Etẹ Wà Wẹ Jiwheyẹwhe Te?

‘Jehovah E, etẹwutu wẹ hiẹ do ṣite to olá boboe? Etẹwutu wẹ hiẹ sọ dewe whlá to nukunbibia whenu?’ a—PSALM 10:1.

EYIN hiẹ yìnnukun gbọn hosọ linlinwe lẹ tọn ji poun, hiẹ na doayi e go dọ mí to gbẹnọ to ojlẹ “nukunbibia [tọn] whenu.” Podọ whenuena nugbajẹmẹji de jọ do mí go—yèdọ whenue mílọsu jiya sẹ́nhẹngba tọn, basi asidan sinsinyẹn de, kavi hẹn mẹyiwanna de bu to okú mẹ—mí sọgan kanse dọ, Be Jiwheyẹwhe to mimọ ya? Be e nọ hò mítọn pọ́n ya? Be e tlẹ to finẹ ya?

Ṣigba, be hiẹ ko lẹnnupọndo yọnbasi lọ ji dọ nuhe mí nọ donukun sọn Jiwheyẹwhe dè delẹ sọgan sinai do linlẹn he ma sọgbe ji ya? Di apajlẹ: Lẹnnupọndo ovi pẹvi he to homẹgble na otọ́ etọn yì azọ́nmẹ wutu de ji. Ovi lọ ma mọ otọ́ etọn bo to jijlo dọ e ni gọwá whégbè. E tindo numọtolanmẹ ṣokẹdẹninọ tọn. To azán lọ blebu gblamẹ, e to kinkanse mapote dọ, “Fie wẹ Papa te?”

Mí sọgan yawu doayi nuhe ma sọgbe to pọndohlan ovi lọ tọn mẹ de go. Na nugbo tọn, otọ́ etọn to azọ́nwa to ojlẹ enẹ pẹpẹ mẹ nado penukundo nuhudo whẹndo lọ blebu tọn go. Mọdopolọ, be nuhe ma sọgbe wẹ e yin nado dawhá dọ, “Fie wẹ Jiwheyẹwhe te” ya?

Di apajlẹ, mẹdelẹ sọgan jlo dọ Jiwheyẹwhe ni yin whẹdida-hẹnṣẹtọ de he azọngban etọn tintan wẹ nado sayana mẹhe yí ylanwiwa do dó aṣa lẹ to afọdopolọji. Mẹdevo lẹ ma nọ mọ Jiwheyẹwhe hugan Papa Noẹli olọn mẹ tọn de he nọ kọ̀n dona do gbẹtọ lẹ ji—yèdọ agbasazọ́n, alọwlemẹ kavi etlẹ yin tike akọhiho tọn de dùdù.

Ehe lẹpo nọ dohia dọ eyin Jiwheyẹwhe ma hẹn whẹdida ṣẹ to afọdopolọji kavi eyin e ma na mí nuhe mí biọ de, be yajiji kavi nuhudo mítọn lẹ ma nọ duahunmẹna ẹn niyẹn. Ṣigba, lalo pete wẹ e yin nado lẹn mọ! Nugbo lọ wẹ yindọ, to ojlẹ ehe pẹpẹ mẹ, Jehovah Jiwheyẹwhe to azọ́nwa nado penukundo nuhudo whẹndo gbẹtọvi tọn blebu go, amọ́ e ma yin to aliho he mẹ mẹsusu nọ jlo te gba.

To whelọnu lo, etẹ wà wẹ Jiwheyẹwhe te? Nado na gblọndo na kanbiọ enẹ, mí dona lẹnnupọn yì godo jẹ bẹjẹeji whenuho gbẹtọvi tọn ji to whenue haṣinṣan he tin to gbẹtọ po Jiwheyẹwhe po ṣẹnṣẹn yin hinhẹngble taun—ṣigba vọjlado yọnbasi.

Kọdetọn Vẹadi Ylando Tọn Lẹ

Lẹnnupọndo owhé he ko tin to ninọmẹ gbakija tọn de mẹ na owhe susu ji. Họta lọ ko tọ́n, ohọ̀n lẹ ko de sọn adó go, podọ adó etọn lẹ ko gble taun. To ojlẹ de mẹ wayi, ohọ̀ ehe to ganji—ṣigba e masọ yinmọ todin ba. Eyin mí lẹnnupọndo obá he mẹ ohọ̀ lọ ko gble jẹ ji, vọjlado etọn ma na bọawu; e ma na yọnbasi to zánto dopo mẹ.

