Ogán Whiwhla Aihọn Tọn Yin Didehia

JESU dọna gbẹtọ lẹ to nujijọ de whenu dọmọ: “Ogán aihọn ehe tọn na yin yinyan jẹgbonu.” To godo mẹ, e yidogọ dọ ‘ogán aihọn tọn ma tindo huhlọn do emi ji’ podọ “ogán aihọn ehe tọn ko yin whẹdana.” (Johanu 12:31; 14:30; 16:11) Mẹnu hodọ wẹ Jesu te?

Eyin mí lẹnnupọndo nuhe Jesu dọ gando “ogán aihọn ehe tọn” go ji, e họnwun dọ ewọ ma to alọdlẹndo Otọ́ etọn, Jehovah Jiwheyẹwhe gba. To whelọnu lo, mẹnu wẹ yin “ogán aihọn ehe tọn”? Nawẹ e na yin “yinyan jẹgbonu” gbọn, podọ nawẹ e ko yin “whẹdana” gbọn?

“Ogán Aihọn Ehe Tọn” De Ede Hia

Kẹdẹdile danuwatọ akonka de nọ to kikla na huhlọn he e tindo wutu do, mọ wẹ Lẹgba wà do to whenue e whlé Jesu, Visunnu Jiwheyẹwhe tọn pọ́n. To whenue Satani ko do “ahọluduta [aihọn tọn] lẹpo” hia Jesu godo, e dọna ẹn dọmọ: “Yẹn na na we aṣẹpipa ehe lẹpo po gigo yetọn po, na yé ko yin zizedo alọmẹ na mi, podọ mẹdepope he jlo mi wẹ yẹn na yí i na. Enẹwutu, eyin hiẹ basi sinsẹ̀n whladopo to nukọn ṣie, popolẹpo na lẹzun towe.”—Luku 4:5-7.

Eyin Lẹgba yin linlẹn ylankan de poun to gbẹtọvi lẹ mẹ dile mẹdelẹ nọ lẹn do, nawẹ whlepọn enẹ sọgan yin zẹẹmẹ basina gbọn? Be ojlo kavi linlẹn ylankan he sọgan ko fọ́n to baptẹm Jesu tọn godo delẹ wẹ to whiwhle e pọ́n ya? Eyin mọ wẹ, na e sọgan yin didọ do dọ “ylando de ma tin to ewọ mẹ”? (1 Johanu 3:5) Jesu ma gbẹ́ dọ Lẹgba tindo huhlọn do gbẹtọvi lẹ ji gba, kakatimọ e zinnudo ehe ji to whenue e dọho gando ewọ go taidi “ogán aihọn tọn,” bo do e hia taidi “hlọnhutọ de” podọ “lalonọ de.”—Johanu 14:30; 8:44.

To owhe 60 godo he Lẹgba whlé Klisti pọ́n, apọsteli Johanu flinnu Klistiani lẹ gando huhlọn nuyiwadomẹji tọn Lẹgba tọn go bo dọ dọ “aihọn lọ pete tin to huhlọn mẹylankan lọ tọn glọ.” Johanu sọ dọ dọ, omẹ enẹ dopolọ “nọ to aigba fininọ lẹpo klọ.” (1 Johanu 5:19; Osọhia 12:9) Biblu dọ hezeheze dọ nudida gbigbọnọ de yin “ogán aihọn tọn.” Ṣigba, obá tẹ mẹ wẹ e nọ yinuwado gbẹtọvi lẹ ji jẹ?

Ogán Aihọn lọ Tọn Má Aṣẹpipa Na Gbẹdohẹmẹtọ Etọn Lẹ

Apọsteli Paulu do kẹntọ Klistiani lẹ tọn hia hezeheze to whenue e to wekan gando avùnhiho yetọn na yise lọ go. E dọ madoadúdẹji dọmọ: “Ahididi he mí tindo, ma yin sọta ohùn po agbasalan po, ṣigba sọta gandudu lẹ, sọta aṣẹpipa lẹ, sọta ogán aihọn zinvlu ehe tọn lẹ, sọta huhlọn gbigbọ ylankan olọn tọn lẹ.” (Efesunu lẹ 6:12) Enẹwutu, avùnhiho ehe zẹ̀ nugopipe gbẹtọvi tọn go, na e nọ wá aimẹ e “ma yin sọta ohùn po agbasalan po” gba, ṣigba sọta “huhlọn gbigbọ ylankan” lẹ.

