HIẸ na yigbe dọ onú titengbe wẹ e yin nado nọ gbọṣi nukle to wehọmẹ. Wehọmẹvi susu wẹ nọ sà amlọngọ to klasi, ṣigba nado plọnnu, hiẹ dona gbọṣi nukle. Vlavo a nọ yì opli Klistiani tọn lẹ ga, fie a nọ plọn Biblu te.

Etẹwẹ a lẹndọ emi sọgan wà nado nọ gbọṣi nukle?— * Onú dopo he a sọgan wà wẹ nado nọ yawu mlọnai to zánmẹ. Amlọn whèmẹ tọn didọ sọgan sọ gọalọ. Gbọ mí ni pọ́n nuhe apajlẹ jọja sunnu de he damlọn to whenue apọsteli Paulu to hodidọ de na to zánhomẹ tọn plọn mí. Hùn owe Owalọ lẹ tọn, weta 20, wefọ 7 jẹ 12 to Biblu mẹ, bo pọ́n nuhe jọ lọ.

Paulu to agun he tin to tòdaho bato-glintẹn Tloa tọn dlapọn. Biblu dọ dọ Paulu na do tọjihun nado ‘yì to aihọngbè.’ Enẹwutu, “e sọ dlẹnkanna hodidọ etọn kakajẹ zánhomẹ.” Mí hia dọmọ: “Jọja sunnu de he nọ yin Eutiku sinai to fleṣe nù bo damlọn yìkànmẹ dile Paulu to hodọ.” Etẹwẹ jọ bọdego?—

Eutiku flẹ jai gbọn fleṣe lọ nù “sọn petlezìn aga atọ̀nnọ ji.” Paulu po mẹdevo lẹ po họ̀nwezun wá odò po awuyiya po. Oṣiọ Eutiku tọn wẹ yé wá mọ to kọmẹ! Be a sọgan mọ obá he mẹ yé na ko blawu jẹ ya?— Biblu dọ dọ Paulu ze Eutiku do awà etọn lẹ mẹ bo gbò e fán. Ojlẹ kleun de godo, Paulu dawhá po ayajẹ po dọmọ: ‘Mì hanú blo, e ko jẹgangan!’ Jiwheyẹwhe ko gọ̀ Eutiku wá ogbẹ̀!

Etẹwẹ mí sọgan plọn gando Jiwheyẹwhe go sọn nuhe jọ do Eutiku go mẹ?— Onú dopo wẹ yindọ, Jehovah, Otọ́ olọn mẹ tọn mítọn,  sọgan gọ̀ oṣiọ lẹ wá ogbẹ̀, etlẹ yin jọja lẹ lọsu. Jehovah yọ́n we bosọ yiwanna we, mọwẹ, ewọ tlẹ yiwanna we hugan lehe mẹjitọ towe lẹ yiwanna we do. To whenue Jesu tin to aigba ji, e bẹ ovivu lẹ do awà etọn lẹ mẹ bo dona yé; gbọnmọ dali e do mẹhe nkọ Otọ́ etọn yin hia. E sọ fọ́n jọja lẹ sọnku ga, etlẹ yin viyọnnu owhe 12 mẹvi de.

Etẹwẹ yin numọtolanmẹ towe nado yọnẹn dọ Otọ́ olọn mẹ tọn towe yiwanna we?— Mọwẹ, enẹ nọ whàn mílọsu lẹ nado yiwanna Jehovah bo setonuna nuhe E dọ lẹ. Be a yọ́n lehe mí sọgan dohia dọ mí yiwanna Ẹn do ya?— Aliho dopo wẹ nado nọ dọ ẹ na ẹn tlọlọ. Jesu dọmọ: “Yẹn yiwanna Otọ́.” Ṣigba Jesu wà nususu hugan nado dọ poun dọ emi yiwanna Jiwheyẹwhe. E do e hia to nuyiwa etọn lẹ mẹ.

Jesu setonuna Jiwheyẹwhe. “Yẹn nọ wà nuhe nọ hẹn homẹhun in lẹ to whepoponu,” wẹ Jesu dọ. Enẹwutu, eyin mí nọ wà nudopolọ, nado hẹn homẹ Jehovah po Visunnu etọn po tọn hùn, mí na wà nuhe go mí pé lẹpo nado gbọṣi nukle to whenue e jẹ dọ mí ni wàmọ.