado dọho hẹ họntọn dejidego vijinu dopolọnọ de gando magbọjẹ yetọn lẹ go sọn ojlẹ de mẹ jẹ devo mẹ.

TẸ́N EHE PỌ́N: Basi kandai aliglọnnamẹnu he a nọ pehẹ to nukunpipedo alọwlemẹ towe go lẹ tọn. Enẹgodo, wlan nuhe a sọgan wà nado duto yé ji kavi pehẹ yé po kọdetọn dagbe po lẹ. Kakati nado to nulẹnpọndo yé ji zẹjlẹgo, kanse dewe dọ, ‘Etẹwẹ yin aliho he bọawu hugan nado hẹn ninọmẹ lọ pọnte dogọ?’

Mì Tẹnpọn Nado Hẹn Pọndohlan Dagbe Go

Biblu na avase dọmọ: “Hiẹ dọ dọ, etẹwutu wẹ azán nukọn tọn pọnte hú ehelẹ blo?” (Yẹwhehodọtọ 7:10) Enẹwutu, ma nọ lẹnnupọn glanglan do lehe ninọmẹ mìtọn na ko te eyin alọwlemẹ towe ma to azọ̀njẹ ji blo. Flindọ to aihọn ylankan ehe mẹ, ayajẹ mlẹnmlẹn ma tin. Ayinamẹ lọ wẹ nado kẹalọyi ninọmẹ towe bo mọ ayajẹ daho hugan yí sọn e mẹ.

Etẹwẹ na gọalọna hiẹ po alọwlemẹ towe po nado wà ehe? Mì nọ dọhodo dona he mì ko mọyi lẹ ji dopọ. Mì nọ jaya whedepopenu he ninọmẹ lọ pọnte, etlẹ yin yẹẹ de. Mì tẹnpọn bo mọ nude he mì na to nukundo, bo ze yanwle he kọ̀n mì sọgan jẹ lẹ donukọnna mìde.

Shoji po asi etọn Akiko po, ko yí ayinamẹ ehelẹ do yizan mẹ bo tindo kọdetọn dagbe. To whenuena doto lẹ mọ azọ̀n agbasakàn tọn sinsinyẹn de na Akiko, ewọ po asu etọn po to dandannu glọ nado jo azọ́ndenamẹ vonọtaun yetọn to lizọnyizọn whenu-gigọ́ tọn mẹ do. Be ehe hẹn yé jẹflumẹ wẹ ya? Gbau. Ṣogan, Shoji na ayinamẹ mẹdepope he tin to ninọmẹ mọnkọtọn lẹ mẹ dọmọ: “Mì ma dike nulinlẹnpọndo nuhe mì masọ sọgan wà lẹ ji ni hẹn mì gbọjọ blo. Mì hẹn pọndohlan dagbe go. Eyin mì omẹ awe lẹ tlẹ gbẹ́ tindo todido dọ nulẹ na wá gọ̀ jẹ lehe yé te do dai to gbèdopo, mì ze ayidonugo mìtọn do gbẹzan mìtọn dintọn ji. Na yẹn tọn, enẹ zẹẹmẹdo nado ze ayidonugo do asi ṣie ji bo gọalọna ẹn.” Ayinamẹ yọ́n-na-yizan ehelẹ sọgan gọalọna hiẹ lọsu eyin alọwlemẹ towe tindo nuhudo vonọtaun.

[Nudọnamẹ odò tọn lẹ]

KANSE DEWE DỌ . . .

Etẹwẹ yẹn po alọwlemẹ ṣie po dona wà to alọnu din?

▪ Mí na nọ dọhodo azọ̀n lọ ji dogọ

▪ Mí na de hodidọ do azọ̀n lọ ji pò

▪ Mí ma na nọ hanú zẹjlẹgo

▪ Mí na nọ hò ode awetọ tọn pọ́n dogọ

▪ Mí na nọ wà nuhe azọ̀n lọ ma glọnalina mí nado wà to pọmẹ lẹ

▪ Mí na jihọntọn hẹ mẹdevo lẹ dogọ

▪ Mí na tindo yanwle dopolọ lẹ

[Yẹdide to weda 18]

Nado hẹn jlẹkajininọ go, be mì sọgan nọ daihun dopọ ya?