Sọgbe hẹ suhugan lẹdogbedevomẹ Biblu tọn agọe tọn lẹ, “huhlọn gbigbọ ylankan” lẹ tofi dlẹnalọdo nudida gbigbọnọ ylankan huhlọnnọ lẹ, e ma yin ayilinlẹn ylankan de gba. Lẹdogbedevomẹ Biblu tọn delẹ yí hogbe delẹ zan taidi “nutogbẹ̀ gbigbọnọ lẹ to otẹn he tin to olọn lẹ mẹ” (Biblu Wiwe Lọ Gun Alada), “awhànpa gbigbọ ylankan lẹ tọn to olọn lẹ mẹ” (La Bible de Jérusalem), podọ “gbigbọ ylankan lẹ he tin to olọn lẹ mẹ” (TOB). Lẹgba nọ yí aṣẹpipa etọn zan  gbọn angẹli atẹṣitọ devo he jo “nọtẹn he jẹna yé” do to olọn mẹ lẹ gblamẹ.—Juda 6.

Owe Daniẹli tọn to Biblu mẹ do lehe “ogán aihọn” tọn ehelẹ ko to anadena nujijọ aihọn lọ tọn sọn hohowhenu do hia. Na onú Juvi hatọ he lẹkọ sọn kanlinmọgbenu to Babilọni yì Jelusalẹm to 537 J.W.M. lẹ tọn to ahunmẹduna yẹwhegán Daniẹli wutu, e hodẹ̀ do ota yetọn mẹ na osẹ atọ̀n. Angẹli he yin didohlan gbọn Jiwheyẹwhe dali nado vọ́ jide na yẹwhegán lọ dọ nuhewutu wiwá etọn do dẹn na ẹn. E dọmọ: “Ahọvi sọn ahọludu Pẹlsia tọn mẹ gbòalina mi azán ko-nukundopo.”—Daniẹli 10:2, 13.

Mẹnu wẹ ‘ahọvi Pẹlsia tọn’ ehe? E họnwun dọ, angẹli lọ ma to alọdlẹndo Ahọlu Kilusi Pẹlsia tọn he do nukundagbe hia Daniẹli po omẹ etọn lẹ po to ojlẹ enẹ mẹ. Humọ, nawẹ ahọlu he yin gbẹtọvi tata de sọgan diahi hẹ nudida gbigbọnọ de na osẹ atọ̀n do, to whenuena e yindọ angẹli dopo wẹ và awhànfuntọ huhlọnnọ 185 000 sudo to zánto dopo mẹ? (Isaia 37:36) ‘Ahọvi Pẹlsia tọn’ ylankan ehe ma sọgan yin mẹde hugan devizọnwatọ Lẹgba tọn de, yèdọ aovi de he yin dide nado deanana gandudu Ahọluigba Pẹlsia tọn. To godo mẹ to kandai lọ mẹ, angẹli Jiwheyẹwhe tọn lọ dọ dọ emi gbẹ́ to dandannu glọ nado hoavùn sọta “ahọvi Pẹlsia tọn” podọ hẹ aovi devo he yin ‘ahọvi Glẹki tọn.’—Daniẹli 10:20.

Etẹwẹ mí sọgan plọn sọn ehe mẹ? Ehe dohia poun dọ “ogán aihọn” tọn he ma sọgan yin mimọ lẹ tin nugbonugbo, yèdọ aovi he yin ahọvi lẹ he to anadena aihọn lọ to aṣẹpipa ogán yetọn, Satani Lẹgba tọn glọ. Ṣigba, etẹwẹ yin yanwle yetọn kakajẹ din?

Ogán Aihọn Tọn Do Mẹhe E Yin Na Taun Tọn Hia

To owe godo tọn Biblu tọn, Osọhia mẹ, apọsteli Johanu dọ lehe Jesu, taidi Mikaẹli angẹligán lọ, gbawhàn Lẹgba po aovi etọn lẹ po tọn do gọna nujijọ ylankan he wá aimẹ to whenue yé yin yinyan sọn olọn mẹ godo. Mí hia dọmọ: “Dindọn na aigba . . . na Lẹgba ko jẹte wá mì dè, po homẹgble daho po, na e yọnẹn dọ whenu gli de wẹ emi tindo wutu.”—Osọhia 12:9, 12.

Nawẹ Lẹgba do homẹgble daho hia gbọn? Kẹdẹdile danuwatọ akonka susu nọ jlo nado wà nudepope he e biọ nado jẹ yanwle yetọn kọ̀n do, mọdopolọ wẹ Lẹgba po aovi etọn lẹ po ko magbe nado hẹn aigba po mẹhe to e ji lẹ po nado yin vivasudo to pọmẹ hẹ yé do niyẹn. Na Lẹgba yọnẹn dọ whenu vude wẹ pò na emi wutu, e to adà titengbe titonu gbẹtọvi lẹ tọn he tin to anademẹ etọn glọ—yèdọ ajọwiwa daho—yizan nado nọgodona gbigbọ nuhihọ̀ zẹjlẹgo tọn, ehe nọ zọ́n bọ adọkunnu jọwamọ tọn lẹ nọ yin vivasudo bọ ninọmẹ lẹdo tọn nọ yin hinhẹngble lẹdo aihọn pé, bo nọ gbọnmọ dali ze gbẹninọ gbẹtọvi lẹ tọn do owù mẹ.—Osọhia 11:18; 18:11-17.