 Todin, lẹnnupọndo nuhẹngble he ko jọ do gbẹtọvi lẹ go sọn nudi owhe 6000 die gbọ́n ji, to whenuena Satani he yin gbigbọ mayinukundomọ de sisẹ́ Adam po Evi po nado ṣiatẹ sọta Jiwheyẹwhe. Jẹnukọnna nujijọ enẹ, asu po asi po tintan lọ tindo agbasalilo pipé de po todido lọ po nado nọgbẹ̀ kakadoi to pọmẹ hẹ kúnkan sọgodo tọn ovi yetọn lẹ tọn. (Gẹnẹsisi 1:28) Ṣigba, to whenuena Adam po Evi po waylando, e taidi dọ yé dọ̀n whẹndo gbẹtọvi tọn he na wá aimẹ to godo mẹ lẹ biọ nuhahun mẹ.

Mí ma dona yí nukunpẹvi do pọ́n kọdetọn vẹadi he atẹṣiṣi enẹ hẹnwa gba. Biblu dọmọ: “Ylando gbọn omẹ dopo [Adam] gblamẹ biọ aihọn mẹ podọ okú gbọn ylando gblamẹ wá.” (Lomunu lẹ 5:12) Gbọnvona okú, ylando ko hẹn haṣinṣan he mí tindo hẹ Mẹdatọ mítọn gble bosọ nọ yinuwado mí ji to agbasa-liho, to apọ̀n mẹ podọ to numọtolanmẹ-liho. Taidi kọdetọn de, ninọmẹ mítọn sọgan yin yiyijlẹdo ohọ̀ he gbakija de go. Dawe dodonọ lọ Job basi bladopọ ninọmẹ mítọn tọn po gbesisọ po to whenuena e dlẹnalọdo gbẹtọ taidi “azán lẹ vude tọn, bosọ gọ́ na tukla.”—Job 14:1.

Ṣigba, be Jiwheyẹwhe jo gbẹtọvi lẹ do to ylando Adam po Evi po tọn godo wẹ ya? Paali! Na nugbo tọn, sọn ojlẹ enẹ mẹ kakajẹ din, Otọ́ mítọn olọn mẹ tọn to azọ́nwa do whẹndo gbẹtọvi tọn tamẹ. Nado mọnukunnujẹ nuhe e to wiwà na mí mẹ ganji, mì gbọ mí ni lẹnnupọndo afọdide atọ̀n he yin dandannu nado vọ́ owhé de jlado po lehe dopodopo afọdide ehelẹ tọn gando nuhe Jiwheyẹwhe ko wà nado gọ̀ ninọmẹ dowhenu tọn gbẹtọvi lẹ tọn wá aimẹ do go po ji.

1 To whenuena whétọ de yí sọwhiwhe do pọ́n owhé etọn he ko gbakija de godo, e sọgan de vlavo nado vọ́ ẹ jlado kavi họ́ ẹ liai.

Bọdo atẹṣiṣi Edẹni mẹ tọn go tlolo, Jehovah Jiwheyẹwhe dọ lẹndai etọn nado vọ́ ninọmẹ gbẹtọvi tọn jlado. E dọna gbigbọ mayinukundomọ he yin asisa atẹṣiṣi lọ tọn dọmọ: “Yẹn nasọ yí okẹ̀n do hiẹ po yọnnu lọ po ṣẹnṣẹn; podọ do okún towe po okún etọn po ṣẹnṣẹn: ewọ na só ota towe, hiẹ na só afọgbẹn etọn.”—Gẹnẹsisi 3:15.

Po hogbe ehelẹ po, Jehovah dopagbe nado và dowatọ atẹṣiṣi Edẹni mẹ tọn lọ sudo. (Lomunu lẹ 16:20; Osọhia 12:9) Humọ, Jehovah dọ dọdai dọ “okún” sọgodo tọn de na fli gbẹtọvi lẹ sọn ylando si. b (1 Johanu 3:8) To aliho ehe mẹ, Jehovah dopagbe nuhe e na wà tọn tlọlọ: Ewọ na vọ́ ninọmẹ nudida etọn tọn jlado, e ma na và ẹ sudo gba. Ṣigba vọjlado enẹ na biọ whenu.

2 Yẹdenanutọ họgbigbá tọn de nọ basi yẹdide he nọ do adà voovo owhé lọ tọn hia.

Jehovah Jiwheyẹwhe na alẹnu osẹ́n tọn de Islaelivi lẹ bosọ dọ lehe tẹmpli he mẹ yé na nọ basi sinsẹ̀n hlan ẹn te na yin gbigbá do. Biblu dọmọ: “oyẹ̀ onú he ja lẹ tọn wẹ onú ehelẹ yin.” (Kọlọsinu lẹ 2:17) Taidi yẹdide he nọ do adà voovo ohọ̀ de tọn hia, yé nọtena onú daho de.

