Dọnsẹpọ Jiwheyẹwhe

‘Jehovah E, Hiẹ Yọ́n Mi’

“NUHE nọ yin agbàn pinpẹn na mí hugan wẹ nado mọdọ mẹde ma to mítọn hòpọn kavi ma yọ́n nuhe mí to pipehẹ.” a Be hogbe ehelẹ gando gowe ya? Be hiẹ ko tindo numọtolanmẹ pọ́n dọ mẹde ma nọ hò towe pọ́n, yọ́n nuhe a to pipehẹ, kavi dọ a ma tindo mẹde wẹ ya? Eyin mọ wẹ, hogbe ehelẹ sọgan miọnhomẹna we: Jehovah nọ hò sinsẹ̀n-basitọ etọn lẹ tọn pọ́n sọmọ bọ e nọ doayi nuhe to jijọ to gbẹzan egbesọegbesọ tọn yetọn mẹ lẹ go. Hogbe Davidi tọn lẹ to Psalm 139tọ mẹ hẹn mí tindo nujikudo nugbo ehe tọn.

Na Davidi deji dọ Jiwheyẹwhe nọ hò emitọn pọ́n wutu, e dọmọ: “OKLUNỌ E, hiẹ ko dindona mi, bosọ yọ́n mi.” (Wefọ 1) Tofi, Davidi yí hogbe yẹhiadonu tọn dagbe de zan. Hogbe Heblu tọn he yin lilẹdo “dindona” sọgan dlẹnalọdo dòkunkun nado kùn gànmú jẹgbonu (Job 28:3), nado pọ́n ninọmẹ aigba de tọn (Whẹdatọ 18:2), kavi nado gbeje ninọmẹ voovo he lẹdo whẹho de he yin zize yì whẹdatẹn pọ́n (Deutelonomi 13:14). Mọwẹ, Jehovah yọ́n mí sọmọ bọ e taidi dọ e ko gbadopọnna adà gbẹzan mítọn tọn po nuhe lẹdo e lẹ po wẹ nkọ. Gbọn hogbe lọ “mi” yiyizan dali, Davidi to pinplọn mí dọ Jiwheyẹwhe tindo ojlo to devizọnwatọ etọn dopodopo mẹ. E nọ dindona yé bo nọ yọ́n mẹdopodopo.

Davidi dọho yinukọn dogọ gando lehe Jiwheyẹwhe nọ yí sọwhiwhe do dindona mí do go dọmọ: “Hiẹ yọ́n aisinsin ṣie po finfọnṣite ṣie po, hiẹ tunwun lẹndai ṣie to olá boboe.” (Wefọ 2) To linlẹn de mẹ, Jehovah to “olá boboe” to olọn lẹ mẹ. Etomọṣo, e nọ yọ́n whenue mí sinai, vlavo to vivọnu azán de tọn, podọ whenue mí fọ́n to afọnnu bo yì nuwiwa egbesọegbesọ tọn mítọn lẹ kọ̀n. E sọ yọ́n linlẹn, nuhudo, po ojlo ahun mẹ tọn mítọn lẹ po. Be Davidi dibu na Jehovah nọ dindona ẹn po sọwhiwhe po wutu wẹ ya? Lala, kakatimọ e biọ dọ Jehovah ni dindona emi. (Wefọ 23, 24) Naegbọn e do wàmọ?

Davidi yọnẹn dọ linlẹn dagbe wẹ Jehovah tindo nado nọ dindona devizọnwatọ Etọn lẹ po sọwhiwhe po. Davidi dlẹnalọdo linlẹn ehe to whenuena e wlan dọmọ: “Hiẹ dindona omọ́ji ṣie po aimimlọn ṣie po, bosọ yin mẹyọndòna aliho ṣie lẹpo.” (Wefọ 3) Egbesọegbesọ wẹ Jehovah nọ mọ ‘aliho mítọn lẹpo’—yèdọ nuṣiwa mítọn lẹ gọna azọ́n dagbe mítọn lẹ. Be adà ylankan lọ ji wẹ e nọ ze ayidonugo do ya kavi dagbe lọ? Hogbe Heblu tọn he yin lilẹdo “dindona” tofi sọgan zẹẹmẹdo nado “jàn” nude dile glesi lẹ nọ jàn likun lẹ nado mọ dagbe hugan lẹ yí do. Hodidọ lọ “yin mẹyọndòna” wá sọn hogbe Heblu tọn de mẹ he sọgan zẹẹmẹdo “nado yí nukun nujọnu tọn do pọ́n.” Eyin Jehovah dindona nuhe sinsẹ̀n-basitọ etọn lẹ dọ bo wà to azán dopodopo ji, e nọ yí nukun họakuẹ do pọ́n dagbe he to e mẹ lẹ. Etẹwutu? Na e nọ yí nukun nujọnu tọn do pọ́n vivẹnudido yetọn nado hẹn homẹ etọn hùn.

Psalm 139tọ plọn mí dọ Jehovah nọ hò sinsẹ̀n-basitọ etọn lẹ tọn pọ́n taun. E nọ dindona yé bo nọ to pinpọn yé to nuwiwa egbesọegbesọ tọn yetọn lẹ kọ̀n. Gbọnmọ dali, e yọ́n nuhahun he yé to pipehẹ, podọ e yọ́n awufiẹsa ahun mẹ tọn he nuhahun ehelẹ sọgan hẹnwa. Be ehe ma whàn we nado sẹ̀n Jiwheyẹwhe he nọ hò mẹtọn pọ́n ehe ya? Eyin mọ wẹ, a sọgan deji dọ: Jehovah ma na ‘wọn azọ́n towe po owanyi he a dohia na oyín etọn po’ gbede.—Heblu lẹ 6:10.

[Nudọnamẹ odò tọn]