Sọn bẹjẹeji whenuho gbẹtọvi tọn gbọ́n, ojlo vẹkuvẹku Lẹgba tọn nado dugán sọ nọ yin didohia gbọn tonudidọ po sinsẹ̀n po gblamẹ. Owe Osọhia tọn do huhlọn tonudidọ tọn lẹ hia taidi gbekanlin he Lẹgba ko na “aṣẹpipa daho.” E sọ basi zẹẹmẹ gbekọndopọ he tin to tonudọtọ lẹ po sinsẹ̀n po ṣẹnṣẹn tọn taidi ayọdide gbigbọmẹ tọn he hiọawu de. (Osọhia 13:2; 17:1, 2) Yí nukun homẹ  tọn do pọ́n kọgbidinamẹ, kanlinmọgbenu ninọ, awhàn, po nudindọn akọta tọn lẹ po he ko zọ́n bọ ogbẹ̀ gbẹtọ livi susu tọn yin hinhẹnbu to owhe kanweko lẹ gblamẹ. Be mẹdepope sọgan dọ po ahundopo po dọ nujijọ dobu mẹhẹnjọsi tọn he ko wá aimẹ to whenuho gbẹtọvi tọn mẹ lẹ yin kọdetọn nuwiwa jọwamọ tọn gbẹtọvi lẹ tọn ya? Kavi be nuyiwadomẹji huhlọn gbigbọ ylankan mayinukundomọ lẹ tọn wẹ?

Biblu do mẹhe nọ deanana nukọntọ gbẹtọvi lẹ tọn po huhlọn aihọn tọn lẹ po hia hezeheze bosọ hùngona ẹn. Vlavo yé yọnẹn wẹo kavi lala, gbẹtọvi lẹ nọ do gbẹtọ-yinyin ogán yetọn tọn gọna ojlo etọn nado wà nudepope he e biọ nado jẹ yanwle etọn kọ̀n hia. Ṣigba, nawẹ gbẹtọvi lẹ na jiya to gandudu Lẹgba tọn glọ dẹnsọ?

Nuhe Na Jọ Do Lẹgba Go to Madẹnmẹ

Nuwiwa Klisti tọn to aigba ji to owhe kanweko tintan whenu dohia dọ Lẹgba po aovi etọn lẹ po na yin kúnsúdona to madẹnmẹ. To whenue devi Jesu tọn lẹ dọ lehe yé yàn aovi lẹ jẹgbonu do na ẹn, e dọna yé dọmọ: “Yẹn jẹ mimọ ji bọ Satani flẹ taidi abì sọn olọn.” (Luku 10:18) Po hogbe enẹlẹ po, Jesu jaya na awhàngbigba sọgodo tọn etọn do ogán aihọn tọn ji, ehe na wá aimẹ to whenue e na lẹkọyi olọn mẹ godo taidi Mikaẹli angẹligán lọ. (Osọhia 12:7-9) Dọdai Biblu tọn lẹ pinplọn po sọwhiwhe po dohia dọ awhàngbigba ehe wá aimẹ to olọn mẹ to 1914 kavi ojlẹ kleun de to enẹgodo. a

Sọn owhe enẹ mẹ gbọ́n, Lẹgba yọnẹn dọ ojlẹ vude wẹ pò whẹpo emi nado yin vivasudo. Dile etlẹ yindọ ‘aihọn lọ pete tin to huhlọn etọn glọ,’ e ma ko penugo nado doyẹklọ gbẹtọ livi susu delẹ gbọn yanwle etọn nado deanana yé dali. Biblu ko gọalọna yé nado yọ́n mẹhe ewọ yin po ayiha wintinwintin etọn lẹ po. (2 Kọlintinu lẹ 2:11) Yé nọ mọ todido sọn hogbe Paulu tọn hlan Klistiani hatọ lẹ mẹ dọmọ: “Jiwheyẹwhe he nọ namẹ jijọho na gídí Satani to afọ mìtọn lẹ glọ to madẹnmẹ.” b—Lomunu lẹ 16:20.

To madẹnmẹ, Lẹgba na yin hinhẹn biọ ninọmẹ nude ma yiwà tọn mẹ! To gandudu owanyi tọn Klisti tọn glọ, dodonọ lẹ na diọ aigba zun paladisi. Danuwiwa, wangbẹna, po nukunkẹn po ma nasọ tin gbede ba. “Yè ma na flin [onú] hoho tọn” lẹ ba, wẹ Biblu dọ. (Isaia 65:17) Kọgbọ nankọ die ehe na yin na mẹhe tlú yede sọn ogán whiwhla aihọn ehe tọn po aṣẹpipa etọn po si lẹ!

[Nudọnamẹ odò tọn]

[Nudọnamẹ tangan lẹ to weda 5]

To gandudu owanyi tọn Klisti tọn glọ, dodonọ lẹ na diọ aigba zun paladisi