 Di apajlẹ, Islaelivi lẹ nọ basi avọ́sinsan kanlin tọn lẹ nado mọ jona ylando yetọn lẹ tọn yí. (Levitiku 17:11) Aṣa ehelẹ yin yẹdenanu avọ́sinsan daho he na wá yin bibasi to owhe kanweko susu godo de tọn—avọ́sinsan de he na hẹn ofligọ nujọnu tọn wá na gbẹtọvi lẹ. c Yẹdide gòhọtúntún po tẹmpli he mẹ Islaelivi lẹ nọ basi sinsẹ̀n te po tọn nọtena afọdide he Mẹsia kavi “okún” sọgodo tọn lọ na de lẹ, yèdọ sọn okú avọ́sinsan tọn etọn whenu kakajẹ whenue e lẹkọyi olọn mẹ.—Pọ́n apotin he tin to weda 7.

3 Họgbátọ he na hodo yẹdide he do adà voovo ohọ̀ lọ tọn hia bo vọ́ ẹ jlado de nọ yin dide.

Jesu wẹ Mẹsia dopagbe lọ he na hodo apajlẹ avọ́sinsan he Islaelivi lẹ nọ basi lẹ tọn bo na ze ogbẹ̀ edetiti tọn jo nado fli gbẹtọvi lẹ. Na nugbo tọn, Johanu Baptizitọ ylọ Jesu dọ “Lẹngbọvu Jiwheyẹwhe tọn lọ he ze ylando aihọn tọn yì.” (Johanu 1:29) Jesu kẹalọyi azọ́ndenamẹ lọ sọn ojlo mẹ wá. E dọmọ: “Yẹn ko jẹte sọn olọn mẹ wá, e ma yin nado wà ojlo ṣie gba, ṣigba ojlo ewọ he do mi hlan tọn.”—Johanu 6:38.

Ojlo Jiwheyẹwhe tọn ma yindọ Jesu ni “ze alindọn etọn jo taidi ofligọ de do ota mẹsusu tọn mẹ” kẹdẹ gba, ṣigba e nasọ basi alẹnu Ahọluduta tọn de hẹ hodotọ etọn lẹ. (Matiu 20:28; Luku 22:29, 30) Ahọluduta enẹ wẹ Jiwheyẹwhe na yizan nado hẹn lẹndai etọn na gbẹtọvi lẹ di. Owẹ̀n he gando Ahọluduta Jiwheyẹwhe tọn go nọ yin yiylọdọ “wẹndagbe” na e dohia dọ Jiwheyẹwhe ko ze gandudu he na penukundo whẹho aigba ji tọn lẹ go de dai to olọn mẹ!—Matiu 24:14; Daniẹli 2:44. d

Azọ́n Nuvọjlado Tọn lọ Gbẹ́ Zindonukọn

Whẹpo Jesu do hẹji yì olọn mẹ, e degbena hodotọ etọn lẹ dọmọ: “Mì . . . hẹn gbẹtọ lẹ sọn akọta lẹpo mẹ zun devi lẹ, bosọ nọ baptizi yé to oyín Otọ́ tọn, Visunnu tọn, po gbigbọ wiwe tọn po mẹ . . . Podọ, mì pọ́n! yẹn tin po mì po to azán lẹpo gbè kakajẹ vivọnu titonu lọ tọn.”—Matiu 28:19, 20.

Enẹwutu, vọjlado ninọmẹ gbẹtọvi lẹ tọn ma na fó to whenuena Jesu kú. E na zindonukọn kakajẹ “vivọnu titonu lọ tọn”—yèdọ ojlẹ he mẹ Ahọluduta Jiwheyẹwhe tọn na jẹ nukunpedo whẹho aigba ji tọn lẹ go ji te. Ojlẹ enẹ mẹ wẹ mí te todin. Mí yọ́n ehe na ohia he Jesu dọ dọdai etọn gando “vivọnu titonu lọ tọn” go lọ ko to hẹndi mọyi to alọnu din. e—Matiu 24:3-14; Luku 21:7-11; 2 Timoti 3:1-5.

