Plọnnu sọn Ohó Jiwheyẹwhe Tọn Mẹ

Nawẹ Hiẹ Sọgan Yọ́n Sinsẹ̀n Nugbo Gbọn?

Hosọ ehe fọ́n kanbiọ he hiẹ sọgan ko nọ kanse lẹ dote bo do fihe hiẹ sọgan mọ gblọndo lọ lẹ te to Biblu mẹ hia. Homẹ Kunnudetọ Jehovah tọn lẹ tọn na hùn nado dọhodopọ hẹ we do gblọndo ehelẹ ji.

1. Be sinsẹ̀n nugbo dopo gee wẹ tin ya?

Sinsẹ̀n dopo gee wẹ Jesu plọn devi etọn lẹ, yèdọ sinsẹ̀n nugbo lọ. E taidi aliho de he nọ planmẹ yì ogbẹ̀ mẹ. Jesu dọ gando aliho enẹ go dọmọ: “Vude sọ wẹ mẹhe to dindin in mọ lẹ.” (Matiu 7:14) Jiwheyẹwhe nọ kẹalọyi sinsẹ̀n-bibasi he sinai do Ohó nugbo etọn kẹdẹ ji. Yise dopolọ wẹ sinsẹ̀n-basitọ nugbo lẹpo tindo.—Hia Johanu 4:23, 24; 14:6; Efesunu lẹ 4:4, 5.

2. Naegbọn sinsẹ̀n susu nọ sọalọakọ́n dọ emi yin Klistiani?

Yẹwhegán lalo lẹ ko hẹn sinsẹ̀n Klistiani tọn flu bo ko yí i zan nado dín ale yetọn titi lẹ. Dile Jesu dọ dọdai do, yé nọ do yede hia taidi “lẹngbọ” etọn lẹ ṣigba yé nọ yinuwa taidi ohla he huvẹ to hùhù. (Matiu 7:13-15, 21, 23) Sinsẹ̀n Klistiani lalo tọn lẹ wá gbayipe titengbe to okú apọsteli Jesu tọn lẹ tọn godo.—Hia Owalọ lẹ 20:29, 30.

3. Etẹwẹ yin delẹ to nuhe nọ dohiagona sinsẹ̀n nugbo lẹ mẹ?

Sinsẹ̀n-basitọ nugbo lẹ nọ na sisi Biblu taidi Ohó Jiwheyẹwhe tọn. Yé nọ dovivẹnu nado nọgbẹ̀ sọgbe hẹ nujinọtedo etọn lẹ. Enẹwutu, sinsẹ̀n nugbo gbọnvo na sinsẹ̀n he sinai do linlẹn gbẹtọvi tọn lẹ ji. (Matiu 15:7-9) Sinsẹ̀n-basitọ nugbo lẹ ma nọ dọyẹwheho nude tọn bo nọ wà nudevo gba.—Hia Johanu 17:17; 2 Timoti 3:16, 17.

Sinsẹ̀n nugbo lọ nọ gbògbéna yinkọ Jiwheyẹwhe tọn, Jehovah. Jesu hẹn yinkọ Jiwheyẹwhe tọn zun yinyọnẹn. E gọalọna gbẹtọ lẹ nado yọ́n Jiwheyẹwhe bo plọn yé nado nọ hodẹ̀ dọ yinkọ Jiwheyẹwhe tọn ni yin kinklando wiwe. (Matiu 6:9) Sinsẹ̀n tẹwẹ nọ yí yinkọ Jiwheyẹwhe tọn zan to lẹdo towe mẹ?—Hia Johanu 17:26; Lomunu lẹ 10:13, 14.

 4. Nawẹ hiẹ sọgan yọ́n sinsẹ̀n-basitọ nugbo lẹ gbọn?

Klistiani nugbo lẹ nọ dọyẹwheho gando Ahọluduta Jiwheyẹwhe tọn go. Jiwheyẹwhe do Jesu hlan nado dọyẹwheho Ahọluduta lọ tọn. Ahọluduta Jiwheyẹwhe tọn wẹ todido dopo gee lọ na gbẹtọvi lẹ. Jesu dọyẹwheho gandego kakajẹ azán he gbè e kú. (Luku 4:43; 8:1; 23:42, 43) E dọna hodotọ etọn lẹ nado nọ dọyẹwheho Ahọluduta Jiwheyẹwhe tọn. Eyin mẹde dọnsẹpọ we nado dọho gando Ahọluduta Jiwheyẹwhe tọn go, hagbẹ sinsẹ̀n tẹ tọn wẹ ewọ na ko yin?—Hia Matiu 10:7; 24:14.

Hodotọ Jesu tọn lẹ ma yin apadewhe aihọn ylankan ehe tọn. Yé ma nọ tindo mahẹ to tonudidọ po nudindọn lẹ po mẹ. (Johanu 17:16) Mọdopolọ, yé ma nọ hodo aṣa po nuyiwa ylankan aihọn lọ tọn lẹ po.—Hia Jakọbu 1:27; 4:4.

5. Etẹwẹ yin ohia tangan sinsẹ̀n Klistiani nugbo tọn?

Klistiani nugbo lẹ nọ tindo owanyi nujọnu tọn na ode awetọ. Sọn Ohó Jiwheyẹwhe tọn mẹ, yé nọ plọn nado na sisi gbẹtọ akọ̀ voovo lẹpo tọn. Dile etlẹ yindọ sinsẹ̀n lalo lẹ nọ saba nọgodona awhàn akọta lẹ tọn, sinsẹ̀n-basitọ nugbo lẹ nọ gbẹ́ nado wàmọ. (Mika 4:1-4) Humọ, hagbẹ sinsẹ̀n nugbo lọ tọn lẹ nọ gbọn ṣejannabi matindo dali yí whenu po nutindo yetọn lẹ po zan nado gọalọ bosọ na tuli mẹdevo lẹ.—Hia Johanu 13:34, 35; 1 Johanu 4:20, 21.

Hagbẹ sinsẹ̀n tẹ tọn lẹ wẹ nọ ze nuplọnmẹ yetọn sinai do Ohó Jiwheyẹwhe tọn ji, nọ gbògbéna yinkọ Jiwheyẹwhe tọn bo nọ lá Ahọluduta Jiwheyẹwhe tọn taidi todido dopo gee na gbẹtọvi lẹ? Hagbẹ sinsẹ̀n tẹ tọn lẹ wẹ nọ yiwanna yedelẹ bo ma nọ nọgodona awhàn? Kunnudenu lẹ dohia dọ Kunnudetọ Jehovah tọn lẹ wẹ.—1 Johanu 3:10-12.

Na nudọnamẹ dogọ, pọ́n weta 15 owe Etẹwẹ Biblu Plọn Mí Taun? tọn, he Kunnudetọ Jehovah tọn lẹ zinjẹgbonu.

[Yẹdide to weda 16]

“Yé lá to gbangba dọ yé yọ́n Jiwheyẹwhe, ṣigba yé mọ́n ẹn gbọn azọ́n yetọn lẹ dali.”—Titu 1:16