Mẹhe Nọ Hẹn Opagbe Etọn lẹ Di
Dọnsẹpọ Jiwheyẹwhe
Mẹhe Nọ Hẹn Opagbe Etọn lẹ Di
BE E nọ vẹawuna we nado dejido mẹdevo lẹ go ya? E blawu dọ jidide masọ tin to aihọn he mẹ mí to gbẹnọ te ehe mẹ ba. Eyin mẹhe go hiẹ dejido de gbleawuna we—vlavo gbọn lalodido dali kavi e ma hẹn opagbe he e do de di—hiẹ sọgan nọma dejidego ba. Ṣigba, mẹdevo de tin he go hiẹ sọgan dejido bọ e ma na hẹn we jẹflumẹ gbede. Howhinwhẹn lẹ 3:5 na mí tuli dọmọ: “Yí ayiha towe [lẹpo] do dotudo OKLUNỌ go.” Etẹwutu e jẹ dọ mí ni dotudo kavi dejido Jehovah go domọ? Nado na gblọndo na kanbiọ enẹ, mì gbọ mí ni gbadopọnna nuhe Jọṣua—yèdọ dawe de he deji mlẹnmlẹn do Jehovah go—dọ to Jọṣua 23:14 mẹ.
Lẹnnupọndo nuhe jọ to whenẹnu ji. Jọṣua he bọdo Mose go taidi nukọntọ Islaeli tọn dibla tindo owhe 110. To gbẹwhenu etọn, e ko yí nukun etọn lẹ do mọ azọ́n huhlọnnọ susu he Jehovah wà do Islaelivi lẹ tamẹ, ehe bẹ aliho jiawu he mẹ e whlẹn yé gán te gbọn Ohù Vẹẹ mẹ nudi owhe 60 jẹnukọn. Todin, Jọṣua lẹnnupọndo gbẹzan etọn ji bo basi oylọna “mẹho [Islaeli tọn] lẹ podọ na ogán yetọn lẹ, na whẹdatọ yetọn lẹ podọ na azọ́ngán yetọn lẹ.” (Jọṣua 23:2) Nuhe e dọna yé to enẹgodo lẹ ma do nuyọnẹn mẹhowhe tọn kẹdẹ hia gba, ṣigba yé dohia dọ e yí ahun etọn he gọna yise do lẹnayihamẹpọn na ojlẹ susu whẹpo do dọho.
“Azán ehe gbè yẹn jei aliho aihọn lẹpo tọn ji,” wẹ Jọṣua dọ. Hogbe lọ “aliho aihọn lẹpo tọn” yin hogbe yẹhiadonu tọn de he dlẹnalọdo okú. Na nugbo tọn, nuhe dọ Jọṣua te wẹ yindọ, “Azán vude janwẹ pò na mi.” Na Jọṣua yọnẹn dọ emi ma na dẹn do kú wutu, ayihaawe ma tin dọ e na ko yí whenu susu zan edeṣo nado lẹnnupọndo gbẹzan etọn ji. Ṣigba ohó godo tọn tẹlẹ wẹ e dọna sinsẹ̀n-basitọ hatọ etọn lẹ?
Jọṣua zindonukọn dọmọ: “Onú dopo ma gbòpò sọn onú dagbe he OKLUNỌ Jiwheyẹwhe mìtọn dọ gbọn mì dali lẹ de mẹ; popolẹpo wẹ ṣẹ hlan mì, onú dopo ma gbòpò to e mẹ gba.” Ohó ehelẹ dohia dọ e deji mlẹnmlẹn do Jiwheyẹwhe go. Etẹwutu? Jọṣua lẹnnupọndo nuhe e ko mọ lẹpo ji, bo mọdọ Jehovah nọ hẹn opagbe Etọn lẹ di—to whepoponu. a Nuhewutu Jọṣua do dọmọ họnwun: Ewọ jlo dọ Islaelivi hatọ etọn lẹ ni tindo jidide mlẹnmlẹn dọ opagbe he Jehovah do na yé na sọgodo lẹpo na mọ hẹndi.
Gando Jọṣua 23:14 go, owe he basi zẹẹmẹ do Biblu ji de dọmọ: “Basi kandai opagbe he tin to Biblu mẹ lẹpo tọn; enẹgodo gbadopọnna whenuho aihọn tọn; podọ kanse nudida he tin to aihọn mẹ lẹpo, eyin Jiwheyẹwhe gboawupo nado hẹn opagbe etọn dopo tata di kavi wọnji e go.” Eyin dodinnanu ehelẹ yọnbasi na mí wẹ, mí na wá tadona dopolọ kọ̀n taidi Jọṣua dọ Jehovah ma nọ gboawupo gbede nado hẹn opagbe etọn lẹ di.—1 Ahọlu lẹ 8:56; Isaia 55:10, 11.
Biblu bẹ opagbe Jiwheyẹwhe tọn he ko mọ hẹndi lẹ hẹn, gọna delẹ he to hẹndi mọ to gbẹwhenu mítọn. E sọ bẹ opagbe jiawu he Jehovah do gando sọgodo mítọn go lẹ hẹn ga. b Naegbọn hiẹ lọsu ma na gbadopọnna opagbe ehelẹ to Biblu mẹ? Biblu pinplọn sọgan hẹn we kudeji dọ mí dona dejido Jiwheyẹwhe, yèdọ Mẹhe nọ hẹn opagbe etọn lẹ di go.
[Nudọnamẹ odò tọn]
a Opagbe kavi ohó Jiwheyẹwhe tọn he mọ hẹndi to gbẹwhenu Jọṣua tọn delẹ die. Jehovah na Islaelivi lẹ aigba yetọn titi. (Yí Gẹnẹsisi 12:7 jlẹdo Jọṣua 11:23 go.) Jehovah tún akọta Islaeli tọn dote sọn Egipti. (Yí Eksọdusi 3:8 jlẹdo 12:29-32 go.) Jehovah penukundo omẹ etọn lẹ go.—Yí Eksọdusi 16:4, 13-15 jlẹdo Deutelonomi 8:3, 4 go.
b Na nudọnamẹ dogọ gando opagbe Jiwheyẹwhe tọn lẹ na sọgodo go, pọ́n weta 3, 7, po 8 po to owe lọ Etẹwẹ Biblu Plọn Mí Taun? mẹ, he Kunnudetọ Jehovah tọn lẹ zinjẹgbonu.