To egbehe to aigba 236 ji, Kunnudetọ Jehovah tọn lẹ to tonusena gbedide Jesu tọn nado dọyẹwheho wẹndagbe Ahọluduta Jiwheyẹwhe tọn. Na nugbo tọn, linlinnamẹwe he hiẹ to hihia ehe yin awuwlena nado gọalọna we nado plọnnu dogọ gando Ahọluduta enẹ po nuhe e na wadotana lẹ po go. To weda 2tọ zinjẹgbonu Atọ̀họ̀-Nuhihọ́ lọ Tọn dopodopo tọn ji, hiẹ na mọ nudọnamẹ ehe: “Linlinnamẹwe ehe . . . nọ miọnhomẹna gbẹtọ lẹ po wẹndagbe lọ po dọ Ahọluduta Jiwheyẹwhe tọn, yèdọ gandudu de he ko to nuyiwa to olọn mẹ, na hẹn kanyinylan lẹpo wá opodo to madẹnmẹ bo na diọ aigba zun paladisi. E nọ na tuli gbẹtọ lẹ nado tindo yise to Jesu Klisti mẹ, mẹhe kú na mí nido sọgan mọ ogbẹ̀ madopodo bo ko sọ to gandu todin taidi Ahọlu Ahọluduta Jiwheyẹwhe tọn.”

E họnwun dọ, kakajẹ din hiẹ sọgan gbẹ́ nọ sè dogbọn mẹgbeyinyan nukunbianamẹtọ lẹ tọn po nugbajẹmẹji jọwamọ tọn lẹ po dali kavi a sọgan pehẹ nugbajẹmẹji mẹdetiti tọn de. Ṣigba Biblu pinplọn na hẹn we deji dọ Jiwheyẹwhe ma wọnji gbẹtọvi lẹ go. To vogbingbọn mẹ, “ewọ ma dẹn do dopodopo mítọn.” (Owalọ lẹ 17:27) Podọ opagbe etọn nado hẹn nuhe mẹjitọ mítọn tintan lẹ hẹnbu lẹ gọwá na mọ hẹndi.—Isaia 55:11.

[Nudọnamẹ odò tọn]

 [Yẹdide to weda 7]

(Na nudọnamẹ gigọ́, pọ́n linlinnamẹwe)

“Ohia Onú Jọnun lẹ Tọn”—Nuhe Gòhọtúntún lọ Nọtena

AGBÀ LỌ

Ojlo Jiwheyẹwhe tọn nado kẹalọyi avọ́sinsan Jesu tọn.—HEBLU LẸ 13:10-12.

YẸWHENỌ DAHO LỌ

Jesu.—HEBLU LẸ 9:11.

1 To Azán Ovẹsè tọn gbè, yẹwhenọ daho lọ nọ basi avọ́sinsan de na ylando gbẹtọ lẹ tọn.—LEVITIKU 16:15, 29-31.

1 To Nisan 14 owhe 33 W.M., Jesu yí ogbẹ̀ etọn do sanvọ́ do ota mítọn mẹ.—HEBLU LẸ 10:5-10; 1 JOHANU 2:1, 2.

OFI WIWE LỌ

Ninọmẹ Jesu he yin jiji gbọn gbigbọ dali tọn.—MATIU 3:16, 17; LOMUNU LẸ 8:14-17; HEBLU LẸ 5:4-6.

HỌMẸGBÒVỌ̀ LỌ

Agbasa Jesu tọn, nuhe gbò ogbẹ̀ aigba ji tọn po ogbẹ̀ olọn mẹ tọn po.—1 KỌLINTINU LẸ 15:44, 50; HEBLU LẸ 6:19, 20; 10:19, 20.

2 Yẹwhenọ daho lọ nọ biọ adà awetọ họmẹgbòvọ̀ he má Fiwiwe lọ po Fiwiwe Gbaugbau lọ po tọn mẹ.

2 To fọnsọnku etọn godo, Jesu ‘biọ adà awetọ họmẹgbòvọ̀ lọ tọn mẹ’ to whenuena e lẹkọyi olọn mẹ “nado sọawuhia . . . to Jiwheyẹwhe lọsu nukọn na mí.”—HEBLU LẸ 9:24-28.

FIWIWE GBAUGBAU LỌ

Olọn lẹ.—HEBLU LẸ 9:24.

3 To whenuena yẹwhenọ daho lọ ko biọ Fiwiwe Gbaugbau lọ mẹ wẹ e nọ húnhún ohùn avọ́sinsan lọ tọn vude do aki alẹnu tọn lọ nukọn.—LEVITIKU 16:12-14.

3 Gbọn nuhọakuẹ ohún etọn tọn zizedonukọnna Jiwheyẹwhe dali, Jesu wleawuna ovẹsè nujọnu tọn de na ylando mítọn lẹ—HEBLU LẸ 9:12, 24; 1 PITA 3:21, 22.